Pristayeri 5

Bikayeri Na Ana Tur Ka Mdə Hamta Saɗaka

1“Ma mdə kəga nga akwa mbwar shariya kamnyar ka gə hamta seɗa ata kəra su tə gə wuta wala nggata, amma gə nggəlar ta hamta seɗa ata kər, antə ga ku hara biku. Antə tar ka mdə ɗi nga.”

2“Kəlara mda akwa nca giri na ku tsəkwar su na dlimbur tsa ata ndzi dlimbur ka ndzi ka biku. Ma tsa ku tsəkwar mshiyir mwaɓi na adiya, wala tsa an mwaɓi mtaku wala mwaɓi kəi, wala mshiyir su apa kəga tawula, kilang, pwapu, wala fəvəng, wala an kula səndərni tsa ata ndzi ka biku.”

3“Kəlara mda akwa nca giri na ku tsəkwar kəlara su na adiya na ku səɓəla akwa dza mda, wala an kula səndərni, ma sakatə tsa ku sə nggaɓəla su tə tsa hara ni ata ndzi alari biku.”

4“Kəlara mda akwa nca giri na ku huva hara alkawal kula dzama ata kər, wala tsa akwa bara hara su na ɓɗaku wala su na ɗimi, antə ata ndzi biku alari ma sakatə tsa ku nggaɓəla.”

5“Kəlara sakatə ga ku nggaɓəla abbər ga ku hara biku antə tar kara pəlaɓəla biku tə ga hara ni. 6Tsuwa ata ndzi dwali ala gə ka gə səntə mbəkəl təma wala malgum kamnyar kiɗə tifəmtar bikər nga. Antə prist ata thlamta saɗaka kəgari antə I ata tifəmta ala gə bikər nga.”

7“Amma ma ga amzhi wutə mwaɓi wa, ga ata mzhi səntə bukəlayeri wala kataparayeri suɗa. Pal ga ata hamtari kamnyar kiɗə tifəmtar biku, palari ga ata mbamta ni apa sur shiwura na msəra ali. 8Ga ata hamta ɗikayeri ni aka prist. Antə prist ni ata hamta ɗika na ntangkəma kamnyar kiɗə tifəmtar biku. Tsa ata ndwaləmta wulya ɗika ni kula nthləmta kərari. 9Tsa ata pshitə mamshari ata tenga bagaɗi, ka pumta mbila mamshi ni adzə nggilanga bagaɗi ni. Ngəni an saɗakar kiɗə tifəmta biku. 10Aghəla nda prist ni ata hamta ɗika na suɗkur kamnyar saɗaka mbamba akwa laku tə mdə ku ɗəmha akwa. Apani antə prist ni ata hamta saɗakar kiɗə tifəmtar bikər mdə ni, antə Hyel ata tifəmta alari bikərni.”

11“Amma ma ga amzhi wutə maɗa' bukəl suɗa wala katapar suɗa wa, ka gə səntə mpu na liktikti kilogram pal kamnyar kiɗə tifəmtar biku. Ga aɗiya pungkər mal wala sur shiwura na msəra wa, kamnyar ngəni an saɗakar kiɗə tifəmtar biku. 12Ga ata hamta mpu ni aka prist, antə tsa ata kətsə mpu ni kuta tsiyari pal apa sur seɗa ka tsa mbamta ata bagaɗi apa tə mda ana hara hwatu. Ngəni an saɗakar kiɗə tifəmta biku. 13Prist ata hamta saɗakar kiɗə tifəmta biku ala ga akwa laku ngəni, antə I ata tifəmta ala gə bikər nga. Mambila mpu ni ata ndzi aka prist tsu apatə mda ana hara ka saɗakar mthli.”

Saɗakar Ntə Biku

14MTHLAKU ku pəla aka Musa abbər, 15“Ma mdə laga ku kar ka ɓəli alkawal tə tsa hara atar hamta suayeri laga aka MTHLAKU, antə tsa ata səntə gam na kula nangka ka tsa hamta saɗaka kəgari kamnyar kəcə bikərni. Ma apani wa, tsa ata ntəmta kwabari ka liyar adzərfa, ata sur ngkər su tə mda ana kəthlər kəgari akwa Vəi na Ɓɗakkarkara ni. 16Tsuwa tar ka tsa ntə təmbələr suayeri natə tsa aɗi hamta wa, ka jakəngkər bwa pal ata kəra ntəfu ar su ndaga. Tsa ata hamta aka prist, antə Prist ni ata hamta saɗaka ka gam ni kamnyar bikər mdə ni, antə mda ata tifəmta alari bikərni.”

17“Mdə na ku hara biku atar hara suayeri natə I na MTHLAKU ku ngkata, wala an karkara alari, tsu ata ndzi dwali ka mdə ɗi ni. 18Tsa ata səntə gam na lapiya kula nangka aka prist kamnyar saɗakar ntə biku. Tsa ata ntə biku ni ka gam natə olkurərni kalkal ka su tə Prist ku thlamta. Prist ata hamta saɗakar kəcə biku karkara ata vəyari, antə mda ata tifəmta alari bikərni. 19Ngəni an saɗakar ntə biku tə tsa ku hara ali.”

Currently Selected:

Pristayeri 5: KNB

Highlight

Copy

Compare