UMÁTIYU 23
23
Ujísɔ̄si ŋmó aótrɛ̄yí kú Ísrɛ̄lu okónu
(Umák 12.38-40; Ulúk 11.37-54; 20.45-47)
1Anɔ́ɔ Ujísɔ̄si da ɛwa ā mɛ́mla ayíkpó kú nū kahíníī, 2“Aítíca kú íne mɛ́mla ācɛ Ufárisīi wɛ ācɛ nēé je íkwu ō cɔ̄wɔ kú íne kú Umósīsi ā lɛ uwá á. 3Abɔ̄ ó lɛ ā, ɔdā dóódu nēé da aá, aá lɛyítáajɛ, klla lɛ uwá yá. Amáŋ aá híīī gbla ucē kú uwá yá ŋ́. Ohígbū keé ī ka, amáŋ é ī yá ŋ́. 4É gé pi ācɛ abɔ̄fú kéē lɛyítáajɛ lɛ aíne nēe lɛbɛ̄ɛka iyó ogbɛnú nōo lɔnɔ ō bī nēé le ce ācɛ igbīhi ā. É kōō tútū kéē lɛ aíkābɔ̄ áncā je iyó ā gicō tá ācɛ abɔ̄ ŋ́. 5#Umát 6.1; Obla 6.8; Áluk 15.38É gē yá odúúdú úklɔ́ kú uwā ká ācɛ kéē má uwā. Aá má aɔ́dā nēe lɛbɛ̄ɛka íkpɔ́yí ɛkpa nēé tá ɛlɔ̄ɔwɔicō tā ɔ̄ nɛ̄ ācɛ gē le bá údɔ̄bū mɛ́mla ácábɔ̄ kóō mafú ɛ́gɛ́nɛ̄ é lɛyítáajɛ lɛ Ɔwɔicō ā. Aá má ɛ́gɛ́nɛ̄ ákú uwā nwuné lɛ ā. É gē le ajaŋja o playi awulú kú uwā yá līkpō klla le ɔ́ yá lɔwá fongoo. #23.5: É gē le ajaŋja o playi…É gē le ajaŋja playi uwā kóō mafú ɛ́gɛ́nɛ̄ é lɛyítáajɛ lɛ Ɔwɔicō lɛ ā. (má Álūk 15.37-41) 6Ó gē he uwá ɔtū kéē yāajɛ ɛga ojīlīmā eko kú ucɛ, mɛ́mla o yāajɛ iyɔ̄bū ɛga olɔhi fíyɛ́ dúú ipú aɛ́gogbɔ̄ɔkɔ. 7Ó ī he uwá ɔtū kéē hokónu tū uwā ipú ōlihī, ká ācɛ kéē klla hī uwā ka ‘Itíca’. 8Amáŋ é híīī hī aá ka ‘Itíca’ ŋ́, ohígbū ka aá lɛ Itíca ékpó, odúúdú aá kē wɛ ayínɛ́ nɔ̄nyā mɛ́mla ayínɛ́ nɔ̄nyīlɔ. 9Aá híīī hī ɔ̄cɛ dúúmā ka, ‘Ádā’ aá ɛcɛ nyā ŋ́, ohígbū ka aá lɛ Ádā ékpó, ó kē yɔ̄ ɔkpáncō. 10Ɛ́ɛ́ nēé gē hī aá ka ‘Ɔkpani’ ŋ́, ohígbū ka aá lɛ ɔkpani ékpó, anú kē wɛ Ohɔ́nyɛtá á. 11#Umát 20.26,27; Umák 9.35; 10.43,44; Ulúk 22.26Ɔ̄cɛ nōo nwuné ipú aá fíyɛ́ dúú ā, géē wɛ ɔ̄cɛ o cɛ̄ aá ɛhɔ̄ á. 12#Ulúk 14.11; 18.14Ɔ̄cɛ nōo gē je iyī nū gicō, Ɔwɔicō géē tū ɔ̄ wāajɛ. Ɔ̄cɛ nōo lɛ iyī nū tū wāajɛ, ó géē je ɔ́ gicō.
Ujísɔ̄si ŋmá aítíca kú íne mɛ́mla ācɛ Ufárisīi okónu kéē leyīɛpa.
13“Aá le jí ɛɛ́, aítíca kú íne mɛ́mla ācɛ Ufárisīi, aá nēe leyīɛpa ā. Ohígbū ka aá lɛ ɔwɛ kú ajɔ̄ɔ̄cɛ́ kú ɔkpáncō gwū tū ācɛ, aá bēhé ŋ́, aá ke cɛ̄ lɛ ācɛ nēe tíne kéē bēhé ā bēhé ŋ́. 14Aá le jí ɛɛ́, aítíca kú íne mɛ́mla ācɛ Ufárisīi, aá nēe leyīɛpa ā. Aá gē pīya anyōkwū tū gē mīyɛ aɔ́lɛ́ kú anyōkwū, cɛ́ɛ́ aá gē gbɔ̄ɔkɔ olīgbō ajɛ kú aá mafú ka aá wɛ ācɛ olɔhi. Ohígbū ɔ́ɔmā italā nēé géē yá ā géē fíyɛ́ dúú á. 15Aá le jí ɛɛ́, aítíca kú íne mɛ́mla ācɛ Ufárisīi, aá nēe leyīɛpa, aá yɛ gla ísu ipú ajɛ áncā kú aá lɛ ɔyíkpó éyi lɛ, amáŋ eko nɛ̄ aá lɛ ɔ́ lɛ ā, aá lɛ ɔ́ yá kóō le pīya ɔyí kú ɔlíkɔtɔ ɔ́klɛ́ɛpa fíyɛ́ aá ā.
16“Aá le jí ɛɛ́, aá nēe lɛbɛ̄ɛka aópeyī ō bī aópeyī jɔ́ɔwɛ ā. Aá gē ka kahíníī, ‘Ɔ́dāŋ ka ɔ̄cɛ dúúmā bī Agblīihɔ-nɛ̄hi ā le ɛka gbo, ó wɛ ɔdā dúúmā ŋ́. Amáŋ ɔ́dāŋ ka ɔ̄cɛ dúúmā bī ugóolu kú Agblīihɔ-nɛ̄hi ā le ɛka gbo, ó géē yá ɛka nōó gbo ā piíí.’ 17Aá aólíla nōo wɛ aópeyī, ɛ̄nyá nwuné fíyɛ́ ā? Ugóolu ā kɛ̄ɛ̄ ka Agblīihɔ-nɛ̄hi nōo yá ká ugóolu ā kóō le tīihɔ āa? 18Aá ka dúú kahíníī, ‘Ɔ́dāŋ ka ɔ̄cɛ dúúmā ɔ́ɔ bī ede le gbɛka, ka ɔ́ɔ wɛ ɔdā dúúmā ŋ́. Amáŋ ɔ́dāŋ ka ɔ̄cɛ dúúmā lɛ ɛka gbo ŋmá lɛ ɛhi nōo yɔ̄ ɛyí ede ā, ó géē yá ɛka kú nū ā piíí.’ 19Aá wɛ aópeyī! Ɛ̄nyá nwuné fíyɛ́ ā? Ɛhi ā kɛ̄ɛ ka ede nōo yá ká ɛhi ā kóō le tīihɔ āa? 20Ohígbū ɔ́ɔmā ā ɔ̄cɛ nōo bī ede le gbɛka, bī ɔ̄ le gbɛka, mɛ́mla ɔdā dóódu nōo yɔ̄ ɛyí nū ā dúú. 21Ɔ̄cɛ nōo kē bī Agblīihɔ-nɛ̄hi ā le gbɛka, kē bī ɔ̄ le gbɛka mɛ́mla Ɔwɔicō nōo lā ipú nū ā. 22#Ayis 66.1; Umát 5.34Ɔ̄cɛ nōo bī ɔkpáncō le gbɛka, bī akpa ɔcɛ́ kú Ɔwɔicō mɛ́mla Ɔwɔicō nōo yājɛ ɛyí nū ā gbɛka dúú.
23 #
Ulīf 27.30
“Aá le jí ɛɛ́, aítíca kú íne mɛ́mla ācɛ Ufárisīi, aá nēe leyīɛpa ā. Aá gē je éyi kú ipú igwó kú aɔ́dā nēe nyɛ́ fíyɛ́ dúú bɛ̄ɛka aépu nēé hī ka umínt mɛ́mla udíll mɛ́mla ukúmin ā. Amáŋ aá lɛ eyī gwū ɛlā ocɛgbá kú íne ā, bɛ̄ɛka ɛpɔ̄ okpaakpa mɛ́mla eyīnyinyi mɛ́mla ɔkwɔ̄ɔ̄kwɛ̄yi ā tá. Aá cíkā ō je o kɔ̄ ɛga ogwó kú ɔdā dóódu kú aá, amáŋ aá cíkā ō lɛ eyī gwū ɛlā ocɛ́gbá fíyɛ́ dúú ā bónū ŋ́. 24Aá nēe lɛbɛ̄ɛka aópeyī ōbī aópeyī jɔ́ɔwɛ ā. Aá gē cīla íkítíkpī tɛ́ɛcɛ ŋmá éŋkpɔ̄ amáŋ aá kē ī je inyankwūlūmī mlɛ!
25“Aá le jí ɛɛ́, aítíca kú íne mɛ́mla ācɛ Ufárisīi, aá nēe leyīɛpa. Ohígbū ka aá gē na eyīyɛ̄ɛcɛ kú íkókwū mɛ́mla ocíbú, amáŋ ɔdā nɛ̄ aá lɛ abɔ̄fú mɛ́mla unwū ɔdā o yá fíyɛ́ abɔ̄ ā bá eyīpú uwā láyí. 26Awɔ, ɔ̄cɛ Ufárisīi nōo wɛ opeyī ā, lɛ eyīpú kú íkókwū mɛ́mla ocíbú nā gbɔbū ɛ́ɛ́, cɛ́ɛ́ kú eyīyɛ̄ɛcɛ kú uwā kóō le yá yēŋēē dúú.
27 #
Ācot 23.3
“Aá le jí ɛɛ́, aítíca kú íne mɛ́mla ācɛ Ufárisīi, aá nēe leyīɛpa ā. Aá lɛbɛ̄ɛka únóji nēé bī áfū le nya ɔ́, nɛ̄ eyīyɛ̄ɛcɛ kú nū lɔhi ō má, amáŋ nɛ̄ ikpokwú kú okwū mɛ́mla ɔdōblínyī dóódu le mu eyīpu nū ā. 28Ɔwɛ ékpó ɔ́ɔmā, eyīyɛ̄ɛcɛ, aá wɛ ɛ́nɛ́nɛ̄ ācɛ okpaakpa iyɔ̄bū ācɛ, amáŋ eyīɛpa o lɛ mɛ́mla ɔ́bíipú le mu aá ipú.
29“Aá le jí ɛɛ́, aítíca kú íne mɛ́mla ācɛ Ufárisīi, aá nēe leyīɛpa ā. Ohígbū ka aá gē ma aúnóji kú ācomɛ́ɛbɛ kú eko nɛ̄ncɛ̄ āa. Aá klla gē yá únóji kú ācɛ okpaakpa ā ifa. 30Aá gē ka kahíníī, ‘Ɔ́dāŋ ka alɔ yɔ̄ eko kú aádā alɔ ā nɛɛ, alɔ í géē yɛ í yɛce uwá kpó ācomɛ́ɛbɛ ā ŋmó ŋ́.’ 31Ipú ɛ̄nyā ā, aá ī cībéenú ce īyī aá ka aá wɛ ayínɔ̄nyīlɔ kú ācɛ nēe ŋmó ācomɛ́ɛbɛ ā á. 32Aá gbɔɔ́, kú aá lɛ ɔdā nɛ̄ aádā aá hútu ā yá kwɛyí. 33#Umát 3.7; 12.34; Ulúk 3.7Aá nēe lɛbɛ̄ɛka aɛ́gwā, klla lɛbɛ̄ɛka ugbɛ kú ogwiji ā, abɔ̄ ó yá lɛ ɛ́ɛ́ nɛ̄ aá gbɛlá ka aá géē kwu, nēe gáā ŋmó aá ɛpɔ̄bí je aá tá ipú ɔlíkɔtɔ ŋ́ mā ā? 34Ohígbū ɔ́ɔmā ā, aá má ɔ̄, n géē tū ācomɛ́ɛbɛ mɛ́mla ācɛ ojéeyī mɛ́mla aítíca ɛhɔ̄ fu aá piíí. Aá géē ŋmó aóhī kú uwā, géē kpó uwá nyɔ́kpá, géē gɔ́ aóhī ipú aɛ́gogbɔ̄ɔkɔ kú aá, aá klla ī nū uwā ŋmá igelī éyi ga igelī ɔhá. 35#Ohút 4.8; 2 Úklɔ́ 24.20,21Cɛ́ɛ́ ká oyī kú ācɛ okpaakpa dúúdú nēé ŋmó ɛcɛ ā kóō ce aá ɛyí. Oyī kú ācɛ okpaakpa ŋmá ákú Ébɛ̄lu, jāā kwu ákú Usɛkaríya, ɔyínɔ̄nyīlɔ kú Ubɛrakíya nēé ŋmó ɔtāhɛ̄ Agblīihɔ-nɛ̄hi ā mɛ́mla ɛyí ede ā. 36N da aá ɔkwɔ̄ɔ̄kwɛ̄yi ka, odúúdú italā kú odúúdú ācɛ nēé kpó ŋmó kpɛ́mm ā géē wā í ce ācɛ kú eko mā ɛyí.
Ujísɔ̄si lɛ ihɔtū nɛ̄hi lɛ Ujerúsālɛm
(Ulúk 13.34-35)
37“Ujerúsālɛm, Ujerúsālɛm! Ācɛ ɔlɛ́ uwɔ gē ŋmó ācomɛ́ɛbɛ klla gē tá ɛcɔ̄ klá ācɛ nēé tɛ̄hɔ̄ gé lɛ uwá ā, igbɛ alɛwa nɛ̄ n tíne ká n̄ lɛ ayí uwɔ túbá tɔ̄há ɛ́gɛ́nɛ̄ ɛ́nɛ́ ugwū gē tū ayí nū bá ɛháajɛ acá kú nū á, amáŋ á kē cɛ̄ ŋ́? 38#Ujer 22.5Aá má ɔ̄, Ɔwɔicō, géē cālɛ́ ŋmá Agblīihɔ-nɛ̄hi kú aá, ó í je pīya alácɛ̄ 39#Aíjē 118.26N da aá ka, aá gáā má um gɛ ŋ́ ŋmá abālɔbányā jāā gbéeko nɛ̄ aá géē kahíníī, ‘Ɔwɔicō kóō hɔ́hā ce ɔ̄cɛ nɛ̄ Óndú ā tɛ̄hɔ̄ gē wā ā.’”
The Bible Society of Nigeria
Learn More About Ubáyíbu kú Idɔma