OŌYƐBƐ̄CƐ 29

Abɔ̄ ō le ce ɔ̄cɛ ɛyí mla anɔ̄ ō tū ɛyí kú ɔ̄cogwɛ́ɛya

(Ulīf 8.1-36)

1Ɔwɔicō klla da Umósīsi kahíníī. “Uculo nāa géē yá kú Árɔ̄ni mɛ́mla ayí nū fu céé gā um, kéē kwú pīya ācogwɛ́ɛya gā um ā yɔ̄ á. Kwu ɛdrɔ́ kú ɔbá ɛna éyi ú mɛ́mla omlede ɛpa, nēe lɛ ɛnya ŋ́. 2Kwu umu kú īkpɔ̄dā kú uwɔ nōo lɔhi fíyɛ́ dúú ā ú, cɛ́ɛ́ a lɛ ámú kú igbō nɛ̄ó gē nū ŋ́ ɛtá yá. Á gáā lɛ anɔ̄ kú ɔcí nēé hī ka ólīfu ā tū igbō nāa géē yá ŋmá ámú kú igbō kú aflɛ́yí ā ŋ́. Lɛ anɔ̄ kú ólīfu wīya tɔ̄há mla ámú ɔ́mpa ā, cɛ́ɛ́ a lɛ īgbō ō bákánjɔ̄ yá ŋmá anú. A géē yá igbō plékété plékété nāa í lɛ anɔ̄ nya ɔ́ iyē. 3Lɛ uwá kpó tū ipú ómbilí cɛ́ɛ́ a kwu uwā ú kpó gwɛ́ɛya gā um eko nāa géē je ɔbɛ́ɛna mɛ́mla omlede ɛpa ā gwɛ́ɛya gā um ā. 4A géē bī Árɔ̄ni mɛ́mla ayīnu nɔ̄nyilɔ ā wā okómpinu kú Áklɔ̄kpīihɔ ɛga nɛ̄ n yɔ̄ ā, cɛ́ɛ́ a da uwá kéē lɛ iyē uculo gwā. 5Cɛ́ɛ́ a kwú aɔ́dōwiyē kú ɔ̄cogwɛ́ɛya ú kpó wu Árɔ̄ni iyē, ukafután, awulú nēé í wiiyē ɛháajɛ ɛ́fɔ̄du, ɛ́fɔ̄du abɔ̄yīnū, ɛkpa o bɔ́ɔ́tū, mɛ́mla ɔdōkwɛ́nyɔ́. 6A í je ɔláwonī gbō ɔ̄ ɛyí, a klla i je oje ugóolu (oje ɔdɔ) plɛ́kɛ́tɛ́ɛ́ nēé tá odée tū ɔ̄ ka, ‘ákú Óndú ā’ kwu ɔláwonī ā. 7Cɛ́ɛ́ a kwú anɔ̄ ú pīya klá anú ɛyí ká uculo kú abɔ̄ ō cɛyí ā kwú ŋmɛ́yí. 8A géē bī ayínɔ̄nyīlɔ kú nū ā wā ká ā lɛ ukafután kpó wu uwá iyē, 9kwú ɔdōgbɛ́nyɔ́ ú gbō uwā ɛ́nyɔ́, cɛ́ɛ́ ā kwú ɔdōkwɛyí ú kpó kwu uwá ɛyí. Ɔwɛ nyā nāa géē lɛ abɔ̄ ce Árɔ̄ni mɛ́mla ayínɔ̄nyīlɔ kú nū ɛyí á. Uwá mɛ́mla ayááyí uwā géē gwɛ́ɛya gā um piyóó.

10A géē bī ɔbá ɛna mɛ́mla omlede ā wā Áklɔ̄kpīihɔ ɛga nɛ̄ n yɔ̄ ā, cɛ́ɛ́ a da Árɔ̄ni mɛ́mla ayínɔ̄nyīlɔ kú nū kéē lɛ abɔ̄ kpó ce ɔ́ ɛyí. 11Lɛ ɔbɛ́ɛna ā ŋmó abɔ́ɔ ipéyī ami Óndú ā, Okómpíinu kú Áklɔ̄kpīihɔ ā. 12Kwú ohi kú oyī kú ɔbɛ́ɛna ā ú, lɛ ayíkabɔ̄ wu ɔ́, cɛ́ɛ́ a lɛ ɔ́ kwu ajī kú ɛyí ede ā. Cɛ́ɛ́ a kwú oyī o hile ā ú pīya tū ɔ̄gɔ̄ kú ɛyí ede ā. 13A géē je odúúdú ijē nōo klá ɛyí iyíípú ā, ɛga olɔhi fíyɛ́ dúú kú anyī ā, ikpílí ɛpa mɛ́mla ijē nōo klá anú ā, cɛ́ɛ́ a lɛ uwá kpó yɔlá dúúdú ɛyí ede kóō wɛ ɛya ō gwó gā um. 14Amáŋ, a géē je ɛbɛ́ kú ɔbɛ́ɛna ā, ɔkpá kú nū, mɛ́mla ácílubu kú nū kpó yɔlá eyīyɛ̄cɛ kú ɛga nɛ̄ aá lā ā cɛ́ɛ́ kéē lɛ íne nɛ̄ ācogwɛ́ɛya bīya ā kpó nyɔ̄.

15Kwú éyi kú aómlede ā ú, cɛ́ɛ́ a da Árɔ̄ni mla ayí nū nɔ̄nyīlɔ kéē lɛ abɔ̄ kú uwā kpó ce ɔ́ ɛyí. 16Lɛ ɔ́ ŋmó, cɛ́ɛ́ a kwú oyī kú nū ú cē klá ɔ́gɔgɔ́ ɛnɛ kú ede ā biílí. 17A géē lɛ ɛbɛ́ kú omlede a kpó hɛ́ kpɛɛ́kpɛɛ́, lɛ iyípú kú nū, īkpɛ̄yí mɛ́mla iklíkpó kú nū kpó na, cɛ́ɛ́ a kwú uwā í kpó ce ɛyí ede mɛ́mla ɔdā o hile nēé hɛ́ kpɛɛ́kpɛɛ́ ā. 18#Ɛfɛs 5.2; Ufíl 4.18Kwú odúúdú omlede ā ú yɔlá ɛyí ede ā kóō wɛ ɛya kú ɔdōlé. Ocu kú ɛya nyā he um ɔtū.

19A klla í je omlede ɔhá, ɛ̄nɛ̄ é bī lɛ yá uculo kú abɔ̄ ō cɛyí ā, cɛ́ɛ́ a da Árɔ̄ni mɛ́mla ayínɔ̄nyīlɔ kú nū kéē lɛ abɔ̄ kpó ce ɔ́ ɛyí. 20Lɛ omlede ā ŋmó, cɛ́ɛ́ a kwú oyī ōhī ú. A géē lɛ oyī ā nya akpáhɔ̄ kú Árɔ̄ni mɛ́mla ayínɔ̄nyīlɔ kú nū, a klla géē lɛ oyī ā nya ocúgbɔ̄du abɔ̄lɔ́ná mɛ́mla ocúgbɔdu ikpó abɔ̄lɔ́ná kú uwā. A géē je oyī o hile ā ce klá ɔ́kíka ɛnɛ kú ede ā biílí. 21Kwú oyī o hile nōo yɔ̄ ɛyí ede ā ú mla anɔ̄ kú abɔ̄ ō cɛyí ā, cɛ́ɛ́ a kwú ɔ̄ ú mī klá Árɔ̄ni mɛ́mla ɔdōwiyē kú nū mɛ́mla ayínɔ̄nyīlɔ kú ɔlɛ́ nū mɛ́mla ɔdōwiyē kú uwā. Cɛ́ɛ́ anú, ayínɔ̄nyīlɔ kú nū mɛ́mla ɔdōwiye kú uwā le kpó tū cíí gā um.

22A géē wá ijē ŋmá omlede ā ugbé, iyē kú nū mɛ́mla ijē nōo gē klá iyíípú, anyī, aíkplí ɛplɛ́ɛpa ā mɛ́mla o ŋmá átákwū abɔ̄lɔ́ná kú nū. 23kwú igbō ɛdɔ éyééye ú ŋmá ipú ómbilí kú igbō nēé je gwɛ́ɛya gā um ā. Igbo nēé yá tɔ̄há mla anɔ̄ kú ólífu ā mɛ́mla ɛ̄nɛ̄ anɔ̄ í yɔ̄ anú ŋ́ mā mɛ́mla égblú pétéké-pétéké ā. 24A géē kpó odúúdú ɔdōlé nēe bá ā ce Árɔ̄ni mɛ́mla ayínɔ̄nyīlɔ kú nū abɔ̄, cɛ́ɛ́ a da uwá kéē kwú uwā ú kpó gā um bɛ̄ɛka ɛhi nōo wɛ ɛyɛ́ɛ́yí gwū ɛhi ɔhá tá. 25A géē mīyɛ ɔdōlé ā ŋmá abɔ̄ uwā, cɛ́ɛ́ a kwú ɔ̄ kpó yɔlá ɛyí ede īkpɛ̄yí kú ɛya o yɔlá dúúdú ā, cɛ́ɛ́ kéē lɛbɛ̄ɛka ɛya kú ɔdōlé nē é je gā um ā. Ocu kú ɛya nyā he um ɔtū.

26Kwú ɔkɔ́kllɔtū kú omlede kú abɔ̄ ō cɛyí kú Árɔ̄ni mɛ́mla ayínɔ̄nyīlɔ kú nū ā, cɛ́ɛ́ a kwú ɔ̄ ú gā um, kóō wɛ ɛhi ɛyɛ́ɛ́yí hī ɛhi ɔhá tá. Āyā kú ɛbɛ́ nyā géē wɛ ákú uwɔ. 27Eko nēé lɛ abɔ̄ ce ɔ̄cogwɛ́ɛya ɛyí, ɔkɔ́kllɔtū mɛ́mla átákwū kú omlede nēé lɛ abɔ̄ ce ɔ́ ɛyí ā, a í kpó uwā gā um kóō wɛ ɛhi ɛyɛ́ɛ́yí hī ɛhi ɔhá tá, nēé í fō tá ɛyɛ́ɛ́yí lɛ ācogwɛ́ɛya. 28Eko nɛ̄ ācɛ ɔlɛ́ um wā gaá le ɛya kú olétɔ̄há gwó, ɔkɔ́kllɔtū mɛ́mla átákwū kú nū ā wɛ ákú ācogwɛ́ɛya. Ɛ̄nyā wɛ ɛhi nɛ̄ ācɛ yá ami, Óndú ā á. Ɛ̄nyā wɛ ɔdā nɛ̄ n le ŋmó tū nɛ̄ó lɛ opīyabɔ̄ gɛ̄ ŋ́ piyóó.

29A géē kpó ɔdōwiyē kú Árɔ̄ni ā lɛ ayínɔ̄nyīlɔ kú ɔlɛ́ nū eko nɛ̄ó gēkwú. Cɛ́ɛ́ kéē lɛ wiiye eko nēé lɛ abɔ̄ ce uwá ɛyí. 30Ɔyínɔ̄nyīlɔ kú Árɔ̄ni nēé lɛ abɔ̄ ce ɔ́ ɛyí kóō wɛ ɔ̄cogwɛ́ɛya kwɛyí ádā nū ā, nōo gē ga Áklɔ̄kpīihɔ gaá cɛ̄ɛhɔ̄ ipú ɛga Otīihɔ ā, Ó géē lɛ ɔ́ wiiye ɛ̄cī ahāapa.

31Kwú ɛbɛ́ kú omlede kú abɔ̄ ōcɛyí kú Árɔ̄ni mɛ́mla ayí nū ā ú, cɛ́ɛ́ é lɛ ɔ́ he ɛga otīihɔ ā. 32É géē lé ɛbɛ́ mɛ́mla igbō nēe hile ipú ómblí ā, okómpinū kú Áklɔ̄kpīihɔ ā ipéyī um. 33É géē lé ɔdā nēé bī le yá uculo kú ojeyɛ́ɛhi kú ínoōbīya eko nēé le abɔ̄ ce uwá ɛyí ā. Ācogwɛ́ɛya ōfōōfū uwā lɔfú lé ɔdōlé nyā glá á ohígbū koó tīihɔ. 34Ɔ́dāŋ́ ka ɛbɛ́ ā, ámāŋ igbō ā hile gbɔ́ ɔ̄cī, kéē kwú ɔ̄ ú yɔlá. Ó gáā wɛ ɔdā nɛ̄ ɔ̄cɛ dúú ī lé igbɔhá ɛ́ɛ́ gɛ ŋ́, ohígbū kaó tīihɔ.

35A géē yá uculo kú abɔ̄ ō lɛ ce Árɔ̄ni mɛ́mla ayínɔ̄nyīlɔ kú nū ɛyí ā ɛ̄cī ahāapa ɛ́gɛ́nɛ̄ n mafú gā uwɔ ā. 36Ɛ̄cī dóódu, a géē je ɔbá ɛna éyi gwɛ́ɛya, cɛ́ɛ́ kéē kwú íne nēé bīya ā í yá uwā ɛhi. Ó klla í gwu ede ā iyē. Cɛ́ɛ́ a lɛ anɔ̄ kú ólīfu tū ɔ̄ kóō kwú tīihɔ. 37“A í yá ɛ̄nyā ɛ̄cī dóódu ɛ̄cī ahāapa. Cɛ́ɛ́ ede ā kwú yá tīīhɔ dúúdú. Anɔ́ɔ ɔ̄cɛ dúúmā ámāŋ ka ɔdā dúúmā nōo lɛ iyē kwu ɔ́ ɔfú kú otīihɔ kú nū ā géē yá ɔ̄ odée.” #29.37 ɔfú kú otīihɔ kú nū ā géē yá ɔ̄ odée. Ācɛ cɛ̄ ka ɔ̄cɛ olamu ámāŋ ka ɔdā nēe lɛ iyē kwu ɔdā ōtīihɔ, odée lɔfú yá ɔ̄

Ɛya nēé gē gwó ɛ̄cī dóódu ā

38A géē je omlede kú iháyí éyi gwɛ́ɛya ɛyí ede ā ɛ̄cī dóódu piyóó ipú ɛcɛ nyá. 39Kwú omlede éyi í gwɛ́ɛya ɔ̄cɔ̄ɔ̄cī, cɛ́ɛ́ a kwú ɔhá ā ú gwɛ́ɛya ɔ̄nɔ̄ɔ̄nɛ̄. 40Lɛ okoolo kú ɛ́nɛ́ɛ́nɛ̄ umu kú ikpɔ̄dɛ̄hɔ̄ miya, lɛ ɔ́ wīya tɔ̄há mla ɛlɛm ɛhīlī kú ɛ́nɛ́ɛ́nɛ̄ anɔ̄ kú ólīfu, cɛ́ɛ́ a kwú anú mɛ́mla omlede kú aflɛ́yí ā ú gwɛ́ɛya gā um. A í je ɛlɛm ɛhīlī kú ejé gwɛ́ɛya ga um dúú. 41Kwú omlede ɔ́mpa ā ú gwɛ́ɛya gā um ɔ̄nɔ̄ɔ̄nɛ̄. A géē je ɔ́ gwɛ́ɛya mla áluka kú ɔdā ékpónú nāa bī lɛ gwɛ́ɛya kú ɔ̄cɔ̄ɔ̄cī ā. Ɛ̄nyā wɛ ɛya kú ɔdōlé nēé gwó gā um, ocu kú nū í he ami nōo wɛ Óndú ā ɔtū. 42Aá géē yɔ̄ ī gwɛ́ɛya kú ɔdā ō yɔlá dúúdú nyā ipéyī um pīyɛ okómpinu kú Áklɔ̄kpīihɔ nɛ̄ n yɔ̄ ā piyóó ipú ɛcɛ nyā. Abɔ́ɔ ā, n gē jīla mla ācɛ ɔlɛ́ um ká n̄ kɛlā gā awɔ. 43Abɔ́ɔ ā nɛ̄ n géē jīla mla ācɛ kú Ísrɛ̄lu, cɛ́ɛ́ ɔlá ōceyī nɛ̄hi ā géē je abɔ́ɔ yá tīihɔ. 44N géē je Áklɔ̄kpīihɔ mɛ́mla ede ā yá tīihɔ. N géē je Árɔ̄ni mɛ́mla ayí nū tū céé, cɛ́ɛ́ kéē cɛ̄ um ɛhɔ̄. 45N géē lā mla ācɛ kú Ísrɛ̄lu, cɛ́ɛ́ n kwú pīya Ɔwɔicō kú uwa. 46É géē jé ka ami wɛ Óndú ā, Ɔwɔicō kú uwā nōo kpó uwā bɛ̄cɛ ŋmá ajɛ kú Íjīpiti, cɛ́ɛ́ ká n̄ lɔfú lā mla uwá. Ami wɛ Ɔwɔicō kú uwā á.

Currently Selected:

OŌYƐBƐ̄CƐ 29: IFBCL

Highlight

Copy

Compare