2 Ịtọpa 6
6
Isoromọnị ộ kà ịrẹyị yị Anisirẹrị
(1 Ohi 8.14-21)
1Ịjị ọnị ẹtẹ vavọọ sị za ku, dị Isoromọnị kà a Ẹnẹyịmavara ọ nyị ka ọnị aa ra ịnị eguhi ruma-ruma nị. 2Ama booro aanị, ọnị ọ raà dà irehi ọbanyị ozoza yị Ẹnẹyịmavara kà ọ vị irehi anị pooro zịna-zịna. 3Dị Isoromọnị vara eyi ka ịragụ Anisirẹrị anaa jẹẹ, dị ộ mẹ̀ aduwa yị wa nị. 4#2 Ịsa 7.1-13; 1 Ịtọ 17.1-12Ọ kà ọnị ộ kụ́ Ẹnẹyịmavara, Ohomorihi Anisirẹrị avọ agụvị ka ộ mẹ̀ ịsa ọnị ộ kà yị ada anị Idevidi. Ẹnẹyịmavara kà a, 5hụrị ụmẹ ọnị ọnị sị kụ aza anị jịnẹ hụrẹ Ijipiti, ọnị ẹ yị nyị ẹkụra ọnị ọnị nyị ka a dà irehi tụ́ yị ọnị. Ọnị ẹ yị rẹẹ̀ nyị ọza ọnyọọnyị ka ọ vị ohinọyị yị Anisirẹrị nịnị. 6Ama booro aanị, ọnị ọ raà nyị Ijerusarẹmị ka ọ vị ịzị a vaa yaa hẹkẹ ọnị. Avọọ ọnị mẹ rẹẹ̀ nyị Idevidi ka ọ vị ohinọyị Anisirẹrị nị. 7Isoromọnị kà a, ada anị Idevidi ộ mẹ̀ eto ka ọnị ọ dà irehi yị Ẹnẹyịmavara ana vị Ohomorihi Anisirẹrị. 8Dị Ẹnẹyịmavara sị ohi yọ kà ô zoza ka ada anị o si ka ọnị ọ dà irehi yị ọnị. 9Ama ọ yị vaa dà a. Ozi anị ụvọta ọ vaa dà irehi anị nị. 10Isoromọnị kà a Ẹnẹyịmavara ọ raà mẹ̀ ịsa ọnị o wo oto anị. Ọnị ọ kụkụ vị ohinọyị tụ́ udi ada anị. Ọnị ò raà dà irehi ịzị a vaa ya hẹkẹ Ẹnẹyịmavara ana vị ohinọyị Anisirẹrị nịnị. 11Dị ọnị rẹ raà sị apoti oto ọnị Ẹnẹyịmavara sị hị́ eku yị Anisirẹrị nị. Ịrẹta ẹẹva oto ọnọọ ọ ya ịnị ịnẹ apoti ọnọọ nị.
Aduwa ọnị Isoromọnị mẹ̀
(1 Ohi 8.22-53)
12Eyi aza ana gụ, Isoromọnị jẹẹ ọvịdị ụta ịsọvọ Ẹnẹyịmavara dị ọ va ụvọ hịrẹ mẹ̀ aduwa nị. 13Isoromọnị ộ vịdị ra sị enyusẹ mẹ ụta ana gọdọ ẹtẹ ahụ ịhịmba rị ẹjịjị, dị ọ rẹ gana ahụ ịhịmba rị ẹjịjị, dị ọ nẹba ahụ ẹẹna rị ẹjịjị. Ụta ọnọnị vị ọnị ọ sị tụ́ ịnị akakana ohweje eyi ẹhẹ ana gụrị ụta ịsọvọ. Isoromọnị ộ hịrẹ ụta ọnọọ, dị ọ va eyi ka ụta ịsọvọ ọvịdị ịragụ ana ya ịrẹma anị, dị ọ va ụvọ hịrẹ, di o ku ẹtẹ, 14dị ọ mẹ̀ aduwa, dị ọ kà a Ẹnẹyịmavara Ohomorihi Anisirẹrị ọ nyị ẹbẹẹba ọnịrị ẹtẹ nị. Ẹ yị nyị ori ana ya anka ọnị, ộ saasa ịsa oni o wo oto anị yị aza anị, di o sì ịrẹyị aza ana sị avaba ayị ẹnịnị saasa ịrẹyị anị nị. 15Ộ raà mẹ̀ ịsa ọnị o wo oto anị yị ada anị Idevidi. Avaba ịrẹyị ọnị ọ kà ộ sẹ ajịnị. 16#1 Ohi 2.4Ọ rẹ wo oto ka ẹ yị vaa nyị ụmẹ ọnya ana ahịka ẹ yi vị anovwoovu Idevidi aa rị ohinọyị Isirẹrị ẹnịnị ẹ̀ẹ sị vụrụ saasa ọda anị anka ọnị. 17Isoromọnị ộ dà ịpẹ ka Ẹnẹyịmavara ọ mẹ̀ ịsa ọnị ọ ka yị ozi ahụ anị Idevidi. 18#2 Ịtọ 2.6Ama ọ́ọ́ vaa ra ịnị akakana aza ịrẹma ọnị avaba ẹbẹẹba ẹ yị dọ ọ ya? Irehi anị ọnị ọ dà aanị wáá vaa dọ ọ ya? 19Ọ kà Ẹnẹyịmavara Ohomorihi anị ọ wụ́ aduwa anị dị ọ mẹ̀ ịsa ọnị ọnị aa pa a. 20#Ọda 12.11O sere irehi anị ọnọnị ọọdụ ọnịrị ịrahụ. Ô wo oto ka ịzọọ a vaa hẹkẹ ọnị nị, avọọ ọ wụ́ aduwa anị ụmẹ tụra ụmẹ ọnị ọnị òo va eyi ka aa mẹ̀ aduwa. 21Ọ navọ ọ wụ́ aduwa anị ọnịrị aza anị Anisirẹrị ịnị ụmẹ ọnị ẹnị ẹ̀ẹ va ka ịzọọ aa mẹ̀ aduwa. Ohomorihi ọ wụ́ aduwa ẹnịnị, dị ọ vagu ẹnị hụrị ẹbẹẹba ini eehi anị chi vẹ. 22Ụmẹ ọnị àa sị ọza vẹ ịrẹsụ ụta ịnị irehi ọnọnị va hị́ eku dị aa yẹ ọ̀ọ rị ịvị ọnọhụva anị, 23navọ Ẹnẹyịmavara wa wụ́ ẹbẹẹba, dị wa mẹ̀ ọkarẹyị sị ụya rị ọza anaa rị ịvị, dị wa jị ịhị yị ọza ẹnẹ ẹ yị rị ịvị. 24Ụmẹ ọnị ọnịvị ẹ̀ẹ sị huna aza awụ Isirẹrị agụvị ka ẹ raà mẹ̀ ebira hi wu. Ẹnịnị èe ro ịnẹ, dị ẹ va ẹngụ nẹtẹ, dị ẹ vẹ ịnị irehi ọnọnị va pa ẹvagu nị, 25wụ́ aduwa ẹnịnị hụrẹ ẹbẹẹba dị ụ wa vagu aza awụ, di u waa va wa varẹma vẹ ịnị ẹtẹ ọnị ụ raà sị yị ẹnịrị ohiku ẹnịnị. 26Wàa za orihi jẹẹ aza awụ ẹ̀ẹ mẹ̀ ebira odivi hi wu. Ẹnịnị èe ro ịnẹ, dị ẹ va eyi ka irehi Ohomorihi, dị ẹ va ẹngụ nẹtẹ, dị ẹ mẹ̀ aduwa, 27Ẹnẹyịmavara wụ́ aduwa ẹnịnị, dị ụ waa vagu ezi ahụ awụ Anisirẹrị nịnị, dị ụ wa zụ wa ka ẹẹ mẹ̀ ịsa ana vọrọ. Dị ụ wa varẹma zụ̀ orihi tụ́ ịnị ẹtẹ ọnọnị ọnị ụ sị yị aza awụ ka ọ vị ogu ẹnịnị pooro zịna-zịna. 28Àa nyị ụngwẹ ịnị ẹtẹ, a vị ụkụ, a vị ka ịsa ịnị aarẹ o du ha agụvị ka ahị ịrịịra ộ wara a ha, a vị ka okoni akụvarịva ệ rị ọ. 29Batọ dị ụ wa wụ́ aduwa ẹnịnị. Àa nyị ịnị aza awụ ọnị ọ zị ẹngụ ka ọnị ọ̀ tana ụvọ hi irehi Ohomorihi dị ọnị ọ mẹ̀ aduwa. 30Navọ wa wụ́ aduwa ẹnịnị. Be wa atọ ịnị eehi awụ ẹbẹẹba, dị u wa vagu wa. Ẹwụ kẹnẹ ọ yẹ ịsị ẹ vị ariro ọzọza nị. Mẹ̀ ẹhụ ọpa ebira ọzọza hi wa, 31agụvị ẹnịnị ee hí angwa awụ, dị ẹ wụ́ chire wu ịnị avaba ụmẹ ọnị ẹnịnị ẹ sị ra ịnị ẹtẹ ọnị ụ sị yị ohiku ẹnịnị. 32Ụmẹ ọnị ọzọza ana ra aha onoze ẹ̀ẹ wụ́ ụ mẹmẹ nyị ụkata, dị ụ ngụrẹyị ọnịrị ụ mẹmẹ tenyi ẹngụ ee zi, dị ẹ vaa mẹ̀ aduwa ịnị irehi awụ ọnọnị. 33Wụ́ aduwa ọza ọnọọ, dị ụ wa mẹ̀ ịsa ọnị òo họ̀ use anị yọ agụvị avaba anẹhẹ ẹ yẹ wụ, dị ẹ wụ́ chire wụ anka aza Anisirẹrị. Ẹnịnị vaa yẹ ka ịnị irehi ọnọnị a vọrọ ka aa hẹkẹ wụ nị. 34Wàa mẹ ọda yị aza awụ ka ẹ nọ ịrẹkụ ọnịvị ẹnịnị. Ẹnịnị ẹ̀ẹ mẹ̀ aduwa ịzị ẹ̀ẹ ya, dị ẹ va eyi ka ẹkụra ọnọnị ọnị ụ sị nyị ọnịrị irehi awụ ọnị ọnị dà tụ́ ịzọọ yị wụ, 35sị ụtọ pe aduwa ẹnịnị. Wụ́ aduwa ẹnịnị hụrẹ ẹbẹẹba, dị ụ wa sị wa nyị ehuna ọnịvị ẹnịnị. 36Aza awụ ẹ̀ẹ rị ịvị awụ, agụvị ka ẹ yị nyị ọza ẹnẹ ẹ yị ma mẹ̀ ịvị. Wàa kụ́ ayị hi wa, dị ụ hụrẹ wa ụvọ yị ọnịvị ẹnịnị ka ẹ za wa ọrịhị nọ ẹkụra ọsa, ọ̀ọ daka vị ẹkụra ene noze. 37Wụ́ aduwa aza awụ. Ẹnịnị èe ro ịnẹ ịnị ẹkụra ana za na ngụ, dị ẹ dọ irenu ịvị ọnịrị ebira ọhịmị ẹnịnị, dị ẹ da ịpẹ yị wụ nị, dọ aduwa ẹnịnị kwogwo Ẹnẹyịmavara. 38Ẹnịnị ẹ̀ẹ sị ịzẹyịza ro ịnẹ ịzọọ, dị ẹ mẹ̀ aduwa yị ẹtẹ ọnịrị ẹkụra ne beri irehi awụ ọnị ọnị da yị wụ nị. 39Navọ ọ wụ́ aduwa ẹnịnị hụụnị eehi anị ẹbẹẹba, dị ọ vayị ẹnịnị, dị ọ vagu wa ịnị ịvị ẹnẹ mẹ̀. 40Isoromọnị ka Ohomorihi anị ò re ẹnị, dị ọ wụ́ aduwa ọnị ẹnị mẹ ịzọọ. 41#Ahẹ 132.8-10Ọ kà Ẹnẹyịmavara Ohomorihi ọ̀ kwẹẹtẹ beri apoti oto anị ana vị ịsa ụkata anị, dị ọ ngụ ịnị irehi anị na ya pooro zịna-zịna. Ọ mẹ ka o zee yi ohirẹsụ irehi Ohomorihi ịnị ịsa tụra ịsa, dị ọyịza ọnị aa mẹ̀ yị wa ọ vị ayohine avaba aza anị. 42Ẹnẹyịmavara Ohomorihi ọ navọ asị ọ yi ohinọyị ọnị ọ nyị. Ọ tamayị oyisì ọnị ọ nyị yị ozi ahụ anị Idevidi.
Currently Selected:
2 Ịtọpa 6: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
