Pristayeri 6

1MTHLAKU ku pəla aka Musa, 2“Mda ata mzhi hara biku atar fəi nvwani, wala thlandər alari abbər su tə tsa vəi adzə ni ni ku sha, wala abbər mdə ku həlta. Mda ata mzhi ndzi kula jirkur ata kəra kariyir nvwani na akəlari, wala atar ɗuwar kariyir nvwani, wala mbultsari, 3wala thlandəra ka kahyel abbər tsa aɗi wutə su na ku sha ni wa, wala hara pal akwa nca su nayeri ni wa. 4Ma sakatə mdə ni ku nggaɓəla abbər tsa ku hara biku, antə tar ka tsa ngka ka shanga su tə tsa mbultsa, wala su tə tsa wuta akwa lakur zambakur, wala su tə mdə vəi akəlari, wala su na sha tə tsa ku wuta, 5wala kəlara su tə tsa wuta atar thlandər ka kahyel. Ka tsa ngka ka sur mthlakari swakti alari ka jakəngkər pal akwa kuta ntəfu ar su ni. Tsa ata hamta ɗa shang aka mthlakər su ni. 6Tsa ata mwanta aka prist gam na lapiya, kula nangka, natə kwabar masərni an kalkal ka masər kasəku. 7Prist ata hamta saɗaka ni kamnyar kəcə bikər mdə ni, antə mda ata tifəmta alari bikərni.”

8MTHLAKU ku pəla aka Musa, 9ka tsa hamta tsawu nayeri ni aka Haruna ka maɗa'ni. Tsawayeri ni an ata kəra hamta saɗaka mbamba. Ka mda zhar saɗaka mbamba ni ata bagaɗi, ka pi akwa mba ata u'u har ka vir kura. 10Antə səɓəla ɗəpari prist ni ata hatə ləptər pristkur ka hwandauwari, ka famta pənjuwur saɗaka mbamba na ata kəra bagaɗi ni, ka tsa tsapta athlimbəla bagaɗi ni. 11Aghəla nda prist ata pali kari hatərni, kambəla tsa fwaɓəla pənju ni kazhar vəi fəli ka ra pumtari aɓəla akwa vəi laga na kəcəkəcari. 12Mda ata zhar u'u na ata bagaɗi ni ka tsa ləkəma ka mba, mda aɗiya zhari ka tsa mtə wa. Antə prist ata ləkəma ka putə udzəm ata u'u ni ɗəɗəp ɗəɗəpa, ka putə saɗaka mbamba ata u'u, ka tsa mbamta malər saɗakar jakə mwardzi ni ata kər. 13Antə tədəku u'u ni ata ləkəma ka mba ata bagaɗi ni, mda aɗiya zhari ka ta mtə wa.

Tsawayeri Damwa Na Ata Kəra Saɗakar Mthli

14Nayeri ni an tsawa ar saɗakar mthli. Prist na akwa nyarmbwar Haruna an ata hamta ali saɗakar mthli ni abwakəma bagaɗi ni. 15Prist ni ata kətsə mpur mthli na liktikti kuta tsiyari pal ka paktə ka mal, ka sur shiwura na msəra, ka mbamta apa sur seɗa ata bagaɗi saɗaka. Tsa an saɗaka mbamba swakti ka shiwur na msəra natə I ata dluwari ka kucali. 16Mambila mpu ni mda ata ɓwatə ni kula yist, antə pristayeri ata kwasəmnyari. Da ata kwasari akwa Vəi na Ɓɗakkarkara, akwa bəbalər tentər tsaptədzi. 17Ka giri ɗangta abbər mda aɗi ata ɓwata buradi ni ka yist wa, I ku kəɓəla bwa ngəni akwa kuta su tə mdə hamta ali ata bagaɗi saɗaka ka tsa ndzi aka pristayeri. Saɗaka ngəni an ɓɗakkarkara tsu apa saɗakar kiɗə tifəmta biku ka saɗakar ntə biku. 18Shanga mji shili na akwa nyarmbwar Haruna ata mzhi kwasə buradi ngəni akwa shanga zamanayeri ar giri, kamnyar tsa an bwadukwa susəmər saɗaka natə mdə hamta ali. Kəlara mdə damwa na ku tsəkwar buradi natə mdə ku hamta ali ata dəkəidzi kamnyar dunar ɓɗakkur ar buradi ni.

19MTHLAKU ku pəla aka Musa, 20“Nggədza sur hamtayeri natə Haruna ka kəlara prist na akwa nyarmbwarni ata hamtari vir tə mdə ku pungkər tsi alari. Tsa ata sənta ali saɗakar mpur mthli na liktikti kilogram pal, kalkal ka saɗakar mthli na hwatu. Tsa ata hamta retari ɗəɗəpa ka retari tahaku. 21Tsa ata hərtə mpu ni ka mal zaitun ka ɓwatə ni raka raka ata hahəi ɓwa su. Aghəla nda tsa ata səntə buradi ni ka hamta ni ali apa saɗakar mthli. Tsa an saɗaka mbamba swakti ka shiwur na msəra natə I ata dluwari ka kucali. 22Kəlara kəkar Haruna na ku dlu tsiya baba'ni ka ndzi prist, tsa ata hamta saɗaka ngəni ali. Tsa ata mbamta saɗaka ni shang tuktukku ali apatə tsawa ku pəla. 23Shanga jili saɗakar mthli na ar prist mda ata mbamta ni shang tuktukku apani. Mda aɗi ata səmari wa.”

Saɗakayeri Damwa Kamnyar Kiɗə Tifəmtar Biku

24MTHLAKU ku pəla aka Musa, 25“Hamta tsawayeri ngəni aka pristayeri na akwa nyarmbwar Haruna. Da an tsawayeri na ata kəra saɗakar kiɗə tifəmta biku. Ngəni an saɗaka na ɓɗakkarkara, antə tar ka mdə tsi mwaɓi ngəni akəmi akwa vəi tə mda ana thlamta wulya mwaɓiyir saɗaka mbamba. 26Prist na hamta saɗaka ngəni ata səm bwarni tsu akwa bəbal na ɓɗakkarkara na ar tentər tsaptədzi. 27Kəlara mdə damwa wala kəlara su madi na ku kar ka tsəkwar kumər saɗaka ni ata hara nggawa. Ma mamshir kum ni ku tsəkwar ləptər prist, antə tar ka mdə kəcimta ləptu ni akwa Vəi na Ɓɗakkarkara. 28Ma mdə ku ta kum ni akwa tughum həi, tar ka mdə jaɓumta tughum ni. Tsuwa ma mda ta kum ni akwa tughum əmza, tar ka mdə hirɓəla kutari ka yimta ni ɓɗaku ka yimi. 29Saɗaka ngəni an ɓɗakkarkara, antə tar mji shili na akwa kutakəyir prist an ata mzhi səmari. 30Amma mda aɗi ata səm kumər mwaɓi ar saɗakar kiɗə tifəmta biku natə mdə ku səntə mamshari akwa tentər tsaptədzi kamnyar kəcimta bikər mji wa. Tar ka mdə mbamta ni.”

Currently Selected:

Pristayeri 6: KNB

Highlight

Copy

Compare