UMÁTIYU 24
24
Ujísɔ̄si kɛlā lɛyíkwu o catāajɛ kú Agblīihɔ-nɛ̄hi ā
(Umák 13.1-2; Ulúk 21.5-6)
1Abɔ̄ Ujísɔ̄si nyɛ̄ɛ̄ ŋmá ipú Agblīihɔ-nɛ̄hi ā gē nyɔ̄ ā, ayíkpó kú nū wā ɛgiyí nū, gē tá ɔ̄ ɛlā kwu ɛ́gɛ́nɛ̄ é gwó Agblīihɔ-nɛ̄hi ā lɛ ā. 2Amáŋ ó tá uwā ohi kahíníī, “Aá má odúúdú aɔ́dā nēe bá ā? Ɔkwɛ̄yi, n̄ da aá ka, ó lɛ ɛcɔ̄ dúú yɔ̄ amānyā nēé géē mabɔ̄tá ce iyī uwā icō ŋ́. É géē míya ɛjɛ̄ɛ̄jī uwā wāajɛ kpɛ́mm.”
Ayíkpó kú Ujísɔ̄si géē móowe nɛ̄hi
(Umák 13.3-23; Ulúk 21.7-24)
3Eko nōó yājɛ ɛyí ɛfu kú olífu ā, ayíkpó kú nū wā ɛgiyí nū ɛkwūbá gaá kahíníī, “Da alɔ eko nɛ̄ ɔdā nēe bá ā géē yá ā. Ɔdí géē wɛ ɔdōcābɔ̄ kú eko nɛ̄ a géē wā ā mɛ́mla eko nɛ̄ ɛcɛ nyā géē mɛ ā?” 4Anɔ́ɔ Ujísɔ̄si tá uwā ohi kahíníī, “Aá lɛ eyī kwɛcɛ ká ɔ̄cɛ dúúmā kóō híīī plá aá ŋ́. 5Ohígbū ka ācɛ alɛwa géē wā í ka ka aá wā ŋmá iyē um géē ka kahíníī, ‘Ami wɛ Ohɔ́nyɛtá á’, cɛ́ɛ́ kéē plá ācɛ alɛwa. 6Aá géē pó ofu kú ɛfú ōkpó mɛ́mla ɔ̄kā kú ɛfú. Aá híīī yúúfi ŋ́, ohígbū ka ɔdā nēe bá ā géē yá piíí, amáŋ eko nɛ̄ ɛcɛ í mɛ ā í wā ɛ́ɛ́ ŋ́. 7Aéwo éyi géē cāŋjɛ héyī kwu éwɔhá, ajɔ̄ɔ̄cɛ́ éyi géē héyī kwu ajɔ̄ɔ̄cɛ́ ɔhá. Ɔkpɛtā mɛ́mla ajɛ o jíliyē klla hɛ́ wulu géē bá ɛga alɛwa. 8Amáŋ aɔ́dā nēe bá ā wɛ ohútu klɔɔ́dɔ́ɔ́ kú ōwē nɛ̄ ācɛ í má.
9 #
Umát 10.22
“É í je aá tá ōwē, é géē ŋmó aá, odúúdú ācɛ í wɔ́tū aá ohígbū iyē um. 10É géē yá ka ācɛ alɛwa kéē nyɛ̄ɛ̄ ka aá cɛ̄ ɛlɔ̄ɔwɔicō gɛ ŋ́, ācɛ alɛwa géē yá ibīyājɛ tū ɔ́mpa uwā, ācɛ ōhī í wɔ́tū ācɛ ɔhá. 11Ācomɛ́ɛbɛ ɛ̄kɛ̄mgbɛ̄ alɛwa géē wā, é kē géē bī ācɛ alɛwa nyíleyī. 12Ɔ́bíipú géē nyīla cɛ́ɛ́ ācɛ alɛwa í gáā yíhɔtū tá ācɛ ɔhá gɛ ŋ́. 13#Umát 10.22Amáŋ ɔ̄cɛ nōo lɛ ɔtūlé jāā ga ámōōmɛ ā nēé géē nyatá á. 14É géē tɔ́ɔna kú ɔ̄kōolɔhi kú ajɔ̄ɔ̄cɛ́ ā ga odúúdú kú ɛcɛ kóō wɛ ijáalí lɛ éwo dóódu. Cɛ́ɛ́ eko nɛ̄ ɛcɛ í mɛ ā le yá.
15 #
Udan 9.27; 11.31; 12.11 “Aá géē má ojibó o tēelihɔ, nɛ̄ Udánīyɛ̄lu ɔ̄comɛ́ɛbɛ kɛlā nū ā háyi ɛga otīihɔ ā (ɔ̄cɛ nōo yɔ̄ ī jé ɔkpá nyā kóō yá kóō jɛ́yí ɔdā nyā). 16“Cɛ́ɛ́ ācɛ nēe bá Ujudíya ā kéē le kwu ga ɛyí ɛfu. 17#Ulúk 17.31Ɔ̄cɛ nōo ce ɛyí inu, kóō híīī wāajɛ gaá je iyó ŋmá inu kú nū ŋ́. 18Ɔ̄cɛ nōo yɔ̄ ipú ɛhɔ̄, kóō híīī wā ɔlɛ́ gaá je úwé kú nū ŋ́. 19Amáŋ ó géē bɔ̄bí nɛhí lɛ anyā nēe yīīpú mɛ́mla aɛ́nɛ̄ e gē je amɛ̄ lɛ ayí gwá eko ɔ́ɔmā ā. 20Amáŋ aá gbɔ̄ɔkɔ ká eko nɛ̄ aá géē kwu ā kóō tá eko ɔgwā ámāŋ ɛ̄cī usábāti ŋ́. 21#Udan 12.1; Mafú 7.14Ohígbū ka eko ɔ́ɔmā ā, ōwē nɛ̄hi géē yɔ̄ nɛ̄ ɛdɔ nū í yɔ̄ jéjéē ɛ́ɛ́ ŋ́, ŋmá eko nɛ̄ ɛcɛ gbɔɔ́ ā jāā kwu abālɔbányā, nōó kē gáā yɔ̄ gbóógbóō ɛ́ɛ́ gɛ ŋ́. 22Ɔ́dāŋ ka eko ɔ́ɔmāa í le kpií ŋ́ nɛɛ, é gáā nya ɔ̄cɛ dúúmā tá glá ŋ́. Amáŋ ohígbū ācɛ nɛ̄ Ɔwɔicō fu ā, ó géē cē eko ā kpií. 23“Ó lɛ ā, ɔ́dāŋ ka ɔ̄cɛ dúúmā da aá kahíníī, ‘Mɔ́ɔ̄, Ohɔ́nyɛtá ā yɔ̄ amānyā ámāŋ ánūmā a!’, aá híīī cɛ ŋ́. 24Ohígbū ka oóhɔ́nyɛtá ɛ̄kɛ̄mgbɛ̄ mɛ́mla ācomɛ́ɛbɛ ɛ̄kɛ̄mgbɛ̄ géē wɛ̄ɛcɛ, é kē í ma ɔdōcābɔ̄ nɛ̄hi mɛ́mla ɔdā idáagó fú kéē plá ācɛ. Ɔ́dāŋ kóō tɔ́ɔtɛ́ nɛ, é géē plá ācɛ nɛ̄ Ɔwɔicō fu abɔ̄yī nū ā dúú. 25Aá má ɔ̄, n tɛtɛ le da aá táajɛ ɛɛ́. 26#Ulúk 17.23,24Ohígbū ɔ́ɔmā ā, ɔ́dāŋ kéē da aá ka, ‘Aá má ɔ̄, ó yɔ̄ ígbíli,’ aá híīī nyɔ̄ abɔ́ɔ ŋ́. Ɔ́dāŋ keé da ka, ‘Aá má ɔ̄, ó yɔ̄ inu eyīpú,’ aá híīī cɛ̄ ŋ́. 27Ohígbū ka ɛ́gɛ́nɛ̄ ɔwɔ gē límanya ŋmá ɛnɔ̄ɔ̄cī ā, gē cɛ̄ gā ɛnɔ̄ɔ̄nɛ̄ ā, ɛ́gɔ́ɔmā nɛ̄ Ɔyínɔ̄nyīlɔ kú Ɔ̄cɛ géē wā lɛ dúú á. 28#Ulúk 17.37“Ɛga dúú nɛ̄ okwu tá ā, abɔ́ɔ nɛ̄ aépū gē túbá á.”
Ɔdā nōo géē yá eko nɛ̄ Ɔyínɔ̄nyīlɔ kú Ɔ̄cɛ géē wā ā
(Umák 13.24-27; Ulúk 21.25-28)
29 #
Ayis 13.10; Ujów 2.10,31; 3.15; Mafú 6.12;
Ayis 13.10; Isík 32.7; Ujów 2.10; 3.15;
Ayis 34.4; Mafú 6.13 “Ikpíkpó nɛ̄ eko nɛ̄ ācɛ géē móowē ā mɛ, ɛnɔ géē je dobū, ɔyā í kē gáā fíyajɛ glá ŋ́, aínyílɔ́wɔ í fō ŋmá ɔkpáncō, Ɔwɔicō í jíla ɔfú kú ɔkpáncō iyē 30#Udan 7.13; Usak 12.10-14; Mafú 1.7Eko ɔ́ɔmā ā, é géē ma ocābɔ̄ kú Ɔyínɔ̄nyīlɔ kú Ɔ̄cɛ fú ɔkpáncō. Eko ɔ́ɔmā odúúdú aípɔ́ɔma kú ɛcɛ géē bá ī jikwū, abɔ̄ é géē má Ɔyínɔ̄nyīlɔ kú Ɔ̄cɛ gē yɔ̄ ī wā ɛyí ojuja kú ɔkpáncō mla ɔfú, mɛ́mla ɛgahi kú nū ā. 31Ó géē tū aálelékwū-ōtɛ̄hɔ̄ kú nū ɛhɔ̄ mla opo okɛ̄la nɛ̄hi, é kē géē tū ācɛ nēé fu ā bá ŋmá ābɔ̄ ɛnɛ kú ɛcɛ, ŋmá ɛbɛɛbɛ.
Ujísɔ̄si da uwá ɔdā nēé cíkō nwū ŋmá ɔcí ufígi ā
(Umák 13.28-37; Ulúk 21.29-36; 17.26-30)
32“Ɔcí ufígi kóō lɛ odée nwū aá káá. Eko dúúmā nɛ̄ ābɔ̄ kú nū gbɔɔ́ ō lū nɛ̄ ēpū gbɔɔ́ ō wɛ̄ɛcɛ, aá jé ka ɔgwā le bá ɛɛ́. 33Ɔwɛ ékpó ɔ́ɔmā, eko nɛ̄ aá lɛ ɔdā dóódu nēe bá ā má, aá jé ka eko ā le bá ajaajɛ kwu okónɔɔwɛ ɛɛ́. #24.33: Ó i tútū ō gbɔɔ́, ámāŋ ó kwu ajaajɛ, le tútū ō wā. 34Ɔkwɛ̄yi, n̄ da aá ka, ācɛ kú ɛlpéeko nyā í gáā pɛ́ kwú kwɛyí ŋ́, jāā gbéeko nɛ̄ ɔdā dóódu nēe bá ā le yá jīla. 35Ɔkpáncō mɛ́mla ɛcɛ géē mɛ, amáŋ ɛlā kú um í gáā mɛ glá ŋ́.
36“Ɔ̄cɛ dúúmā í jé eko nɛ̄ ɛ̄cī ɔ́ɔmā ámāŋ eko ɔ́ɔmā í wā ā ŋ́, ó kōō wɛ aálelékwū-ōtɛ̄hɔ̄ kú ɔkpáncō ámāŋ Ɔyínɔ̄nyīlɔ ā, ń táafú ŋ́ ayíka Ádā ā ōfūnū nɛ. 37#Ohút 6.5-8Eko nɛ̄ Ɔyínɔnyilɔ kú Ɔ̄cɛ géē wā ā géē lɛbɛ̄ɛka ɔdā nōo yá eko kú Unówa ā. 38Eko ɔ́ɔmā gbɔbū lɛ éŋkpɔ̄ nōo cēenyi kpɛ́ɛcɛ ā, ācɛ bá ī lé ɔdōlé klla bá ī gwá ā. É bá ī lɛ ɔnyā klla bá ī je ɔnyā lɛ ɔbá, jāā gbó ɛ̄cī nɛ̄ Unówa ga ipú Ɔ́wu ā. 39#Ohút 7.6-24É kē jé ŋ́, jāā gbéeko nɛ̄ éŋkpɔ̄ ā gaá lɛ uwá kpó nyɔ̄, ɛ́gɔ́ɔmā nōó gáā lɛ eko nɛ̄ Ɔyínɔ̄nyīlɔ kú Ɔ̄cɛ géē wā á. 40Eko ɔ́ɔmā ācɛ ɛpa géē bá ɛhɔ̄, é géē kwú éyi ú, cɛ́ɛ́ é habɔ̄ ɔhá tá. 41Anyā ɛpa géē bá ī gbā ɔdā ɛgɔ̄, é géē je éyi, é kē í habɔ̄ ɔhá tá. 42Aá lɛ eyī kwɛcɛ, ohígbū ka aá jé ɛ̄cī nɛ̄ Óndú aá ā gáā wā ā ŋ́. 43#Ulúk 12.39,40Amáŋ aá jé ɛ̄nyā, ɔ́dāŋ ka ádɔ̄lɛ́ ā je ɛplá otú nɛ̄ uwī ā géē wā ā nɛɛ, ó géē yɛ í leyī kwɛcɛ ī gbāājɛ, ó gáā cɛ̄ ká uwī kóō ca ɔwɛ klá anú ŋ́. 44Ohígbū ɔ́ɔmā, ó wɛ opií kú aá le tútū eko dóódu, ohígbū ka Ɔyí kú Ɔ̄cɛ géē wā eko nɛ̄ aá lɛ eyī ce ŋ́ mā ā.
Ācocɛ̄hɔ̄ cíkā nēé ī kpɔ́tūce uwá.
(Ulúk 12.42-46)
45“Ɔ̄nyɛ wɛ ɔ̄cocɛ̄hɔ̄ nēé cíkā ō lɛ ɔtū ce ɔ́, nōo jéeyī, nɛ̄ óndú nū géē fu kóō leyīkwu ācɛ ɔlɛ́ nū, kóō je ɔdōlé lɛ uwá eko ā? 46Ákú ɔ̄cocɛ̄hɔ̄ ɔ́ɔmā géē lɔhi nɛ̄ eko nɛ̄ óndú nū gā ā, ó má ɔ̄ yɔ̄ ī yá ɔdā nōó da ɔ́ ā. 47Ɔkwɛ̄yi, n̄ da aá ka, ó géē je ɔ́ yá ɔ̄cɛ nōo í leyīkwu odúúdú agbénú kú nū. 48Amáŋ ɔ́dāŋ kóō wɛ ɔ̄cocɛ̄hɔ̄ obɔ̄bíipú, anɔ́ɔ ó ka ipɔ́tū kú nū kahíníī, ‘Óndú um le eko kpó bónū ɛɛ́’. 49Anɔ́ɔ ó gbɔɔ́ ō ŋmó ācocɛ̄hɔ̄ aɔ́mpa nū ijē, klla gbɔɔ́ ō lé ɔdōlé klla gbɔɔ́ ō gwá ejé mɛ́mla ācɛ ogwéjé fíyɛ́ abɔ̄ ā. 50Anɔ́ɔ óndú kú ɔ̄cocɛ̄hɔ̄ ā géē wā ɛ̄cī mɛ́mla eko nōó leyī ce ɔ́ ŋ́. 51Ó géē yá ɔ̄cocɛ̄hɔ̄ ā italā, klla í tá ɔ̄ tɛ́ɛcɛ kóō lɛ ɛdɔ ōwē nēé géē yá ācɛ o leyī ɛpa ā yá ɔ̄. Abɔ́ɔ ā, ó géē jikwū í hīla aīnu.”
The Bible Society of Nigeria
Learn More About Ubáyíbu kú Idɔma