OŌYƐBƐ̄CƐ 32

Ojibó kú Ɛna oje ɔdɔ

(Obla 9.6-29)

1 # Ācot 7.40 Eko nɛ̄ ācɛ a le má ka Umósīsi ɔ́ɔ le gbojī kóō wāajɛ ŋmá ɛyí ɛfu ā, é le iyí uwā túbá ɛgiyí Árɔ̄ni. Anɔ́ɔ é da ɔ́ kahíníī, “Alɔ í jé ɔdā nōo yá Umósīsi nyā, nōo kpó alɔ bɛ̄cɛ ŋmá Íjīpiti ā ŋ́. Ohígbū ɔ́ɔmā lɛ ɔwɔ éyi yá lɛ alɔ#32.1 ɔwɔ éyi, ámāŋ aɔ́wɔ ōhī kóō gbō alɔ. Canjɛ ka a lɛ aɔ́wɔ ɔhá yá lɛ alɔ. Ohígbū ka Umósīsi nōo bī alɔ bɛ̄cɛ ŋmá ajɛ kú Íjīpiti a, alɔ i je ɛga nōo yɔ̄ ā ɛ́ɛ́ gɛ ŋ.”

2Anɔ́ɔ Árɔ̄ni da uwá kahíníī, “Aá lɛ ɔdōplayi ahɔ̄ kú ugóolu (oje ɔdɔ) kú anyā aá, mɛ́mla ayínɔ̄nyā kú aá kpó plla wā.” 3Anɔ́ɔ odúúdú ācɛ ā lɛ ɔdōplayi ahɔ̄ kú uwā kpó plla ŋmá ahɔ̄, anɔ́ɔ é le uwá kpó gé lɛ Árɔ̄ni á 4#1 Aɔ́cɛ́ 12.28; Ācot 7.41Ó mīyɛ aɔ́dōplayi ahɔ̄ ā, ŋmá abɔ̄ uwa. Anɔ́ɔ ó le ɔ́ kpó ja tɔ̄há kwú ú yá ojibó kú ɛna ugóolu (oje ɔdɔ) lɛ uwá á. Ācɛ ā kahíníī, “Ísrɛ̄lu, ɛ̄nyā wɛ ɔwɔ kú alɔ, nōo gbō alɔ ŋmá Íjīpiti á.”

5Anɔ́ɔ Árɔ̄ni le ede ma iyɔ̄bū ojibó kú oje ɔdɔ ā, anɔ́ɔ ó le ka tɛ́ɛcɛ kahíníī, “Ucɛ géē yɔ̄ óócí, cɛ́ɛ́ ká alɔ̄ gbā Óndú ā ɛ̄gbā.” 6#1 Ukɔ́r 10.7Anɔ́ɔ ɔ̄cɔ̄ɔ̄cī blibli kú oŋmɔ́cī nū, é le aɛ́bɛ́ ōhī kpó wā kéē wɛ ɛya o yiɔlá dúúdú, anɔ́ɔ é le aóhī ā he lé kóō wɛ ɛya kú ɛbɔ́. Ācɛ ā má báajɛ pɛtɛɛ kéē lé ucɛ. Ucɛ klla kwú pīya tá ejé ō gwá mɛ́mla ikpɔ́nyā ō ce.

7Óndú ā da Umósīsi kahíníī, “Nyɔ̄ ga ajɛ, ohígbū ka ācɛ ɔlɛ́ uwɔ, nāa kpó bɛ̄cɛ ŋmá ajɛ kú Íjīpiti ā le íne kú um bīya klla tá um ɛɛ́. 8É le pīyeyī ŋmá ɔwɛ, nɛ̄ n je ɔ́da lɛ uwá kéē yɛce ā ɛ́ɛ́. É le ɛna kú ugóolu (oje ɔdɔ) ma, gē gbā ɔ̄ ɛ̄gbā ɛɛ́. É klla gē gwɛ́ɛya lɛ ɔ́, gé kahíníī, ‘Ɛ̄nyā wɛ aɔ́wɔ kú alɔ nōo kpó alɔ bɛ̄cɛ ŋmá ajɛ kú Íjīpiti á.’” 9Óndú ā da Umósīsi kahíníī, “N le ācɛ nēe bá nyā má ɛɛ́, é wɛ ācɛ o yīkpɛ̄yí olɔfú.” 10Abālɔbányā, habɔ̄ um tá cíí. Ohígbū ka n le cɔ̄nū nɛ̄hi mla uwá, n kē í kpó uwā yíífi. Cɛ́ɛ́ n kwú awɔ mɛ́mla ayááyí uwɔ ú pīya éwo nɛ̄hi.”

Umósīsi gbɔ̄ɔkɔ lɛ Ɔwɔicō

11 # Áluk 14.13-19 Amáŋ, Umósīsi le ɔkɔ gbā lɛ Óndú ā, Ɔwɔicō kú nū, da ɔ́ kahíníī, “Óndú, ɔdíyá nɛ̄ a ī cɔ̄nū nɛ̄hi ɛ́gɛ́nyā mla ācɛ nāa bī ɔfú nɛ̄hi kú uwɔ kpó bɛ̄cɛ ŋmá ajɛ kú Íjīpiti ā? 12Ɔ́dāŋ ka a lɛ uwá kpó yíífi, ācɛ kú íjīpiti géē ka ka a bī ojuju obɔ̄bí ɔtū ā, yá ɛ́ɛ́ nɛ̄ a kpó uwā bɛ̄cɛ á. Ó wɛ ka o yá ɛ́ɛ́ ká ā lɛ uwá kpó ŋmó ɛyí ɛfu ā, kú ā klla lɛ uwá kpó yíífi ŋmá ipú ɛcɛ. A híī cɔ̄nū gɛ ŋ́, lɛ ɔtū kú uwɔ pīyabɔ̄ cɛ́ɛ́ ká ā híī kpó ācɛ ɔlɛ́ uwɔ yíífi ŋmá ajɛ dúúdú gɛ ŋ́. 13#Ohút 22.16,17; 17.8Blakwu Ébrahām, Áyísīki, mɛ́mla Ujékɔ̄pu ācocɛ̄hɔ̄ kú wɔ. Blakwu okónu nāa ce mla uwá ka anúɔ í kpó ayááyí nēe lɛwa bɛ̄ɛka aínyílɔ́ɔwɔ kú ɔkpáncō ā lɛ uwá ā. A klla cokónu ō je odúúdú ajɛ nāa cokónu kaó í wɛ ákú uwā piyóó ā lɛ uwá.” 14Anɔ́ɔ Óndú ā le ɔtū kú nū pīyabɔ̄ ŋmá ɔdā nɛ̄ó dɔ̄ɔ̄ka ō yá ā, anɔ́ɔ ó kpó ācɛ ɔlɛ́ nū yíífi ɛ́gɛ́nɛ̄ ó miya ā gɛ ŋ́ má.

Umósīsi le ojibó kú ɛna ā ca

15Umósīsi pīyɛyí ŋmá ɛyí ɛfu ā ga ajɛ mla usiléti kú ɛcɔ̄ nēé tá aíne tū ābɔ̄ ɛplɛ́ɛpa kú nū ā abɔ̄. 16Ɔwɔicō abɔ̄yīnū yá ɛcɔ̄ ā á, anú klla tá aíne ā tū uwá á.

17Eko nɛ̄ Ujóssuwa le uya kú ɛgba kú ācɛ kú Ísrɛ̄lu nēé bá ī dē ā pó ā, ó da Umósīsi kahíníī, “N pó ɛgba kú ɛfu ō kpó ipú ɔlɛ́ ā.” 18Amáŋ, Umósīsi tá ɔ̄ ohi kahíníī, “Ó wɛ ɛgba kú ācɛ o yá ɛfu lé ámāŋ ka ikwū kú ācɛ nēé le yálé ŋ́. Ɔkɔ kú ijē ō gwó nɛ.”

19Eko nɛ̄ Umósīsi gā ajaajɛ ɔlɛ́, gáā lɛ ɛna kú ugóolu (oje ɔdɔ) nēé ma ā má, mla ijē nɛ̄ ācɛ ā bá yɔ̄ ī jē ā, ó kwú cɔ̄nū nɛ̄hi. Anɔ́ɔ ó le ɛcɔ̄ nēé tá aíne tū ɔ̄ nɛ̄ ó bī ā kpó tá wāajɛ le uwá kpó ca. 20Anɔ́ɔ ó kwú ɛna nɛ̄ ācɛ ā ma ā ú ca, le ɔ́ tɔ̄ɔ̄lá, anɔ́ɔ ó kwú ɔ̄ ú gba umuumu mɛlíí á. Anɔ́ɔ ó le ɔ́ wīya tɔ̄há mla éŋkpɔ̄. Anɔ́ɔ ó cɛ̄ lɛ ācɛ kú Ísrɛ̄lu kéē lɛ éŋkpɔ̄ nū gwá.

21Umósīsi da Árɔ̄ni kahíníī, “Ɔdí nɛ̄ ācɛ ā yá uwɔ ɛ́ɛ́ nāa cɛ̄ lɛ uwá bīya íne obɔ̄bí nɛ̄hi ɛ́gɛ́nyā ā?” 22Árɔ̄ni tá ɔ̄ ohi kahíníī, “Ā híī cɔ̄nū mla um ŋ́, ɔkpani um. A kē jé ɛ́gɛ́nɛ̄ ācɛ nēe bá nyā ge labɔ̄ kwɔtū kéē yá ɔdōbɔ̄bí lɛ ā. 23É da um kahíníī, “Alɔ í jé ɔdā nōo yá Umósīsi nyā nōo kpó alɔ bɛ̄cɛ ŋmá Íjīpiti ā ŋ́, ohígbbu ɔ́ɔmā lɛ ɔwɔ nōo géē gbō alɔ yá lɛ alɔ. 24Anɔ́ɔ n da uwá kéē lɛ odúúdú ɔdīifa kú ugóolu (oje ɔdɔ) kú uwā kpó gé um. Anɔ́ɔ ācɛ ōhī nēe lɛ ugóolu (oje ɔdɔ) ā. É lɛ uwá kpó wā gé um. Anɔ́ɔ n kwú ɔ̄ ú kpó tū ɔlá lɛ ɔ́ ja, le ɛna nyā ma lɛ uwá á.”

25Umósīsi le má ka Árɔ̄ni cɛ̄ lɛ ācɛ ā kéē le hāābɔ̄, anɔ́ɔ é le iyī uwā pīya olíla iyɔ̄bú aólɛlā kú uwā á. 26Anɔ́ɔ Umósīsi gaá háyi okómpinu kú ɛga nēé bá ā, anɔ́ɔ ó le ɛgba dɛ ka, Ɛjɛ̄ɛ̄jī ācɛ nēe yɛce Óndú ā kéē le pɛ́ wā abɔ̄ nyā.” Anɔ́ɔ odúúdú ayí kú Ulífāyi gaá le jīla tū ō biílí, 27anɔ́ɔ ó da uwá kahíníī, “Óndú, Ɔwɔicō kú Ísrɛ̄lu le ɔ́da je ka ɔnyɔɔnyɛ kú aá kóō kwú ɔkpacaŋ́gelī kú nū ú, kóō ga ipú ɔlɛ́ ā ŋmá okómpinu nyā ga ɔhá cɛ́ɛ́ kóō ŋmó ayínɛ́ nū, aóklóbīya nū, mɛ́mla aóladógbe kú nū.” 28Anɔ́ɔ ayí kú Ulífāyi ā le yá ɛ́gɛ́nɛ̄ Umósīsi da uwá ā á. Ācɛ nēé ŋmó ícíícɛ ɔ́ɔmā lɛbɛ̄ɛka ācɛ úlā ahāapa ce ofu igwó (3,000) ā. 29Anɔ́ɔ Umósīsi da ayí kú Ulífāyi ā kahíníī, “Ícɛ nyā, aá lɛ abɔ̄ ce iyí aá ɛyí kwú pīya ācogwɛ́ɛya lɛ Óndú ā ɛɛ́. O ŋmá lɛ o ŋmó ayí aá nɔ̄nyílɔ mɛ́mla ayínɛ́ aá nɔ̄nyīlɔ ɛɛ́, ohígbū ɔ́ɔmā Óndú ā le ɔhá hɛ́ ce aá ɛɛ́.”

30Ɔŋmɔ́ɔci nū ā, Umósīsi da ācɛ ā kahíníī, “Áa le ɔdōbɔ̄bí nɛ̄hi yá ɛgiyí Óndú ā ɛɛ́. Amáŋ abālɔbányā n géē ga icō ɛfu ā ɛgiyí Óndú ā kpɔ́, ekohī n géē yá kóō habɔ̄ íne nɛ̄ aá bīya ā tá lɛ áa glá.” 31Anɔ́ɔ Umósīsi kwúcē le tá ɛgiyí Ɔwɔicō, gaá da ɔ́ kahíníī, “Ācɛ nēe bá nyā le ɔdōbɔ̄bí nɛ̄hi yá. É bī ugóolu (oje ɔdɔ) le aɔ́wɔ ɔhá yá lɛ iyi uwā, klla gbō ɔ̄ ɛ̄gbā. 32#Aíjē 69.28; Mafú 3.5Kóócōō kwú íne kú uwɔ nēé bīya ā í yá uwā ɛhi. Amáŋ ɔ́dāŋ ka a cɛ̄ ŋ́, ɛńba a lɛ iyē kú um ŋmónyí ŋmá ipú ɔkpá nāa tá iyē kú ācɛ ɔlɛ́ uwɔ tū ɔ̄ ā.”

33Amáŋ, Óndú ā da Umósīsi kahíníī, “Ɔ̄cɛ dóódu nōo bīya íne kú um ā, nɛ̄ n géē nya iyē kú nū ŋmá ipú ɔkpá kú um á. 34Abālɔbányā, nyɔ̄ ká ā lɛ ācɛ ā kpó trɛ̄yí ga ɛga nɛ̄ n da uwɔ ā. Le jé ka alelékwū-ōtɛ̄hɔ̄ kú um géē bī uwɔ tá, amáŋ eko gē wā nɛ̄ n géē yá ācɛ nēe bá ā italā ohígbū íne kú um nēé bīya ā.”

35Anɔ́ɔ Óndú ā le ōcē tū klá ācɛ ā, ohígbū ka é cɛ̄ lɛ Árɔ̄ni lɛ ojibó kú ɛna kú ugóolu (oje ɔdɔ) ma lɛ uwá.

Currently Selected:

OŌYƐBƐ̄CƐ 32: IFBCL

Highlight

Copy

Compare