1 Ịtọpa 27

Ogu isoja nịnị ọnịrị ogu aza ẹnẹ ẹ̀ yị vị isoja

1Â nyị ohirẹsụ ovwoovu nịnị, ọnịrị ọdọvịdị ịrẹsụ-ịrẹsụ nịnị beri ọdọvịdị Anisirẹrị nịnị ene pe ohinọyị sị eyi pe a mẹmẹ mẹ̀ ụkọrọ yọ ịnị ẹtẹ anị. Ịrẹha ẹnịnị yị. Ụhụụhwẹ ịnị ịrayị, ogu irenyi-irenyi aa vaa mẹ̀ ụkọrọ nị. Ogu ikonyi-ikonya vị aza ẹnị akawụ-akawụ oze ẹwụrẹva, dị ọza ana a nyị mẹ ọdọvịdị ịnị ụhwẹ ọnọọ si eyi pe wa. 2Ụhwẹ ịpaapa, Ọnọrụ ana aā hị́ Ijasobiyamu ozi Izabidiyeri ọ vị ọdọvịdị isoja nị. Ọnị o si eyi pe ogu ịpaapa nị. 3Ọnya ini ezi Ịpẹrẹzị ọ vị nị, dị ahịka ọnị ọ vị ohirẹsụ avaba ọdọvịdị isoja nịnị ịnị ụhwẹ ọnọọ nị. 4Ụhwẹ ọhụva, Idodayi ana vị Anahohi o si eyi pe ogu ọhụva nị. 5Ụhwẹ ọhụta, ọnọrụ ana aā hị́ Ịbẹnaya ozi Ijehoyayida ọ vị ohirẹsụ nị. Ọnị ọ vị ọdọvịdị isoja ana sị eyi pe ụkọrọ ịnị ụhwẹ ọnọọ nị. Ijehoyayida ada anị vị ohirẹsụ irehi Ohomorihi. 6Ịbẹnaya ọnọnị ọ vavọọ nyị ụkata ịnị isoja ohurẹẹwụ ẹnẹẹ, dị ahịka ọnị ọ rẹ vị ọdọvịdị ẹnịnị nị. Ộ ma ozi ọnọrụ ana aā hị́ Amizabadị. Ọnị ọ vana dọ ada anị ịrẹsụ, di o si eyi pe ogu ada anị. 7Asahẹrị ọyịnyara Ijowabi ọ vị ọgwọhụna ana sị eyi pe ụhwẹ ọhụna nị. Izebadiya ozi anị ọ vana dọ ọ ịrẹsụ di o si eyi pe ogu anị ịrẹma anị nị. 8Ọdọvịdị isoja ọhụhị, ana sị eyi pe ụkọrọ ịnị ụhwẹ ọhụhị ọ vị Ịsamihuti ana vị Anị Anịzịra nị. 9Ọgwọhụhịnọnyị ana sị eyi pe ụkọrọ ịnị ụhwẹ ọhụhịnọnyị ọ vị Iira, ozi Ikeesi nị. Anitekowa ọ vị nị. 10Ọgwọhụhịmba ịnị ọdọvịdị isoja nịnị ọ vị Iherezi ana vị Aniperoni nị. Ọnyị ini ezi Ehwireemi ọ vị nị, ọnị o si eyi pe ụkọrọ ịnị ụhwẹ ọhụhịmba nị. 11Ụhwẹ ọhụhịnta, Isibekayi ana vị Anihusa o si eyi pe aza nị. Ozi Ịzẹra hụụ ịrẹsụ Ijuda ọ vị nị. 12Ụhwẹ ọhụhịịna Abiyezeri ana vị Anatọtị o sị eyi pe ogu isoja aza ẹnị akawụ-akawụ oze ẹwụrẹẹva (24,000) nị. Anịbẹnjamịnị ọ vị nị. 13Ọnọrụ ana aā hị́ Ịmaharayị o si eyi pe aza ịnị ụhwẹ ẹẹwụ nị. Ịmaharayị vị a Aninetohwa. Ini ovwoovu Ịzẹra ọ chị hụrẹ nị. 14Ịnị ụhwẹ ẹwụrọnya, Ịbẹnaya ana vị Anipiratoni o si eyi pe aza nị. Ọnya ini ezi Ehwireemi ọ vị nị. 15Ịnị ụhwẹ ẹwụrẹva, Iheridayi ana vị Aninetohwa hụrị ovwoovu Ọtịnẹrị ò si eyi pe aza nị.

Á mẹmẹ si eyi pe ịrẹsụ-ịrẹsụ ene hi Isirẹrị

16Ịrẹha aza ana si eyi pe ịrẹsụ-ịrẹsụ ene hi Isirẹrị yị. Eriyaza ozi Izikiri ọ vị ohirẹsụ Anirubẹnị nịnị nị, dị Isehwatiya ozi Ịmaaka vị ọdọvịdị Anisimiyọnị nịnị nị. 17Ihasabiya ozi Ikemụwẹrị ọ vị ohirẹsụ Anireevi nịnị nị Ịzadọkị ọ vị ohirẹsụ ezi Eerọnị nịnị nị. 18Erihu, ọnya ịnị ẹyịnyara Idevidi ọ vị ohirẹsụ Anijuda nịnị nị. Omiri ozi Ịmayịkẹẹrị ọ vị ohirẹsụ Aniisaka nịnị nị. 19Isimaya ozi Ọbadaya ọ vị ohirẹsụ Anizeburuni nịnị nị, dị Ijerimoti ozi Aziriyẹrị vi ohirẹsụ Aninahwitari nịnị nị. 20Ihoseya ozi Azaziya ọ vị ohirẹsụ ịrẹsụ Anehwireemi nịnị nị, dị Ijowẹrị ozi Ịpẹdaya vị ohirẹsụ achẹva Anịmanasẹ nịnị nị. 21Ido ozi Ịzakaraya ọ vị ohirẹsụ achẹva Anịmanasẹ ana vọ ene hi Anigiriyadi nị, dị Ijaasiyẹrị ozi Abịna vị ohirẹsụ Anịbẹnjamịnị nịnị nị. 22Azarẹrị ozi Ijerohami ọ vị ohirẹsụ ezi Ịdaanị nịnị nị. Aza ẹnẹnị ẹ vị ọdọvịdị ịrẹsụ-ịrẹsụ ene hi Isirẹrị nị. 23#Oyn 15.5; 22.17; 26.4Ohinọyị Idevidi ẹ yị za aza ẹnẹ ẹ̀ yị gụ ịrayị oohu ịrịka, agụvị oto ọnị Ẹnẹyịmavara wo ka ọnị va mẹ ka ezi Anisirẹrị ẹ̀ rụrụ anka ụzọmị ene hi ẹbẹẹba. 24#2 Ịsa 24.15; 1 Ịtọ 21.1-14Ọnẹẹ ana aā hị́ Izeruya ọ vị ọnyị Ijowabi nị. Ijowabi ô nyima aa zá aza ịrịka, ama ẹ́ yị va mẹ̀ ẹ za ịrẹsụ. Ohomorihi ộ sị ụya rị Anisirẹrị nịnị agụvị ka aa za wa ịrịka. Avọọ ọza ẹ yị va chẹrẹ ọpa ẹnẹ ẹ vị tụ ini iwe ịtọpa ohinọyị Idevidi.

Aza ene sị eyi pe eto ẹnya ohinọyị

25Â nyị ọnọrụ ọnya ana aā hị́ Azimaveti ozi Adiyẹrị. Ọnị o si eyi pe aku ana a kụ́ ogu ohinọyị hi nị; di Ijonatani ozi Uziya ọnị sị eyi pe aku-aku ana a kụ́ ogu ịnị avaba ẹtẹ ọnọọ ọnịrị ịzị a kụ́ ogu hi ini irehi ọgọdọ nị. 26Eziri ozi Icheruvi o si eyi pe aza ana aa mẹ̀ ụkọrọ ịnị aarẹ nị. 27Isimeyi ana vị Anirama o si eyi pe ụbazị ịvayịnị nị; dị Izabidi ana vị Anisihwimi ọnị si eyi pe eche ọyịmẹ̀ nị. 28Ịbaarị Ihanani ana vị Anigeda si eyi pe ọchị orivi ọnịrị ọchị isikamọ ene hi ịzị aā hị́ Isepera nị. Dị Ijowasi ọnị sị eyi pe aku ana a kụ angwẹ hi nị. 29Isitirayi ana vị Anisaroni o si eyi pe ọkọnị imaaru ana aa kụụ rị inozi ẹtẹ Ịsarọnị nị; dị Isahwati ozi Adirayi ọnị si eyi pe ọkọnị imaaru ana aa kụụ rị inozi nị. 30Â nyị ọnọrụ ọnya ana aā hị́ Oviri. Anisimẹrị ọ vị nị. Ọnị o si eyi pe ịnyaakụmị nịnị nị; dị Ijehideya ana vị Animerọnọtị ọnị sị eyi pe ịkẹrịkẹtẹ anẹẹ nịnị nị. 31Ijazizi ana vị Anihaga o si eyi pe ọkọnị atẹmẹ nị. Avaba aza ẹnẹnị vị ana si eyi pe ogu yi ohinọyị Idevidi.

Aza ana vị Onuwọjị Idevidi

32Â nyị ọnọrụ ọnya ana aā hị́ Ijonatani. Idevidi vị ozi ọyịnyara anị. Ijonatani ọnọnị ọ yara sị ajuwe yị ọza ẹtẹẹtẹrẹ; dị ọ rẹ yẹ ịsa ẹtẹẹtẹrẹ nị. Ọnịrị Ijehiyẹrị Anihakimoni aa zụ ezi Idevidi ịsa nị. 33Â nyị ọnọrụ ọnya ana aā hị́ Ahitohwẹrị. Ọnị ọọ̄ sị ajuwee yi ohinọyị Idevidi nị. Dị ọnọrụ ọsa ana aā hị́ Ihusayi ọnị vị ọta ohinọyị nị. Ihusayi ọnọnị vị Anaachi. 34Ịjị Ahitohwẹrị wusu, â nyị anọrụ ana aā hị́ Abiyata, ọnịrị Ijehoyada ozi Ịbẹnaya. Ẹnị ẹ vanaa sị ajuwee yị ohinọyị Idevidi nị. Ijowabi ọ vị ọdọvịdị isoja ohinọyị nịnị nị.

Currently Selected:

1 Ịtọpa 27: EBTP

Highlight

Copy

Compare