1Ipita 2
2
Ịrẹta ana yára ọnịrị Aza oni Ohomorihi nyị tụ́ irenyi
1Agụvị avọọ, hụụnị avaba ịsa odivi! Asị u ré vene ọza nịnị vụrụ-vụrụ! Asị ụ rẹ̀ mẹ ogevegeve nịnị! Asị ụ rẹ̀ mẹ eyọhụrẹ nịnị! Asị u rè du ọza nịnị. 2Ama waa mẹ nịnị anka ozi ọwọọwa eneē sì ịrẹva oyi hú. Ẹwụ nịnị ọ̀ rẹ vavọọ sì ịrẹyị Ohomorihi ọ̀yị wụ́, agụvị dị ụ waa vịraa tụ́ ịnị ẹdọha nịnị, 3#Ahẹ 34.8agụvị ka wa sị ayamva Ohomorihi dá ree nịnị. 4Vẹ ịdị Ijeesu Ikirisiti ana vị Ịrẹta ana yára nịnị. Aza ê yi ọ tịtẹ, ama Ohomorihi ọ sị ọ nyị, ịsa obooro ọ vị̀ yị Ohomorihi nị. 5Ẹwụ nịnị nyẹmba vị ana rẹ yà anka ịrẹta ana yára avọọ. Ohomorihi aa sị wụ nịnịị dà irehi anị ana yára. Ohomorihi ọ raà sị wụ nịnị tụ́ irenyi yị ẹngụ anị anka ohirẹsụ irehi Ohomorihi nịnị, ka wa sị ụkata Ụhwẹ Ọnịnịị hẹkẹ Ohomorihi nịnị. Ọnọọ ọ vị ịsọvọ ọnị waa mẹ̀ ẹ hi Ohomorihi ini oze Ijeesu Ikirisiti nị. Ịsị Ohomorihi sì ọ vị ọnọọ nị. 6#Ayị 28.16Wáa yẹ ka â chẹrẹ ẹ tụ́ ini Iwe Ohomorihi, ọ mẹ kà a ka,
Re, Maa nyị ịrẹta ọnya, ịsa obooro ọ vị mị nị.
Mâ sị ịrẹta ọnọọ ká irehi ẹtẹ tụ́ Ịzayọnị.
Ọza tụra ọza ana àa sị ayị tụra a, ọ́ yị vaa mẹ ụhịị nyị ọ vụrụ-vụrụ.
7 #
Ahẹ 118.22
Yị aza ana sị ayị tụra a, ịsa obooro ọ vị yị wa nị. Ama yị aza ẹnẹ ẹ̀ yị sị ayị tụra a,
e vee re ka, ịrẹta ọnị ọtụrarehi nịnị yi tịtẹ,
ọ vana vị ọọnyị ịnị ịrẹta ana aā sịị da irehi nị.
8 #
Ayị 8.14,15 Ịrẹta ọnị ọzaā tụ́ ahụ ịnị anị
dị ọ hyẹdụ ọ vị nị.
Ệ vavọọ hyẹdụ, agụvị ka ẹnịnị ẹ́ yị dọ ịrẹyị Ohomorihi wụ. Avọọ Óhomorihi mẹ̀ vịdị mẹ eto anị tịtẹ nị.
9 #
Kụra 19.5,6; Ayị 43.20;
Kụra 19.5; Ọda 4.20; 7.6; 14.2; Ịta 2.14;
Ayị 43.21;
Ayị 9.2
Àa vị ẹwụ nịnị yọ, ẹwụ nịnị vị aza oni Ohomorihi sị nyị. Ẹngụ ohirẹsụ irehi Ohomorihi ana aa hẹkẹ Ohomorihi Ohinọyị, ụ vị nịnị nị. Anẹkụra oni Ohomorihi nyị tụ́ irenyi yị ẹngụ anị, ụ vị nịnị nị. Aza Ohomorihi obooro ụ vị nịnị nị. Ộ nyị wụ nịnị ka waa kà a yị aza ịsa ẹbanyị-ẹbanyị oni Ohomorihi mẹ, ọ mẹ̀ hị́ wụ nịnị hụụnị ịrahụ va ngụ ini ẹtohweyi anị ene hí ọza irenu. 10#Iho 2.23Ịyẹẹyẹ wẹ́ yị vịdị vị aza Ohomorihi nịnị, ama booro aanị wa sị vara aza anị nịnị. Wẹ́ yị rẹ vịdị yẹ ayamva Ohomorihi nịnị, ama wa sị ọ yẹ nịnị booro aanị.
Sị ụbanyị yị ohirẹsụ nịnị
11Ẹwụ nịnị ọnị mi sì, wâ yẹ nịnị ka ọzọga ụ vị hi ịnị ẹhẹ nịnị nị. Agụvị avọọ, maa dá ịpẹẹ wụ nịnị: Và hụụnị ịsa edivi ọnị ọchẹngụ awụ nịnị sì. Ịsa ẹnẹẹ vị ana và eyi ịrazị kà ayị awụ nịnị. 12Waa mẹ̀ ebira ọyịza, ụ mẹ yà ịnị akakana anarịmadọwụ nịnị aanị. Aza ẹnẹẹ ẹ̀ẹ daka aa kà ịrẹyị odivi awụ nịnị, áa vọrọ ka è zụ ré ebira ọyịza awụ nịnị, dị ẹ̀ zụ sị ụga yị Ohomorihi ịnị ẹkụhị oni òo ve tù wa. 13Hụ agụvị Ananyị yị, waa sị ịrẹsụụ yị avaba aza ana a sị vị ohirẹsụ; ẹ̀ẹ vị ohirẹsụ keekere, 14àa vị avaba aza ana vọ ọnị ọọ̄ tụ́ ka ẹ̀ sị ụya rị aza ana aa mẹ̀ ịsa odivi, dị ẹ rẹẹ ga aza ana aa mẹ̀ ịsa ozoza. 15Ohomorihi ô sì ka waa mẹ̀ ebira ọyịza, agụvị dị ụ wa zụ mẹ ka ọnụra nịnị ẹnẹ ẹ̀ yị nyị ịsị ẹ yẹ, ẹ̀ sị irenu ẹnịnị kú oku. 16Waa mẹ anka aza ana nyị ẹngụ anị nịnị, ama asị ụ sị ọnọọ kà eyi hi, dị ụ waa mẹ̀ ịsa odivi; ama waa mẹ anka ozi ahụ Ohomorihi nịnị. 17Sị ụbanyị yị avaba aza. Sì ịrẹyị ọdọwụ anda awụ nịnị. We yii hí angwa Ohomorihi nịnị. Sị ụbanyị yị ohirẹsụ ẹkụra nịnị.
Ezida, sị ụbanyị yị ọga awụ nịnị
18Ẹwụ nịnị ezida, ká ịrẹsụ hi yị ọga awụ nịnị, dị ụ wa nyị angwahi ẹnịnị ẹtẹẹtẹrẹ. Ẹ́ yị vị ọga anaā ngụ ayị awụ nịnị, dị e ree roo yị wụ nịnị kẹnẹ m maa kà, ama hi ọga anaā nyị ẹngụrẹyị bẹẹ. 19Ọza aa rị ụya ọọhẹ, dị ọ hụ agụvị Ohomorihi dị ọ sị ẹngụ dọ ụya ọnọọ nị, ọza ọnọọ aa mẹ ịrẹyị ozoza nị. 20Àa vị agụvị ịsa odivi ọnị ụ mẹ, e si tụ́ wu, dị ụ daka yị sị ẹngụ dọ ọ nị, ọgụ ịsị ẹ kụkụ yà ịnị anị? Ama àa vị agụvị ịsa ozoza ọnị ụ mẹ, ụ waa rị ụya nị, wàa sị ẹngụ dọ ọ, ịnẹ Ohomorihi vee hinee hi wu. 21Oze oni Ohomorihi hị́ wụ nịnị tụ́ ọ vị ọnọọ nị, agụvị ka Ikirisiti nyẹmba ộ rị ụya yị wụ nịnị. Ộ tụ́ oze tịtẹ yị wụ nịnị ka wa vavọọ sị ahụ anịị hi ẹtẹ nịnị. 22#Ayị 53.9Ẹ́ yị nyị ụmẹ ọnị ọ sị mẹ ịvị, ọza ộ yị rẹ wụ́ ịrẹyị ireche ini irenu ani da. 23#Ayị 53.7Aza mẹ̀ kụ̀ ọ́ ụhụ ẹ́ yị và ụhụ yị wa. Aza mẹ̀ raa sị ụyaa rị ọ, ô yi wo hi wa, ama ô si chire Ohomorihi ụvọ, anaā sịị ịzẹyịzaa mẹ̀ ọkarẹyị. 24#Ayị 53.5,6Ikirisiti ụvọta ộ sị ịrẹsụ dọ ụya ịvị ayị, a mẹ̀ kanyị ọ za ọchị apavahị, agụvị dị ya kụkụ sị mẹẹ oku avọọ dị asị kụkụ zụ mẹ ịvị, dị ya kụkụụ mẹ ịzẹyịza. Ini oze ụnava ana a tụ̀ ọ, ọ sị mẹ wụ nịnị ụkụ nị. 25Vị ụ vịdị sị mẹẹ anka atẹmẹ ene vú nịnị avọọ nị, ama booro aanị wa zị vavẹ ịdị Ọza ene ee sere wu nịnị, dị ọ raa tẹsị awụ nịnị.
Currently Selected:
1Ipita 2: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
