Ayịsaya 62

Ijerusarẹmị vaa ha

1Ẹnẹyịmavara kà a, agụvị Ịzayọnị ọnị e yi vee chi iriji, agụvị Ijerusarẹmị ọnị ẹ yị vaa tụ́ ụhwọ́, ẹ yị ịjị ịzẹyịza anị aa zẹtẹ, dị ẹdọha anị aa za anka ịra ịtọchị. 2Avaba anẹkụra nịnị vee re ka wa raà nyị ehuna. Avaba ohinọyị nịnị vee re ụbanyị awụ. Ẹ vaa hị́ wụ ịrẹha ọwọọwa ọnị Ẹnẹyịmavara raà sị yị wụ. 3Ụ vaa sị mẹ anka amu ohinọyị yị Ẹnẹyịmavara nị. 4Ọza ẹ yị kụkụ vaa hị́ wụ eneyi, a vị dị aa hị́ ẹtẹ awụ nịnị Enezweyị, ama ịrẹha ọwọọwa awụ nịnị ọ rị onimisi, Ẹtẹ awụ nịnị ọ rị Anaanyị. Agụvị ka ayị Ẹnẹyịmavara ô hine tu wụ, ọnị ọ vaa nyị ẹtẹ awụ nịnị anka ọza ộ nyị ọnẹẹ avọọ. 5Anka ọnọrụ anaa nyị ozwoorihi ẹnẹ ẹ yị yẹ ọnọrụ, avọọ Ẹnẹyịmavara ana mẹ̀ wụ mẹ vaa nyị wụ nị. Ayị ọnọrụ meē hine tu oze avọọ, avọọ ayị Ohomorihi awụ nịnị mee hine tu wu nịnị 6Anijerusarẹmị, Ẹnẹyịmavara ọ raà nyị oserẹtẹ ene vee sere ọvọ awụ nịnị. Ẹnịnị e yi vee si irenu kwoku ọọdụ ọnịrị ịrahụ. Ẹ vaa tamayị Ẹnẹyịmavara ayị avaba ọnị o wo oto anị wụ nịnị. Ẹnịnị ẹ yị vaa zẹ ka ayị o hi ọ. 7Ẹnịnị ẹ yị vaa zẹ ka ọ tụ́ ụhwọ́ pooro dị ọ va Ijerusarẹmị nọ udi anị. Dị ọ mẹ̀ ẹ ẹkụra ọnị avaba anẹhẹ vaa ga. 8Ẹnẹyịmavara o reè wo oto ẹtẹẹtẹrẹ. Ọ vaa sị ụkata anị mẹ̀ ẹ. Ọnịvị Anisirẹrị nịnị ẹ yị kụkụ vaa sị akụ ẹnịnị mẹ ịsọyịrị ẹnịnị. Anikinami nịnị ẹ yị kụkụ vee hu eche ẹnẹ ẹnịnị ka ẹhị mi tụra ịrẹsụ. 9Ama ẹwụ nịnị ana chire akụ, dị mẹ̀ ẹ, ọ vaa rị ịsa anị dị ụ waa ga Ẹnẹyịmavara nị. Ẹwụ nịnị ene tenyi ọchị Igirepi, dị ụ kụ́ ẹtụtụ gụ o vee hú eche anị ịnị ohweje ene hi ini irehi Ohomorihi. 10Ẹwụnị aza ene hi Ijerusarẹmị, jịnẹ tụ ẹhẹ hụụnị ẹkụra ọbanyị ọnọnị, dị ụ waa tụ́ oze yị aza ana aa vavẹ. 11#Ayị 40.10; Ẹtẹ 22.12Ọnị Ẹnẹyịmavara aa nọ yị avaba anẹhẹ: “Kà a yị aza ẹnẹ hi Ijerusarẹmị ka Ẹnẹyịmavara aa va dọ̀ wụ ha. Ọ vaa kụ̀ aza ọnị ọ sị dọ ha beri ẹngụ vẹ.” 12A vaa hị́ wụ nịnị “aza ọnịnị Ohomorihi”, aza ọnị Ẹnẹyịmavara sị dọ ha Ijerusarẹmị vị ana vaa hị́ ẹkụra ọbanyị ọnị Ohomorihi sị ịrẹyị anị. Ẹkụra ọbanyị ọnị Ohomorihi ọ yị hụrẹ ụvọ.

Currently Selected:

Ayịsaya 62: EBTP

Highlight

Copy

Compare