Ọyịkụra 39

Awuru irenyi-irenyi ohirẹsụ irehi Ohomorihi nịnị.

(Kụra 28.1-14)

1Ibezareri nịnị ệ sị owu onivuru owu ana a sị ivuru ọnịrị ovivi pō enyi anị vabẹ ne beri owu ovivi di e hi ịta awuru aza ana vaa mẹ̀ ụkọrọ ịnị ajẹngụ ọnọọ nị. Dị ẹ jị awuru yị Eerọnị ọnị ọ vaa sị mẹ̀ ụkọrọ Ohomorihi nị. Ệ jị ọ anka Ẹnẹyịmavara mẹ̀ kà a yị wa. 2Ộ si owu ēni enyi anị vị igooru ọnịrị owu ēni enyi anị vi onivuru ne beri owu ana a sị ivuru ọnịrị ovivi pō enyi anị vabẹ ọnịrị owu ovivi dị ọ ta wa vabẹ nị. Di o si hi ịharamịra ọnọọ nị. 3Dị ọ va si igooru di o tụ́ ọ dị ọ gana pẹtẹẹ aanị dị ọ ha dẹẹdẹrẹ aanị dị ọ sị mẹ̀ ụkọrọ tụ́ ini owu ẹnẹẹ ẹnị ẹnyị vị onivuru, dị a sị ivuru ọnịrị ovivi pō enyi ẹnyị vabẹ, dị ẹnyị rẹ vị ovivi. Ọza ana yara mẹ ụna ọ mẹ̀ ẹ nị. 4Ẹ rẹ mẹ ọtụrịza tụ́ ịnị ịharamịra ọnọọ. Dị e kuru ọ za ọgọgọ ẹẹva ịharamịra ọnọọ nị. Ộ nyị obo ana zụ sị sụ́ ọ. 5Ụbaja ene e hi tụ́ ọ vị ana a nyayịnẹ hi ẹtẹẹtẹrẹ. Owu ọnyọọnya e si hi ọnịrị ịharamịra ọnọọ nị. Dị ẹ sị za ịharamịra ọnọọ dị ẹ vị ọnyọọnya nị. Avọọ gẹdẹ-gẹdẹ Ẹnẹyịmavara mẹ̀ kà a yị Imosiisi nị. 6Dị ẹ sị ịrẹta ọkatarihi ẹẹva ana dà achẹrẹ irenyi-irenyi tụra ẹngụ, dị ẹ kụ́ wa chire ẹkara ana a si igooru mẹ nị. Dị ẹ chẹrẹ ịrẹha ezi Isirẹrị hị́ ọ nị. Ịrẹha ẹnẹẹ vị ẹnị ẹ chẹrẹ hi ọ anka ọnụna nịnị mẹ̀ẹ bẹ ịsị aā sịị sị ụvọọ tụ́ ini iwe avọọ. 7Dị ẹ va sị ọ dị ẹ sị za ọtụrịza ana ya ịnị ịharamịra ọnọọ nị. Dị ahịka ịrẹta ẹnẹẹ aā sị tamayị ezi Anisirẹrị pooro nị. Avọọ Ẹnẹyịmavara mẹ̀ kà a yị Imosiisi nị.

A mẹmẹ mẹ ọtụrịrachị ọnọọ

(Kụra 28.15-30)

8Ibezareri nịnị ẹ rẹ jị ọtụrịrachị tụ́ ịnị ẹnya ọnọọ. Ọza ana yẹ eyi ụkọrọ ẹtẹẹtẹrẹ ọ jị ọ nị. Vị ẹ jị ọ anka ịharamịra ọnọọ nị, owu ọnyọọnya e si hi wa nị. Enyi owu ẹnẹẹ vị igooru, ẹnyị vi onivuru, ẹnyị vị ana sị ivuru ọnịrị ovivi pō enyi anị vabẹ, dị ẹnyị vi ovivi nị. Dị ẹ tá wa vabẹ, di o zoza nị. 9Ụgọdọ ọtụrịrachị ọnọọ ọnịrị ụgana anị vị ẹbẹẹbẹ. Ahụ ọnya ẹ vị nị. Di e che e ẹẹva tụra ẹngụ nị. 10Dị ẹ va sị ịrẹta ozoza ana katarihi irenyi-irenyi di e tò wa ọrọ ẹẹna tụ́ ọ nị. Ịrẹta ene hi ịnị ọrọ ịpaapa yị: ịrẹta ovivi anaā za nyoonyo ọnịrị ịrẹta ore ana yà anka ore avọọ ne beri ịrẹta ovivi ana rẹ yà anka ore avọọ. 11Ịrẹta ene hi ịnị ọrọ ọhụva yị: ịrẹta ọkatarihi ana ka ọnịị ọ̀ vị anangẹrẹ ọnịrị ịrẹta ozoza ana vị onivuru ne beri ịrẹta ozoza nyoonyo ana katẹngụ ẹtẹẹtẹrẹ. 12Ịrẹta ene hi ịnị ọrọ ọhụta ẹnị vị ịrẹta ozoza ana ka ọnị ọ̀ vị anangẹrẹ ọnịrị ịrẹta ozoza ana katẹngụ dị ọ dà achẹrẹ kara ẹngụ ne beri ịrẹta ozoza ana nyị achẹrẹ anka ivuru ọnịrị ovivi ene pō vabẹ avọọ. 13Dị ịrẹta ene hi ịnị ọrọ ọhụna ẹnị vị ịrẹta ozoza ana vị anangẹrẹ ọnịrị ịrẹta ana nyị achẹrẹ irenyi-irenyi tụra ẹngụ ne beri ịrẹta ana dà achẹrẹ ovivi, ọ̀rẹ́ ọnịrị ondaadu. Dị ẹ kụ́ ịrẹta ẹnẹẹ chire ẹkara ẹnị ẹ sị̀ igooru mẹ hi ẹtẹ nị. 14Ịrẹta ẹnẹẹ vị ẹwụrẹva ọnya-ọnya ộ jẹẹ yị ịrẹha ozi Isirẹrị ọnya-ọnya. Dị ẹ bẹ ịrẹta ịrẹsụ Isirẹrị ẹwụrẹva tụ́ ọ anka a mẹ̀ bẹ ịsị a sịị sị ụvọọ tụ́ ini iwe avọọ nị. 15Dị ẹ sị igooru obooro dị ẹ sị mẹ ẹba dị ẹ ta a anka obo avọọ ana aa sịị za ọtụrịrachị ọnọọ nị. 16Ệ sị igooru mẹ ẹkara ẹẹva, dị ẹ rẹ sị igooru mẹ ochirigege ẹẹva nị. Dị ẹ sị ochirigege ọnọọ za ọtụrịrachị ọnọọ ọgọgọ ẹyịva nị. 17Dị ẹ sị ẹba igooru ẹẹva ẹnẹẹ dị e kuru wa gẹ ochirigege ana yà ịnị ọgọgọ ẹyịva ọtụrịrachị ọnọọ nị. 18Dị ẹ va sị ịrẹsụ ẹba ẹnẹẹ ana vọ di e kuru wa za aha ẹẹva, dị ẹ gẹ ọtụrịza ana tụra ịharamịra dị ọ và hi ọvịdị nị. 19Dị ẹ rẹ sị igooru mẹ ochirigege ẹẹva dị ẹ za ụtọ eyi ẹyịva ọtụrịrachị ọnọọ nị. Dị ahịka ịnị ịnẹ anị e hi nị. Dị ẹ gụrị ịharamịra ọnọọ nị. Dị ẹ gụrị ịharamịra ọnọọ nị. 20Dị ẹ rẹ sị igooru mẹ ochirigege ẹẹva dị ẹ sị wa za akẹtẹ ọtụrịza di e hi ọvịdị ịharamịra ọnọọ nị. Dị ahịka vị ẹ gụrị ịzị a zị gẹ ẹ dị ọ maanị yà akẹbẹẹba ụbaja ana a sị za ọtẹ chee aanị nị. 21Dị ẹ va sị ochirigege ana yà ịnị ọtụrịrachị za ochirigege ana yà ịnị ịharamịra ọnọọ nị. Dị ahịka obo onivuru ọ vavọọ sị sụ́ ọ nị, dị ẹ sị kụ́ ọnịrị ụbaja ana a sị za ọtẹ gẹ nị. Ọnọọ ọ mẹ ka asị ọtụrịrachị re oze jesi hụụnị ịharamịra ọnọọ. Ệ mẹ̀ ẹ anka Ẹnẹyịmavara mẹ̀ kà a yi Imosiisi.

A mẹmẹ jị awuru ana vọ oni ohirẹsụ irehi Ohomorihiī chire

(Kụra 28.31-43)

22Ibezareri nịnị ệ sị ịta onivuru dị ẹ sị jị awuru ēni eē chire kú ịharamịra ọnọọ nị. Ọza ana yara hi ịta o hi ọ nị. 23Dị ọ mẹ oze tụ́ ịnị akakana anị ịzị aa zịị jị ịrẹsụ ngụ ọ nị. Dị ọ sị ịta kara ọrọkọ anị ka asị ọ na nị. 24Dị ọ sị owu dị ọ sị mẹ ododo nị. Achẹrẹ ẹnyị vị onivuru, dị ẹnyị vị achẹrẹ onivuru ọnịrị ovivi ēni e pō vabẹ nị, dị ọsa vi ovivi nị. Dị ẹ tá owu ẹnẹẹ vabẹ dị ẹ sị mẹ ododo di e kuru wa gẹ ụtọ awuru ọgọdọ ọnọọ na gẹ ẹtẹ nị. 25Dị ẹ sị igooru mẹ ikono dị ẹ gẹ ẹ za ụtọ awuru ọgọdọ ọnọọ na gẹ ẹtẹ nị. Dị ahịka vị ẹnịrị ododo ẹnẹẹ há ẹngụ nị. 26Ikono ẹnẹẹ ọnịrị ododo ana a sị owu mẹ vị ana há ẹngụ jesi kara ụtọ awuru ọgọdọ ọnọọ. Ẹnị Eerọnị nịnịị̄ chire ẹ̀ẹ yaa mẹ̀ ụkọrọ Ohomorihi nị. Ệ jị awuru ọnọọ anka Ẹnẹyịmavara mẹ kà a yị Imosiisi. 27Ệ sị owu ozoza dị ọza ana yara hi ịta ẹtẹẹtẹrẹ si hi ịta ana a sị jị ọtịnịnẹ awuru yị Eerọnị ọnịrị ezi anị nị. 28Ẹ rẹ sị owu ozoza dị ẹ ta a vabẹ, di e si hi ịta ubobo ọnịrị amu ne beri ọtịnịnẹ awuru Eerọnị nịnị nị. 29Dị ẹ sị owu onivuru ọnịrị owu ana a si ivuru ọnịrị ovivi pō enyi anị vabẹ ne beri owu ovivi, dị ẹ ta wa vabẹ, dị ẹ sị jị ọvẹntẹ yị wa nị. Ọza ana yara mẹ̀ ụkọrọ tụ́ ịnị ịta o hi ọ nị. Ẹnịnị vi ene hi ọ anka Ẹnẹyịmavara mẹ̀ kà a yị Imosiisi. 30Dị ẹ va sị igooru obooro mẹ ẹnya ọnya chẹtẹẹ aanị, dị ẹ chẹrẹ ịsa tụ́ ọ nị. Vị ẹ chẹrẹ ịsa ọnọọ anka ịsa ana a bẹ ana a sịị sị ụvọ tụ́ ini iwe avọọ nị. Ệ chẹrẹ ịsa ọnọọ: “A raà sị yị Ẹnẹyịmavara.” 31Di e ve kuru obo onivuru tụ́ ọ dị ẹ sị sụ́ ọ za ubobo ohirẹsụ irehi Ohomorihi nị. Ẹnịnị vị ana mẹ̀ ẹ anka Ẹnẹyịmavara mẹ̀ kà a yị Imosiisi.

Ụkọrọ Ajẹngụ Ohomorihi ộ ta mẹ

(Kụra 35.10-19)

32Avaba ụkọrọ ajẹngụ ọnọọ ộ ta mẹ saka-saka. Anisirẹrị nịnị vị ana mẹ ajẹngụ anka Ẹnẹyịmavara mẹ̀ kị kà a yị Imosiisi gẹdẹ-gẹdẹ. 33Dị ẹ kara ajẹngụ ọnọọ ọnịrị avaba ẹnya ene hi ịnị anị dị ẹ kụ́ wa ve tù Imosiisi nị. Ẹnya anị ẹnẹ ẹ kụ́ vẹ yị: enyusẹ ene e tụ́ ana nyị ịrẹsụ kẹrẹdẹẹ, uhweremi, ọchị ana a dị jị ajẹngụ ọnịrị ọtụ ne beri ịzị ọtụ ẹnẹẹ vaa jẹẹ tụ́. 34Ịnị ẹnya ẹnẹ ẹ kụ́ vẹ, ẹ rẹ kụ́ ịtụmpaha ịdẹba ana a jị ngụ ịrẹdọ ovivi ọnịrị ịtụmpaha ozoza ne beri ịta ana a kụ́ jị oze. 35Ịsa ọsa ẹnẹ ẹ rẹ kụ́ vẹ vị Apoti oto Ohomorihi ọnịrị ọchị ana aa sịị sị ọ ne beri òkú anị 36ọnịrị itevuru ne beri avaba ẹnya ụkọrọ ene hi ịnị anị. Dị ẹ rẹ sị Ịbụrẹẹdị ana a sị yị Ohomorihi ve tù ọ nị. 37Ịsa ọsa ene re hi ịnị ẹnya ẹnẹ ẹ vavọọ kụ́ vẹ yị: ịzị aa sị ozotupaa tụ́ ana a sị igooru obooro mẹ ọnịrị ozotupa anị nịnị ne beri angwẹ ene e ve sii hu ịra. 38Ẹnya ọsa rẹ vị ụta ana a si igooru kú, angwẹ ana a sịị nyị ọzaa tụ́ ịnị ụkọrọ Ohomorihi, eturare ana agụ anị zoza ọnịrị ịta ana a jị oze ana na ngụ ịnị ajẹngụ. 39Dị ẹnya ọsa ẹnị rẹ vị ụta ana a sị ịkọpa kú ọnịrị ịtanggọrọ anị ana a sị ịkọpa mẹ, okutẹ anị ọnịrị avaba ẹnya ana a vaa sị mẹ̀ ụkọrọ ịnị anị ne beri ịchacha ana aā ká enyi tụ́ ọnịrị ịzị aa sị ịchacha ọnọọ tụ́. 40Ẹ rẹ sị ịta ana kara ohweje beri ọtụ anị ọnịrị ịzị ọtụ ẹnẹẹ jẹẹ tụ́ ne beri ịta ana a sị jị oze ana na ngụ ini ohweje ọnịrị obo ne beri ẹka ana a sị kà ohweje vẹ. Dị ẹ rẹ kụ́ avaba ẹnya ene hi ịnị ajẹngụ 41ọnịrị awuru ēni e hi ana aza ana aa mẹ̀ ụkọrọ ịnị ajẹngụ ọnọọ ee chire ve tù Imosiisi nị. Awuru ana Eerọnị ohirẹsụ irehi Ohomorihi ọnịrị awuru ēni ezi anị ee chire ẹ̀ẹ yaa mẹ̀ ụkọrọ ịnị ajẹngụ vị ẹnị kị kụ́ vẹ ịda Imosiisi. 42Anisirẹrị nịnị vị ana mẹ̀ ụkọrọ ọnọọ anka Ẹnẹyịmavara mẹ̀ kà a yị Imosiisi gẹdẹ-gẹdẹ. 43Di Imosiisi zama ụkọrọ ọnọọ re di o re ka vị ẹ mẹ̀ ẹ anka Ẹnẹyịmavara mẹ̀ kà a yị ẹnị nị. Dị ọ mẹ̀ aduwa ka ò zee yị wa nị.

Currently Selected:

Ọyịkụra 39: EBTP

Highlight

Copy