ĀCƐ URÓM 14
14
Ā híī ŋmó ɔ́mpa awɔ ɔ̄cɔ̄lóhɔ́nyɛtá okónu ŋ́
1 #
Ukól 2.16
Aá mīyɛ ācɔ̄lóhɔ́nyɛtá nēé lɔfú ipú ɔtū nēé kpóce ā ŋ́ mā, aá híī táafú mla uwá lɛyíkwu ɔdā nēé cíkā ō yá mɛ́mla ɛ̄nɛ̄ é cíkā ō yá ŋ́ mā ŋ́. 2Ɔ̄cɛ éyi cɛ̄ ka anúɔ lɔfú lé ɔdā dóódu glá. Amáŋ ɔ̄cɛ nōó lɔfú ipú ɔtū nōó kpóce ā ŋ́ mā ī lé ēpēēpū. 3Ɔ̄cɛ nōo ī lé ɔda dóódu ā, kóō híī leyī gwō ɔ̄cɛ nōó ī lé ŋ́ mā bónū ŋ́. Ɔ̄cɛ nōó kē ī lé ŋ́ mā, kóō híī ŋmó ɔ̄cɛ nōo ī lé ā okónu ŋ́, ohígbū ka Ɔwɔicō mīyɛ anú ɛɛ́. 4A cíkā ō kɛpɔ̄ tū ɔ̄cocɛ̄hɔ̄ kú ɔ̄cɛ ɔhá ā? Óndú nū ōfūnū lɔfú ka kóō yá lɔhi, amáŋ ka ó yá lɔhi ŋ́ má, ohígbū ka Óndú ā lɔfú í má kéē lɛ ɔdā olɔhi yá á.
5Ācɛ ōhī gbɛlá ka ɛ̄cī éyi ɔ́ɔ cɛgbá fíyɛ́ ɛ̄cī ɔhá á, ɛ́ɛ́ nɛ̄ ācɛ ɔhá ā kē gbɛlá ka ɛ̄cī dóódu ɔ́ɔ kē wɛ ékpónú. Ɔnyɔɔnyɛ kóō lɛ ɔtū kú nū yéékpó lɛyíkwu ɛlā nyā. 6Ɔ̄cɛ dúúmā nōo je ɛ̄cī ōhī odée ī yá lɛ ā ohígbū kóō lɛ ojīlīmā cɛ Óndú ā. Ɔ̄cɛ dúúmā nōo kē ī lé ɔdā dóódu ā ī lé, o yá ɛ́ɛ́ kóō lɛ ojīlīmā ce Óndú ā, ohígbū kéē gē le ahínyá tá Ɔwɔicō gbɔbū ɛ́ɛ́ nēé gē lé ɔdōlé ā á. Ɔ̄cɛ dúúmā nōó kē ī lé ŋ́ mā, ó lé ŋ́ o yá ɛ́ɛ́ kóō lɛ ojīlīmā ce Óndú ā, ohígbū ka é gē tá Ɔwɔicō ahínyá. 7Ɔ̄cɛ dúúmā ká alɔ í yēeyī lɛ iyī nū ōfūnū ŋ́. Ɔ̄cɛ dúúmā nōo kē gekwú, ó kwú lɛ iyī nū ōfūnū ŋ́. 8Ɔ́dāŋ ka alɔ kōō yēeyī, alɔ yēeyī lɛ Óndú ā, ámāŋ ɔ́dāŋ ka alɔ gekwú, alɔ kwú lɛ Óndú ā. Ó lɛ ā mɛ́ɛ̄ ā, ɔ́dāŋ́ ka alɔ kōō yēeyī ámāŋ nɛ̄ alɔ gekwú, alɔ wɛ ákú Óndú ā. 9Ohígbū ɔdā nyā nɛ̄ Ohɔ́nyɛtá kwú klla le héyī ŋmá ɔlékwū á. O yá kóō le pīya Óndú ká ācɛ nēe yēeyī mɛ́mla ācɛ nēe gekwú. 10#2 Ukɔ́r 5.10Aá ā, nēe ī lé ēpēēpū ā, ɔdíyá nɛ̄ aá ī kɛpɔ̄ tū ɔyínɛ́ aá ɔhá ā? Aá nēe ī lé ɔdā dóódu ā, ɔdíyá nāa gē leyī gwō ayínɛ́ aá o hile bónū ā? Ohígbū ka odúúdú alɔ géē háyi iyɔ̄bū Ɔwɔicō kóō hɛ́pɔ̄ kú alɔ. 11#Ayis 45.23Ohígbū kéē tá ɔ̄ ipú ɔkpá kú ɛlɔ̄ɔwɔicō ā ka Óndú ā kahíníī,
“Ɔdā nōo yá ɛ́ɛ́ nɛ̄ n wɛ Ɔwɔicō nōo yēeyī ā, ɛjɛ̄ɛ̄jī ācɛ dóódu géē lɛ okwúukwu kwajɛ gā um.
Ɛjɛ̄ɛ̄jī ācɛ dóódu kē í cɛ̄ tɛ́ɛcɛ ka n wɛ Ɔwɔicō.”
12Ɔnyɔɔyɛ kú alɔ géē kɔkɔ kú iyī nū lɛ Ɔwɔicō.
Ā cɛ̄ lɛ ɔ̄cɔ̄lóhɔ́nyɛtá ɔ́mpa awɔ bī íne kú Ɔwɔicō ŋ́
13Ó lɛ ā, ālɔ̄ híī ŋmó iyī alɔ ɛpɔ̄bí gɛ ŋ́. Ikɔkɔ ɔ́ɔmā, ālɔ̄ lɛ ɔ́ kaŋmó ipú ɔtū kú alɔ ká alɔ í gáā yá ɔdā nōo í yá kú ɔ́mpā alɔ kóō bīyíne kú Ɔwɔicō ŋ́. 14Ɔdā nōo yá ɛ́ɛ́ nɛ̄ n cɛ̄ɛ̄lā Óndú Ujísɔ̄si ā, n jé cāā ka ɔdōlé dúúmā í bɔ̄bí abɔ̄yī nū ŋ́, amáŋ ɔ́dāŋ ka ɔ̄cɛ éyi ka ɔdōlé ōhī ɔ́ɔ ī bɔ̄bí, ó lɛ ā ó kē í bɔ̄bí lɛ ɔ̄cɛ ɔ́ɔmā. 15Ɔ́dāŋ ka a ī yá ká ayínɛ́ uwɔ kéē lɛ íne kú Ɔwɔicō bīya ohígbū ka a ī lɛ abɔ̄ kwɔtū ō lé ɛdɔ kú ɔdōlé éyi piíí, ó lɛ ā ɔdā nāa ī yá ā mafú ka á yíihɔtū tá ɔyínɛ́ ɔ̄ ɔ́ɔmā gɛ ŋ́. Ā híī cɛ̄ lɛ ɔdōlé nāa ī lé ā lɛ ɔ̄cɛ nɛ̄ Ohɔ́nyɛtá kwú ohígbū ā yíífi ŋ́. 16Ohígbū ɔ́ɔmā aá híī yá kú ācɛ kéē ŋmó aá okónu ohígbū ka aá yɔ̄ ī yá ɔdā nɛ̄ aá gbɛlá ka ɔ́ɔ lɔhi ā ŋ́. 17Ohígbū ka eko nɛ̄ ɔ̄cɛ ī kɛlā ajɛ ō gbō kú Ɔwɔicō, ɔ̄cɛ í yɔ̄ ī kɛlā lɛyíkwu íne kú ɔdōlé mɛ́mla ɔdā ō gwá ŋ́, amáŋ ɔ̄cɛ ī kɛlā lɛyíkwu o yá ɔdā nɛ̄ Ɔwɔicō dɔɔ̄kā, o bá ɛbɔ́ mla anú, mɛ́mla o lɛ ɔtūnɛhɛ̄ nɛ̄ Alelékwū Ihɔ ī je ā. 18Ɔ̄cɛ nōo ī yúklɔ́ lɛ Ohɔ́nyɛtá ɔwɛ ɛ́gɛ́nyā kē í yá kú ɔtū kóō he Ɔwɔicō, ó klla kē í yá kú ācɛ kéē cɛ̄tra anú. 19Ohígbū ɔ́ɔmā alɔ í yɔ̄ ī cēyītīkwū ká ālɔ̄ yá ɔdā nōo í yá kú ācɛ kéē bá ɛbɔ́ mla iyī uwā mɛ́mla o yá ɔdā nōo í tá ɔ́mpa uwā abɔ̄ kéē le lɔfú iyē. 20Ā híī lɛ ɔdā nɛ̄ Ɔwɔicō yá ā bīya ŋ́, ohígbū ka a ī gbɛlá ka anúɔ lɔfú lé ɛdɔ kú ɔdōlé dóódu glá. Ɔdōlé dóódu lɔhi ō lé ɔkwɛ̄yi, amáŋ ó bɔ̄bí kú ɔ̄cɛ dúúmā kóō yá ɔdā nōo í yá kú ɔ̄cɛ ɔhá kóō bīya íne kú Ɔwɔicō. 21Ɔdā nōo lɔhi ā wɛ ka aá lɛ iyī aá tū ŋmá o yɔ̄ ī lé ɔdōlé, yɔ̄ ī gwá ejé, ámāŋ ka o yɔ̄ ī yá ɔdā dúúmā nōo í yá kú ayínɛ́ aá kéē bīya íne kú Ɔwɔicō. 22Aá lɛ abɔ̄ bī ɔdā nɛ̄ aá cɛ̄ lɛyíkwu ɔdā nyā ā, amáŋ ɛ̄nyā kóō yɔ̄ ɔtāhɛ̄ kú aá mɛ́mla Ɔwɔicō. Ɔtū ī he ɔ̄cɛ ɔkwɔ̄ɔ̄kwɛ̄yi ɔ́dāŋ kóō ŋmó iyī nū ɛpɔ̄bi ŋ́, eko nōó ī lé ɔdā nōó gbɛlá ka ɔ́ɔ lɔhi ā. 23Amáŋ ɔ́dāŋ ka ɔtū kú ɔ̄cɛ ī bɛ́ɛpa lɛyíkwu ɔdā nōó lé ā, Ɔwɔicō lɛ ɛpɔ̄bí ŋmó uwā eko nēé lé ā, ohígbū ká ucē kú uwā í yɛ ŋmá ɔtōkpóce Ɔwɔicō ŋ́. Ɔdā dóódu nōó kē yɛ ŋmá ɔtōkpóce Ɔwɔicō ŋ́ mā wɛ ínoōbīya.
Currently Selected:
ĀCƐ URÓM 14: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma
