1 Ohinọyị 14

Usu ozi Ijerobowami

1Â nyị ụmẹ ọnya, ẹngụ o si nyima aa zị ozi Ijerobowami ana aā hị́ Ahija. 2Di Ijerobowami kà a yi ose anị dị ọ ka, “Kwẹẹtẹ, di wa vara ẹngụ, dị asị ọza yẹ ka ẹwụ vị ose ẹmị Ijerobowami nị, dị wa nọ Isiro. Booro aanị Ahija ana vị ọnịsẹ yà ịzọọ. Ọnị ọ vịdị kà a mị ịhị ọnọọ ka ẹma vaa vị ohinọyị aza ẹnẹnị nị. 3Wàaa na, dị ụ sị Ịbụrẹẹdị ẹẹwụ rị ụvọ za, ne beri ibisikiiti. Dị ụ rẹ sị ẹhụ ijogo ọnya vaka wa di we si ne tù ọ. Wèe ne si tù ọ, ọ vaa kà a wụ́ ịrẹyị ozi ọnọrụ mẹmẹ vaa yà.” 4Ịzẹyịza dị ose Ijerobowami vavọọ kụ́ ịsa ẹnẹẹ, dị ọ kwẹẹtẹ, di o si hu aa nọ Isiro nị. Ọ na sị ngụ ini eehi Ahija. Ama Ahija oni o si bo, eyi anị o si hozi, o yi kuku zụ re ẹtẹ. 5Dị Ẹnẹyịmavara va kà a yi Ahija dị ọ ka, “Wéē re, ose Ijerobowami aa vaa họ̀ wu use ịrẹyị ini ịrẹyị ozi anị ẹnị ẹngụ aa zị. Aanị u mè vee tụ́ o ohi nị, o! Ọ raà mẹ apẹ ka ọnyẹnẹẹ ọsa kẹnẹ ọnị vị nị.” 6Ịzẹyịza Ahija mẹ̀ wụ́ ahẹtẹ ahụ anị kẹnẹ ka ọ va sị ngụ enoze, dị ọ ka, “wa ngụ eehi vẹ, ose Ijerobowami. Sị ẹ vẹ dị waa mẹ apẹ ka ọnẹẹ ọsa wụ vị nị? Ụtụ ana a tụ́ mi hi wu vị ụtụ ọkatẹngụ. 7Varẹma na, dị wa na kà a yi Ijerobowami ka Ẹnẹyịmavara Ohomorihi Anisirẹrị ka ọnị ọ kà a hịrẹ ịnị akakana aza ẹnẹẹ nị. Ọ kà ọnị ọ sị ọ mẹ ọdọvịdị Anisirẹrị nị. 8Ọ kà ọnị ọ tụ̀ ohinọyị hụụnị ovwoovu Idevidi dị ọnị sị yị Ijerobowami nị. Ọ kà ama Ijerobowami ọ yị mẹ anka ozi ahụ anị Ẹnẹyịmavara. Ọ kà Idevidi vị ana si eyi pe ọda anị, dị ọ sị avaba ayị anị saasa ọnị, dị ahịka ebira ana vọrọ ini eyi ọnị Ẹnẹyịmavara kẹnẹ aa mẹ nị. 9Ama Ijerobowami ọ mẹ̀ ebira ene divi hu keekere huna avaba ohinọyị ana vịdị rị tụ́ ọ nị. Ộ na, ọ na kụ́ ori mẹ, ọ kụ ori tụ́ agụvị ọ̀ sị mẹ ayị kụ́ ọnị Ẹnẹyịmavara. Ama ọ kụkụ va sị ọnị ne ta tụ́ ịrẹma. 10#1 Ohi 15.29Ẹnẹyịmavara kà agụvị avọọ ọ̀ yẹ o, ka ọnị aa kụ́ ịrẹyị odivi vee tù irehi Ijerobowami. Ọ kà avaba ezi ọnọrụ Ijerobowami ene hi ịnị ẹtẹ Isirẹrị vị ẹnị ọnị vaa wụ̀ vaa ha, hụụnị ozi na ngụ ịnị ọrịhị. Ọ kà ovwoovu Ijerobowami vị ọnị vaa rị ịra vaa ha anka a mẹẹ rị itutu ịra avọọ. 11Aza Ijerobowami ene èe sú ịnị ẹkụra vi oni irezi vaa rị. Ẹnẹyịmavara kà ọnị ọ kà avọọ nị.” 12Dị Ahija rẹ kà a yi ose Ijerobowami dị ọ ka, “Ẹwa kwẹẹtẹ wa nọ ini eehi awụ Wàa maanị aa jị ahụ ngụ ịnị ẹkụra kẹnẹ, ozi ọnọọ ee sú nị. 13Avaba Anisirẹrị vaa jị òrèrè anị, di e ne e. Ịnị avaba anovwoovu Ijerobowami, ozi ọnọọ ịnya kẹnẹ ẹ vee ne nị, agụvị ka ọnị ọ daba nyị ebira ene zee Ẹnẹyịmavara ana vi Ohomorihi Anisirẹrị eyi nị. 14Ẹnẹyịmavara ọnị ụvọta vaa sị ohinọyị ọsa rị ana vaa vị ohinọyị Anisirẹrị. Ohinọyị ọnọọ vee vú ovwoovu Ijerobowami ọnọnị ẹtẹ hụrẹ ajịnị booro-booro aanị nị. 15Ẹnẹyịmavara vee tụ́ Anisirẹrị, di o henyi wa anka a mèe henyi ịkẹ ana yà ini enyi. Dị ọ hụ́ Anisirẹrị hụụnị ẹtẹ ozoza ọnọnị ọnị ọ sị yị ohiku ẹnịnị, dị ọ sì wa na va ha akẹnẹ okuha. Iruvo ọnị ọ vavọọ vaa sị mẹ wa ọ vị ka ệ mẹ ori ana aā hi Asẹra nịnị ka ẹnị ẹ̀ sị mẹ ayị kụ́ Ẹnẹyịmavara. 16Ọ re vee yi Anisirẹrị tịtẹ agụvị ebira oni Ijerobowami mẹ. Ọnị ọ kụ́ Anisirẹrị nyeeyi ka ẹ̀ẹ mẹ̀ ebira odivi nị.”

17Ahija mẹ̀ sị ịrẹyị anị kà ta, di ose Ijerobowami kwẹẹtẹ dị aa na nị. Ọ mẹ̀ na sị ngụ ịzị aā hị́ Itariza, o mè yi tụ́ enoze irehi anị ịzọọ kẹnẹ, di ozi anị ọnọọ sú nị. 18Dị ẹnịnị ne e, dị avaba Anisirẹrị jị òrèrè anị nị. Avọọ Ẹnẹyịmavara mẹ̀ tụ́ ozi ahụ anị ana aā hi Ahija ana vị ọnịsẹ ka ọ̀ kà a nị.

19Ịrẹyị Ijerobowami ana vọ ẹhụụ ọ mẹmẹ kụ̀ ịrẹkụ ọnịrị ọ mẹmẹ mẹ ohinọyị vị ana a chẹrẹ tụ́ ini iwe ịsị ẹ mẹ ẹkụhị-ẹkụhị ana a chẹrẹ ini oze ohinọyị Anisirẹrị nịnị. 20Avaba ịrayị oni Ijerobowami sị rị ohinọyị vị ịrayị ohurẹẹva. Ijerobowami o sú, di e ne e tụ́ ịzị e ne ohiku anị tụ́ nị. Dị ahịka Inadabi ozi anị ọ rị ohinọyị dọ ọ ịrẹsụ nị.

Irehobowami ohinọyị Anijuda

(2 Ịtọ 11.5—12.16)

21Ịnị ụmẹ ọnọọ Irehobowami ozi Isoromọnị ọ rị ohinọyị tụ́ Ijuda nị. Irehobowami ọ sị gụ ịrayị ẹbẹẹva tụra ọnya dị ọ va vị ohinọyị. Ộ rị ohinọyị tụ́ Ijerobowami mẹ ịrayị ẹwụrịhịmba. Ịnị avaba ẹkụra Anisirẹrị, Ijerusarẹmị ọ vị ẹkụra ẹnị Ẹnẹyịmavara nyị ka ọnị vaa yà nị. Ịrẹha ọnyị Irehobowami ọ rị Inaama nị, dị ahịka Anamọnị ọ vị nị. 22Anijuda ệ mẹ̀ ebira odivi ini eyi Ẹnẹyịmavara. Ẹnịnị ệ mẹ ayị kụ́ Ẹnẹyịmavara huna avaba ohiku ẹnịnị, ini oze ebira odivi ẹnị ẹnịnị mẹ. 23#2 Ohi 17.9,10Ẹnị ẹ rẹ da aha ọnẹba, di e hi ọhẹ, dị ẹ rẹ nyị ori ana aā hi Asẹra hi avaba ịnị ataba ọnẹba ọnịrị hi avaba iruvo ọchị ana avị anị vị ohwoohu nị. 24#Ọda 23.17Â hyakụ rẹ nyị ọsẹrẹka ini eehi Ohomorihi ene hi ịnị ẹtẹ ọnọọ, dị ẹnịnị aa mẹ̀ ebira ana aā nyị ọza ịhyẹrẹ, ẹngụ ebira ana anẹkụra ẹnị Ẹnẹyịmavara dụ kwooze yị Anisirẹrị nịnị.

25 # 2 Ịtọ 12.2-8 Ịnị ịrayị ana tụ́ ọ ịrayị ọhụhị oni Irehobowami sị rị ohinọyị, di ohinọyị Anijipiti ana aā hị́ Isisaki hịrẹ nọ Ijerusarẹmị nị. 26#1 Ohi 10.16,17; 2 Ịtọ 9.15,16Ọ mẹ̀ vavọọ na, dị ọ na kụ́ avaba ogu ene hi ini eehi Ẹnẹyịmavara ọnịrị ogu ene hi ini eehi ohinọyị nị. Avaba anị saka-saka ọ vavọọ kụ́ nị. Dị ọ rẹ vavọọ kụ́ avaba ogonto oni Isoromọnị si igooru mẹ nị.

27Di Irehobowami ohinọyị si enyusẹ ana aā hị́ ịkọpa dị ọ sị mẹ ogonto ọsa dọ wa ịrẹsụ nị. Dị ọ kụ́ wa yị ọga oserẹtẹ ka è sí eyi pè wa nị. Oserẹtẹ ẹnẹẹ ẹ si eyi pè oze irehi ohinọyị nị. 28Ụmẹ tụra ụmẹ oni ohinọyị ọ̀ọ sị ngụ ini eehi Ẹnẹyịmavara, di oserẹtẹ ẹnẹẹ kụ́ ogonto ẹnẹẹ rị ụvọ. Dị ẹ rẹ kụ́ wa vavẹ ini eehi ịzị a kụ́ wa hi di ee sere wa.

29Ịrẹyị Irehobowami ana vọ, avaba ịsa ọnọ ọ mẹ, avaba anị vị ana a chẹrẹ tụ́ ini iwe ịsị ẹ mẹ ẹkụhị-ẹkụhị ana chẹrẹ ini oze ohinọyị Anijuda. 30Ịnị avaba ụmẹ ẹnẹẹ ịrẹkụ vi ana tịtẹ yị Irehobowami ọnịrị Ijerobowami ọnịrị Ijerobowami pooro kẹnẹ. 31Irehobowami ô sú, di e ne e tụ ịzị e ne ohiku anị tụ́ ịnị ẹkụra Idevidi nị. Anka m mẹ̀ vịdị kà a ịjọọ, ịrẹha ọnyị Irehobowami ọ rị Inaama nị.

Currently Selected:

1 Ohinọyị 14: EBTP

Highlight

Copy

Compare