ÚKLƆ́ KÚ ĀCOTƐ̄HƆ̄ 28
28
Upɔ́lu yɔ̄ ipú ɔlíidɔ kú Umálta
1Eko nɛ̄ alɔ gā okónu ísu ɛbɔ́ ā, alɔ le jé igbīhāajɛ ka iyē ɔlíidɔ ā lé ka Umálta. 2Ācɛ kú ajɛ abɔ́ɔ kē mīyɛ alɔ lɔɔlɔhi. Ɔwɔ gbɔɔ́ ō yā, anɔ́ɔ ajɛ kwú hīlaŋdɔ́, anɔ́ɔ é le ɔlá gwó lɛ alɔ kú ālɔ̄ jɛ̄. 3Upɔ́lu le ɛfú cē yɔ̄ ī kpó ɔ̄ tū ipú ɔlá, anɔ́ɔ idɔlá kú ɔlá ā le ɛgwā éyi nū bɛ̄cɛ. Ɛgwā ā gaá playi Upɔ́lu abɔ̄. 4Eko nɛ̄ ācɛ ajɛ ā nēe bá abɔ́ɔ ā lɛ ɛgwā ā ma playi Upɔ́lu abɔ̄, é gbɔɔ́ ō da iyī uwā kahíníī, “Ɔtōbɛ́ɛpa í yɔ̄ ɛlā nyā ŋ́, ɔ̄cɛ ā wɛ ɔ̄coŋmɔ́cɛ nɛ. Abɔ̄ ó le kwu ŋmá ísu nááná ā, ɛpɔ̄ ɔkwɛ̄yi kú Ɔwɔicō í cɛ̄ lɛ ɔ́ yēeyī ŋ́ kpɔ́.” 5Amáŋ Upɔ́lu lɛ ɛgwā ā gwō jigijigi tū ipú ɔlá, ó kē yá ɔ̄ ágbe dúúmā ŋ́. 6Ācɛ ā bá ī gbēyī, ī leyī ce ka iyē kú nū í kpó mi ámāŋ ka ó í fīyɛ̄ ajɛ í kwú bōōbū. Amáŋ eko nēé gbēyī gbóógbó nēé má ka ɔdā dúú yá ɔ̄ gɛ ŋ́ mā ā, é lɛ odo kú uwā pīyabɔ̄, anɔ́ɔ é kahíníī, “Ó wɛ ɔwɔ éyi nɛ.”
7Ajɛ okpáátá éyi yɔ̄ kwu ɛga nɛ̄ ɔdā nyá yá ā ajaajɛ. Ó kē wɛ ajɛ kú Upúbliyɔ̄si, ɔcɛ́ kú ɔlíidɔ ā. Ó mīyɛ alɔ klla yá alɔ ɔga lɔhi lɔhi ɛ̄cī ɛtá ā. 8Ádā kú Upúbliyɔ̄si gwutá agōdō, ófú mɛ́mla ɔ́fɛ́ɛgbɛ̄ gē yá ɔ̄. Upɔ́lu le yɛ tá ipú inu le ɔkɔ gbā, kwú abɔ̄ ú ce ɔ́ ɛyí anɔ́ɔ ó le ɔ́ nyatá. 9Eko nɛ̄ ó lɛ ɛ̄nyā yá ā, ācɛ o doōcē o hile kú ɔlíidɔ ā le pɛ́ wā, anɔ́ɔ ó le uwá kpó nyatá. 10É yá alɔ ɛhi nwuné nwuné, anɔ́ɔ eko nɛ̄ alɔ yɔ̄ ī nyɛ̄ɛ̄ ŋmá abɔ́ɔ ā, é lɛ ɔdā dóódu nēe géē ce alɔ ɛgbá ā kpótū ipú úgbéenyi lɛ alɔ.
O ŋmá Umálta ga Uróm
11Igbīhi ɔyā ɛtá nɛ̄ alɔ klá abɔ́ɔ ā, alɔ le pɛ́ nyɛ̄ɛ̄ ipú úgbéenyi nōo ŋmá Alesáŋdrīya, nēé hī kahíníī, “Áplɛ́ Aɔ́wɔ” nōo klá ɔlíidɔ eko ofū dúú ā. 12Alɔ gāājɛ Usírākɔsi, alɔ yá ɛ̄cī ɛtá abɔ́ɔ. 13Oŋmá abɔ́ɔ ā alɔ yɛ gaajɛ Urejíyum. Oŋmɔ́ɔ̄cī nū ɛdɔ owu éyi, nōo ŋmá ɛháajɛ ā, gbɔɔ́ ō tá, anɔ́ɔ oŋmɔ́ɔ̄ci ɔ́mpa ā alɔ gā Uputéyoli. 14Alɔ le ācocɛ̄lɔ̄wɔicō ōhī má, nēé hī alɔ igwú kā ālɔ̄ yɔ̄ mla uwá ɛ̄cī ahāapa. Ɛ̄nyā wɛ ɛdɔ kú iyāwu nɛ̄ alɔ yɛ gaajɛ Uróm á. 15Eko nɛ̄ ayínɛ́ alɔ nēe bá abɔ́ɔ ā lɛ ofu alɔ pó ka alɔ yɔ̄ ī wā ā, é yɛ ŋmá ɛga oligbó bɛ̄ɛka Olihī kú Apíyɔ̄si mɛ́mla ɛga nēe í hī ka inu-ugbɔga ɛtá ā, gaá jīla alɔ ɔwɛ. Eko nɛ̄ Upɔ́lu lɛ uwá má ā, ó tá Ɔwɔicō ahínyá, ɛ̄nyā kē le ɔ́ ɔtū tū kwu ɔtū. 16Abɔ̄ alɔ gā ipú Uróm ā, é le ɛga je lɛ ɔ́ kóō lā ōfōōfūnū mɛ́mla ícɔ́ɔ́ja nōo gē gbō ɔ̄ ā.
Upɔ́lu kɛlā lɛ ācɛ Ujíyu ajɛ kú Uróm
17Eko nɛ̄ ɛ̄cī ɛtá le gla ā, ó lɛ aótrɛ̄yí kú ācɛ Ujíyu nēe lā abɔ́ɔ ā hīgwú tɔ̄há. Anɔ́ɔ eko nēé le jīla ā, ó da uwā kahíníī, “Ayínɛ́ um, ń kē yá ɔdōbɔ̄bí dúúmā lɛyíkwu ācɛ ɔlɛ́ alɔ ámāŋ ucē kú aádā alɔ ŋ́, nááná é kwú um ú bɛ̄ɛka olagbá ā ŋmá Ujerúsālɛm í tā ācɛ Uróm abɔ̄. 18Eko nēé lɛ um jīla ā, é tíne kéē lɛ um hɛ́tá, ohígbū kéē má ɔdā dúúmā nōo cíkā lɛ ikwū ipú ɛpɔ̄ kú um ŋ́. 19#Ācot 25.11 Amáŋ abɔ̄ ācɛ Ujíyu ā tá ā, ɔ́ɔmā yá ɛ́ɛ́ nɛ̄ n yá apíili ga ɛgiyí Ɔcɛ́ nɛ̄hi Usísa á, nááná ā ó wɛ ɔkwɛ̄yi ka ń kpó ɛlā dúúmā ce ācɛ ɔlɛ́ um ŋ́. 20Ohígbū ɛlā nyā nɛ̄ n dɔɔ̄kā ō má aá, ká n̄ lɛ ɛlā ka lɛ aá, ɛ́gɛ́nɛ̄ ó wɛ ohígbū eyīyōce kú Ísrɛ̄lu ā nēé tū um agbá nyā á.” 21Anɔ́ɔ é da ɔ́ kahíníi, “Alɔ í kē mīyɛ ɔkpa dúúmā ŋmá Ujudíya ohígbū uwɔ ŋ́, odúúmā kú ayínɛ́ nēe wā amānyā í kē kpɛ́pɔ̄ ámāŋ o ka obɔ̄bí kú uwɔ ŋ́. 22Amáŋ alɔ gē tíne ká ālɔ̄ pó ŋmá ɛgiyí uwɔ ɔdā nāa bī ɔtū ā, ohígbū ka alɔ jé ka ācɛ gē ka obɔ̄bí kú ɔ́wá nāa wɛ anú nyā ɛga dóódu.” 23Anɔ́ɔ é lɛ ɛ̄cī nēé í má mla Upɔ́lu ā tū, anɔ́ɔ ācɛ lɛwa kú uwā le pɛ́ wā ɛga nōó lā ā. Ó gbɔɔ́ ō kɛlā lɛ uwá lɛyíkwu ajɔ̄ɔ̄cɛ́ kú Ɔwɔicō klla nwū uwā ɔdā lɛyíkwu Ujísɔ̄si ŋmá lɛ o bī ɛlā ŋmá ɔkpá kú íne kú Umósīsi mɛ́mla ipú aɔ́kpá kú ācomɛ́ɛbɛ ā, ŋmá ɔ̄cɔ̄ɔ̄cī jāā gbó otú. 24Ācɛ ōhī cɛ̄ɛ̄lā nōó ka ā, ācɛ ōhī í kē cɛ̄ ŋ́. 25Anɔ́ɔ é le pɛ́ nyɛ̄ɛ̄ eko nēé le áafú tá mla iyī uwā gɔbū gigbīhi ā, igbīhi ɛlā éyi nɛ̄ Upɔ́lu ka ā. Ɛlā nɛ̄ Alelékwū Ihɔ ka lɛ aádáádā alɔ bū okónu kú ɔ̄comɛ́ɛbɛ Ayisáya le kpaakpa!
26 #
Ayis 6.9,10 Ó ka, ‘Nyɔ̄ gaá ka lɛ ācɛ nēe bá nyā.
Aá géē pi ahɔ̄ ŋlēŋlē í jāhɔ̄, amáŋ aá gáā jɛ́ɛyí ɔdā dúú ŋ́,
aá géē pléeyī kwɛcɛ nɛ̄hi, amáŋ aá gáā má ɔdā dúú ŋ́.
27Ohígbū ka ācɛ nēe bá āa í dɔɔ̄kā ō jé ɔdā dúúmā ŋ́,
é kē kwú odée ú gwu ahɔ̄ cɛ́ɛ́ kéē pó ɛlā ŋ́.
É kē le eyī kú uwā kpó klá cɛ́ɛ́ kéē mɛ́ɛbɛ ŋ́,
ahɔ̄ kú uwā í kē pó ɔdā dúú ŋ́,
ɔtū kú uwā í kē gáā jɛ́ɛyí nū ŋ́,
é cɛ̄ pīyɛyí wā ɛgiyí um ká um lɛ uwá hɛ́tá ŋ́.’
28Anɔ́ɔ Upɔ́lu klla da uwá gbɔbū ɛ́ɛ́ nēé nyɛ̄ɛ̄ kahíníī, “N le da aá piíí ka Ɔwɔicō le olɛhɔ̄ nōó ka ka anúɔ géē nya ācɛ tá ā tū fu aílɔ́wá ɛɛ́. É géē jāhɔ̄.” 29Anɔ́ɔ eko nɛ̄ Upɔ́lu lɛ ɛlā nēe bá ā ka ā, ācɛ Ujíyu ā nyɛ̄ɛ̄ gē táafú nɛ̄hi mla iyī uwā.
Upɔ́lu cɛ̄hɔ̄ olɔhi ā pélúú ajɛ kú Uróm
30Upɔ́lu lā ɛga nōó ī gbā ije nū ā iháyí ɛpa odunkwulu. Ó gē mīyɛ ɛjɛ̄ɛ̄jī ācɛ nēe pɛ́ wā ɛgiyí nū ā. 31Ó gē tɔ́ɔna kú olɛhɔ̄ lɛyíkwu ajɔ̄ɔ̄cɛ́ kú Ɔwɔicō, gē nwū ɛlā kú Óndú Ujísɔ̄si Ohɔ́nyɛtá pāālā, ó kē yúufi ŋ́, ɔ̄cɛ dúú í kē ci ɔ́ anú ŋ́.
Currently Selected:
ÚKLƆ́ KÚ ĀCOTƐ̄HƆ̄ 28: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma
