1 Ịsamụwẹrị 23

Idevidi ộ dọ Anikeyira tụ́

1Ẹkụhị ọnya dị a va kà a yi Idevidi ka Anihwirisiti ẹ raà kụ́ ịrẹkụ ve tù Anikeyira nị. A ka ẹ hyakụ ee yi akụ ene e tụ́ tụ́ ịnị ịda ịzọọ. 2Di Idevidi va na họ̀ Ẹnẹyịmavara kà ọnị ọ́ọ́ na, dị ọnịrị Anihwirisiti ẹ̀ na kụ̀ ịrẹkụ nị. Dị Ẹnẹyịmavara kà ò ne pè Anihwirisiti kụ̀ ịrẹkụ, dị ọ dọ Anikeyira nịnị tụ́ nị. 3Dị aza Idevidi ka ẹnị vi ene hyakụ ee hí angwa ẹnị mẹ̀ yị yà Ijuda aanị. Ẹnị ẹ́ẹ́ va zụụ nọ Ikeyira nee pè Anihwirisitii kụ̀ ịrẹkụ.

4Di Idevidi rẹ na họ̀ Ẹnẹyịmavara kà ẹnị ẹ́ẹ́ na nị. Dị Ẹnẹyịmavara kà ẹ̀ na ka ọnị vaa mẹ ka è huna Anihwirisiti nị.

5Ịzẹyịza di Idevidi ọnịrị aza anị si hu aa nọ Ikeyira nị. E mè tụ̀, dị ẹnịrị Anihwirisiti gẹ ịrẹkụ nị. Di Idevidi ọnịrị aza anị nyayịnẹ pa ịva yị Anihwirisiti nịnị, di ẹ kụ́ ịsụpa ẹnịnị nị. Dị ẹnịnị dọ Anikeyira tụ́ nị.

6Abiyata ozi Ahimẹrẹkị mè zwe ne tù Idevidi Ikeyira, ộ sị ịharamịra oni ohirẹsụ irehi Ohomorihi chire za nọ ịzọọ.

7Ẹkụhị ọnya dị a na sị ọ kà yị Ịsọọrụ ka Idevidi yà Ikeyira nị. Dị Ịsọọrụ ka mbà, Ohomorihi ọ sị Idevidi za yị ọnị. Ọ kà Idevidi o si oze gù hi ẹngụ anị, ọ mẹ̀ na ngụ ịnị ẹkụra ana nyị ozi ọnịrị enyusẹ ene e siī chire e. 8Dị Ịsọọrụ hị́ avaba isoja anị dị ọ ka è ne gu Idevidi ọnịrị aza anị hi tụ́ ịnị ẹkụra ọnọọ nị.

9Idevidi ọ sị wụ́ ka Ịsọọrụ ee be ọnị, dị ọ va hị́ Abiyata ka ọ̀ sị ịharamịra ọnọọ vẹ nị. 10Di Idevidi ka, “Ẹnẹyịmavara ana vị Ohomorihi ana Anisirẹrị aa hẹkẹ, mâ wụ́ ka Ịsọọrụ ee tenyi ẹngụ ka ọnị ọ̀ vẹ Ikeyira dị ọnị ọ̀ va wụ anị ịzẹnị ha agụvị amị. 11Wéé ro ka Anikeyira vaa sị mị chire Ịsọọrụ ụvọ? Wéé ro ka Ịsọọrụ aa vẹ ịzẹyịza anka m mẹ̀ wụ́? Ẹnẹyịmavara ana vị Ohomorihi ana Anisirẹrị aa hẹkẹ, aarịhịnị navọ wa kà a mị.” Dị Ẹnẹyịmavara kà hịịn, Ịsọọrụ aa vẹ. 12Di Idevidi rẹ kà, “Wéé ro ka Anikeyira vaa sị ẹmịrị aza amị chire Ịsọọrụ ụvọ?” Dị Ẹnẹyịmavara rẹ kà, “Hịịn nị.” 13Di Idevidi ọnịrị aza anị sị hụrẹ Ikeyira, dị ẹ yaa ngụ ọ zị nị. Aza Idevidi vị ẹnị akata. Dị a rẹ na sị ọ kà yị Ịsọọrụ ka Idevidi o si zwe hụrẹ Ikeyira nị. Dị Ịsọọrụ ọ̀ yị kụkụ nọ ịzọọ nị.

Idevidi ọ na tẹ̀ ịnị ẹkụra ana yà ịnị ataba

14Idevidi ọ na yà ịnị avị ịzị aa hị́ Izihwi, dị ọ nọ aha ọyịtẹ̀ ịnị ataba ịzọọ, dị ọ na tẹ̀ nị. Dị Ịsọọrụ ee sì ọ eyinị-eyinị nị, ama Ohomorihi ọ yị sị Idevidi chire e ụvọ. 15Idevidi mẹ̀ vavọọ yà ini iriku Ihoresi ịnị avị ana aà hí Izihwi, dị ọ wụ́ ka Ịsọọrụ ee sì ka ọnị ọ̀ va wụ ọnị nị. 16Di Ijonatani ozi Ịsọọrụ ne tù Idevidi, dị ọ naa tụ́ ọ ọtụtụrụma ka Ohomorihi vee sere e nị. 17Di Ijonatani ka, “Asị ụ hí angwa, Ịsọọrụ ada amị ọ yị yàa sị ụvọọ kanyị wụ. Ẹwa va vị ohinọyị Anisirẹrị, dị ahịka ẹma vị ọgwọhụva awụ nị.” Di Ijonatani rẹ ka, “Ada amị ộ hyakụ yẹ ka avọọ yọ nị.” 18#1 Ịsa 18.3Dị ẹnị ẹyịva rẹ yà ọvịdị Ẹnẹyịmavara, dị ẹ hị́ eku yị ẹngụ ịzọọ nị. Di Ijonatani si hu aa nọ eehi, di Idevidi ọnị yị yà Ihoresi nị.

Idevidi ộ ha hụụnị ụvọ Ịsọọrụ

19 # Ahẹ 54 Ẹkụhị ọnya di Anizihwi nịnị ne tù Ịsọọrụ Igibiya dị ẹ ka, “Wáá yẹ ka Idevidi tẹ tụ́ ịda ayị?” Ẹ ka ọ yà aha ọyịtẹ̀ ana yà Ihoresi ịnị ataba Ihakira, éyi ụvọrị ịzị aa hị́ Ijesimoni. 20Dị ẹ ka, “Taarụ ohinọyị! Ịhị òo zee wu eyi ụ vẹ dị ya za a wụ.” 21Dị Ịsọọrụ ka, “Ẹwụ nịnị ọ daba vị vayị ẹmị, Ẹnẹyịmavara ọ̀ navọ ò zee wụ nịnị. 22Na di we ne tenyi ẹngụ tụ́ ọ nịnị. Ne họ̀ use nịnị ịzị Idevidi ọ̀ọọ̄ nọ ọnịrị aza ene re e ịzọọ. Â kà a mị ka Idevidi ộ yẹ eyi apẹ ẹnẹmẹhị. 23Ne họ̀ use avaba ịzị ọ̀ọọ̄ tẹ, dị wa yẹ dị wa va kà a mị nịnị. Màa sị yẹ ka ọ yà ịzọọ, dị ẹmịrị ẹwụ nịnị zị na. Aha tụra aha ọnị ọ̀ọ yà ịnị Anijuda nịnị, mi vee sì ọ di me re e.”

24Ịzẹyịza dị ẹ sị dọ ọvịdị Ịsọọrụ aa nọ Izihwi nị. Idevidi ọnịrị aza anị ẹnị vi ene hi ini avị ịzị aā hị́ Imawoni ịnị ẹtẹ Araba ana yà éyi ụvọrị Ijesimoni. 25Dị Ịsọọrụ ọnịrị aza anị nyima ee sì Idevidi nị. Á mẹ̀ va kà a yi Idevidi, dị ọnịrị aza anị nọ ịnị ịrẹta ana yà ịnị avị Imawoni nị. Ịsọọrụ mẹ̀ wụ́, dị ọ dụ Idevidi nọ ịnị avị Imawoni nị. 26Ịsọọrụ ọnị yà akaha ataba ọnya, di Idevidi ọnịrị aza anị ẹnị re hi akaha ataba ọsa, di e wuse ee zwe ka asị Ịsọọrụ zụ za ọnị nị. Ô tù ụpẹ ọnya ụvọ Ịsọọrụ ọnịrị aza anị ee vee kú Idevidi ọnịrị aza anị. 27Dị a vana tụ́ va kà a yị Ịsọọrụ ka ọ̀ wụsẹ vẹ ka Anihwirisiti ẹ raà kụ́ ịrẹkụ va ngụ ịnị ẹtẹ anị nị. 28Dị Ịsọọrụ kụkụ va hụụnị Idevidi ọnị ọ vịdị aa dụ, dị ọ na và eyi ka Anihwirisiti nịnị nị. Iruvo ana a kụkụ aa sịị hị́ ịzọọ Ịrẹta ọhọ̀zahi ọ vị ọnọọ nị. 29Di Idevidi ọnị hụrẹ ịzọọ dị ọ na yà aha ọyịtẹ̀ ana yà ịzị aā hị́ Enggedi nị.

Currently Selected:

1 Ịsamụwẹrị 23: EBTP

Highlight

Copy

Compare