Ọyịkụra 38

A mẹmẹ jị ụta ịzị a yàa mẹ̀ ịsọvọ ana aā rị ịra

(Kụra 27.1-8)

1Ibezareri ọ rẹ sị ọchị ịchẹkẹnẹ dị ọ sị jị ụta ịzị a yàa mẹ̀ ịsọvọ ana aā rị ịra nị. Ụta ọnọọ ộ nẹba tù ahụ ẹẹna rị ẹjịjị. Ụgọdọ anị ọnịrị ụgana anị vị ẹbẹẹbẹ. Ahụ ịhịmba rị ẹjịjị ẹ vị nị. 2Ộ mẹ ọpanyị ọnya-ọnya tụ́ ịnị ọgọgọ anị eyi ẹyịna. Ọpanyị ẹnẹẹ vị ọnị ọ bẹ za ụta ọnọọ dị ẹ kụkụ vị ọnya nị. Dị ọ va sị enyusẹ ana aā hị́ ịkọpa di o si kú ụta ọnọọ nị. 3Avaba ẹnya ana a vaa sị mẹ̀ ụkọrọ ịnị ụta ọnọọ vị ọnị ọ sị igooru mẹ. Ẹhụụ ẹnya ana a vaa sị kụ́ atịtọ anị ọnịrị ịchọvịrị ne beri ẹnya ana a vaa sị ịsa tụ́ di è che e sẹ ịsa vị ọnị ọ sị ịkọpa mẹ. Ịkọpa ọ rẹ sị mẹ osi agẹgẹnẹ ana a sịị sị uye ọnịrị ụnọkọ ana a sịị wara ịsa nị. 4Dị ọ rẹ sị ịkọpa dị ọ sị mẹ ịtanggọrọ dị ọ sị ịkọpa mẹ apoti ịzị aa kà ịra tụ́ dị ọ sị tụ́ iruvo ụta ọnọọ, dị ọ kà hịrẹ chee nị. 5Dị ọ sị ịkọpa tụ́ ochirigege tụ́ ịnị ọgọgọ ẹyịva ịtanggọrọ ọnọọ nị. Ochirigege ẹnẹẹ aā kà ọchị ẹnẹẹ ngụ nị. 6Ọ sị ọchị ịchẹkẹnẹ bẹ okutẹ, dị ọ sị ịkọpa kú wa nị. 7Dị ọ kụ́ ọchị ẹnẹẹ dị ọ kà wa ngụ ochirigege ẹnẹẹ nị. Di e hi ụtọ ụta ọnọọ dị ahịka ọnị aā sịị sị ọ nị.

Ẹnya ọbanyị ana a sị enyusẹ Ibironzi

(Kụra 30.18)

8 # Kụra 30.18 Ọ rẹ sị ịkọpa dị ọ sị mẹ ịchacha ana a ka ọ̀ mẹ nị. Â nyị anyẹnẹẹ ẹnyị anaā mẹ̀ ụkọrọ enoze ajẹngụ ọnọọ. Ẹnịnị ệ nyị ore ana vị ịkọpa. Di Ibezareri sị ore ẹnịnị ọnọọ dị ọ sị mẹ ịchacha ọnọọ nị.

A mẹmẹ mẹ ohweje ana kara ajẹngụ ọnọọ

(Kụra 27.9-19)

9Ibezareri ộ jị ohweje kara ajẹngụ ọnọọ. Ịpa na yà eyi ụvẹtẹ ini ohweje ộ gọdọ tù ahụ ẹchịhịmba tụra ẹẹwụ. Ịta anị vị ana a sị owu ene zoza ana a tá vabẹ hi. 10Ô hi ọtụ oohu tụ́ ọ, dị ọ rẹ mẹ aha oohu ọnị ọtụ ẹnẹẹ jẹẹ ịrẹsụ anị nị. Enyusẹ ana aā hị́ ịkọpa ọ sị mẹ aha ọnị ọtụ ẹnẹẹ jẹẹ tụ́ nị. Dị ọ va sị enyusẹ ana a sịị mẹ ẹkẹhị dị ọ sị mẹ enyusẹ ana nyị ịrẹsụ kẹrẹdẹ ọnị ọ sị za ọtụ ẹnẹẹ nị. Dị ọ rẹ sị enyusẹ ẹkẹhị ọnọọ mẹ ọchị ana a sị tụra wa nị. 11Ịpa ana yà eyi ẹbẹẹba ini ohweje ọnọọ ộ gọdọ tù ahụ ọchịhịmba rị ẹjịjị. Di o re hi ọtụ oohu tụ́ ịzọọ nị. Dị ọ sị ịkọpa mẹ aha oohu ịzị ọtụ ẹnẹẹ jẹẹ tụ́ nị. Dị ọ rẹ sị enyusẹ ẹkẹhị dị ọ sị mẹ enyusẹ ana nyị ịrẹsụ kẹrẹdẹẹ ọnị ọ sị za ọtụ ẹnẹẹ, dị ọ rẹ sị enyusẹ ọnọọ mẹ ọchị ana a sị tụra wa nị. 12Ịpa eyi ọnị ọyịị̄ zị naa ngụ ẹtẹ ini ohweje ọnọọ ọnị ọ rẹ gana tù ahụ ẹtarẹwụ tụra ẹẹhị, dị ọ nyị ịta nị. Ibezareri ô hi ọtụ ẹẹwụ tụ́ ọ, dị ọ rẹ mẹ aha ẹẹwụ ịzị ọtụ ẹnẹẹ jẹẹ tụ́ nị. Dị ọ rẹ sị enyusẹ ẹkẹhị mẹ enyusẹ ana nyị ịrẹsụ kẹrẹdẹẹ ọnị ọ sị za ọtụ ẹnẹẹ, dị ọ rẹ sị enyusẹ ọnọọ mẹ ọchị ana a sị tụra wa nị. 13Ịpa ohweje ọnọọ ana yà eyi ọnị ọyịị̄ zịị vẹ ộ gana tù ahụ ẹtarẹwụ tụra ẹẹhị. 14A nyị ịta ọnya ene kú oze ọnya ana aā zịị ngụ eehi ọnọọ. Ịta ọnọọ ộ gọdọ tù ahụ ohurẹẹva rị ẹjịjị. Ô hi ọtụ ẹẹta tụ́ oze ọnọọ, dị ọ rẹ mẹ aha ẹẹta ọnị ọtụ ẹnẹẹ jẹẹ tụ́ nị. 15A rẹ nyị oze ọsa ana a zịị ngụ ohweje ọnọọ. Ịta ana a sị jị oze ọnọọ ộ gọdọ tù ahụ ohurẹẹva rị ẹjịjị. Ọnị ọ rẹ nyị ọtụ ẹẹta beri aha ẹẹta ịzị ọtụ ẹnẹẹ jẹẹ tụ́. 16Avaba ịta ana kara ohweje ọnọọ vị ana a sị owu ozoza ana a ta vabẹ hi ịta anị. 17Ịkọpa a sị mẹ ka enyusẹ ẹkẹhị a sị mẹ enyusẹ ana nyị ịrẹsụ kẹrẹdẹẹ ana a sị za ọtụ ẹnẹẹ nị. Enyusẹ ọnọọ a rẹ sị mẹ ọchị ana a sị tụra wa nị. Dị a rẹ sị enyusẹ kú ẹbẹẹba anị nị. Avaba ọtụ ohweje ọnọọ ệ nyị ọchị ana a sị tụra wa. Enyusẹ ẹkẹhị a sị mẹ ọchị ẹnẹẹ nị. 18Oze ana zị naa ngụ ohweje ọnọọ ộ nyị ịta ana gẹ ẹ. Owu ēni e si hi ịta ọnọọ vị ana a ta vabẹ. Enyi anị vị onivuru, ọnịrị onivuru beri ovivi ene pō vabẹ ne beri ovivi. Dị a mẹ̀ ụkọrọ hị́ ọ ẹtẹẹtẹrẹ nị. Ịta ọnọọ ộ gọdọ tù ahụ ohurẹẹwụ. Vị ọ gana ne vene ịta ana kara ohweje ọnọọ nị. Ahụ ịhịmba rị ẹjịjị ọ gana vị nị. 19Ộ nyị ọtụ ẹẹna, dị ọ rẹ nyị aha ẹẹna ana a sị ịkọpa mẹ ịzị ọtụ ẹnẹẹ jẹẹ tụ́ nị. Enyusẹ ẹkẹhị a sị mẹ enyusẹ anị ana nyị ịrẹsụ kẹrẹdẹẹ ọnịrị ọchị ana tụra wa nị. Dị a rẹ sị enyusẹ ẹkẹhị kú ẹbẹẹba anị nị. 20Ịkọpa a sị mẹ avaba ẹka ajẹngụ ọnọọ ọnịrị ohweje ana kara a nị.

Enyusẹ ana a sị mẹ̀ ụkọrọ ịnị ịnẹ Ajẹngụ Ohomorihi

21Ịrịka avaba enyusẹ ana a sị mẹ̀ ụkọrọ Ajẹngụ Ohomorihi yị. Ịnị ajẹngụ ọnọọ a sị apoti oto tụ́ nị. Imosiisi kà Anireevi nịnị ẹ̀ chẹrẹ avaba ịsa ana a sị mẹ ajẹngụ ọnọọ. Ịzẹyịza dị ẹ vavọọ chẹrẹ ẹ tịtẹ nị. Ozi Eerọnị ohirẹsụ irehi Ohomorihi ana aā hị́ Ịtama ọ sị eyi pe aza ana a ka ẹ̀ chẹrẹ ịsa ọnọọ nị. 22Ọza ana mẹ avaba ịsa ẹnị Ẹnẹyịmavara kà a ka Imosiisi ọ̀ mẹ aā hị́ Ibezareri nị. Ibezareri ọnọọ vi ozi Ọọrị. Ihuri ana vi Ijuda ọ ma Ọọrị ọnọọ nị. 23Ọza ene pe Ibezareri mẹ̀ ụkọrọ ọnọọ aā hị́ Ohoriyabi nị. Ohoriyabi vị ozi Ahisamachị ana vị ịrẹsụ Ịdaanị. Ọnụna ọ vị nị, ọ yara mẹ ụkẹkẹ ẹtẹẹtẹrẹ, dị ọ rẹ yara sị owu onivuru ọnịrị owu ana sị ivuru ọnịrị ovivi pō enyi anị vabẹ ne beri owu ovivi ọnịrị owu ozoza mẹ̀ ụkọrọ hị́ ịnị ịta nị. 24Avaba igooru ana aza kụ́ va yị Ohomorihi ana a sị mẹ̀ ụkọrọ ajẹngụ ọnọọ vị igooru ẹnya ịrẹsụ oohu tụra ịhịịna. Ẹhụụ ẹnya ana a dọ ka ộ vị ẹnya ịrẹsụ ọnya a vavọọ sị sị ọ nị. 25#Kụra 30.11-16Enyusẹ ẹkẹhị ana aza kụ́ vẹ vị ẹnya ịrẹsụ ẹchẹhị tụra ọnya. Aza ana sị hụ ọ ana aā chẹrẹ kẹnẹ a za ẹẹnịnị ịrịka nị. Ẹhụụ ana a dọ ka ộ vị ẹnya ịrẹsụ ọnya a rẹ sị sị ọnọọ nị. 26#Imt 17.24Anka ana a dọ ka ộ vị ẹnya ịrẹsụ aanị, àa ka à na kà, enyusẹ ẹkẹhị ọnị ọza ịnya ọza ịnya sị vẹ ộ jẹẹ tụ́ ịrẹsụ ka aza ẹnị akahị-akahị oze ịhịnọnyị (6,000) ẹ và ụvọ bẹ tụ́ ịnị enyusẹ ẹnya ịrẹsụ ọnya nị. Aza ana sị gụ ịrayị oohu dà a vahịrẹ aā kà avọọ nị. Avaba ọpa aza ẹnẹẹ vị ẹnị akahị-akahị oze akata tụra ẹẹta ộ tụra akavarẹchẹhị tụra ẹvarẹwụ (603,550). 27Enyusẹ ẹkẹhị ẹnya ịrẹsụ ẹchẹhị a sị mẹ aha ọnị ọtụ ajẹngụ ọnọọ jẹẹ tụ́ ọnịrị ịzị a kụ́ ịta gẹ nị. Aha ẹchẹhị a vavọọ mẹ nị. Â sị enyusẹ ẹkẹhị ẹnya ịrẹsụ ọnya mẹ aha ọnya. 28Enyusẹ ẹkẹhị ana a sị mẹ enyusẹ ana nyị ịrẹsụ kẹrẹdẹẹ ana a sị za ọtụ ẹnẹẹ vị ana jị ha chee ịnị ẹnya ịrẹsụ ọnya. Ịnị anị a rẹ yà sị kú ẹbẹẹba ọtụ ẹnẹẹ, dị a rẹ sị mẹ ọchị ana a sị tụra wa nị. 29Enyusẹ ana aā hị́ ịkọpa ana aza kụ́ va yị Ohomorihi, vị ẹnya ịrẹsụ akatarẹchẹhị ộ tụra ọnya. 30Ọnọọ a sị mẹ aha ọtụ ana jẹẹ ịzị aa zị naa ngụ ịnị ajẹngụ ọnọọ nị. Ịnị anị a rẹ yà mẹ ụta ana a sị ịkọpa mẹ ọnịrị ịtanggọrọ anị ne beri avaba ẹnya ana aa sịị mẹ̀ ụkọrọ ịnị anị nị. 31Ịnị ịkọpa ọnọọ a rẹ yà mẹ aha ọtụ ohweje ana kara ajẹngụ ọnọọ ọnịrị oze ana a zị naa ngụ ọ ne beri ẹka ajẹngụ ọnọọ ọnịrị ẹka ohweje anị.

Currently Selected:

Ọyịkụra 38: EBTP

Highlight

Copy