OŌYƐBƐ̄CƐ 27

Ɛyí ede

1Aá géē gwó ede gā um ŋmá ɔcí kú akésiya. Ó géē lɛ ɔkíkā ɛnɛ. Olīkpō kú nū géē wɛ ekābɔ̄ ɛhɔ̄. Olɔwá kú nu géē wɛ ekābɔ̄ ɛhɔ̄ dúú, olicō kú nū géē wɛ eko abɔ̄ ɛtá. 2A géē yá ajī kwu áklō kú ɔkíkā ɛnɛ kú nū ā. A géē yá ajī ā kwɔhá mla ede ā. Aá lɛ oje udɔ ma plá anú. 3A géē yá oflēnjē nē ewo kú ijē ɛbɛ́ géē pɛ́ tū ɔ̄ ā. A klla í yá ussɔ́bɛ̄lu, aócíbú, ojotíhī mɛ́mla aɔ́dōfɔ́lá. A géē bī oje udɔ lɛ yá aíyó nɛ̄ bá nyā a. 4Lɛ ɔdée nēé le oje udɔ wúlá-wúlá pla tū ipú nū ā yá, cɛ́ɛ́ a klla le eliká kú oje udɔ nē é géē lɛ bī ɔ̄ ā yá playi ɔ́kíkā ɛnɛ kú nū ā. 5Kwú ɔdā nēé le oje udɔ wúlá-wúlá pla tū ipú nū ā ú háyi ɛháajɛ kú ede ā, cɛ́ɛ́ kóō háyi ɔtāhɛ̄ o yɛ ga ɛhícō kú ede ā. 6Lɛ ɔcí ō le bī ɔdée kú akésiya yá, cɛ́ɛ́ a lɛ oje udɔ ma plá anú. 7Kwú uwā ú kpó wu aéliká neē yɔ̄ ābɔ̄ éyééye kú ede ā eko nēé ī je ɔ́ ŋmá ajɛ ā. 8A géē yá ede ŋmá ɔcí o pátákáá. Ó kē í lɛ ɔ̄gɔ̄, ɛ́gɛ́nɛ̄ nɛ̄ n mafú gā uwɔ ɛyí ɛfu ā.

Eyīpú kú Áklɔ̄kpīihɔ kú Óndú ā

(Oyɛb 38.9-20)

9Lɛ igá kú Áklɔ̄kpīihɔ kú um ā yá mla ukɔ́tin kú īlī onɛkɛnɛkɛ olɔhi, īlī kú owú nɛkɛnɛkɛ ā. Olīkpō kú ukɔ́tin kú ābɔ̄ ɛháajɛ ā kóō wɛ ekābɔ̄ ofɛpa ce ɛnɛ. 10A géē yá ogbló ofu nēe í wu ígbóoje-otáajɛ ofu, nɛ̄ uwɔ mɛ́mla ɔ́kpa nēé yá mla oje nɛ̄hɛ́ ā géē bī ɔ̄ háyi. 11Ɔdā ékpónú ɔ́ɔmā nāa géē yá ɛhíícō kú Áklɔ̄kpīihɔ ā dúú ā. 12Eyī ɛnɔ̄ɔ̄nɛ̄ kú Áklɔ̄kpīihɔ ā, olīkpō kú īlī ukɔ́tin ā kóō wɛ ekābɔ̄ ofu ce ɛpa, mɛ́mla ogbló igwó mɛ́mla ígbóoje-otáajɛ igwó. 13Eyī ɛnɔ̄ɔ̄cī kú nū, ɛga nɛ̄ okómpinu kú nū yɔ̄ ā, olɔwá kú īlī ukɔ́tin ā kóō wɛ ekābɔ̄ ofu ce ɛpa. 14Īlī ukɔ́tin kú áklō kú ɛga o bēé wā inu ā kóō wɛ ekābɔ̄ igwɛ́ɛhɔ̄ mɛ́mla ekābɔ̄ ɛtá mɛ́mla ogbló mla ígbóoje-otáajɛ kú uwā. 15Īlī ukɔ́tin kú ābɔ̄ ɔhá kú Áklɔ̄kpīihɔ ā wɛ ekābɔ̄ igwɛ́ɛhɔ̄ mɛ́mla ekābɔ̄ ɛtá, mɛ́mla ogbló ɛtá mɛ́mla ígbóoje-otáajɛ kú uwā. 16Īlī ukɔ́tin kú ókómpinu abɔ̄yī nū ā, olīkpō kú nū ā géē wɛ ekābɔ̄ ahāanɛ, nēé yá mla īlī odufā, īlī ɔgalúlā mɛ́mla īlī nɔ̄wá nēé le ijā he tū ɔ̄. Ó í lɛ ogbló ɛnɛ mɛ́mla ígbóoje-otáajɛ nēe í bī ɔ̄ háyi. 17A géē bī oje udɔ fíílí lɛ fúla odúúdú ogbló nōo yɛ igá ā jīla tá ā kwɔhá. É géē bī oje nɛ̄hɛ́ lɛ yá uwɔ ā, é kē í bī oje udɔ lɛ yá ígbóoje-otáajɛ o lɛ ogbló ā wu ipú nū ā. 18Olīkpō kú igá ā géē wɛ ekābɔ̄ ofɛpa ce ɛnɛ, olɔwá kú nū ā géē wɛ ekābɔ̄ ofu ce ɛpa, olicō kú nū ā géē wɛ ekābɔ̄ ɛpa ce āyā, é géē yá īlī ukɔ́tin ā mla īlī ulínin olɔhi nɛ̄hi. É géē bī uwɔ mɛ́mla ogbló kú oje nɛ̄hɛ́ ā lɛ flla ukɔ́tin ā playi icō. 19Odúúdú iyó nēé bī le gwó Áklɔ̄kpīihɔ ā, mɛ́mla ɔdā ō bī ɔ́ŋgbá kwaajɛ mɛ́mla igá kú nū ā, oje udɔ nē é géē bī lɛ yá ɔ̄ á.

Ɛlá ō kwu Agege ā

20Aá ka lɛ ayí kú Ísrɛ̄lu kéē bī anɔ̄ o lɔhi fíyɛ́ dúú kú ɔcí nēé hī ka ɔ́līfu ā wā, cɛ́ɛ́ kú agege ā kóō kwu yɔ̄ ī cɔ̄ɔ̄lá piyóó. 21Árɔ̄ni mɛ́mla ayí nū nɔ̄nyīlɔ ā géē lɛ ɔlá kwu agege ipú Áklɔ̄kpīihɔ kú um ā eyɛ̄ɛ̄cɛ kú īlī ukɔ́tin, n yɔ̄ iyɔ̄bū kú Ikpati kú Ɛka kú Óndú ā. Ɔlá ā géē yɔ̄ ī cɛ̄ abɔ́ɔ, ŋmá ɔ̄cɔ̄ɔ̄cī gbó ɔ̄nɔ̄ɔ̄nɛ̄. Ācɛ kú Ísrɛ̄lu géē lɛ íne nyā tū piyóó ŋmá ayááyí ga ayááyí.

Currently Selected:

OŌYƐBƐ̄CƐ 27: IFBCL

Highlight

Copy

Compare