Ịdanịyẹrị 6

Ịdanịyẹrị ịnị ụsị Idu nịnị

1Ẹkụhị ọnya, ohinọyị Ịdarịyọsị ộ nyị aza ẹnị ẹchẹhị tụra oohu ka ẹ̀ vị Ịgọvọnọ ene vee pe ọnị sị eyi pe avaba ẹtẹ ọnị ọnị aa mẹ ịjọva anị. 2Dị ọ rẹ nyị Ịdanịyẹrị ọnịrị aza ẹnị ẹẹva ọsa ka ẹnịnị è si eyi pe Ịgọvọnọ ẹnẹnị nị. Ọ kà ẹnịnị e re ka ụkọrọ aa na ẹtẹẹrẹ. 3E yi kù dị ẹnịnị re ka Ịdanịyẹrị aa mẹ̀ ụkọrọ ẹtẹẹrẹ huni ẹnị ẹẹva ana vọ ana a ka ọnịrịị è si eyi pe Ịgọvọnọ nịnị nị. Ụkọrọ anị o re zoza huni ụkọrọ Ịgọvọnọ nịnị bẹẹ nị. Agụvị ka ụkọrọ anị ô zoza huni ẹnị ana vọ ẹtẹẹtẹrẹ, dị ohinọyị aa mẹ eto ka ọnị aa sị avaba ẹtẹ anị chire e ụvọ nị. 4Ịjọnọọ, dị ẹnị ana a ka è si eyi pe Ịgọvọnọ nịnị ne beri Ịgọvọnọ ẹnẹnị ee si iruvo Ịdanịyẹrị nị. E yee sì ịrẹyị ene e ve sii du ọ ka ẹ yị mẹ̀ ụkọrọ ẹtẹẹrẹ. Ama ẹnịnị e yi re ịsa sị ụvọ za, agụvị ka Ịdanịyẹrị vị anaa sị ịzẹyịzaa mẹ̀ ụkọrọ anị. 5Dị ẹ kà a yị ẹngụ nị ka, ẹnị e yi vee re ịsị a vọrọ ka ẹnị è si du Ịdanịyẹrị ẹ yị vị ịrẹyị oze ahẹkẹ anị. 6Dị ẹnịnị gẹ eyi dị e ne tu ohinọyị Ịdarịyọsị nị. Dị ẹ kụ ọ ka, ọ̀ taarụ! vi o vee ku orubo ọcha, dị o ku orubo ẹya nị. 7Ẹ ka, avaba ẹnị ọdọvịdị ẹkụra ẹ sị eyi gẹ ka ohinọyị ọ mẹ ọda ọnị ọza ẹ yị va nyayịnẹ sị ahụụ jịnẹ. Ẹ ka ọ̀ mẹ ọda ka asị a nyị ọza ene kuku họ̀ use ịsa hụụnị ụvọ ọza ọnyọọnyị ẹ yị vị hụụnị ụvọ ohinọyị ọnịnya kẹnẹ pooro dị ọ̀ mẹ ẹkụhị ohurẹẹwụ. Dị ọ̀ kà a ka ọza ene èe họ̀ use ịsa hụụnị ụvọ ọza ẹnẹsa, ọ̀ọ vị ori, ọ̀ọ vị ọzarẹyịrẹsụ vị e vee ne e ngụ ịnị ụsị ọbanyị ana a kụ idu nịnị hi nị. 8Dị ẹ ka, agụvị avọọ, ohinọyị ọ mẹ ọda ọnọọ anka ọda Animeedi ọnịrị Anipesiya nịnị ọnị ọza ẹ yị ma vara. 9Ịzẹyịza dị ohinọyị Ịdarịyọsị mẹ ọda ọnọọ, dị ọ sị ụvọ tụ ọ nị.

Ê ne Ịdanịyẹrị ngụ ụsị idu nịnị.

10Ịjị Ịdanịyẹrị sị yẹ ka â maanị sị ọda mẹ dị o si hu aa nọ ini eehi anị nị. Ô tụ ịnị eehi, dị ọ nọ ịrẹsụ ọtụrọsa, dị ọ na ozokete aku anị nị. Ozokete ọnọọ vana va eyi ka oze Ijerusarẹmị. Dị o ku ẹtẹ, dị aa mẹ̀ aduwaa hi Ohomorihi anka ọ mẹẹ̄ vịdị yịị mẹ nị. Ụpẹ ẹẹta ọọ̄ mẹ̀ aduwa ịnị ẹkụhị nị. 11Ịjị ẹnị ọnịvị Ịdanịyẹrị sị yẹ ka aa mẹ̀ aduwaa hi Ohomorihi, 12dị avaba ẹnịnị gẹ eyi dị e ne tu ohinọyị nị. Ịjị e tu ịzọọ dị ẹ họ̀ ohinọyị ka, áá vị ọ mẹ ọda ka pooro dị ọ mẹ ẹkụhị ohurẹẹwụ, asị a nyị ọza ene vene họ̀ use ịsa hụụnị ụvọ ọza ọnyọọnyị, asị e họ̀ use ịsa hụụnị ụvọ ori, ẹ yị vị hụụnị ụvọ anị kẹnẹ, ọnịrị ka ọza ana àa vavọọ mẹ, vị e vee ne e ngụ ịnị ụsị ana a kụ idu nịnị hi nị? Dị ohinọyị ka ịzẹyịza yọ, ọda ọnọọ vị ọnị ọnị mẹ ẹtẹẹtẹrẹ anka ọda Animeedi ọnịrị Anipesiya, ọnị ọza ẹ̀ yị zụ vara. 13Dị ẹnịnị va káa yị ohinọyị ka, ọnyara ịnị ẹnị ọrịhị ana a kụ hụrị Ijuda vẹ ana aā hị́ Ịdanịyẹrị ẹ yị saasa ọda ọnọọ. Ẹ ka ụpẹ ẹẹta aa yịị mẹ̀ aduwa ẹkụhị-ẹkụhị nị. 14Ịjị ohinọyị maanị wụ́ ịrẹyị ọnọnị kẹnẹ, dị ayị anị sị du nị. Dị o si oze pooro dị ẹtẹ hozi ịhị ọnọọ ka ọnị ọ dọ Ịdanịyẹrị há hụụnị ịrẹyị ọnọnị nị. 15Ama dị ọnịvị Ịdanịyẹrị ẹnẹnị gẹ eyi, dị ẹ varẹma ve tu ohinọyị dị ẹ ka, ộ yẹ́ ka ịdị Animeedi ọnịrị Anipesiya, ọda ọnị ohinọyị ọ̀ọ sị mẹ, ọza ọ ma kụkụ vara a. 16Ịzẹyịza dị ohinọyị mẹ ọda, dị ẹ na sị Ịdanịyẹrị, dị e ne e ngụ ịnị ụsị idu nịnị nị. Dị ohinọyị kà a yị Ịdanịyẹrị ka, Ohomorihi anị ọnị ọ sị ịzẹyịza aa hẹkẹ ọ̀ va dọ ọ ha nị. 17Dị ẹnịnị zịna ịrẹta ọbanyị dị ẹ sị gu ụsị ọnọọ irenu nị. Dị ohinọyị ọnịrị ẹnị ọdọvịdị ẹkụra na mẹ apọtẹrẹwa ẹnịnị tụ ịnị ịrẹta ọnọọ agụvị asị a nyị ọza ana nọ ịzọọ na mẹ ịsọnyị-ịsọnyị hi Ịdanịyẹrị nị. 18Dị ohinọyị varẹma nọ ịnị eehi anị nị. Ô tu ini eehi, ẹ yị rị ịsa, ẹ hyakụ dọ ka ọnị ọ mẹ ayị ohine ọnyọọnyị, dị ẹ̀ yị rẹ zụ sụ ara ịrahụ nị.

Ohinọyị ô ro ịnẹ varẹma agụvị ka ẹ yị nyị ịsị ẹ mẹ̀ Ịdanịyẹrị.

19Ini etumeyọnị, dị ohinọyị kwẹẹtẹ eyiha-eyiha, dị ọ nọ ịnị ụsị ene e ne Ịdanịyẹrị ngụ nị. 20Ịjị o tu ịzọọ, ayị anị vị ene du, dị o nowu, dị ọ ka: Ịdanịyẹrị, ọnụtụ Ohomorihi ana yara! Ohomorihi awụ ọnị ụ waa sị ịzẹyịzaa hẹkẹ ọ́ọ́ sị ụ dọ tụ hụụnị ụvọ idu nịnị kẹ? 21Dị Ịdanịyẹrị tụ ọ ohi dị ọ ka, vị ohinọyị ọnọnị vee ku orubo ọcha, dị ọ ku orubo ẹya nị. 22Ọ kà, Ohomorihi ộ tụ anggẹẹrị anị va sị ịsa kú idu nịnị irenu ka asị ẹ zụ mẹ̀ ọnị ịrẹyị. Agụvị ka ộ yẹ ka ẹ yị nyị odivi ọnị ọnị mẹ, dị ẹ̀ yị rẹ nyị odivi ọnị ọnị mẹ hi ẹwụ ohinọyị nị. 23Ịjị ọnọọ dị ayị ohinọyị sị hine ne hu nị. Dị ọ wụsẹ mẹ ọda ka è ve tura Ịdanịyẹrị hụụnị ụsị ọnọọ nị. Ịzẹyịza dị e tura a tụ ẹhẹ nị, dị ẹnịnị re ka ẹ rẹ va nyị ịsị ẹ mẹ̀ ẹ, agụvị ka ộ sị ayị tụra Ohomorihi nị. 24Dị ohinọyị ọnọnị mẹ ọda ka à na zá avaba aza ana sị ịrẹyị Ịdanịyẹrị va tụ ịrẹka nị. Ịzẹyịza dị a na zá wa nị. Dị a kụ wa beri ezi ẹnịnị ọnịrị ose ẹnịnị, dị e ne wa và hí ịnị ụsị ana kụ idu nịnị hi nị. Dị a naa nyị ka ê tu ẹtẹ idu za wa, dị ẹ nà wa rị chẹ́kẹ̀-chẹ́kẹ̀ nị. Ẹchụkụ ẹnịnị ikonyara ẹ yị hyakụ vẹtẹ. 25Ohinọyị ộ chẹrẹ iwe tu hi avaba Anịrẹsụ ẹtẹ nị. Dị ọ kụ wa nị. 26Ọ kà, ọnị ộ mẹ̀ ẹ ọda ka ịnị avaba anẹkụra ọnị ọnị vị ohinọyị ẹ̀ sị ụbanyị yị Ohomorihi ọnị Ịdanịyẹrị aa hẹkẹ, dị ee hí angwa anị. Agụvị ka, ọnị ọ vị Ohomorihi ana yara pooro nị. Ọnị ọ rẹ vaa mẹ ịjọva pooro nị. Ẹ yị nyị ọza ene ve zụ vú ịjọva anị ọnịrị ụkata anị ẹtẹ. 27Ọ kà, Ohomorihi ọnọọ ọọ̄ dọ ọzaa há hụụnị avaba ịrẹyị odivi nị. Ọnị ọọ̄ mẹ̀ ịvọpa ọnịrị ịtọmatapa ẹbẹẹba ọnịrị ịnị ẹhẹ nị. Ọnị ọnọọ ọ dọ Ịdanịyẹrị há ka asị idu nịnị zụ wụ ọ nị. 28Hụrị ịhị ọnọọ hụrị ịhị ọnọọ ẹ vana sị Ịdanịyẹrị tụ udi obobooro nị. Ụmẹ ọnọọ Ịdarịyọsị ọnịrị ọnọrụ ana aā hị́ Ịsayịrọsị ana vị Anipesiya sị vị ohinọyị nị.

Currently Selected:

Ịdanịyẹrị 6: EBTP

Highlight

Copy

Compare