ĀCƐ URÓM Omafú kú ɔ̄kā kú ipú ɔkpá ā
Omafú kú ɔ̄kā kú ipú ɔkpá ā
Upɔ́lu tɔ́kpá nyā gé lɛ ācɛ Uróm kóō tá ɔwɛ lɛ iyāwu nɛ̄ ó gáā yɛ ga ɛgiyí ācɛ icɔ́ɔci kú Uróm ā. Ó le miya kóō lɛ úklɔ́ yá mla ācɔ̄lóhɔ́nyɛtá nēe bá abɔ́ɔ ā lígíí, cɛ́ɛ́ kéē géē tá ɔ̄ abɔ̄ kó ō yɛ ga Usipén. Ó tɔ́kpá kú nū nyā kóō ka ɛyí kú ɔdā nōo wɛ ɛlā Ɔwɔicō ōcɛ̄ kú ācɔ̄lóhɔ́nyɛtá ā mɛ́mla ɛ́gɛ́nɛ̄ ācɔ̄lóhɔ́nyɛtá í cɛ̄ɛ̄lā Ɔwɔicō ipú ɔdā dóódu nēé í yá ā. Ɔkpá nyā nɛ̄ Upɔ́lu kɛlā kúnū gaajɛ fíyɛ́ aɔ́kpá o hile á.
Abɔ̄ ó lɛ okónu hɛ́ tū ācɛ Icɔ́ɔ́ci nēe bá Uróm mɛ́mla ɛ́gɛ́nɛ̄ ó gē gbɔ̄ɔkɔ ohígbū uwā lɛ ā, Upɔ́lu ka ɔdā okpɔ́cíí ō lɛ abɔ̄ bī ɔ̄ ká ɔkpá ā wɛ ka: Ɔ̄kōōlɔhi ā mafú ɛ́gɛ́nɛ̄ Ɔwɔicō ka alɛɛcɛ gwó mla iyī nū lɛ ā, ɔ́ɔ ŋmá lɛ ocɛ̄ɛ̄lā Ɔwɔicō ŋmá ajaajɛ ga oŋmɛ́yí (1.17).
Upɔ́lu le ɛlā ka tū ipú ɔdā okpɔ́cíí ō lɛ abɔ̄ bī ɔ̄ ā nɛ̄ɛ̄nɛ̄hi. Ó ka ɔ́ɔ cɛgbá kú odúúdú alɛɛcɛ, kwu ācɛ Ujíyu, kwu aílɔ́wá kéē le kagwó mla Ɔwɔicō, ohígbū ka ɛjɛ̄ɛ̄jī uwā í nyɛ̄ɛ̄ ŋmá íne kú Ɔwɔicō ō bīya tá glá ŋ́. É gē ka ācɛ gwó mla Ɔwɔicō o ŋmá lɛ o cɛ̄ɛ̄lā kú nū ohígbū ɔdā nɛ̄ Ujísɔ̄si Ohɔ́nyɛtá yá āa. Ogbo ce ɔ́, Upɔ́lu cābɔ̄ kú oyēeyī ɛ̄yīpɛ̄ ipú opīyatɔ̄há mla Ohɔ́nyɛtá, nɛ̄ opīyɔyí kú nū wɛ ɛma ɛ̄yīpɛ̄ kú alɔ mɛ́mla Ɔwɔicō. Ɔ̄cɛ nōo cɛ̄ ā lɛ ɛbɔ́ mla Ɔwɔicō. Ɔfú kú Alelékwū kú Ɔwɔicō lɛ ɔ́ hɛ́tá ŋmá ɔfú kú íne ō bīya mɛ́mla ikwū. Ɛyí 5-8, Upɔ́lu nwɛ̄lā lɛyíkwu ɔdā nɛ̄ íne kú Ɔwɔicō wɛ mɛ́mla ɔdā nōó yá glá mɛ́mla ɔfú kú alelékwū kú Ɔwɔicō ipú oyēeyī kú ɔ̄cɛ nōo cɛ̄ ā. Anɔ́ɔ Upɔ́lu, nōo wɛ ɔ̄cōtɛ̄hɔ̄ kú Óndú ā yɔ̄ í nunu lɛyíkwu ɔ̄kā nēé da lɛyíkwu ɛ́gɛ́nɛ̄ ācɛ Ujíyu mɛ́mla aílɔ́wá gē bá tɔ̄há mɛ́ɛ́lɛ́ ipú ɔdā nɛ̄ Ɔwɔicō miya lɛyíkwu alɛɛcɛ ā.
Ó lɛ ɛlā kú nū ka ka, ācɛ Ujíyu ɔ́ɔ tá Ujísɔ̄si o ŋmá lɛ ɔdā nɛ̄ Ɔwɔicō le miya táajɛ kóō lɛ ɛjɛ̄ɛ̄jī alɛɛcɛ kpó wā ɛgiyí nū, cɛ́ɛ́ kóō géē ményinyi uwā ohígbū Ujísɔ̄si Ohɔ́nyɛtá. Ó kē cɛ̄ ka ācɛ Ujíyu í gáā tá ɛlā kú Ujísɔ̄si piyóó ŋ́. Ámōōmɛ ā, Upɔ́lu tɔ́kpá ā lɛyíkwu ɛdɔ oyēeyī nɛ̄ ācɔ̄lóhɔ́nyɛtá cíkā ō lā ā, ofíyɛ́ dúú ā ɔwɛ nēé í yíihɔtū mɛ́mla ɛma ō yá tá ācɛ ɔhá. Ó lɛ abɔ̄ kwu ɛlā ōbī abɔ̄ kpɔ́cíí bɛ̄ɛka úklɔ́ ō yá lɛ Ɔwɔicō ā. Úklɔ́ kú ācɔ̄lóhɔ́nyɛtá lɛyíkwu ācɛ ogbāājɛ mɛ́mla o lɛyíkwu ɔnyɔɔnyɛ kú uwā mɛ́mla unwalu kú ɛlá nɛ̄ ācɛ ī gbo lɛyíkwu iyī uwā. Ó lɛ ɔkpá ā gwū mla olɛhɔ̄ kú abɔ̄yī nū mɛ́mla o cɛ̄tra Ɔwɔicō.
Okwɔgba kú ɔ̄kā kú ɔkpá
Ɛlā ō mafú 1.1-17
Ó cɛgbá kéē lɛ alɛɛcɛ nyatá 1.18—3.20
Ɔwɛ nɛ̄ Ɔwɔicō ī nya ācɛ tá 3.21—4.25
Oyēeyī ɛ̄yīpɛ̄ ɛgiyí Ohɔ́nyɛtá 5.1—8.39
Ísrɛ̄lu yɔ̄ ipú ɔdā nɛ̄ Ɔwɔicō miya táajɛ ā 9.1—11.36
Ucē kú ācɛ kú ɔlé Ohɔ́nyɛtá 12.1—15.13
Ɛlā onmɛ́yí mɛ́mla okónu ō hɛ́ kú Upɔ́lu 15.14—16.22.
Currently Selected:
ĀCƐ URÓM Omafú kú ɔ̄kā kú ipú ɔkpá ā: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma