ÁLUKA 11

Ācɛ ā ka iŋini tá Óndú ā

1Ācɛ ā gbɔɔ́ kóō ka iŋini ohígbū unwalu kú uwā. Eko nɛ̄ Óndú ā le iŋini nēé ka ā pó ā, ó le cɔ̄nū, anɔ́ɔ ó le ɔlá tū í klá ācɛ ā á. Ɔlá ā kwú ācɛ nēe lā ogwu éyi kú ɛga nēé lā í yi tāajɛ. 2Ācɛ ā gbɔɔ́ ō jikwū klá Umósīsi kóō tá uwā abɔ̄. Umósīsi le ɔkɔ gbā lɛ Óndú ā, anɔ́ɔ ɔlá ā ge nyí á. 3Ohígbū ɛ̄nyā ā, é hī iyē kú abɔ́ɔ ka, Utabéra,#11.3 UtabéraIyē nyā lɛbɛ̄ɛka “ɔlá o yɔ̄ ī yi” okónu ācɛ Uhíbru ā ohígbū ka ɔlá kú Óndú ā yi ɔtāhɛ̄ uwā.

Umósīsi le anyākwɔ́cɛ ofɛtá ce igwó fu

4Ācɛ ewɔhá ōhī bá ipú ācɛ Ísrɛ̄lu bá ī nyɔ̄ mla uwá. É wɛ ācɛ o yúnwɛ̄bɛ́ nɛ̄ɛ̄nɛ̄hi. Ācɛ kú Ísrɛ̄lu kōō gbɔɔ́ ō ka iŋini dúú kahíníī, “Ɔ́dāŋ ka, alɔ kōō lɛ ɛbɛ́ má kwú lé ōfōōfūnū.” 5Alɔ blakwu ɛbéenyi nɛ̄ alɔ gē lé ajɛ kú Íjīpiti ɛ́gɛ́nɛ̄ alɔ cɛgbá lɛ ā. Ógāapɛ, mɛ́mla álibácā, mɛ́mla ɔdā nēé hī ka ukúkūmba ā. 6Amáŋ, abālɔbányā abɔ̄ le hɛ́ alɔ iyē ɛɛ́, ɔdā dúúmā ɔhá í yɔ̄ nɛ̄ alɔ gē lé gwū umaná nyā nɛ̄ alɔ gē lé ɛ̄cī dóódu nyā ŋ́.

7 # Oyɛb 16.31 Umaná ā lɛbɛ̄ɛka īkpɔ̄cí lígíí-lígíí, ɛnɛ̄hɛ́ mla odo ā. 8#Oyɛb 16.13-15Ācɛ ā ī nyɔ̄ ī tú ɔ̄ bá, cɛ́ɛ́ é lɛ ɔ́ wú ɔjī klla lɛ ɔ́ gbā ɛgɔ̄, kwú ɔ̄ ú ce ɔlá ipú ɛ̄hī. É ge yá igbō ŋmá anú. Ɔnyɛ kú nū lɛbɛ̄ɛka igbō nēé yá mla anɔ̄ ɛ̄yīpɛ̄ ā. 9Eko nɛ̄ ébú le ce klla ɔlɛ́ uwā otú nɛ, umaná ā gē wā ajɛ mla anú.

Umósīsi ba Ɔwɔicō ɛbɛ́

10Eko nɛ̄ Umósīsi le pó ka ācɛ le túbá ígwíígwu okómpīinu kú ɔlɛ́ uwā bá ī jīkwu ā. Ó le kwú Umósīsi iyē nɛ̄hi, ohígbū ka Óndú ā le cɔ̄nū mla uwá. 11Umósīsi da Óndú ā kahíníī, “Ɔdíyá nāa yá um ɔdɔ̄bɔ̄bí ɛ́gɛ́nyā ā? Ɔdíyá nɛ̄ ɛlā kú um í he uwɔ ɔtū ŋ́ mā? Ɔdíyá nāa je iyó kóō bī ācɛ nēe bá nyā ce um ɛyí ā? 12Ó wɛ ami yá uwā ā ŋ́. Ó kē wɛ ami ma uwá ā ŋ́. Ɔdíyá nāa da um ka ami ɔ́ bī uwā ipú abɔ̄ kú um bɛ́gɛ́nɛ̄ é gē bī ɔyí ō gwá amɛ̄ abɔ̄ ā, ga ajɛ nāa cokónu nū lɛ aádáádā uwā ā? 13Iní nɛ̄ n géē má ɛbɛ́ ŋmá nōo géē jila odúúdu ɛwa nyā glá ā? Ohígbū keé bá ī jikwū tū um eko dóódu kahíníī, ‘Je ɛbɛ́ lɛ alɔ kú ālɔ̄ lé.’ 14Ń bī ācɛ nēe bá nyā ōfōōfū um glá ŋ́, unwalu kú uwā le ce um bá. 15Ɔ́dāŋ ka a géē yá um lɛ ā, méyīnyinyi um kú ā lɛ um ŋmó igbo ékpónú, cɛ́ɛ́ ń gáā yɔ̄ ī má ɔplɛ́ca lɛ ā igbɔhá ɛ́ɛ́ gɛ ŋ́.’”

Ɔwɔicō le ohi tá Umósīsi

16Anɔ́ɔ Óndú ā da Umósīsi kahíníī, “Lɛ anyākwɔ́cɛ nēe wɛ aótrɛ̄yí kú Ísrɛ̄lu ofɛtá ce igwó fu, ká ā lɛ uwá kpó gé um ipú Áklɔ̄kpīihɔ ā, cɛ́ɛ́ kéē háyi abɔ́ɔ mla uwɔ. 17N géē wā í kɛlā mla uwɔ abɔ́ɔ. N géē je alelékwū ōhī nɛ̄ n je gā uwɔ ā ŋmá ɛgiyí uwɔ, cɛ́ɛ́ n kwú lɛ uwá. Cɛ́ɛ́ kéē géē bá ī bī iyó ákanya kú ācɛ kú Ísrɛ̄lu ā mla uwɔ, nɛ̄ á gáā bī iyó ā ōfōōfū uwɔ gɛ ŋ́. 18Le ka lɛ ācɛ ā kéē lɛ iyī uwā tīihɔ, ohígbū ka óócí, é géē lɛ ɛbɛ́ nēé í lé. Ohígbū kēé le ikwū je klá Óndú ā ka, ɔ̄nyɛ ɔ́ɔ géē je ɛbɛ́ lɛ aá lé ā? Aá ka ɔ́ɔ lɔhi lɛ aá Íjīpiti fíyɛ́. Ohígbū ɔ́ɔmā, ó ka Óndú ā ɔ́ɔ géē je ɛbɛ́ lɛ uwá nēé géē lé. 19Aá géē lé ɛbɛ́, ó gáā wɛ ɛ̄cī éyi, ámāŋ ɛ̄cī ɛpa ŋ́, ámāŋ ɛ̄cī ɛhɔ̄ ŋ́, ámāŋ ɛ̄cī igwó ŋ́, ámāŋ ɛ̄cī ofu ŋ́. 20Amáŋ, ipú ɔyā odunkwulu jāā gbéeko nɛ̄ ɛbɛ́ ā gbɔɔ́ ō cē bla aá ɛnwū, nɛ̄ó kwú cá aá eyī. Ɔdā nyā géē yá ohígbū ka aá tá Óndú ā nōo yɔ̄ ɔtāhɛ̄ aá ā, gē jikwū kahíníī, “Ɔdíyá nɛ̄ alɔ bɛ̄cɛ ŋmá Íjīpiti ā?” 21Amáŋ, Umósīsi kahíníī, “Ācɛ kú Ísrɛ̄lu nɛ̄ n gē leyīkwu uwá ā wɛ úlā bá ɛga úlā ɛtá ce úlā ofu igwɛ́ɛhɔ̄ 600,000, anɔ́ɔ a ka ami ɔ́ɔ géē je ɛbɛ́ lɛ uwá ɔyā odumkulu á ā? 22Aálá mɛ́mla ɛna nɛ̄ alɔ géē kpó ŋmó ɛ́ɛ́ kóō jɛ̄ uwā áā, kɛ̄ɛ ka odúúdu ɛbéenyi kú ísu nɛ̄ alɔ géē túbá ɛ́ɛ́ nɛ̄ó géē jɛ̄ uwā ā a?” 23Óndú ā tá Umósīsi ohi kahíníī, “Ɔdā dúúmā ce ɔfú kú um abɔ̄ bá nɛɛ? Abālɔbányā, aá géē má ɔ̄, ɔ́dāŋ ka ɛlā nɛ̄ n ka ā géē yá jīla, ámāŋ koó gáā yá jīla ŋ́.”

24Anɔ́ɔ Umósīsi le tɛ́ɛcɛ gaá lɛ ɛlā nɛ̄ Óndú ā ka ā ka lɛ ācɛ ā. Anɔ́ɔ ó le anyākwɔ́cɛ ofɛtá ce igwó ā fu, kwú uwā ú kwu ɔgba biílí ipu Áklɔ̄kpīihɔ ā. 25Anɔ́ɔ Óndú ā gaajɛ ipú ojuja gaá le ɛlā ka lɛ uwá. Anɔ́ɔ ó kwú ōhī kú alelékwū ú ŋmá ɛgiyí Umósīsi, kwú ɔ̄ ú tá ipú uwā. Eko nɛ̄ó kwú Alelékwū ā ú tá ipú uwā ā, é gbɔɔ́ ō kɛlā bɛ̄ɛka ācomɛ́ɛbɛ́ ā, amáŋ, é ka gɔ́bū fíyɛ́ eko ɔ́ɔmā gɛ ŋ́.

26Ācɛ ɛpa kú anyākwɔ́cɛ ā, Ɛ́lídādi mɛ́mla Umédādi klá ɔlɛ́, é ga ipú Áklɔ̄kpīihɔ ā ŋ́. Alelékwū ā gā ipú uwā, anɔ́ɔ é gbɔɔ́ ō kɛlā bɛ̄ɛka ācomɛ́ɛbɛ́ ā dúú ɔlɛ́ uwā abɔ́ɔ. 27Oklobīya éyi le inya kwu gaá le ka lɛ Umósīsi, ɔdā nɛ̄ Ɛ́ldādi mɛ́mla Umédādi yɔ̄ ī yá ā. 28Anɔ́ɔ Ujóssuwa, ɔyí kú Unɔ́n nōo húmáyī tá Umósīsi abɔ̄ ŋmá eko ɔyípɛ̄ kú nū ā da Umósīsi kahíníī, “Lɛ uwá anú ci ɔkpani.” 29Amáŋ Umósīsi tá ɔ̄ ohi kahíníī, “A gē ka ɛ̄nyā ohígbū olɔhi kú um nɛɛ? Ó géē he um ɔtū, ɔ́dāŋ ka odúúdu ācɛ kú Óndú ā wɛ ācomɛ́ɛbɛ́ nɛ̄ Óndú ā géē je alelékwū kú nū lɛ uwá.” 30Anɔ́ɔ Umósīsi mɛ́mla anyākwɔ́cɛ ofɛɛtá ce igwó ā pīyɛyí wā ɔlɛ́ ŋmá ipú Áklɔ̄kpīihɔ ā á.

Óndú ā le ɔ́wá kú ígbáanɔ nōo lɛbɛ̄ɛka ɛwá ɔkpá ā tɛ̄hɔ̄ fu uwá

31Anɔ́ɔ igbeékpónú Óndú ā lɛ owu nɛ̄hi tū wā ajɛ, anɔ́ɔ ó lɛ ɔ́wá kú ígbáanɔ nōo lɛbɛ̄ɛka ɛwá ɔkpá ā kpó gwu wā ŋmá okónu ísu. É wu licō ŋmá ajɛ fíyɛ́ ikpó ɛtá glá ŋ́. É le ce klɛ́ɛcɛ ɛga dóódu kú ipú ɔlɛ́ ā bɛ̄ɛka iyāwu kú ɛ̄cī éyi ā. 32Ɛ̄cī dóódu, otú dóódu, mɛ́mla oŋmɔ́ɔ̄cī nū, ācɛ ā bá ī yúklɔ́ kú aígbáanɔ ō kwú. É ī kwú nyɛ́ fíyɛ́ utín ofɛpa cigwó ŋ́. É le uwá kpó bá ɛcɛ ɛga dóódu kú ɛga nēé lā ɛbɛɛbɛ. 33Eko nēé le ɛbɛ́ lɛ nɛ̄hi bá ī lé ā, Óndú ā le cɔ̄nū le ōcē obɔ̄bí tū klá uwá, ó gbɔɔ́ ō ŋmó uwā bónū nɛ̄hi. 34Anɔ́ɔ é kwú iyē ú ce abɔ́ɔ kahíníī, “Unóji kú unwɛbɛ́.” Ohígbū ka abɔ́ɔ ā nēé nyi okwū kú ācɛ o yúnwɛ̄bɛ́ ā á. 35Oŋmá abɔ́ɔ ā, ācɛ ā gbɔɔ́ ō ga Uhásɛ̄rɔtu, ɛga ɔhá nēé gwó ɔlɛ́ ā.

Currently Selected:

ÁLUKA 11: IFBCL

Highlight

Copy

Compare