2 Ohinọyị 22

Ụmẹ ọnị Ijosaya sị vị Ohinọyị

(2 Ịtọ 34.1-2)

1 # Ijer 3.6 Ijosaya vị ozi ịrayị ịhịnta ịnị ụmẹ ọnị ọ sị rị ohinọyị Ijuda, dị ọ mẹ̀ ẹ ịrayị ohurẹẹwụ tụra ọnya Ijerusarẹmị nị. Ịrẹha ọnyị anị ọ rị Ijedida ana vị ozi Adaya. Anẹkụra Ibozikati ọ vị nị. 2Ộ mẹ̀ ebira ene hine Ẹnẹyịmavara ayị. Ộ saasa ebira ọyịza Idevidi ana vị ohiku anị. Ộ nyayịnẹ sị ahụ ku avaba ọda Ohomorihi.

Ê re iwe ọda

(2 Ịtọ 34.8-28)

3Ịnị ịrayị ana tụ ọ ịrayị ẹwụrịhịnta ọnị Ijosaya rị ohinọyị, ộ tụ́ ọchẹrịsa anị ana aā hị́ Ịsahwanị, ozi Azarịya ozi Ịmẹsụramị nọ ịnị irehi Ẹnẹyịmavara. 4Ọ kà Ịsahwanị o ne tụ́ Ihirikaya ohirẹsụ ọbanyị irehi Ohomorihi ohirẹsụ, dị ọ dọ enube ẹkẹhị ọnị ohirẹsụ irehi Ohomorihi nịnị ene e sere oze irehi Ohomorihi dọ hụụnị ụvọ aza. 5Ịsahwanị ọ kà yọ ka ọ sị ẹkẹhị ọnọọ yị anụkọrọ ene si eyi pe ụkọrọ irehi Ohomorihi ene ee tenyi. Aza ẹnẹẹ ẹ vị 6ikahunta nịnị, ọtụrarehi nini, anụkọrọ ana vọ. Dị ẹnịnị ẹ rẹ hị́ ọchị ọnịrị ịrẹta enee sii tenyi irehi. 7#2 Ohi 12.15Anọrụ ana sị eyi pe ụkọrọ ọnọọ ệ nyị ịzẹyịza. Ẹ yị nyị ka ẹ va kà a ẹ mẹmẹ aa sị ẹkẹhị mẹ̀ ụkọrọ. 8Ịsahwanị ọchẹrịsa ọ kà ụtụ ohinọyị yị Ihirikaya, dị Ihirikaya ka yọ ka ọnị o re re iwe ọda ịnị irehi Ẹnẹyịmavara. Dị ọ sị iwe ọnọọ yị Ịsahwanị dị ọ kà a nị. 9Dị Ịsahwanị ọchẹrịsa varẹma na ka enube yị ohinọyị ka ezi ahụ anị ẹ raà sị ẹkẹhị ana ya ịnị irehi Ẹnẹyịmavara yị anọrụ ene sị eyi pe irehi oyitenyi nị. 10Dị Ịsahwanị kà yị ohinọyị ka, iwe ọnị Ihirikaya sị yị ọnị yị. Dị sị ọngwẹ tụ́ ẹba za a ịrịka zụ ohinọyị nị. 11Ịjị ohinọyị wụ́ ọ mẹ za iwe ọnọọ ịrịka kẹnẹ, dị ọ na awuru anị hi ẹngụ. 12Dị ọ mẹ ọda yị Ihirikaya ọnịrị Ahikami ozi Isahwani beri Akibọ ozi Imikaya, ọnịrị Ịsahwanị ọchẹrịsa ne beri Asaya ozi ahụ ohinọyị. 13Ohinọyị kà ẹnịnị ẹnẹ na họ̀ Ẹnẹyịmavara yị ọnị ọnịrị aza ana vọ tụ Ijuda ịsị ana ya ịnị iwe ene e hee aanị. Ộ ka Ẹnẹyịmavara ô du ayị hi ẹnị agụvị ohiku ẹnịnị ana mẹ̀ akamawụ hi ịrẹyị anị, dị ẹ̀ yị mẹ̀ ịsị iwe ọnọnị kà a vọrọ ka a mẹ. 14Ihirikaya, Ahikami, Akibọ, Ịsahwanị, ọnịrị Asaya ọnị ohinọyị tụ́ ụtụ ene tụ́ ọnẹẹ ọnịsẹ ọnya aanị ana a hị́ Ihurida ana ra aha ọwọọwa Ijerusarẹmị. Ẹnịnị e juwe yọ ịsị ẹ mẹ. Ọva ọnẹẹ ọnọọ ọ rị Isarumi ana vị ozi Itikiva, ozi Iharihasi. Ọnị ọ vị ọza ene si eyi pe awuru ene hi ini irehi Ohomorihi. 15Ọnẹẹ ọnịsẹ ọnọnị kà a yị wa ka Ẹnẹyịmavara Ohomorihi Isirẹrị ka ẹ varẹma ne tu ohinọyị dị ẹ̀ kà yọ. 16Ịrẹyị ọnị Ẹnẹyịmavara kà. Ọ kà ọnị vaa sị ụya rị Ijerusarẹmị ọnịrị avaba anẹkụra ọnọọ anka ozirenu ana a chẹrẹ tụ́ ịnị iwe ana a za ịrịka zụ́ ohinọyị Ijuda. 17Ẹnẹyịmavara kà ẹnịnị ệ raà va ịrẹma na mẹ̀ ịsọvọ yị ori nịnị. Avaba ịsa ẹ mẹ o re du ọnị ayị. Agụvị avọọ ọnị aa kụ́ ayị hi Anijerusarẹmị nịnị. Ọyịkụ anị ọ yị vaa ta. 18Aa vị ohinọyị Ijuda ụvọta yọ, Ẹnẹyịmavara Ohomorihi Isirẹrị kà yị. Ọ kà ộ wụ́ ịrẹyị ana chẹrẹ tụ́ ini iwe ọnọọ, 19ka ô ro ịnẹ, dị ọ va ẹngụ anị nẹtẹ, dị ọ na awuru anị hi ẹngụ, dị ọ sụ ùnè agụvị ka ộ wụ́ ka oni o chi hi wa ka ọnị vaa sị ụya rị Ijerusarẹmị ọnịrị aza ene hi ịzọọ. Ẹnẹyịmavara kà ọnị ọ raà wụ́ aduwa anị. 20Ọnị ẹ yị vaa sị ụya ọnị ọnị aa kà rị Ijerusarẹmị eyi anị. Ọnị vaa navọ ọ ka o su ini ẹngwọọrọ da. Dị anọrụ ẹnẹẹ sị enube ọnọọ vavẹ ne tu ohinọyị Ijosaya nị.

Currently Selected:

2 Ohinọyị 22: EBTP

Highlight

Copy

Compare