ÁLUKA 10

Opo kú oje nɛ̄hɛ́ ā

1Óndú ā da Umósīsi kahíníī, 2“Lɛ opo ɛpa kú oje nɛ̄hɛ́ na káā bī ɔ̄ lɛ hī ācɛ igwú tɔ̄ɔhá, mɛ́mla o bī lɛ da ācɛ kéē tútū ō cālɛ́. 3Eko nēé lɛ ɛplɛ́ɛpa kú uwā tá, ācɛ í jīla awɔ eyī okómpīinu kú Áklɔ̄kpīihɔ ā. 4Ɔ́dāŋ ka okónu ékpónú nēé tá á nɛɛ, ótrɛ̄yí kú aípɔ́ɔma kú Ísrɛ̄lu kē í jīla awɔ eyī. 5Eko nāa lɛ opo ā tá ɔkɔ éyi, ācɛ nēe lā ābɔ̄ ɛnɔ̄ɔ̄cī a géē cālɛ́. 6Eko nāa lɛ opo ā tá ɔkɔ okpií okónu ɔ́mpa, ācɛ nēe lā ābɔ̄ ɛháajɛ ā géē cālɛ́. Ohígbū ɔ́ɔmā ɔkɔ kú opo o tá kpií igbɔmpa gē yá kéē cālɛ́. 7Amáŋ, eko nāa gáā hī ācɛ kú Ísrɛ̄lu igwú tɔ̄ɔ̄há, a géē tá opo ā ɔkɔ olikpō. 8Ayí kú Árɔ̄ni, ɔ̄cogwɛ́ɛya géē tá opo nyā á.

A í lɛ aíne nēe bá nyā tū opiyóó. 9Eko nɛ̄ aá bá yɔ̄ ī kpɛ́fú ipú ajɛ kú áa, yɔ̄ ī gbāajɛ kú aá ŋmá abɔ̄ kú aólɛlā kú aá nēe wā í kpɛ́fú tá aá, lɛ opo nēe bá nyā tá kéē hī ācɛ igwú wā í kpɛ́fú tá aólɛlā kú aá, nēe wā í nuunu tá aá. Ami nōo wɛ Óndú ā, Ɔwɔicō kú aá ā géē nya aá tá ŋmá abɔ̄ kú aólɛlā kú aá. 10Aá géē tá opo ā eko nɛ̄ aá yɔ̄ ī gwéeyē, mɛ́mla eko kú ucɛ kú aá, mɛ́mla ohútu kú ɔyā ɛ̄yīpɛ̄ kú aá. Aá géē tá opo nyā, eko nɛ̄ aá gē gwɛ́ɛya o yɔlá dúúdú ā mɛ́mla eko nɛ̄ aá gē gwɛ́ɛya kú ɛbɔ́. N géē tá aá abɔ̄. Ami wɛ Óndú ā, Ɔwɔicō kú aá á.”

Ācɛ kú Ísrɛ̄lu nyɛ̄ɛ̄ ŋmá Usáyínāyi

11Ɛ̄cī ɔ́mofu kú ɔyā ɔ́mpa kú iháyí ɔ́mpa ā, ŋmíífi nɛ̄ ācɛ ā nyɛ̄ɛ̄ ŋmá Íjīpiti ā, ojuja ā nyɛ̄ɛ̄ ŋmá ɛyí Áklɔ̄kpīihɔ ā. 12Anɔ́ɔ ācɛ kú Ísrɛ̄lu kwu cālɛ́ á. Anɔ́ɔ é gbo iyāwu kú uwā ŋmá ipú ígbíli kú Usáyínāyi á. Ojuja ā wā í klá ajɛ ígbíli kú Upáran. 13É hútu iyāwu kú uwā ŋmá ɔ́da nɛ̄ Óndú ā je bū okónu kú Umósīsi ā. 14Eko dóódu nēé le fu ajɛ nɛɛ, ó gē wɛ ɔwɛ ékpónú ɔ́ɔmā. Ācɛ nēe bá ɛháajɛ kú ígwu kú ipɔ́ɔma kú Ujúda ā gbɔɔ́ aflɛ́yí. É yɛ ígwíígwu ɛ́gɛ́nɛ̄ Unássɔn, ɔyí kú Ammínādābu, otrɛ̄yí kú uwā ā ka lɛ uwá lɛ ā. 15Unatánīyɛlu, ɔyí kú Usúwa leyīkwu ígwu kú ipɔ́ɔma kú Ísāka, 16anɔ́ɔ Ɛlíyābu, ɔyí kú Uhɛ́lɔn leyīkwu ígwu kú ipɔ́ɔma kú Usɛ́būlɔn á. 17Eko nēé kwú Áklɔ̄kpīihɔ ā ú wī wā ajɛ ā, ipɔ́ɔma kú Ugɛ́ssɔn mɛ́mla Umerári nēe gē bī ɔ̄ ā, géē gbɔɔ́ kéē nyɔ̄ gbɔbū.

18Ācɛ nēe bá ipú ígwu kú ipɔ́ɔma kú Urúbɛ̄n ā géē gbɔɔ́ kéē nyɔ̄ ígwíígwu, mɛ́mla Ɛlísɔ, ɔyí kú Ussɛ́deyɔ nōo gē leyīkwu uwá á. 19Ussélūmīyɛlu, ɔyí kú Usúríssadāyi leyīkwu ipɔ́ɔma kú ígwu kú Usímīyɔn á. 20Ɛlíyāsafu, ɔyí kú Udíyūwɛlu leyīkwu ipɔ́ɔma kú Ugád á. 21Cɛ́ɛ́ ipɔ́ɔma kú Ulífāyi ayí kú Ukɔháti ā géē gbɔɔ́ kéē nyɔ̄ mla aɔ́dā otīihɔ nēé bī ā. Ɛ́ɛ́ kéē wā ajɛ ɛga ɔhá nēé gáā lā ā, é géē lɛ Áklɔ̄kpīihɔ ā gwó kwaajɛ abɔ́ɔ. 22Ācɛ nēe kwūce uwá ā wɛ ipɔ́ɔma kú Ɛfrēm nɛ̄ Ɛlíssāma, ɔyí kú Ammíhūd géē leyīkwu uwá. 23Ugamálīyɛ̄lu, ɔyí kú Upɛdássɔ gē leyīkwu ipɔ́ɔma kú Umanásɛ á. 24Abídan, ɔyí kú Ugídiyɔni leyīkwu ipɔ́ɔma kú Ubɛ́njamīn á.

25Ámōmɛ kú ígwu ā wɛ ipɔ́ɔma kú Udán nɛ̄ Aheyésa, ɔyí kú Ammíssadāyi kē í gbo ce ɔ́ ā. Uwá wɛ ācɛ nēe gē gbo ācɛ kú Ísrɛ̄lu ɛyi ŋmá igbīhi á. 26Upagíyɛ̄lu, ɔyí kú Ɔ́kran ā gē leyīkwu ipɔ́ɔma kú Ássa á. 27Ahíra, ɔyí, kú Ɛ́nan gē leyīkwu ipɔ́ɔma kú Unáfutāli á. 28Ɛ̄nyā wɛ ɔwɛ kú ɛ́gɛ́nɛ̄ ācɛ kú Ísrɛ̄lu géē hútu iyāwu kú uwā lɛ, eko dóódu nēé gē cālɛ́ ā á.

29Umósīsi da ɔyínɛ́ kú ɔnyā nū, Uhɔ́bābu, ɔyí kú Ujɛ́tro, ɔ̄cɛ kú Umídiyan ā kahíníī, “Alɔ gáā ga ɛga nɛ̄ Óndú ā cokónu ka anúɔ géē je lɛ alɔ ā ɛɛ́. Wā mla alɔ, alɔ géē yá uwɔ lɔhi. Óndú ā cokónu kú ɔdā olɔhi lɛ ācɛ kú Ísrɛ̄lu.” 30Amáŋ Uhɔ́bābu tá ɔ̄ ohi kahíníī, “Ń gáā nyɔ̄ mla aá ŋ́, n géē ga ɔlɛ́ um, mɛ́mla ɛgiyí ācɛ ɔlɛ́ um.” 31Anɔ́ɔ Umósīsi da ɔ̄ kahíníī, “Ā híī nyɛ̄ɛ̄ hɛ̄ alɔ tá ŋ́, n gē gbɔ̄ɔkɔ gā uwɔ. Ohígbū ka a jé ɛ́gɛ́nɛ̄ alɔ gē lā ipú ígbíli lɛ ā. Á kē í yɔ̄ ī bī alɔ jé ɔwɛ. 32Ɔ́dāŋ ka a le yɛ mla alɔ, ɔdā olɔhi dóódu nɛ̄ Óndú ā géē yá lɛ alɔ ā, alɔ géē kɔ̄ ɔ̄ mla awɔ.”

33Anɔ́ɔ é gbɔɔ́ ŋmá ɛgiyí ɛfu kú Óndú ā, é yāwu ɛ̄cī ɛtá. Ikpati kú Ɛka kú Óndú ā gē gbɔbū lɛ uwá eko dóódu kóō mafú ɛga ɔhá nēé géē lā ā lɛ uwá. 34Abɔ̄ é bá ī nyɔ̄ ɛ̄cī dóódu ā, ojuja kú Óndú ā klá uwá ɛyí ɔlɛ́ɛnɔ.

35 # Aíjē 68.1 Eko dúúmā nɛ̄ Ikpati kú Ɛka kú Óndú ā gbɔɔ́ kóō nyɔ̄, Umósīsi gē kahíníī, “Canjɛ Óndú, cɛ́ɛ́ kú aólɛla kú uwɔ kéē le fíyákátā, kú ācɛ nēe géē wɔ́tū uwɔ ā kéē kwinya ŋmá iyɔ̄bū uwɔ.” 36Eko nēé kwú Ikpati kú Ɛka kú Óndú ā ú háyi ɛga dóódu nɛɛ, ó gē kahíníī, “Pīyɛyí Óndú, wā ɛgiyí ācɛ úlúúlā kú ipɔ́ɔma kú Ísrɛ̄lu ā.”

Currently Selected:

ÁLUKA 10: IFBCL

Highlight

Copy

Compare