Ijeremaya 11
11
Ijuda ọnịrị Isirẹrị ệ raà jịnẹ oto Ẹnẹyịmavara
1Ẹnẹyịmavara ộ kà a yị Ijeremaya ka: 2Ọ̀ wụ́ ịrẹyị ẹnị ẹnị ka ọnị dọ beri ẹngụ tụ ịnị anị. Ọ kà ọ̀ kà a yị Anijuda ọnịrị Anijerusarẹmị nịnị ka 3Ọnị Ẹnẹyịmavara, Ohomorihi Anisirẹrị. O ree chì hị́ avaba aza ẹnẹ ẹ yị saasa ịrẹyị ọnị ẹnị dọ beri ẹngụ tụ ịnị anị. 4Ịrẹyị ọnị ọnị mẹ ọda anị yị ohiku ẹnịnị ọnị mẹ kụ wa hụrị ẹtẹ Ijipiti ọ vị ọnọọ nị. Ẹtẹ Ijipiti vị ana sị mẹẹ anka arasị ịrịịra avọọ yị wa. Ọnị ộ kà a yị wa ka ẹ wụ́ chire ọnị dị ẹẹ mẹ avaba ịsị ọnị mẹ ọda anị yị wa. Ọnị ka ẹnịnị vaa vị aza anị, dị ọnị vị Ohomorihi ẹnịnị. 5Ọ kà ịjị ọnọọ, ọnị vaa mẹ ịsị ọnị hị́ eku anị yị ohiku ẹnịnị, ka ọnị vaa sị ẹtẹ ịzị ịsụpa ẹnịnị ọnịrị ịsa ịnị aarẹ ẹnịnị vaa ha dị ẹ yaa mẹ ẹtẹẹtẹrẹ yị wa. Ẹtẹ ọnọọ ẹnịnị yà ịnị aanị nị. Dị Ijeremaya tụ́ ohi ka, Ẹnẹyịmavara, ọ̀ vavọọ ya (aamị). 6Ijeremaya ka, dị Ẹnẹyịmavara kà a yị ọnị ka, ọnị ọ̀ nọ ẹkụra ene hi Ijuda ọnịrị utoze-utoze Ijerusarẹmị dị ọnị ọ̀ naa nọ̀ọ avaba ịrẹyị ọnọnị yị wa nị. Ọ ka ọnị kà a yị wa ka ẹnịnị ẹ̀ wụ́ ịrẹyị ọnị ẹnị dọ beri ẹngụ tụ ịnị anị dị ẹnịnị ẹ̀ saasa a. 7Ẹnẹyịmavara kà, ọnị mẹ kụ ohiku ẹnịnị hụrị Ijipiti ọnị ộ kà wa ọnọ ẹtẹẹtẹrẹ ka ẹnịnị ẹẹ saasa ịrẹyị anị. Vị va ngụ ajịnị vị ọnị ọnị aa kịị kà wa ọnọọ. 8Ama ẹnịnị ẹ yị wụ́ chire ọnị. Ẹnịnị ẹ yị wụ́ ịrẹyị anị. Dị ahịka ịsị ayị ọzọza ọọ ka yị wa kẹnẹ ẹ yaa saasa nị. Ayị ẹnịnị ọọ katẹngụ, avọọ o me divi nị. Ọ kà ọnị ộ kà a yị wa ka ẹnịnị ẹ̀ sị ụvọ za ịrẹyị ọnị ẹnị dọ beri ẹngụ tụ ịnị aanị ama ẹnịnị ê yi. Avọọ, ọnị aa sị avaba ụya ana ya ịnị anịị rị wa nị. 9Ijeremaya ka Ẹnẹyịmavara ộ rẹ kà a yị ọnị ka, Anijuda ọnịrị Anijerusarẹmị nịnị aa gẹ eyi ọyị kwẹẹtẹ tụ ọnị, Ẹnẹyịmavara. 10Ẹnịnị ẹ sị varẹma naa mẹ̀ ebira odivi ohiku ẹnịnị. Ohiku ẹnịnị ẹ yị saasa ịrẹyị anị. Ẹnịnị ẹ́ naa hẹkẹ ori ọsa. Anisirẹrị ọnịrị Anijuda nịnị ẹ raa sị ahụ jịnẹ eku ọnị ọnịrị ohiku ẹnịnị mẹ. 11Ẹnẹyịmavara kà agụvị avọọ, ọnị vee vu wa ẹtẹ ọnị ẹnịnị ẹ yị vaa ha hụụnị anị. Ẹnịnị ẹẹ nowu ka ọnị ọ gụ ẹnị ụvọ, ọnị e yi vee tụ́ ohi. 12Ịjọnọọ Anijuda ẹnịrị Anijerusarẹmị vị anaa hị́ ori ẹnẹ ẹ yaa mẹ̀ ịsọvọ yị ka ẹ̀ gụ ẹnị ụvọ, ama ori ẹnẹẹ ẹ yị va zụụ dọ wa ha ịjị ẹngụkata oo tu wa. 13Ẹnẹyịmavara kà, ẹwụ nịnị Anijuda, avaba ẹkụra awụ nịnị vị ana kụkụ nyị ori ẹnịnị. Avaba oze ene hi Ijerusarẹmị vị ẹnị ẹnị re hi ụta hi. Ịnị ụta ẹnẹẹ ẹ yaa mẹ̀ ịsọvọ yị ori ana aā hị́ Ịbaarị nị. Ori ọnọọ vị anaa nyị ọza ịhyẹrẹ. 14Ọ kà, agụvị avọọ, asị ọnị Ijeremaya hụvị aza ẹnẹnị mẹ̀ aduwa; asị ọnị dá ịpẹ yị ọnị agụvị ẹnịnị, agụvị ka ọnị ẹ yị vaa wụ̀, ẹnịnị ẹẹ hị́ ọnị ịnị ụmẹ akanya ẹnịnị. 15Ẹnẹyịmavara kà, sị aza ọnị ọnị sì ịrẹyị anị aa mẹ ini irehi anị, ịrẹma ẹnị ẹ na raa mẹ ịsị edivi-edivi ẹnịnị? Vị eku ẹnị ẹ yaa hị́ ọnịrị ịsụpa ẹnị ẹ yaa sị mẹ̀ ịsọvọ waa zụ za wa ka asị ẹ rị ụya nị? Ẹnẹnị waa zụ mẹ ka waa jẹ nịnị nị? 16Ọ kà, ọnị ộ vịdị hị́ wa ọchị orivi avị-avị da, dị ọ tụ ẹtụtụ ozoza-ozoza nị. Ama booro aanị, ọnị vaa sụrẹyị anka apaapa ihinẹba avọọ, ọnị vaa jị ịraa da a, dị ọnị che avaba avọ anị ha. 17Ọnị Ẹnẹyịmavara Ochẹtẹẹngụ ene chire wu nịnị, ọ sị ọ ka ka vị ọnị ee vu wu nịnị ẹtẹ nị agụvị ebira odivi ọnị ẹwụ nịnị Anisirẹrị ọnịrị Anijuda aa mẹ nịnị. Ọ kà wa sị ayị mẹ kụ ọnị nịnị agụvị ka wa naa mẹ̀ ịsọvọ yị Ịbaarị nịnị. 18Ijeremaya ka Ẹnẹyịmavara ộ sị zụ ọnị ka ọnị ọ̀ yẹ ka ọnịvị anị nịnị aa geyi anị. 19Ama ọnị vị ana sị mẹẹ anka ozi atẹmẹ ana a sị ka à na wụ avọọ. Ọnị ẹ yị yẹ ka ọnị ẹ yaa geyi anị nị. Ẹ yaa kà a ka: à jẹẹ ẹnị du ọchị ọnọnị ha beri ẹtụtụ anị à jẹẹ ẹnị ẹ wụ ọ dị asị a kụkụ tamayị ịrẹha anị. 20Dị Ijeremaya ka, ẹwụ Ẹnẹyịmavara Ochẹtẹẹngụ, ẹwụ aa mẹ̀ ọkarẹyị ọ mẹ vọrọ nị. Ẹwụ zama ayị ọza ọnịrị ivehu ọzaa re nị. Ọ̀ na ọ̀ họ̀ oponu ịrẹyị anị ịrẹsụ aza ẹnẹnị dị ọnị ò ree, Ẹnẹyịmavara ọnị sị ịrẹyị anị chire ụvọ nị o. 21Avọọ dị Ẹnẹyịmavara kà yị ọnị ka, aza ene hi Anatọtị ee sị ọnị isu, dị ẹ ka asị ọnị vana vaa kụ tụ Ẹnẹyịmavara yị ẹnị, ka ẹyịvavọọ vị ẹnị aa wụ ọnị nị. 22Ọnị vaa sị ụya rị wa. Ezwọọmụha ẹnịnị vị ana a vaa wụ̀ eyi ịrẹkụ. Ezi ẹnịnị vị ọnị ụngwẹ vaa wụ̀ vaa ha. 23Ọ kà ọnị ọ raa jị ụmẹ ọnị ọnị ve sii vu anị Anatọtị ẹtẹ. Ịjị ụmẹ ọnọọ oo tu, ọza ikonyara ẹ yị yaa vọ ẹtẹ ịnị ẹnịnị.
Currently Selected:
Ijeremaya 11: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
