Ijeremaya 10
10
Ohomorihi obooro ọnị ịnyara
1Ẹwụ nịnị Anisirẹrị ọ wụ́ ịrẹyị ọnị Ẹnẹyịmavara aa kà a yị wụ nịnị. 2Ẹnẹyịmavara kà, a sị ụ hama ebira ana anẹkụra ana vọ aa mẹ nịnị. Asị ụ hụrẹ ayịnẹ apọtẹrẹwa ọnị we re ẹbẹẹba nịnị, anẹkụra ana vọ ẹẹ daka hụrẹ ayịnẹ agụvị avọọ. 3Ahẹkẹ ịyẹyẹ aza ẹnẹnị aa mẹ nị. Ẹẹ na dà ọchị hụụnị iruku, dị ẹẹ bẹ ẹ. 4Dị ẹẹ sị Igooru ọnịrị Isiriva (ọmọ) dị ẹẹ sị mẹ̀ ẹ ọvị. Dị ẹẹ kanyị ọ iso zẹtẹ agụvị asị ọ hụrẹ nyẹtẹ. 5Ẹngụ ori ẹnẹẹ vana sị mẹẹ anka eku ana tụra tụ ịnị aarẹ ọyị chire inomi angwa avọọ. Ẹnịnị ẹ yị zụ ka ịrẹyị; vị ee chema wa nị, agụvị ka ẹnịnị ẹ yị zụ zị ụsẹ. Asị u hí angwa ẹnịnị; ẹnịnị ẹ yị zụ zama wụ nịnị; ẹnịnị ẹ yị rẹ zụ mẹ ọyịza wụ nịnị. 6Ẹ yị nyị ọza anka ẹwụ Ẹnẹyịmavara o. Waa nyị ụkata ẹtẹẹtẹrẹ, avọọ ịrẹha awụ mẹ banyị dị ọ nyị ụkata ẹtẹẹtẹrẹ nị. 7#Ẹtẹ 15.4È nee yị vee hí angwa ẹwụ ohinọyị avaba ẹhẹ? Vị a vọrọ ka ee hí angwa awụ nị. Ịnị avaba ọyẹrẹyị ẹhẹ ọnọnị ọnịrị avaba ohinọyị ẹnịnị ẹ yị nyị ọza anka ẹwụ. 8Avaba ẹnịnị vị ọnụra. Ịrẹyọyẹ ịsị ẹ zụ kọ hụụnị ụvọ ori ana a sị ọchị bẹ kẹ? 9Ori ẹnịnị vị ana a sị isiriva ọnịrị igooru mẹ ẹtẹ Itasisi ọnịrị ẹtẹ Uhwaazị. Ụkọrọ ụvọ aza ẹ vị nị. Dị ee chire wa awuru akàaka ọnị aza ana yara mẹ̀ ụkọrọ ẹtẹẹtẹrẹ hi ịta anị. 10Ama Ẹnẹyịmavara ọ vị Ohomorihi obooro nị. Ọnị ọ vị Ohomorihi ana yara nị. Ọnị ọ vị Ohinọyị pooro zịna-zịna nị. Ẹnẹyịmavara àaa kụ ayị, avaba ẹhẹ vị ene e zizi. Anẹhẹ ẹ yị zụ jẹẹ zị ọ àaa kụ ayị. 11Kà ẹ yị wa nịnị ka, ori ẹnẹnị, ẹ yị vị ẹnị ọ mẹ ẹbẹẹba ọnịrị ẹhẹ ọnọnị. Ẹnịnị vị ene e vee vú ẹtẹ hụụnị ẹhẹ. Ọza, e me vene re wa ịnị ẹhẹ. 12Ama Ohomorihi ọ sị ụkata anị tụ ẹhẹ ọnọnị nị. Ọnị ọ sị ịrẹyọyẹ anị nyima ẹhẹ ọnọnị nị. Ịrẹyọyẹ anị ọ sị tana ẹbẹẹba nị. 13Ohomorihi ọọ̄ ka ịrẹyị dị orihi aa karutu ẹbẹẹba nị. Ọnị ọọ̄ mẹ̀ ka ịnyanya ọọ̄ rị orihi aa zụ nị. Ọnị ọọ̄ mẹ̀ ka ahị ọọ̄ tụ́ hụụ ịzị ọ zaa ku tụ nị. 14Ọsọnị aza ee si re, dị ẹ sị mẹẹ ọnụra ẹnẹ ẹ yị nyị ịrẹyọyẹ nị. Anịngẹrẹ enee tu ori vị ọnị ụhị aa nyị, agụvị ka ori ẹnẹ ẹ mẹ va hi ẹtẹ vị apẹ kẹnẹ; ẹnịnị ẹ yị nyị ụhwẹ. 15Ịsa kẹnẹ ẹnịnị vị nị. A sị eyi wụ̀ wa. Ịjị ụmẹ ọkarẹyị ẹnịnị oo tu, e vee vu wa ẹtẹ. 16Ohomorihi Ijekọvụ ọnịrị wa ẹ ị vị ọnya, agụvị ka ọnị ọ mẹ avaba ịsa nị. Ọ raa nyị Anisirẹrị nịnị ka ẹ vị aza anị. Ẹnẹyịmavara Ochẹtẹẹngụ ịrẹha anị rị nị. 17Dị Ijeremaya ka, ẹwụ nịnị Anijerusarẹmị, we tenyi ẹnya awụ nịnị. Isoja nịnị ẹ raa ta kara wụ nịnị. 18Ka, Ẹnẹyịmavara kà: Re, ọyaanị, avaba ẹwụ nịnị ana ra ịnị ẹtẹ ọnọnị vị ọnị vaa tụ̀ okoko. Ọnị vaa kụ ẹngụkata odivi tù wụ nịnị dị wa yẹ ọyịkụ anị nịnị. 19Dị Anijerusarẹmị nịnị na owu zẹtẹ ka: ụnava ẹnịnị ọnọnị oo divi o! Ụnava ọnọnị ẹ yị zụ vị ọ. Vị ẹnị vịdị ro ka ịsị ẹnị zụ sị ẹngụ dọ yọ nị. 20Ẹ ka, ajẹngụ ẹnịnị e ku wu. Orupa anị ẹ kụ jị va ha. A raa kụ ezi ẹnịnị. Ẹ yị nyị ọza ana vọ ana vọrọ ka ò pe ẹnị kụ ajẹngụ ẹnịnị jẹẹ, dị pe ẹnị sị ịta jị ọ. 21Dị Ijeremaya tụ́ ohi ka, ọdọvịdị ẹnịnị vị ọnụra-ọnụra. Ẹnịnị ẹ yị họ̀ Ẹnẹyịmavara kà ọ zụ ẹnị oze, avọọ ẹnịnị sẹ ẹdụ, dị aza ẹnịnị sị gara nị. 22Sị ụtọ pe ẹtẹ nịnị! Enube ộ vẹ. Ẹ naa wụ̀ isoja nịnị ịrẹka ẹtẹ Ịbabịrọnị. Ẹnịnị aa vaa hụ azaa hụrị ẹtẹ Ijuda, dị ọ kụkụ vị aha ọnị irezi ịnị avị nịnị kụkụ ra nị. 23Ijeremaya ka, Ẹnẹyịmavara ọnị oo yẹ ka ẹ yị nyị ọza ana zụ sị ụvọ nya ịrachị ọnị ọ nyị ẹhẹ anị nị. Ẹ yị nyị ọza ana nyị ụkata ka a ka aanị ọnị mẹ vaa mẹ ẹhẹ anị nị. 24Ọ kà, Ẹnẹyịmavara ọ̀ navọ ọ sị ịzẹyịza vọrọ ẹnị zị oze. Asị ọ sị ọyịkụ sị ụya rị ẹnị ka ẹyịvavọọ vị ee vu ẹnị ẹtẹ nị. 25Ọ kà, ọ sị ọyịkụ anị zụ aza ana ka ẹnị ẹ yị yẹ ẹ; dị ẹnịnị ẹ yị maa hẹkẹ ẹ. Ẹnịnị ẹ sị aza Ẹnẹyịmavara wụ̀ ha; ẹ sị ẹnị vú ẹtẹ saka-saka, dị ẹ jị ẹkụra ẹnịnị eburu nị.
Currently Selected:
Ijeremaya 10: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
