ĀCƐ URÓM 13
13
Ɛyí ōtáajɛ lɛ ācɛ olajɛ
1Ɛjɛ̄ɛ̄jī aá kóō lɛyítáajɛ lɛ igɛ́mɛ́nti nēe ī gbāājɛ ā. Ohígbū ka ɔcɛ́ dúú lɔfú kú abɔ̄yī nū ŋ́, ń táafú ŋ́ ayíbɛ ɛ̄nɛ̄ o ŋmá ɛgiyí Ɔwɔicō ā nɛ. Ɔwɔicō ōfōōfūnū ī je íkwu ō gbō ācɛ lɛ ɔ̄cɛ glá á. 2Ohígbū ɔ́ɔmā ɔ̄cɛ dúú nōo ī bɛ́yíkwu ɔcɛ́ nōó ī gbāājɛ ā, Ɔwɔicō nēé ī bɛ́yíkwu ɔ̄ á. Ɔ̄cɛ nēe kē ī bɛ́yíkwu ɔcɛ́ ā ī dɔ̄ɔkā kéē yá ɔ̄ italā. 3Ohígbū ka ācɛ o yá ɔdā olɔhi ā í gē yúufi ācɛ o gbāājɛ ŋ́, amáŋ ācɛ o yá ɔdōbɔ̄bí ā gē yúufi ɔ̄cɛ nōo ī gbāājɛ á. Ó lɛ āa ayíka, aá yá ɔdā nōo lɔhi, cɛ́ɛ́ kéē géē cɛ̄tra aá. 4Ohígbū ka é wɛ ācotɛ̄hɔ̄ kú Ɔwɔicō yɔ̄ gē yúklɔ́ ohígbū olɔhi kú aá. Amáŋ ɔ́dāŋ́ ka aá ī yá ɔdōbɔ̄bí, ayíka aá yúufi uwā, ohígbū ka ɔfú nēé je lɛ uwá kéē le yá ācɛ italā ā í wɛ icííci ŋ́. É wɛ ācotɛ̄hɔ̄ kú Ɔwɔicō nēe gē yá ācɛ o yá ɔdōbɔ̄bí italā kwɛyí Ɔwɔicō. 5Ohígbū ɔ́ɔmā ó cɛgbá ká ɔ̄cɛ kóō lɛyítáajɛ lɛ igɛ́mɛ́nti, ó híī wɛ ohígbū italā nɛ̄ Ɔwɔicō í yá aá ōfōōfūnū ŋ́, amáŋ ohígbū ka odo ká aá da aá ka aá kóō yá lɛ ā. 6#Umát 22.21; Umák 12.17; Ulúk 20.25Ohígbū ɔdā ékpónú nyā nɛ̄ aá ī dɔlɛ́ á, ohígbū ka ācɛ ogbāajɛ ā bá gē yúklɔ́ lɛ Ɔwɔicō eko nēé lɛ úklɔ́ kú uwā yá gaajɛ. 7Aá gbā ɔdā dóódu nōo wɛ ukpɛ̄ kú uwā ā lɛ uwá. Aá gbā ɛdɔ ijɔ̄lɛ́ dúú nēé da aá ka aá gbā ā, aá lɛ ojīlīmā ce odúúdú uwā.
Ācɛ cíkā ō yíihɔtū tá ɔ́mpa uwā
8Aá bī ɔ̄cɛ dúúmā ulé ɔdā dúúmā ŋ́, ń táafú ŋ́ ō yíihɔtū tū ɔ́mpa aá. Ohígbū ka ɔ̄cɛ nōo ī yíihɔtū tá odúúdú ācɛ ā lɛ íne ā tū ɛɛ́. 9#Oyɛb 20.14; Obla 5.18; Oyɛb 20.13; Obla 5.17; Oyɛb 20.15; Obla 5.19; Oyɛb 20.17; Obla 5.21; Ulīf 19.18 Íne nēé tū kahíníī, “Ā híī gbaajā ŋ́ ámāŋ ka o cikpɔ́nyā ɔhá ŋ́, ā híī ŋmó ɔ̄cɛ ŋ́, ā híī wūwī ŋ́, ā híī leyīkwu ɔdā nōo wɛ ákú ɔ̄cɛ ɔhá ŋ́,” odúúdú aíne nēe bá ā, mɛ́mla aíne ɔhá dúúmā nēé je ā, gaá ŋmɛ́yí ipú ɛlā ékpónú nyā, “Yíihɔtū tá ācɛ ɔ́mpa uwɔ ɛ́gɛ́nɛ̄ a ī yíihɔtū tá iyī uwɔ ā.” 10Ɔ́dāŋ́ ka ɔ̄cɛ he uwɔ ɔtū, á gáā yá ɔ̄ ɔdōbɔ̄bí dúúmā ŋ́. Ohígbū ɔ́ɔmā ihɔtū ō yá wɛ o lɛyítáajɛ lɛ ɛjɛ̄ɛ̄jī íne āá.
Ɛ̄cī nɛ̄ Ohɔ́nyɛtá í kwúcē wā ā
11Ó wɛ ɛ̄nyā ōfūnū ŋ́, amáŋ aá jé ka eko nɛ̄ aá ī héyī ŋmá iyɔ̄lā ā lɛ yá ɛɛ́. Ohígbū ka ɛ̄cī nɛ̄ Ɔwɔicō géē nya alɔ tá ā má kwajaajɛ abālɔbányā fíyɛ́ ɛ́gɛ́nɛ̄ ó lɛ eko nɛ̄ alɔ cɛ̄ɛ̄lā Ujísɔ̄si Ohɔ́nyɛtá aflɛ́yí ā. 12Ɔ́ɔmā léka ó lɛbɛ̄ɛka otú mɛ ɛ́ɛ́ mā, eyī kē gáā nyā ɛɛ́ mā. Ká ālɔ̄ lɛ ɔdōbɔ̄bí nɛ̄ ācɛ ī yá ajɛ odobū ā kpó bónū, cɛ́ɛ́ ká ālɔ̄, ɛ́gɛ́nɛ̄ ācɛ ī kɛlā, lɛ iyɔ́fú ō bī nunu ɔlɛ́ɛnɔ kpó tū iyē. 13Ká ālɔ̄ gbɔɔ́ ō yá ucē nōo cíkā ā bɛ̄ɛka ācɛ nēe lā ɔlɛ́ɛnɔ péee ā, ká ālɔ̄ habɔ̄ ejé ō gwá nōo í kwú alɔ ká alɔ wīyā ā tá, ká alɔ habɔ̄ ajā ō gbo, ikpó ɔnyā ɔhá ō ce, ɔdōbɔ̄bí ō yá, unu ō nu mɛ́mla ímálānyī tá. 14Amáŋ aá kwú Óndú alɔ Ujísɔ̄si Ohɔ́nyɛtá ā ú kóō lɛbɛ̄ɛka ɔkplɛ́fú ō wiiyē ká aá ú, cɛ́ɛ́ kú aá híī jɛga lɛ ɔkpíyē ká aá kóō yá ɔdōbɔ̄bí nɛ̄ ó tíne ā gɛ ŋ́.
Currently Selected:
ĀCƐ URÓM 13: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma
