Ịdanịyẹrị 7

Uye ẹẹna ọnị Ịdanịyẹrị re

1Ịnị ịrayị ịpaapa ọnị ọnọrụ anaā hị́ Iberisaza rị ohinọyị ẹtẹ Ịbabịrọnị. Ịdanịyẹrị ka ọnị me hụtẹtẹ dị ọnị aa sụ̀ ara, ọnị ộ rá ụra, dị a nyị ẹtẹ ọnị ọnị re nị. Ọ kà ọnị ộ chẹrẹ ụra ọnọọ ọnịrị avaba ẹtẹ ọnị ọnị ré tịtẹ. 2Ịdanịyẹrị ka, ọnị maa rá ụra ịrahụ, ọnị ô re ka ahị aa tụ́ kukuku hụrị eyi ụvọnị-ụvọnị ẹbẹẹba. Dị ọ mẹ ka enyi ịnị oku ộ dà vụụvụ nị. 3#Ẹtẹ 13.1; 17.8Kẹnẹ, dị uye ẹbanyị-ẹbanyị ẹẹna vana va jẹẹ ịrẹsụ okū ọnọnị nị. Ọ kà uye ẹyịna ẹnẹnị vị irenyi-irenyi. 4#Ẹtẹ 13.2Uye ịpaapa vị ana sị mẹẹ anka idu avọọ. Ama dị ọ nyị avaka ọkasịmẹ nị. Ịdanịyẹrị ka ọnị mẹ vavọọ e re e, dị a vana na avaka anị kwooze nị. Dị a sị uye ọnọnị vọrọ jẹẹ anka ọza avọọ nị. Dị a rẹ mẹ ka ọ̀ nyị ayị ọza nị. 5Uye ọhụva vị ana sị mẹẹ anka ẹzụ avọọ. Ọ kà oni ô re ka uye ọnọnị ộ kụ́ ahụ ẹẹva vọrọ jẹẹ, dị ọ kụ ẹchụkụ agịga ẹẹta tu irenu nị. Dị ọngwẹ ọnya vana kà a yị uye ọnọọ ka ọ̀ kwẹẹtẹ dị ọ naa rị uye ó mè ze e eyi kẹnẹ nị. 6Ịrẹma ọnọọ, ọnị mee yii re ẹtẹ, di oni vene re ka uye ọsa ọ va jẹẹ nị. Uye ọnọnị vana sị mẹẹ anka ọdụmị avọọ. Ama dị ọ nyị avaka ẹẹna anka avaka inomi avọọ tụ ịrẹma nị. Uye ọnọnị ộ nyị ịrẹsụ ẹẹna, dị a sị ụkata yọ ka ọ̀ọ mẹ ịjọva nị. 7#Ẹtẹ 12.3; 13.1Ịrẹma ọnọọ, di oni re re uye ọhụna ka ộ va jẹẹ nị. Ọnọnị ộ nyị ụkata ẹtẹẹtẹrẹ, ọza òo re e vị ayị aa hụrẹ ẹ ịnẹ nị. Anyị anị vị ana sị mẹẹ anka enyusẹ avọọ. Ịsị ọ̀ọ za vị ọnị ọọ̄ nà aa rị chẹkẹ-chẹkẹ, dị ọ sị ahụ gara ana vọ ha nị. Ọ kà uye ọnọnị e yi vene uye ana vọ ọnị ọnị vịdị re. Ọnọnị ộ nyị ọpanyị ẹẹwụ. 8#Ẹtẹ 13.5,6Oni mee re ọpanyị uye ọnọnị, kẹnẹ dị ọpanyị oweyi ọnya aanị vene nyì va jẹẹ ịnị ịrẹsụ uye ọnọnị nị. Dị ọpanyị ọnọọ hu ọpanyị ẹẹta ịnị ọpanyị ene vi di hi ịnị ịrẹsụ uye ọnọnị kwooze nị. Ọpanyị oweyi ọnọnị vị ana nyị eyi anka eyi ọza avọọ, dị ọ rẹ nyị irenu nị. Irenu anị vi e nee sii wo oto ọdẹngụ-ọdẹngụ.

Ẹtẹ ọnị Ịdanịyẹrị re ịnị ịpa ọzọkụ ọnya aanị.

9 # Ẹtẹ 20.4; Ẹtẹ 1.14 Ịdanịyẹrị ka ọnị mee re ẹtẹ, dị ọnị re ka ê to aga ohinọyị nịnị hi ẹtẹ nị. Dị ọnị re ka ọza ana ya ịzọọ hụrị ụmọrụmọ ka ộ va yaatụ ịnị aga ẹnẹẹ ọnya nị. Ịta ọnị ọza ọnọnị kụ hi ẹngụ vị ọvwọọvụ sẹnẹ-sẹnẹ, dị ẹyịrẹsụ anị â vwẹtẹ anka owu oyiche avọọ nị 10#Ẹtẹ 5.11; Ẹtẹ 20.12Dị ịra â dà wụụrụ ọvịdị anị nị. Ọkọnị aza ee ku ẹtẹ kụ ọ, dị aza otomiroku ẹnị rẹ jẹẹ ọvịdị anị nị. Ịjị ọmọkarẹyị nịnị sị yaatụ, dị ẹ hụ̀ iwe ana a chẹrẹ ịsa ọnị ọzọza mẹ hi ịnị anị nị. 11Ịdanịyẹrị ka ọnị mee yii re e, dị ọnị wụ ka ọpanyị oweyi ọnọọ ee yii wo oto nị. Kẹnẹ, dị a vana za uye ọhụna ọnọnị dị á wụ ọ, dị a rị oku anị ịra nị. 12Ọ kà, â yị sị ụmẹ chee yị uye ẹyịta ịpaapa ka ẹ̀ rị ra ịnị ẹhẹ, ama dị a dọ wa ụkata ẹnẹ ẹ yaa sị mẹ ịjọva nị. 13#Imt 24.30; 26.64; Ịmk 13.26; 14.62; Irk 21.27; Ẹtẹ 1.7,13; 14.14Ịdanịyẹrị ka ịnị ẹtẹ ọnị ọnị re ịrahụ, ọnị ô re ịsị ẹ sị mẹẹ anka ọza avọọ ka aa vẹ ịnị akakana eguhi. Dị a sị ọ ne tu ọza ana ya ịzọọ hụrị ụmọrụmọ aanị nị. 14#Ẹtẹ 11.15Ọ kà, â sị ụkata ọnịrị ụbanyị ohinọyịị yọ, agụvị dị avaba anẹhẹ ẹẹ hẹkẹ ẹ. Ụkata anị ọnịrị ịjọva ọnị ọ vaa mẹ̀ ẹ yị vaa nyị ẹzẹtẹ.

Iruvo Ẹtẹ ọnị Ịdanịyẹrị re

15Ịdanịyẹrị ka ẹtẹ ọnị ọnị re aanị ô hí oni irenu, dị ọ vị ẹngụkata yị ọnị ẹtẹẹtẹrẹ nị. 16Agụvị avọọ di oni ne tù ọza ịnyara ịnị aza ana jẹẹ ịzọọ ka ọ mẹ ẹhahi avaba ịrẹyị ẹnẹnị yị ọnị nị. Ịzẹyịza dị ọ kà a yị ọnị nị. 17Ọza ọnọọ ka, uye ẹbanyị-ẹbanyị ẹẹna ọnị ọnị re aanị vị ẹkụra ẹẹna ana vaa mẹ ịjọva Anịrẹsụ-ẹtẹ. 18#Ẹtẹ 22.5Ama, Ohomorihi ene hu kere-kere vaa sị ụkataa yị aza anị ẹnẹ ẹ vaa sị mẹ ohinọyị pooro zịna-zịna. 19Ọ kà ọnị ô si ka ọnị ọ̀ yẹ ịnị ịpa uye ọhụna ana vị irenyi yị uye ana vọ aanị hu avọọ. Uye ọnọọ ene divi pooro ọnị igege anị ọnịrị anyị anị sị mẹẹ anka enyusẹ avọọ, dị ọ̀ọ za ịsa dị ọ nà a rị, dị ọ sị ahụ gara ana vọ ha. 20Ọnị ê si ka ọnị ọ yẹ ịnị ịpa ọpanyị ẹẹwụ ọnị uye ọnọnị nyị tụ ịrẹsụ ọnịrị ọpanyị oweyi ene vene nyị di o hu ọpanyị ẹẹta kwooze aanị. Ọnị ô si ka ọnị yẹ ọpanyị oweyi ọnọọ ana nyị eyi ọnịrị irenu ene ee si wo oto ọdẹngụ-ọdẹngụ aanị. Ọnị ò divi huna avaba anda ẹnịnị ana vọ nị. 21#Ẹtẹ 13.7Ịdanịyẹrị ka ọnị mee yii re e, dị oni re ka ọpanyị ọnọọ ee pe aza Ohomorihi kụ̀ ịrẹkụ nị. Dị ụvọ anị aa kara wa nị. 22#Ẹtẹ 20.4Dị Ọza ana yara pooro zịna-zịna vẹ, dị ọ mẹ̀ ọkarẹyị yị wa nị, Ohomorihi ene hu kere-kere ộ jị ịhị yị aza nị. Ịjọnọọ dị a va sị ụkata yị aza Ohomorihi ka ẹ sịị mẹ ịjọva nị. 23Aanị á mẹ mẹ ẹhahi ịrẹyị ọnọọ yị ọnị nị. Ọ kà, uye ọhụna ọnọọ vị ẹkụra ọhụna ana vaa mẹ ịjọva anịrẹsụ ẹtẹ. Ẹkụra ọnọọ vaa vị irenyi yị avaba ana vọ. Vị ọ nyayịnẹ vaa sị ụyaa rị avaba anịrẹsụ-ẹtẹ nị. 24#Ẹtẹ 17.12Ọpanyị ẹẹwụ ọnị uye ọnọnị nyị vị ohinọyị ẹẹwụ ana vaa rị ịnị ẹkụra ọnọọ. Ịrẹma anị dị ohinọyị ọsa ọnị rẹ va rị. Ọ vaa vị irenyi yị avaba ẹnị ana vịdị rị. Ọ rẹ vaa dụ ohinọyị ẹẹta ịnị ohinọyị ịpaapa ẹnẹnịị kwooze. 25#Ẹtẹ 12.14; 13.5,6Ohinọyị ọnọnị vaa kà kẹnẹ-kẹnẹ hi Ohomorihi ene hu keekere, dị ọọ raa sị ụyaa rị aza Ohomorihi. O vee si ka ọnị ọ̀ vara ọda ana aza Ohomorihi a sị mẹ ahẹkẹ ọnịrị eche ẹnẹ ẹ rị. Avọọ ọ mẹ̀ vaa mẹ ịjọvaa tụra wa ịrẹsụ pooro dị ọ mẹ ịrayị ẹẹta rị ẹjịjị nị. 26Ama ọmọkarẹyị nịnị ene hi ẹbẹẹba vaa yaatụ dị ẹ mẹ̀ ọkarẹyị yọ. A vaa dọ ohinọyị ọnọọ ụkata anaa sịị mẹ ịjọva dị e vú ẹtẹ saka-saka. 27#Ẹtẹ 20.4; Ẹtẹ 22.5Ịjọnọọ, Ohomorihi ene hu keekere vaa sị ụkata ọnịrị ụbanyị ọ yị mẹ ịjọvaa chire aza anịị ụvọ. Ẹnịnị vaa mẹ ịjọva pooro zịna-zịna. Avaba ohinọyị ẹkụra nịnị vee ku ẹtẹẹ kụ́ wa, dị ẹ yaa wụ́ụ chire wa. 28Ịdanịyẹrị ka, avaba ẹtẹ ọnị ọnị re ịnị ụra anị yị. Ịrẹyị ẹnẹnị ệ vị angwahi yị ọnị, dị ẹngụ anị sị và hí nị. Ama dị ọnị sị avaba anị tụ ịnị ayị anị nị.

Currently Selected:

Ịdanịyẹrị 7: EBTP

Highlight

Copy

Compare