Ẹzịra 5

Itatenayi ộ chẹrẹ ịsa tụ hi ohinọyị Ịdarịyọsị

1 # Ihg 1.1; Iza 1.1 Ịnị ụmẹ ọnọọ, Ohomorihi ộ tụ ọnịsẹ anị Ịhagayị ọnịrị Ịzakaraya ana vị ozi Ido ụtụ hi Aniju nịnị ana ra Ijuda ọnịrị Ijerusarẹmị. 2#Ihg 1.12; Iza 4.6-9Ịjị Izerubabẹrị ozi Isiritiyẹrị ọnịrị Ijesuwa ozi Ijozadaki wụ́ enube ọnọọ, dị ẹ kụ aza ne nyima ee tenyi irehi Ohomorihii da nị. Dị ọnịsẹ Ohomorihi ẹnẹẹ jẹẹ pe wa, dị ẹ yaa gụ wa ụvọ nị. 3Ịnị ụmẹ ọnọọ, Itatenayi sị vị Ịgọvọnọ tụ ẹtẹ Ehwirati nị. Dị ọnịrị atụra Ịgọvọnọ, Isita Ibozenayi ne beri ọdọvịdị ẹkụra nịnị nọ Ijerusarẹmị ne tu wa nị. Dị ẹ họ̀ wa ka ẹ̀nẹ sị oze yị wa ka ẹẹ da irehi Ohomorihi ọnọọ? 4Dị ẹ họ̀ use ịrẹha aza anaa mẹ̀ ụkọrọ ịzọọ nị. 5Ama eyi Ohomorihi ọ yị hụrẹ ọdọvịdị Aniju nịnị ẹngụ. Ọdọvịdị Anipesiya ẹnẹnị ệ navọ wa ka ẹẹ mẹ̀ ụkọrọ ẹnịnị nị. Eyee zi ka ẹnị ẹ̀ na kà a yị Ịdarịyọsị da, dị ẹnị ẹ̀ wụ ịsị ọ vaa kà. 6Dị Itatenayi Ịgọvọnọ, Isita Ibozenayi, ọnịrị anajuwe nịnị na kà enube yị Ịdarịyọsị nị. 7Ẹ kà, 8Taarụ, Ẹnị ệ nọ Ijuda ịzị a yà aa da irehi Ohomorihi ọbanyị. Aniju nịnị ệ kụ ịrẹta ẹbanyị-ẹbanyị aa tụra irehi ọnọọ, dị ẹ kụ ọchị ẹbanyị-ẹbanyị tụra ọvọ anị nị. Ẹ́nịnị nyayịnẹ kụ ẹngụ hi ọ, dị ụsẹ aa hụ wa ịra ẹtẹẹtẹrẹ nị. 9Ẹnị ệ họ̀ wa use ka ẹnẹ sị ọda yị wa ka è tenyi irehi ọnọọ da. 10Dị ẹnị rẹ họ̀ use ịrẹha ọdọvịdị ẹnịnị agụvị dị ẹnị ẹ̀ chẹrẹ ẹ yị ohinọyị nị. 11Dị Aniju ẹnẹẹ tụ ẹnị ohi ka, ezi ahụ Ohomorihi ana nyị ẹbẹẹba ọnịrị ẹhẹ ẹnị vị nị. Dị ẹ kà ẹnị ee tenyi eburu irehi Ohomorihi ọnị ohinọyị Anisirẹrị ọbanyị ọnya aanị vịdị da hụrẹ ụmọrụmọ nị. 12#2 Ohi 25.8-12; 2 Ịtọ 36.17-20; Ijer 52.12-15Ama ohiku ẹnịnị ê du Ohomorihi ana nyị ẹbẹẹba ayị, dị ọ hụrẹ ẹnị ụvọ yị Inebukadineza ohinọyị Anikaridi nị. Dị Inebukadineza za wa ọrịhị nọ Ịbabịrọnị, dị ọ chaka irehi Ohomorihi ọnọọ ha nị. 13#Ẹzị 1.2-11Ama ịnị ịrayị ịpaapa ọnị Ịsayịrọsị rị ohinọyị dị ọ mẹ ọda ka è tenyi irehi Ohomorihi da nị. 14Dị ọ kụ Igooru ọnịrị Isiriva hụụnị irehi Ohomorihi ori Anibabironi ọnị ohinọyị Inebukadineza vịdị kụ hụụnị irehi Ohomorihi ana ya Ijerusarẹmị. Dị ohinọyị Ịsayịrọsị kụ ogu ẹnẹẹ yị Isesibaza ọnị ọ nyị Ịgọvọnọ Aniju nịnị nị. 15Dị Ịsayịrọsị ka Isesibaza ka ọ̀ kụ ẹnya ẹnẹẹ ne tenyi irehi Ohomorihi ana ya Ijerusarẹmị. Di o re hu ọ ụvọ ka ò tenyi ọ da tụ ịzị ọ vịdị ya nị. 16Dị Isesibaza nọ Ijerusarẹmị na ka irehi Ohomorihi ọnọọ ẹtẹ nị. Hụrẹ ịhị ọnọọ a vanaa mẹ̀ ụkọrọ ịnị anị dị ụkọrọ ọyị va ta mẹ pooro tu ajịnị nị. 17Dị ẹ kà òo ze ohinọyị eyi booro aanị, ò ne si iwe ịzị a chẹrẹ ịrẹyị ohinọyị hi Ịbabịrọnị. Ò sì iruvo àa vị ịzẹyịza Ịsayịrọsị vavọọ mẹ ọda ka à da irehi Ohomorihi ọnọọ nị, dị ọ̀ tụ́ hi ẹnị.

Currently Selected:

Ẹzịra 5: EBTP

Highlight

Copy

Compare