UMÁTIYU 25
25
Ujísɔ̄si tá ācīije kú ayípáncɛ́nyā igwó
1 #
Ulúk 12.35
Eko ɔ́ɔmā nɛ̄ Ɔwɔicō géē wā í lɛ ajɔ̄ɔ̄cɛ́ kú ɔkpáncō kwajɛ ipú ɛcɛ nyā ā, í lɛbɛ̄ɛka ɔdā nōo yá ipú ɔ̄kā kú ayīpáncɛ́nyā igwó, nēe kpó aágege kú uwā nyɔ̄ gaá jīla ɔ̄cɛ olɔnyā ɔwɛ ā. 2Ācɛ ɛhɔ̄ kú uwā wɛ olíla, ācɛ ɛhɔ̄ ɔhá ā wɛ ācojéeyī. 3Aólíla ā kwú agege kú uwā í, amáŋ é bī anɔ̄ ohá dúúmā ipú íkpém mla iyī uwā ŋ́. 4Amáŋ aójéeyī ā bī anɔ̄ ɔhá ipú íkpém mɛ́mla agege kú uwa. 5Anɔ́ɔ abɔ̄ ɔ̄cɛ olɔnyā ā le gbojī ō wā ā, ɛ̄jɛ̄ le jɛ̄ odúúdú uwā, anɔ́ɔ uwá lɛ iyɔ̄lā kpó gbo á. 6Amáŋ ahāpōtú, ɔ̄cɛ éyi gbɔɔ́ ō dɛ̄gba kahíníī, ‘Aá mɔ́ɔ̄, ɔ̄cɛ olɔnyā ā gē wā ɛɛ́! Aá le bɛ̄cɛ kú aá gaá jīla anú ɔwɛ.’ 7Eko ɔ́ɔmāa odúúdú áncɛ́nyā ā cānjɛ, anɔ́ɔ é lɛ agege kú uwā tútū á. 8Amáŋ aólíla ā da aójéeyī ā kahíníī, “Aá je anɔ̄ kú aá ōhī lɛ alɔ ohígbū ka agege kú alɔ gē nyí ɛɛ́.’ 9Aójéeyī ā tóohi da uwá kahíníī, ‘Ó gáā jɛ alɔ mɛ́mla aá glá ŋ́. Ó í lɔhi lɛ aá fíyɛ́ kú aá nyɔ̄ ɛgiyí ācɛ nēe gē je lá ā, kú aá lɛ ōhī lá ŋmá abɔ̄ uwā.’ 10Eko nēé nyɔ̄ gáā lá anɔ̄ ā, ɔ̄cɛ olɔnyā ā gā. Anɔ́ɔ ācɛ nēe tútū ā le yɛ tá ɛgiyí ucɛ kú ɔnyā ō lɛ ā mɛ́mla anú, anɔ́ɔ é lɛ ɔwɛ gwū á. 11#Ulúk 13.25Anɔ́ɔ Igbīhāajɛ ā áncɛ́nyā ɔhá ā le pɛ́ wā yɔ̄ ī ka kahíníī, ‘Óndú, Óndú, lɛ ɔwɛ nwūla lɛ alɔ.’ 12Amáŋ ɔ̄cɛ olɔnyā ā tóohi kahíníī, ‘Ń kōō jé aá ŋ́.’ 13Anɔ́ɔ Ujísɔ̄si le ɛlā kú nū ŋmɛ́yí abɔ̄ nōó kahíníī, “Aá leyī kwɛɛcɛ kú aá le tútū, ohígbū kú aá jé ɛ̄cī ā ámāŋ eko nɛ̄ Ɔyínɔ̄nyīlɔ kú Ɔ̄cɛ géē kwúcē wā ā ŋ́.
Ujísɔ̄si tá ācīije kú ɔ̄cocɛ̄hɔ̄ nēe lɔtūce ɔ́ mɛ́mla ɛ̄nɛ̄ é lɔtūce ɔ́ ŋ́
(Ulúk 19.11-27)
14 #
Ulúk 19.11-27
“Eko ɔ́ɔmā ajɔ̄ɔ̄cɛ́ kú Ɔwɔicō géē lɛbɛ̄ɛka ɛ́gɛ́nyā. Ɔ̄cɛ éyi yɔ̄, nɛ̄ eko nɛ̄ ó yɔ̄ ī ga iyāwu ā, ó lɛ ācocɛ̄hɔ̄ kú nū hīgwú, anɔ́ɔ ó kwú agbénú kú nū ú kpó tū uwa abɔ̄ á. 15Ó je ɛkpa ɛhɔ̄ kú īkpīje ɔdɔ (ugóolu) lɛ ɔ̄cɛ éyi. Ó je ɛkpa ɛpa kú īkpīije ɔdɔ (ugóolu) lɛ ɔ̄cɛ ɔ́mpa ā. Anɔ́ɔ ó kē je ɛkpa éyi kú ikpīije ɔdɔ (ugóolu) lɛ ɔ̄cɛ ɔ́mɛtá ā á. Ó je lɛ ɔnyɔ̄ɔnyɛ ɛ́gɛ́nɛ̄ ɔfú kú ɔnyɔɔnyɛ lɛ ā. Anɔ́ɔ ó le tá iyāwu á. 16Ɔkwɔɔkwu ɔ́ɔmā ɔ̄cɛ nōo mīyɛ ɛkpa ɛhɔ̄ ā gbɔɔ́ ō bī ɔ̄ tɔ́ɔ́hí, anɔ́ɔ ó klla lɛ ile kú ɛkpa ɛhɔ̄ ɔhá lɛ á. 17Ɔ̄cɛ nōo mīyɛ ɛkpa ɛpa ā yá ɔdā ékpónú ā dúú, anɔ́ɔ ó lɛ ɛkpa ɛpa ɔhá lɛ á. 18Amáŋ ɔ̄cɛ nōo mīyɛ ɛkpa éyi ā nyɛ̄ɛ̄ gaá lɛ ɔ̄gɔ̄ bū, kwú ije kú óndú nū ā ú otayínū ipú nū. 19Abɔ̄ eko yɔ̄ gbóógbó ā, óndú kú ācocɛ̄hɔ̄ ā pīyɛyí wā ɔlɛ́, gaá lɛ ije ā gbakwú mla uwá. 20Anɔ́ɔ ɔ̄cɛ nōo mīyɛ ɛkpa ɛhɔ̄ kú īkpīije ā, bī ɛkpa ɛhɔ̄ kú īkpīije ɔhá wā anɔ́ɔ ó kahíníī, ‘Óndú, a je ɛkpa ɛhɔ̄ kú īkpīiije gā um, n lɛ ɛkpa ɛhɔ̄ ɔhá lɛ tū ɔ̄.’ 21Anɔ́ɔ óndú nū da ɔ́ kahíníī, ‘A yá lɔhi íbí, ɔ̄cocɛ̄hɔ̄ olɔhi nēé cíkā ō lɔtūce ɔ́, a lɛyítáajɛ ipú ɔdā nɛ̄ŋ́cɛ́, n géē je uwɔ pīya ɔ̄cɛ nōo í leyīkwu ɔdā nɛ̄hi. Wā í gwéeyē mɛ́mla um.’ 22Ɔ̄cɛ nōo mīyɛ ɛkpa ɛpa kú īkpīije ɔdɔ ā wā í kahíníī, ‘Óndú, a je ɛkpa ɛpa kú īkpīije gā um, mɔ́ɔ̄, n klla lɛ ɛkpa ɛpa ɔhá lɛ tū ɔ̄.’ 23Anɔ́ɔ óndú nū da ɔ́ kahíníī, ‘A yá lɔhi íbí, ɔ̄cocɛ̄hɔ̄ olɔhi nɛ̄ ɔ̄cɛ cíkā ō lɔtūce. A lɛyítáajɛ ipú ɔdā nɛ̄ŋ́cɛ́, n géē je uwɔ ú pīya ɔ̄cɛ nōo í leyīkwu ɔdā nɛ̄hi. Wā í gwéeyē mɛ́mla um.’ 24Anɔ́ɔ ɔ̄cɛ nōo mīyɛ ɛkpa éyi kú īkpīije ɔdɔ ā gā, anɔ́ɔ ó kahíníī, ‘Óndú, n jé uwɔ ka a wɛ ɔ̄cɛ olɔnɔ nɛ̄hi. A ī cē ŋmá ɛga nɛ̄ á nyi ŋ́, klla ī gla ŋmá ɛga nɛ̄ á kpó bá ŋ́. 25Ɛ́gɛ́nɛ̄ n gē yúúfi ā, n nyɛ̄ɛ̄ gaá kwú ɛkpa éyi kú īkpīije ɔdɔ kú uwɔ ā ú tayínū ipú ajɛ á. Mīyɛ ɔdā nōo wɛ ákú uwɔ ā.’ 26Anɔ́ɔ óndú nū tóohi da ɔ́ kahíníī, ‘Awɔ, ɔ̄cocɛ̄hɔ̄ obɔ̄bíipú mɛ́mla okwáahi, a jé ka n gē cē ŋmá ɛga nɛ̄ ń nyi ŋ́, n klla ī gla ŋmá ɛga nɛ ń kpó bá ŋ́. 27A cíkā ō kwú ije kú um ā ú tū ɛga nēe ī kpó ije tū nēé hī ka ubánki ā, cɛ́ɛ́ eko nɛ̄ n kwúcē ká n̄ mīyɛ ije kú um mɛ́mla ije nōo ga ɔ́ ā.’ 28Anɔ́ɔ ɔkpani ā da ɔ̄cɛ éyi kahíníī, ‘Mīyɛ ɛkpa éyi kú īkpīije ɔdɔ ā ú ŋmá abɔ̄ nū, cɛ́ɛ́ ká aá kwú lɛ ɔ̄cɛ nōo lɛ ɛkpa ɛhɔ̄ kú īkpīije ɔdɔ ā. 29#Umát 13.12; Umák 4.25; Ulúk 8.18Ohígbū ka ɔ̄cɛ nōo lɛ ā, é géē je lɛ ɔ́ fíyɛ́, cɛ́ɛ́ kóō géē lɛ nɛ̄hi. Amáŋ ɔ̄cɛ nōó lɛ odúúmā ŋ́, ɔdā nōó lɛ ā, é géē mīyɛ ŋmá abɔ̄ nū. 30#Umát 8.12; 22.13; Ulúk 13.28Aá kwú ɔ̄cocɛ̄hɔ̄ nōó tū ile ŋ́ mā ú tɛ́ɛcɛ ipú obū. Ó géē jikwū í hīla aīnu abɔ́ɔ.’
Ɔyínɔ̄nyīlɔ kú Ɔ̄cɛ géē kɛpɔ̄ tū ācɛ
31 #
Umát 16.27;
Umát 19.28
“Eko nɛ̄ Ɔyínɔ̄nyīlɔ kú Ɔ̄cɛ í wā mɛ́mla aálelékwū-ōtɛ̄hɔ̄ kú nū ā gaá cɔcɛ́ ā, eko ɔ́ɔmā ó géē yājɛ ɛyí akpa kú ɔcɛ́ kú nū mɛ́mla ɔfú nɛ̄hi kú ɔcɛ́. 32É géē tū odúúdú aéwo bá iyɔ̄bū nū, ó géē kɔ̄ uwā, éyi ŋmá ɛgiyí ɔhá, ɛ́gɛ́nɛ̄ ɔ̄cogbāálá gē kɔ̄ aálá ŋmá ɛgiyí aɛ́wū ā. 33Ó géē kpó aálá ā bá abɔ̄lɔ́ná kú nū, ó klla géē kpó aɛ́wū ā bá abɔ̄lúfīyē kú nū. 34Anɔ́ɔ ɔcɛ́ ā géē da aɛ́nɛ̄ e bá abɔ̄lɔ́ná kú nū ā kahíníī, ‘Aá gā, aá nɛ̄ Ádā um hɔ́hā ce aá kú aá lúgwū kú ajɔ̄ɔ̄cɛ́ nēé tútū lɛ aá ŋmá ohútu kú ɛcɛ ā.’ 35N hī aá igwú ohígbū ka eko nɛ̄ ɛmiyɛ yɔ̄ ī ŋmó um ā, anɔ́ɔ aá je ɔdōlé gā um á. Eko nɛ̄ ijēenyi yɔ̄ ī ŋmó um ā, aá je enyi gā um gwá. N wɛ ugbɔga, aá kē lɛ eyī kwū um. 36N tóohɛ́wa, aá kē lɛ īlī tū um ohí. N yɔ̄ gē doōcē, aá wā gaá má um. N yɔ̄ agbá, anɔ́ɔ aá wā ɛgiyí um gaá jila um á. 37Anɔ́ɔ ācɛ nēe yá ɔdā nōo he Ɔwɔicō ɔtū ā géē tóohi da ɔ́ kahíníī, ‘Óndú, eko nyá nɛ̄ alɔ má uwɔ nɛ̄ ɛmiyɛ yɔ̄ ī ŋmó uwɔ nɛ̄ alɔ je ɔdōlé gā uwɔ āa? Amáŋ nɛ̄ ijēēnyi yɔ̄ ī ŋmó uwɔ nɛ̄ alɔ je éŋkpɔ̄ gā uwɔ ā gwá āa? 38Eko nyá nɛ̄ alɔ má uwɔ nɛ̄ a wɛ ugbɔga nɛ̄ alɔ leyīkwu uwɔ āa? Amáŋ ka a tóohɛ́wa nɛ̄ alɔ lɛ īlī tū uwɔ ohí āa? 39Eko nyá nɛ̄ alɔ má uwɔ yɔ̄ ī doōcē ámāŋ ka a yɔ̄ agbá nɛ̄ alɔ wā ɛgiyí uwɔ gaá jila uwɔ āa?’ 40Anɔ́ɔ ɔcɛ́ ā géē tóohi da uwá kahíníī, ‘Ɔkwɛ̄yi, n̄ da aá ka, eko nɛ̄ aá yá ɔdā ɔ́ɔmā lɛ odúúmā kú ayínɛ́ um, ó kōō wɛ ɛ̄nɛ̄ o cɛgbá ŋ́ fíyɛ́ dúú ā, ami nɛ̄ aá yá gā um á.’ 41Anɔ́ɔ ó géē da aɛ́nɛ̄ e bá abɔ̄lúfīyē kú nū ā kahíníī, ‘Aá nyɛ̄ɛ̄ ŋmá ɛgiyí um, aá nēé tokónu lɛ aá ā, kú aá nyɔ̄ ipú ɔlíkɔtɔ opiyóó nēé tútū lɛ ebilíi mɛ́mla aálelékwū, ōtɛ̄hɔ̄ kú nū ā.’ 42Ohígbū ka ɛmiyɛ yɔ̄ gē ŋmó um, amáŋ aá je ɔdōlé gā um ŋ́. Ijēēnyi yɔ̄ gē ŋmó um, amáŋ aá je ɔdōōgwá gā um gwá ŋ́. 43N wɛ ugbɔga, aá leyīkwu um ŋ́. N tóohɛ́wa, amáŋ aá lɛ īlī tū um ohí ŋ́. N yɔ̄ gē doōcē klla yɔ̄ agbá, amáŋ aá wā gaá má um ŋ́. 44Cɛ́ɛ́ uwá klla géē tóohi kahíníī, ‘Óndú, eko nyá nɛ̄ alɔ má uwɔ nɛ̄ ɛmiyɛ gē ŋmó uwɔ, ámāŋ ka ijēēnyi gē ŋmó uwɔ, ámāŋ ka a wɛ ugbɔga, ámāŋ ka a tóohɛ́wa, ámāŋ ka a yɔ̄ gē doōcē, ámāŋ ka a yɔ̄ agbá, nɛ̄ alɔ í leyīkwu uwɔ ŋ́ mā ā?” 45Ó géē tóohi da uwá kahíníī, “Ɔkwɛ̄yi, n̄ da aá ka, ɛ́gɛ́nɛ̄ aá yá ɔ̄ lɛ éyi kú aɛ́nɛ̄ ó cɛgbá ŋ́ fíyɛ́ dúú nēe bá ā ŋ́ mā ā, ami nɛ̄ aá yá gā um ŋ́ má.” 46#Udan 12.2“É kē géē nyɔ̄ gaá móōwē piyóó, amáŋ ācɛ nēe gē yá ɔdā nōo he Ɔwɔicō ɔtū ā géē nyɔ̄ í yēeyī piyóó.”
The Bible Society of Nigeria
Learn More About Ubáyíbu kú Idɔma