ÁLUKA 9
9
Ucɛ kú Onyatá ɔ́mpa
1 #
Oyɛb 12.1-13
Óndú ā kɛlā lɛ Umósīsi ipú ígbíli kú Usáyínāyi, ipú ɔyā aflɛ́yí kú iháyí ɔ́mpa, nɛ̄ ācɛ kú Ísrɛ̄lu bɛ̄cɛ ŋmá Íjīpiti ā kahíníī, 2“Da ācɛ kú Ísrɛ̄lu ā, kéē lɛ ucɛ kú onyatá ā tū eko kú nū. 3Aá géē lɛ ɛ̄cī kú ucɛ kú onyatá ā tū, ɛ́gɛ́nɛ̄ odúúdú aíne kú nū lɛ ā. O gbɔɔ́ ŋmá ɔ̄nɔ̄ɔ̄nɛ̄ kú ɛ̄cɛ̄ ɔ́migwɛ́ɛnɛ kú ɔyā nyā.” 4Anɔ́ɔ Umósīsi le ka lɛ ācɛ ā kéē lɛ ucɛ kú onyatá nyā lé eko kú nū. 5Ɔ̄nɔ̄ɔ̄nɛ̄ kú ɛ̄cī ɔ́migwɛ́ɛnɛ kú ɔyā aflɛ́yí ā, é lɛ ucɛ kú onyatá ā lé ɛ́gɛ́nɛ̄ Óndú ā ka lɛ Umósīsi lɛ ā.
6Amáŋ ācɛ ōhī bá abɔ́ɔ nēe le tēelihɔ ohígbū kaé le abɔ̄ kwu okwū, ɔ́ɔmā yá ɛ́ɛ́ nēé gáā lé ucɛ kú onyatá nyā glá ŋ́. É le pɛ́ tá ɛgiyí Umósīsi mɛ́mla Árɔ̄ni, anɔ́ɔ 7é kahíníī, “Alɔ le tēelihɔ ohígbū ka alɔ le abɔ̄ kwu okwū, ɔdíyá nēé cɛ̄ lɛ alɔ je iyɛ́ɛya kú alɔ lɛ Óndú ā mla ācɛ kú Ísrɛ̄lu o hile ā ŋ́ mā ā?” 8Anɔ́ɔ Umósīsi da uwá kahíníī, “Aá gbēyī ká n̄ lɛ ɔdā nɛ̄ Óndú ā géē ka lɛyíkwu aá ā pó ɛ́ɛ́”
9Óndú ā da Umósīsi kahíníī, 10“Le ka lɛ ācɛ kú Ísrɛ̄lu ka eko nɛ̄ ɔ̄cɛ dóódu kú aá ámāŋ ka ayááyí kú aá le tēelihɔ o ŋmá lɛ abɔ̄ ō kwu okwū, ámaŋ ka o yɔ̄ iyāāwu ɛgaligbó, nɛ̄ ó dɔ̄ɔ̄ka ō lé ucɛ kú onyatá kpɔ́. 11N je ɛga lɛ uwá kéē lɛ ɔ́ tū eko nɛ̄ ɔyā éyi le gla, ikɔkɔ ɛ̄cī ɔ́migwɛɛnɛ kú ɔyā ɔ́mpa ā. Kéē lé ucɛ ā mɛ́mla igbō nɛ̄ó gē nū ŋ́, mɛ́mla ēpū ohɔ́ɔnɔ. 12#Oyɛb 12.46; Ujɔ́n 19.36Aá gáā mā ɛbɛ́ kú nū dóódu tá gbó oŋmɔ́ɔci nū ŋ́. Ɛ́ɛ́ nɛ̄ aá géē ca ikpokwu kú ɛbɛ ā dúúmā ŋ́. Aá lé ucɛ ā ɛ́gɛ́nɛ̄ íne kú nū lɛ ā. 13Amáŋ, ɔ̄cɛ dúúmā nōo le yēŋēē, nɛ̄ó ga iyāāwu oligbó ŋ́, nɛ̄ó lé ucɛ kú onyatá nyā ŋ́, ń gáā je ɔ̄ ka ó wɛ éyi kú ācɛ ɔlɛ́ um ɛ́ɛ́ gɛ ŋ́. Ohígbū kaó wā í gwɛ́ɛya gā um eko kú nú ŋ́. Ó géē lɛyíkwu ɔdā dúúmā nōo tá íne nɛ̄ ó bīya ā ɔkwu. 14Ɔ́dāŋ ka ugbɔga dúúmā yɔ̄ ɔlɛ́ aá nōo dɔ̄ɔka kóō lé ucɛ kú onyatá ā, o géē lɛ odúúdu íne kú ucɛ ā tū. Íne kú ucɛ kú onyatá ā wɛ ékpónú lɛ ācɛ dóódu.
Ojuja kú ɔlá
(Oyɛb 40.34-38)
15Ɛ̄cī nēé je Áklɔ̄kpīihɔ kú Óndú ā kwaajɛ ā, ojuja wā í klá anú, ɔ̄nɔ̄ɔ̄nɛ̄ bɛ̄ɛka ɔlá ā otú gbóɔ̄cī. 16Ɛ́gɔ́ɔmā nɛ̄ ó lɛ piyóó ā. Ojuja klá anú ɔlɛ́ɛnɔ, otú ā, ojuja kwú yá bɛ̄ɛka ɔlá ā. 17Eko dúúmā nɛ̄ ojuja ā nyɛ̄ɛ̄ ŋmá Áklɔ̄kpīihɔ ā, ācɛ kú Ísrɛ̄lu géē je cālɛ́ ŋmá abɔ́ɔ ga ɛga nɛ̄ ó géē wā í háyi igbɔhá ā. 18Ācɛ ā géē cālɛ́ klla í gaá lā ɛga ɔhá, ɛ́gɛ́nɛ̄ Óndú ā ka lɛ ā. Ɛ́gɛ́ nɛ̄ ojuja ā gbojī ɛyí kú Áklɔ̄kpīihɔ ā lɛ ā, ɛ́gɔ́ɔmā nɛ̄ ācɛ ā klá abɔ́ɔ gbojī lɛ á. 19Eko nɛ̄ ojuja ā ma klá Áklɔ̄kpīihɔ ā gbojī nɛ̄ɛ̄nɛ̄hi, é géē lɛyítáajɛ lɛ Óndú ā klla lā abɔ́ɔ. 20Eko ōhī, ojuja ā í gē klá Áklɔ̄kpīihɔ ā ɛ̄cī alɛwa ŋ́, nááná ɛ́gɛ́nɛ̄ Óndú ā ka lɛ ā, nēé gē lā gaá kwu klla gē cālɛ́ á. 21Eko ōhī ojuja ā yɔ̄ ŋmá ɔ̄nɔ̄ɔ̄nɛ̄ gaá kwu ɔ̄cɔ̄ɔ̄cī, cɛ́ɛ́ ikpííkpó nɛ́ ojuja ā nyɛ̄ɛ̄ ŋmá Áklɔ̄kpīihɔ ā, é gē cālɛ́. 22Ó kōō wɛ ɛ̄cī ɛpa, ɔyā éyi, iháyí éyi, ó kōō fíyɛ́ ɔ́ɔmā, ɔ́dāŋ ka ojuja ā klá Áklɔ̄kpīihɔ ā, é géē lā abɔ́ɔ, amáŋ eko dóódu nɛ̄ ó nyɛ̄ɛ̄, é géē cālɛ́.
23É gē lā ɔlɛ́ ā klla ī cālɛ́ ɛ́gɛ́nɛ̄ Óndú ā ka lɛ uwá lɛ ā. É géē lɛ íne nɛ̄ Óndú ā gē je lɛ uwá bū okónu kú Umósīs ā tū.
Currently Selected:
ÁLUKA 9: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma