2 Ohinọyị 21

Ịmanasẹ ộ vị ohinọyị Ijuda

(2 Ịtọ 33.1-20)

1Ịmanasẹ vị ịrayị ẹwụrẹva ịnị ụmẹ ọnị ọ sị rị ohinọyị. Ộ vị ohinọyị tụ́ Ijerusarẹmị ịrayị ẹvarẹwụ. Ịrẹha ọnyị anị ọ rị Ihepiziba nị. 2#Ijer 15.4Ịmanasẹ vị ana mẹ̀ ebira odivi ọvịdị Ẹnẹyịmavara, ộ saasa ebira odivi anẹkụra ọnị Ẹnẹyịmavara dọ ẹtẹ eyi Anisirẹrị nịnị na mẹ̀ ịsa ana vị enyisi anị. 3Ô tenyi irehi ọgọdọ-ọgọdọ ọnị ada anị Ihezekaya wú ha dà. Di o hi ụta yị ori ana a hị́ Ịbaarị, dị hi ọchị yi ori ọnẹẹ ana a hi Asẹra anka ohinọyị Ahabị mẹ vịdị mẹ̀. Dị aa vaku ẹtẹ hẹkẹ ụzọmị ene hi ịnị ihinẹba nị. 4#2 Ịsa 7.13Avọọ ô me re hi ụta ori hi ịnị irehi Ẹnẹyịmavara, ịzị ọ ka a vaa ya hẹkẹ ọnị. 5Ịmanasẹ ô hi ụta ịzị aa hẹkẹ ụzọmị tụ́ ịnị ohweje ẹyịva irehi Ẹnẹyịmavara. 6Ô si ozi ọnọrụ mẹ̀ ịsọvọ, ana aā rị ịra yị ori, dị ee re ẹtẹ, di aa ha ẹva, di ee pè arịjẹnụ ka ịrẹyị nị. 7#1 Ohi 9.3-5; 2 Ịtọ 7.12-18Dị ọ sị ọchị ori Asẹra ana a bẹ tụ́ ịnị irehi Ohomorihi nị, ịzị Ẹnẹyịmavara ộ kà yị Idevidi ọnịrị Isoromọnị ozi anị ka ịzọọ ọnị nyị ka avaba ịrẹsụ Anisirẹrị vaa ya hẹkẹ ọnị nị. 8Ẹnẹyịmavara kà Anisirẹrị nịnị ẹ̀ẹ saasa avaba ọda anị, dị sị ụvọ za avaba ọda ọnị Imosiisi ozi ahụ sị yị wa nị, ọnị ẹ yị vaa zẹ ka a dụ wa hụụnị ẹtẹ ọnị ọnị sị yị ohiku ẹnịnị. 9Ama aza ene hi Ijuda ệ yị wụ́ chire Ẹnẹyịmavara, Ịmanasẹ ộ kụ́ wa ku ịrẹma na mẹ̀ ebira odivi ene hụụnị anẹkụra ọsa ọnị Ẹnẹyịmavara dụ hụrẹ ẹtẹ ọnọọ eyi Isirẹrị nịnị. 10Ẹnẹyịmavara ộ kà a yị ọnịsẹ ana vị ezi ahụ anị ka, 11Ohinọyị Ịmanasẹ ộ raà mẹ̀ ịsa enyisi ene divi huu Anamọrị nịnị mẹ̀. Ọnịrị ori anị ẹ raà kụ́ aza ene hi Ijuda na mẹ̀ ịvị. 12Avọọ, Ẹnẹyịmavara Ohomorihi Isirẹrị ka ọnị vaa kụ́ odivi tụ́ Ijerusarẹmị ọnịrị Ijuda ọnị aza ọ̀ọ wụ́ dị ọ su wa ẹngụ. 13Ộ kà a ọnị vaa sị ụya rị aza ene hi Ijerusarẹmị anka ọnị mẹ mẹ̀ Ịsamarịya nịnị, a vị anka Ahabị ohinọyị Isirẹrị ọnịrị evere anị, ộ kà ọnị vee vu aza ene hi Ijerusarẹmị ẹtẹ anka ịchachọ̀rịsa ana a nyịna va ku avọọ. 14Ẹnẹyịmavara kà ọnị vaa hụrẹ wa ụvọ, dị ọnị sị wa chire ọnịvị ẹnịnị ụvọ. Dị ẹ rị wa, dị ẹ dọ wa ẹtẹ. 15Ọnị vavọọ vaa mẹ̀ aza anị agụvị ka ẹnịnị ẹ raà rị ịvị anị dị ẹ raà mẹ̀ ayị kụ́ ọnị hụụnị ụmẹ ọnị ohiku ẹnịnị jịnẹ hụrẹ Ijipiti va ngụ ụmẹ ọnọọ. 16Ịmanasẹ ộ wụ̀ aza ọrụrụ-ọrụrụ ẹnẹ ẹ yị nyị ịsị ọ mẹ̀, dị ee sí chava avaba aha Ijerusarẹmị nị. Ịrẹma ịvị ọnọnị, dị ọ rẹ mẹ ka aza ene hi Ijuda ẹ mẹ̀ ebira odivi ọvịdị Ẹnẹyịmavara nị. 17Avaba ịsa ọnị Ịmanasẹ mẹ̀ beri ebira odivi ọnị ọ mẹ̀ vị ana a chẹrẹ tụ́ iwe ịtọpa ohinọyị Ijuda nịnị.

Ụmẹ ọnị Amọnị vị ohinọyị Ijuda

(2 Ịtọ 33.21-25)

18Ịmanasẹ ô su, di e ne e tụ́ ịnị ụbazị ịnị eehi ohinọyị ọnị Uza dà. Ịrẹma anị ozi anị Amọnị rị ohinọyị tụ́ udi anị nị. 19Amọnị vị ịrayị ohurẹẹva ịnị ụmẹ ọnị vị ohinọyị Ijuda, dị ộ mẹ̀ ohinọyị ịrayị ẹẹva Ijerusarẹmị. Ọnyị anị ọ rị Ịmẹsụrẹmẹtị, ozi Iharuzi ana vị anẹkụra Ijotiba. 20Anka ada anị Ịmanasẹ, ộ rị ịvị Ẹnẹyịmavara 21Ộ saasa ebira odivi ada anị, dị ộ hama ada anị hẹkẹ avaba ori ọnị ada anị raà hẹkẹ nị. 22Amọnị ô yi Ẹnẹyịmavara Ohomorihi ohiku anị, dị ọ mẹ akamawụ hi ọda Ẹnẹyịmavara. 23Ezi ahụ anị nịnị e gẹ eyi dị ẹ wụ̀ ohinọyị Amọnị ịnị eehi anị nị. 24Anijuda nịnị ệ wụ̀ aza ana wụ̀ Amọnị, dị ẹ sị ozi anị Ijosaya rị ohinọyị tụ́ udi anị. 25Avaba ịsa ọnị Amọnị mẹ̀ vị ana achẹrẹ tụ́ ini iwe ịtọpa ohinọyị Ijuda nịnị. 26Oku Amọnị vị ene e ne tụ́ ịnị ụbazị Uza, dị ozi Ijosaya rị ohinọyị dọ ọ ịrẹsụ nị.

Currently Selected:

2 Ohinọyị 21: EBTP

Highlight

Copy

Compare