ÁLUKA 20
20
Ɔdā nōo yá Ukádɛssi ā
1Ipú ɔyā kú aflɛ́yí ā, odúúdú ójila kú Ísrɛ̄lu ā le pɛ́ wā ipú ígbíli kú Usín, gaá lā Ukádɛssi. Abɔ́ɔ ā, Umíriyam gekwú, é lɛ ɔ́ nyi. 2#Oyɛb 17.1-7Éŋkpɔ̄ í yɔ̄ ɛga nēé lā ā ŋ́, anɔ́ɔ ācɛ ā le túbá, le ɛyí bú kwu Umósīsi mɛ́mla Árɔ̄ni. 3É ka iŋini tū Umósīsi kahíníī, “Ó géē yɛ í lɔhi lɛ alɔ fíyɛ́, ɔ́dāŋ ka alɔ le pɛ́ gekwú mla ācɛ Ísrɛ̄lu, ɔ́mpa alɔ ā, okómpíinu kú Áklɔ̄kpīihɔ ā. 4Ɔdíyá nāa kpó alɔ wā ígbíli nyā, ká alɔ mɛ́mla aɛ́bɛ́ kú ɔlɛ́ kú ālɔ ká ālɔ̄ le lɛ pɛ́kwú ā? 5Ɔdíyá nāa kōō kpó alɔ bɛ̄cɛ ŋmá Íjīpiti wā ajɛ obɔ̄bi nyā, nɛ̄ ɔdɛ̄hɔ̄ dúúmā í gáā jɛ anú glá ŋ́ mā ā? Amānyā í wɛ ajɛ nōo lɔfú yá īkpɔ̄dɛ̄hɔ̄ glá ŋ́, ɔcí ufáyin, ámāŋ ka upomégrenēetí í yɔ̄ amānyā ŋ́, ɛ́ɛ́ nɛ̄ éŋkpɔ̄ nɛ̄ ɔ̄cɛ í gwá kōō ī yɔ̄ ŋ́.” 6Umósīsi mɛ́mla Árɔ̄ni nyɛ̄ɛ̄ ŋmá ɛgiyí ācɛ ā, le tá okómpíinu kú Áklɔ̄kpīihɔ ā gaá le eyī pīya klá ajɛ. Anɔ́ɔ ɛgahi kú Óndú ā gaá klá iyɔ̄bū uwā.
7Óndú ā da Umósīsi kahíníī, 8“Kwú okwutɛ nōo bayi iyɔ̄bū Ikpati kú Ɛka kú Óndú ā ú, cɛ́ɛ́ ká awɔ mɛ́mla Árɔ̄ni kú aá lɛ odúúdu ójila kú ācɛ kú Ísrɛ̄lu ā túbá. Cɛ́ɛ́ ka ikpēyī kú odúúdu uwā kóō má ɔ̄ abɔ́ɔ. Cɛ́ɛ́ kú ā lɛ ɛlā ka lɛ ɛcɔ̄, éŋkpɔ̄ í bɛ̄cɛ ŋmá ipú nū. Ɔwɛ nyā nāa géē bī éŋkpɔ̄ ŋmá ipú ɛcɔ̄ wɛ̄ɛcɛ lɛ ācɛ ā ká uwá mɛ́mla aɛ́bɛ́ ká ɔlɛ́ uwā kéē gwá á. 9Umósīsi nyɔ̄ í kwú okwutɛ ā ú, ɛ́gɛ́nɛ̄ Óndú ā ka lɛ ā. 10Umósīsi mɛ́mla Árɔ̄ni le odúúdu ójila kú ācɛ Ísrɛ̄lu ā túbá iyɔ̄bū ɛcɔ̄ ā. Anɔ́ɔ Umósīsi da uwá ka, “á jāhɔ̄, ācɛ o yíkpɛ̄yí olɔfú, alɔ í bī éŋkpɔ̄ wɛ̄ɛcɛ ŋmá ipú ɛcɔ̄ nyā lɛ aá nɛɛ?” 11Anɔ́ɔ Umósīsi je okwutɛ ā gicɔ̄ lɛ ɔ́ fīyɛ̄ ɛcɔ̄ ā igbɛɛpa. Anɔ́ɔ ɔkpá ku éŋkpɔ̄ nɛ̄hi kwú yíla á. Anɔ́ɔ ācɛ mɛ́mla aɛ́bɛ́ kú ɔlɛ́ uwā gbɔɔ́ ō gwá á.” 12Amáŋ, Óndú ā le cɔ̄nū mla Umósīsi mɛ́mla Árɔ̄ni. Anɔ́ɔ ó kahíníī, “Abɔ̄ aá í kpɔ́tūce ɛlā kú um, cɛ́ɛ́ ká aá mafú ɔfú otīihɔ kú um fú iyɔ̄bū kú ācɛ kú Ísrɛ̄lu ŋ́ mā, aá í gáā kpó uwā ga ipú ajɛ nɛ̄ n cokónu ka n gē je lɛ uwá ā ɛ́ɛ́ gɛ ŋ́. 13Ɛ̄nyā wɛ éŋkpɔ̄ kú Umɛ́rība, ɛga nɛ̄ ācɛ kú Ísrɛ̄lu táafú mla Óndú ā, nɛ̄ ó ma iyī nū fú lɛ uwá ka anúɔ tīihɔ ā.”
Ɔcɛ́ kú Ɛ́dɔm í cɛ̄ lɛ ācɛ kú Ísrɛ̄lu bū ɔlɛ́ nū ŋ́
14Umósīsi lɛ ācɛ tɛ̄hɔ̄ ŋmá Ukádɛssi fu ɔcɛ́ kú Ɛ́dɔm kahíníī, “Ɛhɔ̄ nyā ŋmá ɛgiyí aɔ́mápú aá, aipɔ́ɔma kú Ísrɛ̄lu, a jé ɛ́gɛ́nɛ̄ alɔ móōwē lɛ ā, mɛ́mla 15ɛ́gɛ́nɛ̄ aádáádā alɔ ga Íjīpiti klla lā iháyí alɛwa abɔ́ɔ ā. Ācɛ kú Íjīpiti yá uwā mɛ́mla alɔ ōwē. 16Alɔ le ikwū je klá Óndú ā kóō tá alɔ abɔ̄. Ó le ikwū nɛ̄ alɔ je ā pó, anɔ́ɔ ó le alelékwū-otɛ̄hɔ̄ kú nū tɛ̄hɔ̄, anú ó le alɔ kpó bɛ̄cɛ ŋmá abɔ́ɔ á. Abālɔbányā alɔ bá ígbíli kú Ukádɛssi, ɛga nōo yɔ̄ okónōgwu kú ajɛ ɔlɛ́ uwɔ ā. 17Kóócōō lɛ ɛga je lɛ alɔ kú ālɔ̄ le bū ajɛ kú ɔlɛ́ uwɔ. Alɔ mɛ́mla aɛ́bɛ́ kú alɔ í gáā nyā ŋmá ɔwɛ ga ipú ɛhɔ̄, ámāŋ ka ipɔ́lɛ́, ámāŋ ipácí kú aá ɛ́ɛ́ nɛ̄ alɔ gē gwá éŋkpɔ̄ kú aá ŋ́. Alɔ géē kwu ɔwɛ ā jāā gbéeko nɛ̄ alɔ nyɛ̄ɛ̄ ŋmá ajɛ kú ɔlɛ́ uwɔ ā.”
18Amáŋ, ɔcɛ́ kú Ɛdɔm tá ɔ̄ ohi kahíníī, “Alɔ í gáā cɛ̄ kú aá bū ipú ajɛ kú ɔlɛ́ alɔ ā ŋ́. Ɔ́dāŋ ka aá jé ɔ̄ má, alɔ géē bɛ̄cɛ í nuunu tá aá.” 19Ācɛ kú Ísrɛ̄lu kahíníī, “Alɔ géē bá ī yɛ ɔwɛ ā ōfōōfū nū, ɔ́dāŋ ka alɔ mɛ́mla aɛ́bɛ́ kú ɔlɛ́ alɔ le éŋkpɔ̄ kú aá gwá, alɔ géē cíla ulé nū. Alɔ dɔ̄ɔ̄kā ká alɔ yɛ ɔwɛ ā ōfōōfū nū.” 20Amáŋ, ācɛ kú Ɛ́dɔm tóohi kahíníī, “Alɔ tá.” Anɔ́ɔ é bá ī nyɔ̄ mla aícɔ́ɔja kú uwa nɛ̄hi ā kéē í nuunu tá ācɛ kú Ísrɛ̄lu á. 21Abɔ̄ ācɛ kú Ɛ́dɔm í cɛ̄ lɛ ācɛ kú Ísrɛ̄lu bū ajɛ kú uwā ŋ́ mā, ācɛ kú Ísrɛ̄lu le pīyeyī, nyɔ̄ í le yɛ ɔwɛ ɔhá.
Ikwū kú Árɔ̄ni
22Odúúdú ójila kú Ísrɛ̄lu ā nyɛ̄ɛ̄ ŋmá Ukádɛssi. Anɔ́ɔ é gā ipú ígbíli, ɛyi ɛfu kú Uhɔ́ɔ, 23ɛjī kú ajɛ kú Ɛ́dɔm ā. Abɔ́ɔ ā, Óndú ā da Umósīsi mɛ́mla Árɔ̄ni kahíníī, 24“Árɔ̄ni í gáā ga ipú ajɛ nɛ̄ n cokónu ka n gē je lɛ ācɛ Ísrɛ̄lu ā ŋ́. Ó géē kwú. Ohígbū ka aá ɛpɛlɛ́ɛpa í lɛyitáajɛ lɛ ɛlā kú um Umɛ́rība ŋ́. 25Kwú Árɔ̄ni mɛ́mla ɔyí nū, Ɛlísa ú ga ɛyí ɛfu kú Uhɔ́ɔ, 26Abɔ́ɔ ā, lɛ awulú kú ɔ̄cogwɛ́ɛya kú Árɔ̄ni ā plla ŋmá ɔɔ́ iyē, cɛ́ɛ́ a kwú ɔ̄ ú klá Ɛlísa ɔyí nū iyē ohígbū ka Árɔ̄ni géē kwú abɔ́ɔ.” 27Anɔ́ɔ Umósīsi le yá ɛ́gɛ́nɛ̄ Óndú ā ka lɛ ā. É le pɛ́ tá icō ɛfu kú Uhɔ́ɔ ā ipéeyī ójīla kú ācɛ Ísrɛ̄lu ā. 28#Oyɛb 29.29; Áluk 33.38; Obla 10.6Anɔ́ɔ Umósīsi le awulú kú ɔ̄cogwɛ́ɛya kú Árɔ̄ni ā plla ŋmá ɔɔ́ iyē, anɔ́ɔ ó kwú ɔ̄ ú klla Ɛlísa, ɔyí nū iyē. Ɛyí ɛfu abɔ́ɔ ā, anɔ́ɔ Árɔ̄ni gekwú á. Umósīsi mɛ́mla Ɛlísa pīyɛyí wā ajɛ. 29Eko nɛ̄ odúúdú ójīla kú ācɛ Ísrɛ̄lu ā le jé ka Árɔ̄ni ɔ́ɔ gekwú ā, odúúdu uwā le ekwu kú Árɔ̄ni yɔ̄ ɛ̄cī ofu cigwó.
Currently Selected:
ÁLUKA 20: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma