OŌYƐBƐ̄CƐ 28

Úwé kú ācogwɛ́ɛya

(Oyɛb 39.1-7)

1Ɔwɔicō da Umósīsi kahíníī, “Lɛ ɔyínɛ́ uwɔ Árɔ̄ni mɛ́mla ayípɛ̄ ɔlɛ́ nū nɔ̄nyilɔ ā, Unádābu, Abíhu, Ɛlísa mɛ́mla Utáma kpó hīgwú wā ɛgiyí uwɔ. A géē fō uwā ŋmá ipú ācɛ o hile kú Ísrɛ̄lu, cɛ́ɛ́ kéē lɛ pīya ācogwɛ́ɛya kú um. 2A géē gɔ́ awulú otīihɔ kú ācogwɛ́ɛya ā lɛ Árɔ̄ni, ɔyínɛ́ uwɔ, cɛ́ɛ́ kóō lɛ ɔ́ jōklóbīya, kóō cɛ̄ lɛ ɔ́ lɛ ɛgahi mɛ́mla ocɛ̄tra. 3Lɛ ka lɛ odúúdú ācɛ o yá ɔdā ímlɛ́ nɛ̄ n je íjééyī lɛ uwá ā kéē lɛ awulú otīihɔ kú ɔ̄cogwɛ́ɛya kú um, Árɔ̄ni ā gɔ́. 4Aɔ́dā ō wu iyē nēé géē gɔ́ ā yɔ̄ á, ɛkpa kú ɔtū, ɛ́fɔ̄du ōjīlīmā ō playi ɔtū, ukafután, úwé nēé lɛ ijā he tū ɔ̄, ɔláwonī, mɛ́mla īlī ō gbō ɛ́nyɔ́. É géē gɔ́ īlī otīihɔ, nēe bá ā lɛ Árɔ̄ni, ɔyínɛ́ uwɔ mɛ́mla ayí nū nɔ̄nyīlɔ, cɛ́ɛ́ kēé yúklɔ́ kú ɛya ō gwó gā um. 5Ācoyúklábɔ̄ a géē bī owú kú ugóolu (oje ɔdɔ), owú odufā, owú ɔgalúlā, mɛ́mla owú nɔwā le gɔ́ īlī ā.

6Uwá géē yá ɛ́fɔ̄du#28.6 ɛ́fɔ̄du úwé nōo lɛbɛ̄ɛka isimí nɛ̄ ɔ̄cogwɛ́ɛya gē lɛ wiiyē klá awulú āo lɛ playi ɔ̄tū kú owú odufā, owú ɔgalúlā, owú nɔwā mɛ́mla owú kú ugóolu (oje ɔdɔ), mɛ́mla īlī nɛ̄hɛ́, nēé lɛ ijā he tū ɔ̄ lɔɔlɔhi. 7Ɔ́ŋgbá ácábɔ̄ ā géē wɛ ɛgɔ́ īlī ɛpa, nēé le gɔ̄ kwu áklō kú nū, nēé lɔfú je ɔ́ kwu ɔhá glá. 8É géē je īlī ōgbō ɛ́nyɔ́ nēé bī ɔdā ékpónú nēé le tá ɛ́fɔ̄du ā kwu ɛ́fɔ̄du, cɛ́ɛ́ kóō kwú pīya éékpó mla anú. 9A géē lɛ ɛcɔ̄ ō gbɔɔ́lá nɛ̄hi ɛpa kpó, cɛ́ɛ́ a lɛ iyē kú ayí igwɛ́ɛpa kú Ujékɔ̄pu ā tá tū uwā. 10Iyē kú ayí ɛhīlī bá ɛcɔ̄ éyi, iyé kú ɛhīlī ɔhá bá ɛcɔ̄ ɔhá, ɛ́gɛ́nɛ̄ ɔgba kú ɔnyākwɔ́cɛ kú uwā lɛ ā. 11Lɛ ɔ̄cɛ o tɔ́kpá tū ɛcɔ̄ tíne kóō bī oje o lɛ ɔkɔ́ lɛ iyē kú ayínɔ̄nyilɔ kú Ujékɔ̄pu ā tá tū ɛcɔ̄ ā, cɛ́ɛ́ a kwú ɛcɔ̄ ā ɔkwu ú kwu ugóolu (oje ɔdɔ). 12Lɛ uwá kpó tū ɔ́ŋgbá ácábɔ̄ kú ɛ́fɔ̄du ā kéē kwɛyí ipɔ́ɔma igwɛ́ɛpa kú Ísrɛ̄lu. Ɔwɛ nyā nɛ̄ Árɔ̄ni géē bī iyē kú uwā acá, cɛ́ɛ́ ami nōo wɛ Óndú ā í blakwu ācɛ ɔlɛ́ um ojigógó. 13A géē yá ɔ́n̄gbá kú oje udɔ ɛpa, 14mla agbá kú oje udɔ ɛpa nēé lɛ ɔ́ jílatɔ̄há bɛ̄ɛka ɔ́ngbá ā. Cɛ́ɛ́ a kwú agbá ā ú kwu ɔ́ngbá kú oje udɔ ā nōo wɛ oōjílatɔ̄há ā.

Ɛkpa o bá ɔtū ā

15A géē yá ɛkpa o bɔ́tū kú īlī lɛ otrɛ̄yí kú ācogwɛ́ɛya ā kóō bī lɛ jé ɔdā, nōo wɛ ɔtū kú Ɔwɔicō ā. Ɔdā ékpónú nāa bī le yá ɛ́fɔ̄du ā, mla ɛdɔ kú ijā o he tū ɔ̄ éékpó ɔ́ɔmā, nēé géē he tū ɔ̄ dúú á. 16Ó géē lɛ ɔ́kíkā ō jōnjīlɛ̄ ɛnɛ, klla í wɛ ō cēbá ɛpa. Ó géē līkpō fíyɛ́ ɔwá kú nū. 17Lɛ ɔgba ɛnɛ kú ɛcɔ̄ ō gbɔɔ́lá nɛ̄hi kpó kwu ɔ́. Lɛ ɛcɔ̄ nēé hī usadín, utópāsi éyi, mɛ́mla ugánɛ̄ti éyi kpó kwu ɔgba kú aflɛ́yí ā. 18É géē kpó aɛ́cɔ̄ o gbɔɔ́lá nɛ̄hi nēe bá ā kwu ɔ́: émɛrādi, usafíya mɛ́mla udáyímɔ̄ndu kwu ɔgba ɔ́mpa ā. 19É géē kpó aɛ́cɔ̄ o gbɔɔ́lá nɛ̄hi nēe bá ā kwu ɔ́: utɔ́kwɔ̄isi, ágēti mɛ́mla amítēsti, kpó kwu ɔgba ɔ́mɛtá ā, 20É géē kpó aɛ́cɔ̄ o gbɔɔ́lá nɛ̄hi nēe bá ā kwu ɔ́: uberile, ukánēliyan mɛ́mla ujáspa kwu ɔgba ɔ́mɛɛnɛ ā. É kpó uwā kwu ugóolu (oje ɔdɔ) ojílatɔ̄há ā. 21É géē tá iyē kú ɔyí éyééye kú Ujékɔ̄pu tū éyééye kú ɛcɔ̄ ā kóō kwɛyí ipɔ́ɔma kú Ísrɛ̄lu. 22A géē yá agbá kú ɛ́nɛ́ɛ́nɛ̄ ugóolu (oje ɔdɔ) lɛ ɛkpa ō bɔ́ɔ́tū ā, a í jíla ɔ́ bɛ̄ɛka ɔ́ŋgbá. 23A géē yá eliká kú ugóolu (oje ɔdɔ) ɛpa cɛ́ɛ́ a kwú uwā ú kpó playi okónōgwu kú ɛhícō kú ɛkpa ō bɔ́ɔ́tū ā. 24A géē fúlá ɔ́ŋgbá ɛpa kú ugóolu (oje ɔdɔ) ā playi aéliká ā. 25Lɛ īkpɛ̄yí ɛpa kú agbá ā fúlá tū agbá nēé jíla bɛ̄ɛka ɔ́ŋgbá ā, cɛ́ɛ́ a kwú uwā ú kwu ɔ́ŋgbá ácábɔ̄ kú ɛ́fɔ̄du ā. 26A géē yá eliká kú ugóolu (oje ɔdɔ) ɛpa, cɛ́ɛ́ a kwú uwā ú kpó kwu ɛháajɛ ɛkpa ō bɔ́ɔ́tū kwu okónōgwu nōo gboce ɛ́fɔ̄du ā. 27A klla í yá eliká kú ugóolu (oje ɔdɔ) ɔhá, nāa géē kpó kwu ābɔ̄ ɛháajɛ kú ɔ́ŋgbá ácábɔ̄ kú ɛ́fɔ̄du ā, kóō kwu ɛga nēé gɔ́ īlī ā kwɔhá ɛhícō kú ɔdōkwɛ́nyɔ́ nēé wu lɔɔlɔhi ā. 28Lɛ eliká kú ɛkpa o bɔ́ɔ́tū ā fúlá tɔ̄há mla ɔ́ŋgbá ublúu éyi, cɛ́ɛ́ ɛkpa o bɔ́ɔ́tū ā kóō ce ɛhícō kú ɔdōkwɛ́ɛ́nyɔ́ ā, cɛ́ɛ́ kúō híī wī ŋ́.

29Eko nɛ̄ Árɔ̄ni le ta ɛga otīihɔ kú Áklɔ̄kpīihɔ ā, ó géē lɛ ɛkpa īlī o bɔ́ɔ́tū nēé tá iyē kú ipɔ́ɔma kú Ísrɛ̄lu tū nyā wiiyē, cɛ́ɛ́ kú ami nōo wɛ Óndú géē blakwu ācɛ ɔlɛ́ um ojigógó. 30#Áluk 27.21; Obla 33.8; Ɛ́sira 2.63; Uneh 7.65Lɛ anwa kú Úrim mɛ́mla Utúmmin #28.30 Úrim mla Utúmmin. Ɔ́dā ɛpa nɛ̄ ācogwɛ́ɛya gē bī le jé olekwu kú Ɔwɔicō. É da alɔ ɛ́gɛ́nɛ̄ é gē bī uwā lɛ yúklɔ́ lɛ ā ŋ́ kpó tū ipú ɛkpa o bɔ́ɔ́tū ā, cɛ́ɛ́ Árɔ̄ni géē bī uwā eko nɛ̄ ó ī wā ɛgiyí um. Eko ɛ́gɔ́ɔmā ó í lɛ ɛkpa īlī o bɔ́ɔ́tū nyā wiiyē ojigógó, cɛ́ɛ́ kóō jé olekwu kú um lɛyíkwu ācɛ ɔlɛ́ um Ísrɛ̄lu.

Īlī ifa ɔhá kú ɔ̄cogwɛ́ɛya

(Oyɛb 39.22-31)

31A géē gɔ́ awulú kú owú ublúu dúúdú nōo géē yɔ̄ ɛ́háajɛ kú ɛ́fɔ̄du ā. 32Ó géē lɛ ɔkɔ ō lɛ ɛyí bū ɔ̄. É bī owú lɛ ɔkɔ kú nū ā wu lɔfú nɛ̄hi kóō híī híla ŋ́. 33É géē bī owú odufā, owú ɔgalúlā mɛ́mla owú nɔwā lɛ hiijā kú īkpō ɔcí kú upomégránēeti tū okónōgwu kú nū. 34A géē lɛ áma kú ugóolu (oje ɔdɔ) kpó playi ɛ́plá īkpō kú upomégránēeti okónōgwu kú awulú ā biílí. 35Árɔ̄ni géē lɛ awulú nyā wiiyē eko nɛ̄ó yɔ̄ ī yúklɔ́ kú ɔ̄cogwɛ́ɛya. Eko nɛ̄ó géē wā iyɔ̄bū um, ɛga otīihɔ ā, mɛ́mla eko nɛ̄ó géē nyɛ̄ɛ̄ ā. Ācɛ géē bá ī pó uya kú áma nyā, cɛ́ɛ́ é gáā ŋmó ɔ̄ ŋ́. 36Lɛ umɛ́dālu kú ugóolu (oje ɔdɔ) yá, kú ā lɛ otīhɔ lɛ óndú tá tú ɔ̄. 37Lɛ ɔ́ gbo playi iyɔ̄bū kú ɔláwonī ā ɔ́ŋgbá ubulúu. 38Árɔ̄ni géē lɛ ɔ́ bá údɔ̄bū kú nū. Cɛ́ɛ́ kú ami, nōo wɛ Óndú ā géē mīyɛ ɛgba nɛ̄ ācɛ kú Ísrɛ̄lu géē je gā um ā, nááná nɛ̄ ācɛ ā kōō le nyíleyī eko nēé ī gwɛ́ɛya gā um.

39Aá lɛ úwé kú Árɔ̄ni wu mla īlī nɛ̄hɛ́, kú ā lɛ ɔláwonī kú nū wu mla īlī nɛ̄hɛ́ dúú, cɛ́ɛ́ kéē bī inyilá lɛ ijā abɔ̄ he tū ɔ̄.

40Aá lɛ úwé, odokwɛ́nyɔ́ mɛ́mla ɔdōkwɛyi gɔ́ lɛ ayínɔ̄nyīlɔ kú Árɔ̄ni. Kóō je ojīlīma mɛ́mla o lɛ uwá jōklóbīya. 41Kwú īlī nēe bá nyā ú wu Árɔ̄ni, ɔyínɛ uwɔ mɛ́mla ayí nū iyē. Kú ā lɛ abɔ̄ ce uwa ɛyí kú ā lɛ anɔ̄ kú ólīfu tū uwa ɛyí, cɛ́ɛ́ kéē yá úklɔ́ kú ācogwɛ́ɛya gā um. 42Aá lɛ ikakí kú īlī nɛ̄hɛ́ gɔ́ lɛ uwá, kóō ŋmá ohi gaá kwu átákwū ka uwā o yá ɛ́ɛ́ ká ācɛ kéē má ohɛ́ɛwa kú uwā ŋ́. 43Árɔ̄ni mɛ́mla ayí nū géē lɛ ɔ́ wu īkpō eko dóódu nēé gē ga Áklɔ̄kpīihɔ kú um, ámāŋ ga ɛyí ede gáā yúklɔ́ kú ɔ̄cogwɛ́ɛya ā, Ɛga Otīihɔ kú um ā, cɛ́ɛ́ ká n híī je uwá kpó ŋmó ohígbū kaé tóohɛ́ɛwa ŋ́. Ɛ̄nyā wɛ íne otáajɛ piyóó kú Árɔ̄ni mɛ́mla ayí nū nɔ̄nyilɔ ā.

Currently Selected:

OŌYƐBƐ̄CƐ 28: IFBCL

Highlight

Copy

Compare