1 Ịsamụwẹrị 22

Idevidi ô zwe nọ Adurami

1 # Ahẹ 57; 142 Idevidi ộ hụrẹ Igati, di o zwe na ngụ ịnị ụtẹha ana yà Adurami nị. Ẹnẹbẹnị anị ẹnịrị avaba aneehi ada anị ẹ sị wụ ka o si zwe nọ ịzọọ, dị ẹnịnị wara ẹngụ ne tù ọ ịzọọ nị. 2Â nyị aza ẹnyị ana ayị vịdị aa kụ́ ọnịrị aza ana ayị ẹnịnị si du. Dị ẹngụ aza ẹnẹẹ kụ́ ẹngụ gụ di ẹ kụ́ ẹngụ ẹnịnị na yị Idevidi nị. Ẹnịnị vị akana, dị ahịka Idevidi ẹ kụkụ sị mẹ ọga nị.

3Di Idevidi rẹ hụụ ịzọọ, dị ọ nọ Imizipe ịnị ẹtẹ Imowabi nị. O mè tù ịzọọ dị ọ kà a yị ohinọyị Imowabi dị ọ ka ọ̀ navọ ọnyị anị beri ada anị ẹ̀ na yà ịdị ohinọyị ọnọọ pooro dị ọnị yẹ Ohomorihi ọ̀ọ mẹ vaa mẹ ụsẹ anị nị. 4Di Idevidi navọ wa pè ohinọyị Imowabi, pooro ọ́ mẹ̀ yị yà ịzị ọ tẹ tụ́ nị.

5Ẹkụhị ọnya â nyị ọnịsẹ ọnya aanị ana aā hị́ Igadi. Di ọ va kà a yị Idevidi ka asị ọ kụkụ yà ịnị ụtẹha ọnọọ nị. Ọ kà ọ̀ hụụ ịzọọ dị ọ̀ọ nọ Ijuda. Di Idevidi ka ooho, dị ọ hụụ ịzọọ dị ọ na yà ini iriku ana yà Ihereti nị.

Ịsọọrụ ộ wụ̀ Ohirẹsụ irehi Ohomorihi nịnị ana yà Inobi

6Ẹkụhị ọnya dị a va sị ọ kà yị Ịsọọrụ ka ê re Idevidi ọnịrị aza anị ịzị ẹ tẹ tụ́ nị. Ịsọọrụ vị ana sị ọha rị ụvọ, dị ọ yaayịtẹ iruvo ọchị ana aā hị́ Irimoni ị́rẹsụ ataba Igibiya. Aza anị vị ana jẹẹ kara a. 7Dị Ịsọọrụ hị́ aza anị ẹnẹẹ ana jẹẹ kara a, dị ọ ka, “wụ́ ịrẹyị booro aanị, ẹwụ nịnị Anịbẹnjamịnị! A vi u ro ka ozi Ijeese vaa sị ẹtẹ aarẹ yị ọza ịnya ọza ịnya awụ nịnị, dị ọ rẹ mẹ ka wa vị ọga isoja akahị ọnịrị ọga ẹchẹhị nịnị? 8A vị agụvị avọọ avaba awụ nịnị kụkụ kwẹẹtẹ tù mii? Ẹ yị hyakụ va nyị ọza ana jị ọ ahị hi mi ụtọ ka ozi emi ọnịrị ozi Ijeese ẹ raà hị́ eku yị ẹngụ. Ẹ yị nyị ọza awụ ọnị ịrẹyị amị jị areyi ana a vọrọ ka ọ̀ va kà a mị ka ozi emi ọ raà tụ́ ozi ahụ amị ịrẹyị ka ò kukuu bè mi anka ịsị aa mẹ booro aanị.” 9#1 Ịsa 21.7-9; Ahẹ 52Idowegi Anedomi ọnịrị ezi ahụ Ịsọọrụ e dudu jẹẹ ịzọọ nị. Dị ọ ka oni ô re ozi Ijeese màa nọ Inobi ịda Ahimẹrẹkị ana vi ozi Ahitubi. 10Ọ kà Ahimẹrẹkị ộ họ̀ Ẹnẹyịmavara use ịrẹyị agụvị Idevidi dị ọ kà a yi Idevidi nị. Dị ọ rẹ ka ộ hyakụ sị ịsa yi Idevidi ka ọ̀ rị ọ àa na oze. Dị ọ rẹ ka Ahimẹrẹkị ọ raà sị ụhwọ Igorayati Anihwirisiti yị Idevidi nị. 11Di ohinọyị tụ́ ka à na hị́ Ahimẹrẹkị ohirẹsụ irehi Ohomorihi ana vi ozi Ahitubi va yị ọnị nị. Ọ kà à rẹ kụ́ avaba aneehi ada Ahimẹrẹkị ana vi ohirẹsụ irehi Ohomorihi hi Inobi vẹ. Ịzẹyịza dị ẹ vavọọ wara vẹ ịda ohinọyị nị. 12Di ohinọyị kà yị Ahimẹrẹkị ozi Ahitubi ka, “Bato waa wụ́ ịrẹyị ọnị maa vaa kà o!” Di Ahimẹrẹkị ka, “Taarụ, maa wụ́!” 13Dị Ịsọọrụ ka, “Sị ẹ vẹ dị ẹwụrị ozi Ijeese sị kwẹẹtẹ tù mị, dị ụ hyakụ sị ịsọyịrị yọ bẹẹ ne beri ụhwọ. Wa rẹ na họ̀ Ohomorihi use ịrẹyị agụvị Idevidi dị wụ va kà a yọ nị. Wâ mẹ ka Idevidi ọ̀ kwẹẹtẹ tù mị, di o kukuu bè mi anka ọ màa mẹ aanị.” 14Di Ahimẹrẹkị tụ́ ohi dị ọ ka, “Taarụ, wâ yẹ ka ịnị avaba ezi ahụ awụ ẹ yị nyị ọza ana nyị ebira tù Idevidi. Idevidi vị ọyẹ ẹwụ, dị ahịka ọnị ọ vị ọga isoja ene ee sere wu nị. Avaba aneehi awụ vị ana nyayịnẹ sị ụbanyị yọ. 15Taarụ, wâ yẹ ka ẹ yị vị ịpaapa ọnị maa vaa họ̀ Ohomorihi use ịrẹyị agụvị Idevidi yị. Taarụ, aarịhịnị asị wụ kà a ka vị mị kwẹẹtẹ tù wu nị, à vị ka vị aneehi ada amị kwẹẹtẹ tù wu nị. Ẹ yị nyị ịsị ị yẹ vụrụ-vụrụ ịnị ịrẹyị ẹnẹnị.”

16Di ohinọyị tụ́ ohi dị ọ ka, “Ahimẹrẹkị, ẹ yị nyị a mẹ̀ẹ kụ́ ọ ka ẹ yị vị maa wụ̀ wụ. Ẹwụ ne beri aneehi ada awụ vị ọnị maa wụ.” 17Di ohinọyị hị́ isoja ene ee sere ẹtẹ ana jẹẹ pè e, dị ọ ka ẹ̀ vara eyi dị ẹ̀ wụ̀ ohirẹsụ irehi Ẹnẹyịmavara nị. Ọ kà ẹnịrị Idevidi ẹ sị yà tù ọnị. Ọ kà ệ yẹ Ídevidi mèe zwe, ama ẹnịnị ẹ yị va kà a yị ọnị. Ama ezi ahụ ohinọyị ee hí angwa, ẹ yị nyayịnẹ wụ̀ ohirẹsụ irehi Ẹnẹyịmavara.

18Di ohinọyị kà yị́ Idowegi ana vị Anedomi ka ọ vara eyi, dị ọ̀ va ịsa hi ohirẹsụ irehi Ohomorihi ẹnẹẹ ẹngụ nị. Ịzẹyịza dị ọ va ịsa hi ohirẹsụ irehi Ohomorihi ẹnẹẹ ẹngụ, dị ọ wụ̀ wa nị. Ịhị ọnọọ aza ọnị ọ wụ vị ẹnị ẹbẹẹna tụra ẹẹhị. Avaba ẹnị ẹnẹẹ vi ene eē chire ịharamịra ana a sị ịta ozoza hi. 19Dị ọ rẹ za avaba anẹkụra Inobi, dị ọ sị ụ̀hwọ̀ wụ̀ wa nị. Anẹẹ, anọrụ, ezweyi ọnịrị ezinụvọ vị ọnị ọ wụ. Avọọ ọ mẹ̀ rẹ wụ imaaru, ịkẹrịkẹtẹ ọnịrị atẹmẹ ẹnịnị nị.

Abiyata ene zwe hụrị Inobi kẹnẹ ọ ha nị

20Ama Abiyata ana vi ozi Ahimẹrẹkị ana ada anị vị Ahitubi ọnị o si zwe, dị o ne tù Idevidi nị. 21Dị ọ kà a yi Idevidi ka Ịsọọrụ ọ sị avaba ohirẹsụ irehi Ẹnẹyịmavara wụ̀ ha nị. 22Di Idevidi ka, “M ne re Idowegi Anedomi ọnọọ ịhị ọnọọ, mâ yẹ ka vị aa naa kà a yị Ịsọọrụ nị. Ẹma mẹ ka avaba aneehi ada awụ è sú aanị nị. 23Yaayịtẹ pè mị, asị wu hí angwa. Ọza ana àa ka ọnị aa wụ̀ wụ ẹmị o ree sì ka ọnị ọ̀ wụ avọọ nị. Wàa yaayịtẹ pè mi ịzẹnị, ẹ yị nyị ịsị ẹ vaa mẹ wụ.”

Currently Selected:

1 Ịsamụwẹrị 22: EBTP

Highlight

Copy

Compare