Ẹzịra 4

Ọnịvị Aniju nini ka asị a da irehi Ẹnẹyịmavara.

1Ịjị ọnịvị Anijuda ọnịrị Ịbẹnjamịnị nịnị mẹ wụ ọ ka Anisirẹrị aa da irehi yị Ẹnẹyịmavara ana vị Ohomorihi ẹnịnị. 2#2 Ohi 17.24-41Dị ẹ ne tu Izerubabẹrị ọnịrị ohirẹsụ ovwoovu ka ẹnị ẹ gụ wa ụvọ da irehi ọnọọ nị. Ẹ ka hụrẹ ụmẹ ọnị Esahadoni ohinọyị Anasiriya sị kụ ẹnị vị ịzọọ ẹnị a hẹkẹ Ohomorihi ẹnịnị dị ẹnị raa mẹ̀ ịsọvọ yị ọ nị. 3Ama dị Izerubabẹrị ọnịrị Ijesuwa neberi azọkụ-azọkụ ovwoovu Anisirẹrị nịnị tụ wa ohi ka ẹnịnị ẹ yị nyị ụvọ tụ ọ nị. Ẹ ka ẹnị ụvọta aa da irehi yị Ẹnẹyịmavara ana vị Ohomorihi anka Ịsayịrọsị, ohinọyị Ipesiya mẹẹ mẹ̀ ọda yị ẹnị nị. 4Dị aza ana ra ịzọọ sị ka wa ụhwẹ, dị ẹyaa chire wa angwa ka ẹ za ụkọrọ ọnọọ jẹẹ nị. 5Dị aza ẹnẹẹ aa sị ẹkẹhị chire Anajuwe ịjọva Ipesiya nịnị irenu ka ẹ dọ wa oro ka asị ẹ mẹ̀ ụkọrọ ọnọọ. Dị anajuwe ẹnẹẹ vavọọ vị ọchị ojoze yị wa pooro ịnị ụmẹ Ịsayịrọsị ve tu ụmẹ ọnị Ịdarịyọsị sị vị ohinọyị nị. 6Ahasẹrọsị mẹ̀ rị ohinọyị kẹnẹ, aza ẹnẹẹ rẹ chẹrẹ iwe ne du Anijuda ọnịrị Anijerusarẹmị yị ọ nị. 7Ịjị Atazazasisi mẹ va vị ohinọyị dị Ibisitami, Imiteredati, Itabeeri ọnịrị anda ẹnịnị sị ẹkụra Aramayiki chẹrẹ iwe tu hi ọ nị. Dị ahịka a dọ ịrẹyị ka yị ọ nị. 8Irehumi ana vị ọdọvịdị aza ẹnẹẹ, ọnịrị Isimisayi ọchẹrịsa ệ rẹ chẹrẹ iwe du Ijerusarẹmị tụ hi Atazazasisi ohinọyị Anipesiya. 9Aza ana chẹrẹ iwe ọnọọ ẹ vị Irehumi ọga isoja ọnịrị Isimisayi ọchẹrịsa neberi ẹnịnị ana vọ ana vị ọmọkarẹyị nịnị, ọnịrị odeyi nịnị ana hụrẹ Itiriporisi, Ipesiya, Erechi, ọnịrị Ịbabịrọnị, Anarami ene hi Isusa, 10neberi aza ọnị Asuribanịparị, ohinọyị Anisiriya sị ụkata-ụkata kụ ve hi Ịsamarịya ọnịrị ẹkụra ana vọ ene hi akẹnẹ ụtọ irehu Ehwirati. 11Ịsa ọnị ẹ chẹrẹ tụ hi ohinọyị Atazazasisi yị: Taarụ! Ezi ahụ awụ ene hi akẹnẹ ụtọ irehu ịzị ọyị ngụ ẹtẹ ẹ chẹrẹ iwe ọnọnị nị. 12Ẹ ka ohinọyị ọ yẹ ka Aniju ana varẹma vẹ Ijerusarẹmị e tenyi ẹkụra anakamawụ odivi ẹnẹẹ da. Ẹ ya vaa tụra ta ọvọ ene e wu da. 13Ohinọyị ọ́ọ́ yẹ ka aza ẹnẹnị è ree tenyi ẹkụra ọnọọ ta, ẹnịnị ẹ yị kụkụ vaa tụ ẹkẹhị irehi. Ịjọnọọ dị ẹkẹhị ana ngụ eehi yị ịjọva awụ sị jị ha. 14Anka aza ana vẹ odeyi anị tụ ịzọọ ọnị ọ sị ụvọ ẹtẹẹrẹ za, ẹnị ẹ yị dọ ka ọzọnyị-ọzọnyị ẹ sị eyi wụ ọ. 15Ọ̀ọ zama iwe ịtọpa ohinọyị nịnị ana vịdị rị ịyẹẹyẹ, o vee re ka Ijerusarẹmị vị ẹkụra ana vịdị aa mẹ akamawụ hị́ ohinọyị nịnị, dị ẹẹ ku anẹkụra ana avọ ku ịrẹma va eyi ka ịjọva nị. Agụvị avọọ a vịdị sị chaka ẹkụra ọnọọ ha nị. 16Àa vị ka Ijerusarẹmị ọ varẹma sị tenyi, dị a sị ọvọ anị tụra nị, ẹ yị vaa zụ mẹ ịjọva tụra aza ẹnẹẹ ẹnẹ hị́ akẹnẹ enyi ịrẹsụ. 17Dị ohinọyị chẹrẹ ohi anị tụ hi wa. Dị ọ ka, taa o Irehumi, ana vị ọdọvịdị, Isimisayi, ọchẹrịsa, ọnịrị anda ẹnịnị ana vọ ana ra Isamariya neberi aha ana vọ ene hi akẹnẹ enyi. 18Dị ọ ka a raà hị́ iwe ọnị ẹ chẹrẹ yị ọnị. 19Ộ mẹ ọda ka a zama iwe ịtọpa re. Ịzẹyịza di o re ka ịnị ịrayị ọrụrụ ana parahu aza ene hị́ Ijerusarẹmị ệ mẹ̀ akamawụ hị́ ohinọyị irenyi-irenyi, dị ẹ kụ ẹngụkata tu ẹkụra ana vọ nị. 20Ohinọyị-ohinọyị ana nyị ụkata ana vịdị mẹ ịjọva tụra wa ịrẹsụ, ệ dọ ẹkẹhị irehi irenyi-irenyi hụnị ụvọ ẹnịnị. 21Agụvị avọọ ọ mẹ ọda ka aza ana mẹ̀ ụkọrọ ẹ̀ za ụvọ jẹẹ ne tu ịhị ọnị ọ hụrẹ ọchị oze yị wa. 22Dị ọ ka a za a jẹẹ obobooro ọnọọ agụvị asị ẹ kụ ezigi tu ẹtẹ ọnọọ. 23Obooboro ọnị iwe tụ Irehumi, ọnịrị ọchẹrịsa anị Isimisayi, neberi Anajuwe ẹnịnị, dị ẹ nọ Ijerusarẹmị na sị ụkata-ụkata za ụkọrọ ọnọọ jẹẹ nị. 24#Ihg 1.1; Iza 1.1Aanị ụkọrọ irehi Ohomorihi mẹ vana tịtẹ pooro ne tu ana tụ ọ ịrayị ọhụva ọnị Ịdarịyọsị vị ohinọyị Ipesiya nị.

Currently Selected:

Ẹzịra 4: EBTP

Highlight

Copy

Compare