1 Ohinọyị 15

Abijami ộ rị ohinọyị Ijuda

(2 Ịtọ 13.1-22)

1Ịnị ịrayị ana gụ ọ ịrayị ẹwụrịhịnta oni Ijerobowami ozi Inebati si rị ohinọyị, ịnị ịrayị ọnọọ Abijami ọnị rẹ sị rị ohinọyị tụ́ Ijuda nị. 2Ộ rị ohinọyị ịrayị ẹẹta tụ́ Ijerusarẹmị. Ịrẹha ọnyị anị ọ rị Imaaka nị. Imaaka ọnọọ ọnị vi ozi Abịsarọmị.

3Avaba ebira odivi ana ada Abijami mẹ ka Ẹnẹyịmavara na, Abijami ọnị rẹ mẹ nị. Ayị anị ọ yị vị ọnya tụ́ ịda Ẹnẹyịmavara anka Idevidi ohiku anị mẹ̀ nyị ayị ọnya. 4#1 Ohi 11.36Ama Ẹnẹyịmavara ana vị Ohomorihi Idevidi ộ tamayị ebira ozoza oni Idevidi mẹ̀. Agụvị avọọ dị ọ sị ozi ọnọrụ ọnya yị Abijami ka ọ rị ohinọyị tụ́ Ijerusarẹmị nị. Ọnọọ vị ẹnị Ẹnẹyịmavara vavọọ mẹ ka asị ayị ovwoovu Idevidi hi ayị ịrẹma anị. Ẹnẹyịmavara ẹ̀ yị mà vara o yi re sì ka ọnịvị e ve vu Ijerusarẹmị ẹtẹ. 5#2 Ịsa 11.1-27Idevidi ộ mẹ̀ ebira ana vọrọ ini eyi Ẹnẹyịmavara. A yi nyị ụmẹ ọnị ọ sị sị ahụ jị ọchị nyee ịnị avaba ọda ẹnị Ẹnẹyịmavara mẹ yọ, pooro ịnị ẹhẹ anị, à yị hụhụ vị ịnị ịrẹyị Uriya Anihiti kẹnẹ.

6 # 2 Ịtọ 13.3-21 Ịrẹkụ ana chị yị Irehobowami ọnịrị Ijerobowami vị ana tị tịtẹ pooro di Abijami va hụrẹ ẹhẹ. 7Ịrẹyị Abijami ana vọ, avaba ịsa ọnị ọ mẹ, avaba anị vị ana a chẹrẹ tụ́ ini iwe ịsị ẹ mẹ ẹkụhị-ẹkụhị ana a chẹrẹ ini oze ohinọyị Ijuda. Ịrẹkụ vị ana tịtẹ yị Abijami ọnịrị Irehobowami. 8Abijami ô sú, di e ne e pè ohiku anị ịnị ẹkụra Idevidi nị. Dị ahịka Asa ozi anị ọ rị ohinọyị dọ ọ ịrẹsụ nị.

Asa ohinọyị Anijuda

(2 Ịtọ 15.16—16.6,11-13)

9Ịnị ịrayị ana tụ́ ọ ịrayị oohu oni Ijerusarẹmị sị rị ohinọyị tụ́ Isirẹrị ịnị ịrayị ọnọọ Asa sị rị ohinọyị tụ́ Ijuda nị. 10Asa ộ mẹ̀ ohinọyị mẹ ịrayị ẹbẹẹva rị uto Ijerusarẹmị. Ịrẹha ọnyị anị ọ rị Imaaka nị. Imaaka vị ozi Abịsarọmị.

11Asa ộ mẹ̀ ebira ana vọrọ ini eyi Ẹnẹyịmavara anka Idevidi ohiku anị mẹ̀ mẹ. 12#2 Ịtọ 15.8-15Asa ô kụ́ ọsẹrẹka ọnọrụ hụụnị irehi Ohomorihi dị ọ rẹ kụ́ avaba ori ana ada anị vịdịị hẹkẹ hụụnị ẹtẹ ọnọọ nị. 13Ọnyị anị Imaaka ộ nyị ori anaā nyị ọza ịhyẹrẹ ana aā hị́ Asẹra agụvị avọọ dị Asa jị ọ hụụnị udi ose ohinọyị nị. Dị Asa za ori anaā nyị ọza ịhyẹrẹ ọnọọ dị ọ dà a, dị ọ na rị wa ịra ini orosi Ikidironi nị. 14Ama ọ yị kụ́ aha ọnẹba nịnị kwooze. Asa vị ana sị ayị ọnya jẹẹ pè Ẹnẹyịmavara pooro dị ọ va sị ẹhẹ tịtẹ. 15Â nyị ịsa ana ada anị kụ́ yị Ohomorihi, dị ọnị ụvọta ọnị rẹ kụ́ ịsa yị Ohomorihi nị. Ịsa ẹnẹẹ vi igooru ọnịrị enyusẹ ẹkẹhị ne beri ẹnya ụkọrọ ini eehi Ohomorihi. Avaba ịsa ẹnẹẹ vị ọnị Asa kụ́ ve hi ini eehi Ẹnẹyịmavara.

16Ịnị ụmẹ ọnọọ ịrẹkụ vị ana tịtẹ yị Asa ọnịrị Ibaasa ana vị ohinọyị Isirẹrị pooro dị Asa va sị ẹhẹ tịtẹ.

17Ịnị ụmẹ ọnya Ibaasa ohinọyị Isirẹrị ộ hịrẹ nọ Ijuda, di o ne tenyi ẹkụra Ịrama dà nị. Ọ vavọọ ne tenyi ọ agụvị asị a nyị ọza ene re oze jịnẹ ne tù Asa ana vị ohinọyị Anijuda.

18Ẹkụhị ọnya dị Asa kụ́ ẹkẹhị ọnịrị igooru ana vọ hi ịzị a kụ́ ogu tẹ ini irehi Ẹnẹyịmavara ọnịrị ini irehi ohinọyị, dị ọ kụ́ wa yị ozi ahụ anị ọnya, dị ọ ka ọ̀ kụ́ wa na yị Ịbẹnịhadadị ana vi ozi Itabirimọnị nị. Itabirimọnị ọnọọ ọnị rẹ vi ozi Iheziyọnị. Ịbẹnịhadadị vị ohinọyị anẹkụra ana aā hị́ Aramị ene hi ịnị ẹtẹ Ịdamasịkọsị. Asa ka ọnụtụ anị ọnọọ òo tù ịzọọ, dị ọ̀ kà a ka 19“wâ yẹ ka â nyị eku ana ada awụ ọnịrị ada amị hị́ yị ẹngụ. Navọ ẹnịnị ẹwụ ọnị ọ̀ rẹ vavọọ hị́ eku yi ẹngụ. Wéē re ẹkẹhị ọnịrị igooru; ọnị mị kụ́ tụ́ vẹ aanị, mi si ve chire wu irenu nị ka wa sị ayị hụụnị eku ẹnị ẹwụrị Ibaasa ohinọyị Anisirẹrị hị́ yị ẹngụ. Wàa vavọọ mẹ, Ibaasa vee kwooze mị.”

20Ịzẹyịza Ịbẹnịhadadị ộ wụ́ ịrẹyị ọnị Asa kà, dị ọ tụ́ ọga isoja nọ ịnị ẹkụra Isirẹrị nị. Di isoja ẹnẹẹ kụ̀ ịrẹkụ ịzọọ, dị ẹ rị Anịjọnị ọnịrị Anịdanị ne beri Anebẹrị Ịbẹtị Imaaka nị. Dị ẹ rẹ rị avaba ẹkụra Ikineroti ene hi ịnị avaba ẹtẹ Inahwitari nị.

21Ibaasa mẹ̀ vavọọ wụ́ ka ịrẹkụ ọ kụ́ ẹtẹ anị rị, dị ọ hụrẹ ụvọ hụụnị Iraama ene ee tenyi dà nị, dị ọ varẹma nọ Itiriza nị. 22Di Asa ohinọyị va nọ̀ ọ yị avaba Anijuda bemi-bemi, dị ẹnịnị na kụ́ avaba ịrẹta ọnịrị ọchị ana Ibaasa aa sị dà Ịrama nị. Di Asa ohinọyị kụ́ ịrẹta ọnịrị ọchị ẹnẹẹ dị ọ sị na dà ẹkụra ịnị ataba ana aā hị́ Ịbẹnjamịnị ọnịrị Imizipa nị.

23Avaba ịrẹyị Asa ana vọ ọnịrị ọ mẹmẹ nyị ụkata, avaba ịsa ọnị ọ mẹ ne beri ẹkụra ọnị ọ dà, avaba anị vị ana a chẹrẹ tụ́ ini iwe ịsị ẹ mẹ ẹkụhị-ẹkụhị ini oze ohinọyị Ijuda. Ama Asa mè si bo, ahụ ộ zị ọ 24Asa ô sú di e ne e pè ohiku anị ịnị ẹkụra Idevidi ohiku anị nị. Dị ahịka Ijehosahwati ozi anị ọ rị ohinọyị dọ ọ ịrẹsụ nị.

Inadabi ohinọyị Anisirẹrị

25Ịnị ana tụ́ ọ ịrayị ọhụva ọnị Asa sị rị ohinọyị tụ́ Ijuda, ịnị ịrayị ọnọọ Inadabi ozi Ijerobowami sị rị ohinọyị tụ́ Isirẹrị nị. Ịrayị ẹẹva ọ sị mẹ ohinọyị Anisirẹrị nị. 26Inadabi ộ mẹ̀ ebira ene divi ẹtẹẹtẹrẹ ini eyi Ẹnẹyịmavara. Ebira odivi oni ohiku anị mẹ, dị ọ mẹ ka Anisirẹrị ẹ̀ mẹ̀ ebira odivi, ẹngụ ebira ọnọọ Inadabi ọnị rẹ mẹ nị.

27Ibaasa ozi Ahija ọnịrị aneehi Iisaka ệ và iruvo bẹ, tù Inadabi. Ịnị ụmẹ ọnya Inadabi ọnịrị avaba Anisirẹrị ê gù ịrẹkụ agụvị Anigibetoni ene hi ịnị ẹtẹ Anihwirisiti nịnị. Di Ibaasa na, dị ọ na va ịsa hi Inadabi ẹngụ, dị ọ wụ̀ ọ nị. 28Ịnị ịrayị ọhụta ọnị Asa sị rị ohinọyị tụ́ Ijuda Ibaasa maanị sị wụ Inadabi nị. Dị ahịka Ibaasa ọ kụkụ rị ohinọyị dọ Inadabi ịrẹsụ nị.

29 # 1 Ohi 14.10 Ibaasa mẹ̀ vavọọ rị ohinọyị, dị ọ za avaba aneehi Ijerobowami dị ọ wụ̀ wa nị. Ọ yị hyakụ maanị vị ọza ịnya chọ̀chọ̀chọ̀ tịtẹ yị Ijerobowami. Avaba ẹnịnị saka-saka ọ wụ nị. Avọọ Ẹnẹyịmavara mẹ tụ́ ozi ahụ anị ana aā hị́ Ahija Anisiro ka ọ̀ kà a ka ịsị ẹ vaa mẹ ọ vị ọnọọ nị. 30Ịrẹyị ọnọ ộ vavọọ mẹ agụvị ebira odivi oni Ijerobowami mẹ, dị ọ rẹ mẹ ka Anisirẹrị ẹnị ẹ̀ rẹ mẹ. Ebira ọnọọ vị ẹnị ẹ nyayịnẹ sị mẹ ayị kụ Ẹnẹyịmavara ana vị Ohomorihi Anisirẹrị.

31Ịrẹyị Inadabi ana vọ ọnịrị avaba ịsa ọnị ọ mẹ, avaba anị vị ana a chẹrẹ tụ́ ini iwe ịsị ẹ mẹ eyinị-eyinị ana a chẹrẹ ini oze ohinọyị Anisirẹrị nịnị. 32Ịrẹkụ vị ana tịtẹ yị Asa ọnịrị Ibaasa ohinọyị Anisirẹrị pooro dị ẹ va sị ẹhẹ tịtẹ.

Ibaasa ọ rị ohinọyị Anisirẹrị

33Ịnị ana tụ́ ọ ịrayị ẹẹta ọnị Asa sị rị ohinọyị tụ́ Ijuda, ịnị ịrayị ọnọọ Ibaasa ozi Ahija sị vị ohinọyị tụ́ ịrẹsụ avaba Anisirẹrị nị. Dị ahịka Itiriza ọ yà nị. Ibaasa ộ mẹ̀ ohinọyị gụ ịrayị ohurẹẹna. 34Ibaasa ộ mẹ̀ ebira ene divi ini eyi Ẹnẹyịmavara. Ebira odivi oni Ijerobowami mẹ, dị ọ rẹ mẹ ka Anisirẹrị ẹ̀ mẹ, ẹngụ ebira ọnọọ Ibaasa mẹ nị.

Currently Selected:

1 Ohinọyị 15: EBTP

Highlight

Copy

Compare