2 Ịtọpa 5

Â sị apoti oto vẹ ịnị irehi Ohomorihi

(1 Ohi 8.1-9)

1 # 2 Ịsa 8.11; 1 Ịtọ 18.11 Ịjị avaba ụkọrọ irehi Ẹnẹyịmavara ta Isoromọnị mẹ̀, dị ọ kụ́ avaba ẹnya ọnị ada anị Idevidi vịdị sị yị Ẹnẹyịmavara va tụ́ ịzị aa kụ́ ẹnya hi ịnị irehi Ohomorihi nị. Ộ kụ́ isiriva ọnịrị igooru ne beri avaba ẹnya ana vọ na hi ịzọọ. 2#2 Ịsa 6.12-15; 1 Ịtọ 15.25-28Dị ọ hị́ avaba azọkụ ọnịrị ohi ịrẹsụ-ịrẹsụ, ne beri ohi abara-abara ene hi Isirẹrị vẹ Ijerusarẹmị ka ẹ na sị apoti oto Ẹnẹyịmavara hụrẹ Ịzayọnị ana vị ẹkụra Idevidi. 3Ịzẹyịza, dị avaba Anisirẹrị kụ ẹngụ gụ ịnị ụmẹ ana aā sị rị eche ajẹngụ ịnị ụhwẹ ịhịmba ịrayị nị. 4Ịjị avaba azọkụ Anisirẹrị nịnị sị gụ, dị Anireevi nịnị sị apoti oto ọnọọ nị. 5Dị ệ sị ọ na tụ ịnị irehi Ohomorihi, dị ohirẹsụ irehi Ohomorihi nịnị ọnịrị Anireevi nịnị kụ́ ajẹngụ anị ọnịrị ẹnya ene hi ịnị anị va tụ́ ịzọọ nị. 6Isoromọnị ohinọyị ọnịrị avaba ịragụ ya ọvịdị apoti oto dị ẹ wụ́ atẹmẹ ọnịrị ụnọ ọrụrụ ọnị ọza ẹ yẹ za ịrịka mẹ̀ ịsọvọ nị. 7Ịjị ịsọvọ ta wa mẹ̀, dị ohirẹsụ irehi Ohomorihi nịnị sị apoti oto na tụ́ aha ana nị huu ịnị irehi Ohomorihi nị. Dị ẹ sị ọ tụ́ ụvẹtẹ avaka icherubi nịnị nị. 8Dị icherubi nịnị gana avaka ẹnịnị agụvị o kú apoti ọnọọ ọnịrị ọchị anị ịrẹsụ. 9Ọchị anị ẹ gọdọ ẹtẹẹtẹrẹ ọnị ọza zụ re ịnị aku ana gụrị ọ. Ama ọza ẹ zụ re eyi ẹhẹ. Ẹnya ẹnẹnị vavọọ hi ịzọọ pooro ve tu ajịnị. 10#Ọda 10.5Nyị ịsị ẹ ya ịnị apoti oto ọnọọ ẹyị vị ịrẹta oku ẹẹva ọnị Imosiisi sị tụ ọ ịrẹsụ ataba Ịhọrẹbị ịnị ụmẹ ọnị Ẹnẹyịmavara ọnịrị Anisirẹrị sị hị́ eku yị ẹngụ ẹ mẹ hụrị Ijipiti.

Ẹnẹyịmavara ộ sị igirima anị zụ

11 # 1 Ịtọ 16.34; 2 Ịtọ 7.3; Ẹzị 3.11; Ahẹ 100.5; 106.1; 107.1; 118.1; 136.1; Ijer 33.11 # Kụra 40.34,35 Ịrẹma ọnị a raà sị apoti tụ́ ịnị aku ọnọọ, dị ohirẹsụ irehi Ohomorihi nịnị jịnẹ hụụ ịzọọ nị. Avaba ẹnị ana raà sị ẹngụ tụ́ irenyi yị Ẹnẹyịmavara kẹnẹ ẹ zụ ya ịzọọ nị. Ẹ yị vị ogu ọnị ọza ya ịnị anị ọ sị nị tu ọ ka ọ zụ ngụ ịzọọ. 12Avaba Anireevi nịnị ana vị ọjahẹ ệ jẹẹ beri Asa, Ịhẹmanị Ijedutuni ẹnịrị ezi anị ne beri anda ẹnịnị. Ẹnịnị vị ana jẹẹ akaha eyi ịzị ọyịị̄ zịị hụrẹ vẹ, dị ẹ kụ́ ẹnya ọvwọọvụ, di e yee hu isohu nị. Ohirẹsụ ẹchẹhị tụra oohu ee hụ́ ịkakanchị beri wa nị. 13Ẹnị ene hú ịkakanchị ẹnịrị aza ana jị ahẹ vị ana vabẹ aa gama Ẹnẹyịmavara, dị ẹyaa kụ́ ọ avọọ. Isohu irenyi-irenyi ẹnịrị ịkakanchị beri ịchachaa ene hu vị ana sụ wanyị-wanyị kẹnẹ. Dị aza sị ọngwẹ tụ́ ẹba aa jị ahẹ gama Ẹnẹyịmavara nị. Ê jị ahẹ ga a, dị è kà, oo zoza, di o si ọza pooro. Ịnị ụmẹ ọnọọ eguhi chire ku avaba irehi Ẹnẹyịmavara, 14eguhi ana dẹngụ, ohirẹsụ irehi Ohomorihi ệ yị nyẹngụ mẹ̀ ụkọrọ, dị ụbanyị Ẹnẹyịmavara hi irehi anị nị.

Currently Selected:

2 Ịtọpa 5: EBTP

Highlight

Copy

Compare