ÁLUKA 19
19
Ewo kú ɛna nɔ̄wá
1Óndú ā da Umósīsi mɛ́mla Árɔ̄ni kahíníī, 2“Aá le ka lɛ ācɛ kú Ísrɛ̄lu kéē lɛ ɛna nɔ̄wá nɛ̄ ó lɛ ɛnyá ŋ́, nɛ̄ ó yúklɔ́ jéjéje ɛ́ɛ́ ŋ́, bī gé lɛ aá. 3Ká aá kwú ɔ̄ ú lɛ Ɛlísa, ɔ̄cogwɛ́ɛya ā, kéē lɛ ɔ́ bī ga eyɛ̄ɛcɛ kú ɛga nēé lā ā, cɛ́ɛ́ é lɛ ɔ́ ŋmó ipéyī nū. 4Ká Ɛlísa kóō lɛ ayíkābɔ̄ kú nū wu ōhī kú oyī kú nū, kóō lɛ ɔ́ mī lɛyíkwu ɛgiyí Áklɔ̄kpīihɔ ā igbo ahāapa. 5É géē je odúúdú ɛga o hile kú ɛbɛ́ ɛna ā, mla ɔkpá kú nū, mɛ́mla oyī mɛ́mla iyó ipú kú nū ā, kpó yɔlá ipéeyī kú ɔ̄cogwɛ́ɛya ā. 6Cɛ́ɛ́ ó kwú ɔcí kú Usída, mɛ́mla uháyísɔ̄pu, mɛ́mla ɔ́ŋgbá nɔ̄wá ú tá ga ipú ɔlá ā. 7Igbīhi ɛ̄nyā a, ó géē na īlī kú nū, géē pīya éŋkpɔ̄ klá iyī nū iyē ɛ́ɛ́ kóō í wā ipú ɔlɛ́ ā, ámāŋ ó géē wɛ oōtēelihɔ jāā gbó ɔ̄nɔ̄ɔ̄nɛ̄. 8Ɔ̄cɛ nōo yi ɛna ɔlá ā géē na īlī kú nū klla í pīya éŋkpɔ̄ klá iyī nū iyē, ámāŋ ó géē yɔ̄ iyē oōtéelihɔ jāā gbó ɔ̄nɔ̄ɔ̄nɛ̄ dúú. 9#Uhíb 9.13Cɛ́ɛ́, ɔ̄cɛ nōo le yēŋēē ā géē lɛ ewo kú ɛna nɔ̄wá ā túbá ɛga oyēŋēē eyīyɛ̄cɛ kú ipú ɔlɛ́ ā, lɛ ójila kú Ísrɛ̄lu. É géē pīya ɔ̄ tū éŋkpɔ̄ kú oōyá yēŋēē kú uwā. É géē yá uculo nyā kéē kpó íne nēé bīya ā nyɔ̄. 10Ɔ̄cɛ nōo gwu ewo ā bá ā, géē na īlī kú nū, ámāŋ ó géē wɛ oōtēelihɔ jāā gbó ɔ̄nɔ̄ɔ̄nɛ̄. Íne nyā géē yɔ̄ piyóó ipú ɛcɛ nyā lɛ ācɛ kú Ísrɛ̄lu, mɛ́mla aéwɔhá dóódu nēe lā mla uwá ā.”
Iyē ō kwu okwū
11Ɔ̄cɛ dúúmā nōo lɛ iyē kwu okwū géē wɛ oōtēelihɔ ɛ̄cī ahāapa. 12Ó géē yá īyī nū yēŋēē mla éŋkpɔ̄ kú oōyá yēŋēē ā ɛ̄cī ɔ́mɛɛtá mla ɛ̄cī ɔ́maahāapa, cɛ́ɛ́ ó kwú yá yēŋēē. 13Ɔ̄cɛ dúúmā nōo lɛ abɔ̄ kwu okwū nɛ̄ ó yá iyī nū yēŋēē ŋ́, géē wɛ oōtēelihɔ, ohígbū ka é tá éŋkpɔ̄ kú oōyá yēŋēē ā klá anú ɛ́ɛ́ ŋ́. Ó le Áklɔ̄kpīihɔ kú Óndú ā tēelihɔ ɛ́ɛ́. Ó klá gáā wɛ éyi kú ācɛ ɔlɛ́ Óndú ā gɛ ŋ́.
14Eko nɛ̄ ɔ̄cɛ dóódu gekwú tá ipú inu, ācɛ nēe bá ipú inu eko ɔ́ɔmā, mɛ́mla ācɛ dóódu nēe ga ipú inu ɛga nɛ̄ ó kwú tá ā géē wɛ oōtēelihɔ ɛ̄cī ahāapa. 15Ɔjá mɛ́mla ɛtɛ́ dúúmā kú ipú inu ɔ́ɔmā nɛ̄ ó lɛ ɔdā ō ce okónu nū ŋ́ mā kwú tēelihɔ. 16Ɔ́dāŋ ka ɔ̄cɛ dúúmā lɛ abɔ̄ kwu ɔ̄cɛ nēé le ŋmó, ámāŋ okwū kú ɔ̄cɛ nōo kwú abɔ̄yī nū, ámāŋ ɔ̄cɛ nōo lɛ abɔ̄ kwu ikpokwú kú okwū ámāŋ ka únóji, o géē wɛ oōtēelihɔ ɛ̄cī ahāapa.
17Ɛ́ɛ́ ka ɔ̄cɛ kóō géē je yá yēŋēē ŋmá iyē oōtēelihɔ ā, é géē fú ewo kú ɛna nɔ̄wá nēé yɔlá kóō kpó íne nēé bīya ā nyɔ̄ ā, tū ipú ɛtɛ́ cɛ́ɛ́ é lɛ éŋkpɔ̄ ɛ̄yīpɛ̄ tū ɔ̄. 18ɔ̄cɛ nōo le yēŋēē ā géē lɛ oōgwá kú uháyísɔ̄pu ā wu éŋkpɔ̄ nēé ī bī le yá ācɛ yēŋēē ā mī klá inu ā mɛ́mla ɔdā dóódu nēe bá ipú nū ā mɛ́mla ācɛ nēe bá abɔ́ɔ ā. Ɔ̄cɛ nōo le yēŋēē ā í mi éŋkpɔ̄ ā klá ɔ̄cɛ nōo lɛ abɔ̄ kwu okwū, ámāŋ ikpokwú kú okwū ámāŋ únóji ā. 19Ɛ̄cī ɔ́mɛ́ɛtá mɛ́mla ɛ̄cī ɔ́mahāapa ā nɛ̄ ɔ̄cɛ nōo le yēŋēē ā géē mī éŋkpɔ̄ ā klá ɔ̄cɛ ā, ɛ̄cī ɔ́mahāapa ā, ó géē yá ɔ̄cɛ ā yēŋēē, eko nɛ̄ ó lɛ īlī kú nū na lɛ éŋkpɔ̄ pīya klá iyī nū.
20Ɔ̄cɛ dúúmā nōo le iyē tēelihɔ nɛ̄ ó yá iyī nū yēŋēē ŋ́, géē wɛ oōtēelihɔ, ohígbū ka é tá éŋkpɔ̄ kú oōyá yēŋēē ā klá anú iyē ɛ́ɛ́ ŋ́. Ó le Áklɔ̄kpīihɔ kú Óndú ā nyílá, ó klla gáā wɛ éyi kú ācɛ ɔlɛ́ Óndú ā ɛ́ɛ́ gɛ ŋ́. 21Aá géē lɛ íne nyā tū eko dóódu. Ɔ̄cɛ nōo géē mi éŋkpɔ̄ kú oōyá yēŋēē klá ɔ̄cɛ ā iyē ā géē na īlī kú nū. Ɔ̄cɛ dúúmā nōo lɛ abɔ̄ kwu éŋkpɔ̄ ā géē wɛ oōtēelihɔ jāā gbó ɔ̄nɔ̄ɔ̄nɛ̄. 22Ɔdā dúúmā nɛ̄ ɔ̄cɛ oōtēelihɔ ā lɛ abɔ̄ kwu ɔ́, géē wɛ oōtēelihɔ dúú. Ɔ̄cɛ ɔhá dóódu nōo lɛ abɔ̄ kwu ɔ́ kwú iyī nū iyē ú tēelihɔ jāā gbó ɔ̄nɔ̄ɔ̄nɛ̄.
Currently Selected:
ÁLUKA 19: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma