OŌYƐBƐ̄CƐ 33

Óndú ā le ɔ́da je lɛ ayí kú Ísrɛ̄lu kéē nyɛ̄ɛ̄ ŋmá ɛyí ɛfu kú Usáyínāyi

1 # Ohút 12.7; Ohút 26.3; Ohút 28.13 Óndú ā da Umósīsi kahíníī, “Awɔ mɛ́mla ācɛ nāa kpó bɛ̄cɛ ŋmá ajɛ kú Íjīpiti ā, kéē nyɛ̄ɛ̄ ŋmá amānyā, cɛ́ɛ́ ká aá nyɔ̄ ga ajɛ nɛ̄ n cokónu ō je lɛ Ébrahām, Áyísīki mɛ́mla Ujékɔ̄pu ā, mɛ́mla ayááyí uwā. 2N géē tū alelékwū otɛ̄hɔ̄ kú um ɛhɔ̄ kóō gbɔbū lɛ aá, ó géē nū ācɛ kú Ukénan, ācɛ Ámɔn, ācɛ Uhɛ́ti, Upɛ́risi, ācɛ Uhám, mɛ́mla ācɛ Ujébūsi bɛ̄cɛ ŋmá ajɛ ā. 3Aá yɔ̄ ī nyɔ̄ ga ipú ajɛ nōo ge gbiyē nɛɛɛ ā. Amáŋ ami ā, í gáā nyɔ̄ mla ŋ́, ohígbū nɛ̄ n géē kpó aá ŋmó. Ohígbū ka aá wɛ ācɛ o yíkpɛ̄yí olɔfú.

4Eko nɛ̄ ācɛ ā le ɛlā nɛ̄ Óndú ā ka pó ā, é gbɔɔ́ ō yɔ̄tū nōbí. É le abɔ̄ ci ifa ō yá mɛ́mla o kpó ɔdīfa tū iyē. 5Ohígbū ka Óndú ā da Umósīsi kahíníī, “lɛ ka lɛ ācɛ kú Ísrɛ̄lu, aá wɛ ācɛ olɔfú īkpɛ̄yí, ɔ́dāŋ́ ka n le yɛ mla aá lígíí, n géē kpó aá ŋmó. Abālɔbányā, aá lɛ aɔ́tángbédē kú aá plla, cɛ́ɛ́ ká n miya ɔdā nɛ̄ n géē yá mla aá.” 6Anɔ́ɔ é lɛ aɔ́tángbédē tū ɔkɔ eko nēé ŋmá ɛyí ɛfu kú Uhɔ́rébu ɛ́ɛ́ gɛ ŋ́.”

Áklɔ̄kpīihɔ kú Óndú ā

7Eko dúúmā nɛ̄ ācɛ kú Ísrɛ̄lu gaá lā ɛga dúú nɛɛ, Umósīsi gē je Áklɔ̄kpīihɔ kú Óndú ā nyɔ̄ gáā kwu ɛcɛɛcɛ ɛga oligbó ŋmá ɛga nɛ̄ ācɛ o hile lā ā. Ó gē hī ɔ̄ ka Áklɔ̄kpīihɔ kú ɛga nɛ̄ Óndú ā yɔ̄ ā. Anɔ́ɔ ɔ̄cɛ dóódu nōo dɔ̄ɔ̄ka Ɔwɔicō gē ga ɛgiyí Áklɔ̄kpīihɔ eyīyɛ̄cɛ ɛga nɛ̄ ó háyi ā. 8Eko dóódu nɛ̄ Umósīsi gē ga Áklɔ̄kpīihɔ ā nɛ̄, odúúdú ācɛ ā gē gaá háyi Okómpinu áklɔ̄kpɛ kú uwā gē má Umósīsi jāā gbéeko nɛ̄ó le tá ipú Áklɔ̄kpīihɔ ā. 9Eko dóódu nɛ̄ Umósīsi le bēé ga ipú Áklɔ̄kpīihɔ ā, ɔ́kpa kú Ojuja gē gáā klá ɔwɛ kú Áklɔ̄kpīihɔ ā, cɛ́ɛ́ Óndú ā gē kɛlā lɛ Umósīsi ŋmá ipú ojuja ā. 10Ɔkwɔɔkwu nɛ̄ ācɛ ā le ɔ́kpa kú ojuja ā má okómpinu kú Áklɔ̄kpīihɔ ā, odúúdú ācɛ ā gē túkpɛɛ́ ī gbā Óndú ā ɛ̄gbā. 11Óndú ā gē leyīkwu Umósīsi eyī gē kɛlā mla anú bɛ̄ɛka ɔ̄cɛ mla oklóbīya nū ā. Cɛ́ɛ́ Umósīsi le pīyɛyí wā ɛga nɛ̄ ācɛ o hile bá ā. Amáŋ ɔyípōklóbīya éyi, Ujóssuwa, ɔyí kú Unɔ́n nōo gē tá Umósīsi abɔ̄ ā, gē klá igbīhi ɛgiyí Áklɔ̄kpīihɔ ā.

Óndú ā le okónu ce kóō yɔ̄ mla ācɛ ɔlɛ́ nū

12Umósīsi da Óndú ā kahíníī, “Ó wɛ ɛlā ɔ̄kwɛ̄yi ka le da um ka n lɛ ācɛ nēe bá nyā bītá ga ajɛ ɔ́ɔmā, amáŋ á kē da um ɔ̄cɛ nōo í lɛ um bíyē ā ŋ́. A ka anúɔ jé um lɔɔlɔhi, ɛlā um kē he uwɔ ɔtū. 13Abālɔbányā, lɛ ɔdā nāa miya ipú ɔtū kú uwɔ ka anúɔ gaá yá ā ka gā um, cɛ́ɛ́ ká n̄ cɛ̄ uwɔ ɛhɔ̄, ká n̄ yɔ̄ ī yá ká ɔtū kóō he uwɔ. Bla ka a le éwo nyā fu kóō wɛ ákú abɔ̄yī uwɔ.”

14Anɔ́ɔ Óndú ā kahíníī, “Ami abɔ̄yī um géē nyɔ̄ mla awɔ, n kē í je omlɛ́nyɔ́ ga uwɔ.” 15Anɔ́ɔ Umósīsi tá ɔ̄ ohi kahíníī, “Ɔ́dāŋ́ ka á gáā nyɔ̄ mla alɔ ŋ́, ā cɛ̄ kú alɔ fu ajɛ ŋmá amānyā ŋ́. 16Ɔwɛ nyá nɛ̄ ɔ̄cɛ géē jé ka ɛlā kú ācɛ ɔlɛ́ uwɔ mɛ́mla ɛlā kú um, he uwɔ ɔtū ā, ɔ́dāŋ ka á nyɔ̄ mla alɔ ŋ́ mā ā? O yɔ̄ pī alɔ kú uwɔ ā, í mafú ka alɔ wɛ ācɛ ɛyɛ́ɛ́yí hī ācɛ o hile nēe bá ipú ɛcɛ nyā tá.”

Umósīsi le ojīlīma mla ɛgahi kú Ɔwɔicō má

17Óndú ā da Umósīsi kahíníī, “N géē yá ɛ́gɛ́nɛ̄ a dɔɔ̄ka lɛ ā, n jé uwɔ lɔɔlɔhi, ɛlā kú uwɔ klla he um ɔtū.”

18Anɔ́ɔ Umósīsi da ɔ́ kahíníī, “Kóocōō, cɛ̄ ká n̄ lɛ ɔlá ōceyī ŋmaáŋmaá nōo mafú ka a yɔ̄ ɛgée ā má.”

19 # Uróm 9.15 Óndú ā tóohi da ɔ́ kahíníī, “N géē wā í yɛ iyɔ̄bū uwɔ cɛ́ɛ́ ká ā má ɛ́gɛ́nɛ̄ oōlɔhi mɛ́mla ohéyīfuú kú um lɛ āa. N kē í hī iyē ōtīihɔ kú um gā uwɔ. Ami wɛ Óndú ā á, n gē gbonɛnɛ klla ī ményinyi ācɛ nɛ̄ n fu ā. 20Amáŋ, ń gáā cɛ̄ gā uwɔ má eyī kú um ŋ́, ohígbū ka ɔ̄cɛ nōo lɛ um má eyī géē kwú.”

21Óndú ā da ɔ́ kahíníī, “Ɛga éyi yɔ̄ ɛgiyí um, nāa géē mahayi ɛyí ɛcɔ̄ ā; 22Eko nɛ̄ ɔlá ō mafú ka Óndú ā yɔ̄ ɛgée ā wā gaá le yɛ. N géē je uwɔ hayi ipú ɔ̄gɔ̄ kú ápátɛ́cɔ̄, cɛ́ɛ́ n lɛ abɔ̄ klá awɔ jāā gbéeko nɛ̄ n gaá lɛ yɛ. 23Cɛ́ɛ́ n géē je abɔ̄ kú um ŋmá eyī kú uwɔ, cɛ́ɛ́ a géē má igbīhi kú um, amáŋ á gáā má eyī kú um ŋ́.”

Currently Selected:

OŌYƐBƐ̄CƐ 33: IFBCL

Highlight

Copy

Compare