Ayịsaya 63

Ohomorihi ô họ̀ oponu ịrẹsụ Anedomi

1 # Ayị 34.5-17; Ijer 49.7-22; Ezk 25.12-14; 35.1-15; Emọ 1.11,12; Ọba 1.1-14; Ịma 1.2-5 Ẹnẹ ọnị ọnọnị vị ana hụrị Ibozira ịnị ẹtẹ Edomi aa vẹ aanị kẹ? Ẹnẹ kụ́ ẹnya ovivi chomi-chomi hí ẹngụ, di e hu ahụ ọkọọka ịnị ụbanyị ụkata anị vẹ aanị? Ẹnẹyịmavara ana hụ ọ dọ ọza ha aa vẹ vaa nọ̀ ka ọnị ọ raà nyị ehuna. 2Sị ẹ vẹ dị awuru anị ee vi anka ọza ana kwọrọ igirepi anaā sị̀ mẹ eche avọọ? 3#Ẹtẹ 14.20; 19.15; Ẹtẹ 19.13Dị Ẹnẹyịmavara tụ ohi kà a ọnị ọ raà kwọrọ avaba Anẹkụra nịnị anka a mẹẹ̄ kwọrọ igirepi avọọ, dị ẹyị nyị ọza ana vẹ ịnị ọgụvọ anị nị. Ayị ộ kụ ọnị dọ ọnị kwọrọ wa, dị ẹnịnị sì ku avaba achị anị ana a dọ ọ ọtị nị. 4Ẹnẹyịmavara kà ụmẹ ọnị a sị dị aza anị ha o si tu. Ụmẹ o si tu ka ọnị ọ sị ụya rị ọnịvị aza anị nịnị. 5#Ayị 59.16Ọ kà ọnị ô kana eyi, dị ọnị re ka ẹ yị nyị ọza ana zụ gụ ọnị ụvọ. Ama dị ụkata anị sị ọnị nyị ehuna, dị ọyịkụ anị sị ọnị jẹẹ nị. 6Ịnị ọyịkụ anị ọnị ộ sị avaba anẹhẹ mẹ ịyẹyẹ, dị ọnị gara wa, dị ọnị va ẹnịnị hi ịrẹsụ nị.

Ọyịza ọnị Ẹnẹyịmavara mẹ̀ yị Isirẹrị

7Ayịsaya ka ọnị vaa kà a Ẹnẹyịmavara mẹmẹ aa ngụ ayị ẹnịnị. Ọnị aa ga a agụvị avaba ọyịza ọnị ọ mẹ yị ẹnị, dị mẹ ize yị Anisirẹrị nịnị agụvị ka ộ vayị ẹnịnị, di o sì ịrẹyị ẹnịnị pooro nị. 8Ẹnẹyịmavara kà aza anị ẹ vị nị, ẹnịnị ẹ yị vee vene ọnị. Agụvị avọọ ọ dọ wa ha 9hụụnị avaba ụya ẹnịnị nị. Ẹnẹyịmavara ụvọta ọ dọ wa ha, ẹ yị vị anggẹẹrị. Ộ dọ wa ha agụvị oyisì ọnịrị ayamva anị, ộ vịdị tẹsị ẹnịnị hụrị ẹtẹẹtẹ. 10Ama ẹnịnị ệ mẹ akamawụ hi ọ ene du Ụhwẹ Ọnịnị ayị. Agụvị avọọ Ẹnẹyịmavara vara ọnịvị ẹnịnị, dị ọ vara eyi ịraazị ka wa nị. 11Ama Ẹnịnị ệ tamayị ịsa ana mè ịnị ụmẹ Imosiisi ozi ahụ Ẹnẹyịmavara. Ê họ̀ use ka ịzị Ẹnẹyịmavara ana dọ ọdọvịdị aza anị ha hụụnị Oku Ovivi? Ịzị Ẹnẹyịmavara ana sị ụkata yị Imosiisi ya? 12#Kụra 14.21Ọnị ộ mẹ̀ ka ụkata igirima anị ọ ya pe Imosiisi ọnị ọ sị ga oku hi. A vaa ga a pooro zịna-zịna nị. 13Ọnị ộ kụ aza anị jịnẹ enyi anka umaata ee zwe echi ini ozi, dị ẹ yị tụ ahụ avọọ nị. 14Ọnị ọ sị ụkata anị sị ụhwọtụ yị wa anka imaaru ana kụ nọ ịnị ozi na tụ́ ụhwọ́ avọọ nị. Ộ mẹ̀ ka aa ga Ẹnẹyịmavara. 15Ẹnẹyịmavara navọ wa va eyi chi vẹ hụrẹ ẹbẹẹba, aha ọnịnị ọnịrị ụbanyị awụ, dị wee re ịsa ana aa na. 16Ẹwa vị ada ayị nị. Ohiku ayị Abụrahamị ọnịrị Ijekọvụ ẹ yị yẹ yị, ama ẹwụ Ẹnẹyịmavara ọ vị ada ayị. Ẹwa vị ọza anaa dọ yị ha pooro nị. 17Sị ẹ vẹ dị ụ navọ ka ya ha hụrẹ oze awụ? Sị ẹ vẹ dị ụ mẹ̀ yị ọnịrẹsụ ọkatẹngụ ana mẹ̀ ka ya va hụụ ịrẹma wụ? Navọ wa vavẹ agụvị aza anaa hẹkẹ wụ ọnịrị aza ana ahịka awụ ẹ vị pooro nị. 18Ọnịvị ayị vị ana dụ ẹyị aza ọnịnị awụ ịnị ụmẹ chee: dị ẹ sị irehi ọnịnị awụ mẹ̀ ịyẹyẹ. 19Ụ mẹ̀ yi anka aza ọnị wẹ yị vị ọdọvịdị anị avọọ. Ọ sị mẹ anka ị yị vị aza awụ avọọ nị.

Currently Selected:

Ayịsaya 63: EBTP

Highlight

Copy

Compare