Pristayeri 4
4
Saɗakayeri Kamnyar Biku Na Karkara
1Antə MTHLAKU pəla aka Musa, 2ka tsa pəla aka mjir Israila, abbər kəlara mdə na ku hara biku karkara ka ɓəli kəlara pal akwa nca tsawayeri arna, tar ka tsa nu lakwayeri ngəni:
3Ma prist na ola an hara biku, ka vu shanga mji akwa hara biku, antə tar ka tsa hamta saɗakar kiɗə tifəmtar biku ka ɓzər gyal na kula nangka. 4Tsa ata mwari ka gyal ni akwa nyarmbwar tentər tsaptədzi. Anda antə tsa ata pungkər tsiyari ata kəra gyal ni ka thlamta wulyari. 5Aghəla ngəni tsa ata kətsə mamshir gyal ni ka mwanta akwa tentər tsaptədzi. 6Tsa ata nciu kulengari akwa mamshi ni ka pshingkər mamshi ni ka murfa akəma lapəli ar Vəi na Ɓɗakkarkara ni. 7Prist ata ɗatə mamshi ni ata təmbəlayeri ar bagaɗi na akwa kuɗəmayeri nfwar na ar mba sur shiwur na msəra akwa tent ni. Tsa ata pumta mambila mamshi ni adzə nggilanga bagaɗiyir mba saɗaka na akwa nyarmbwar tent ni. 8Prist ni ata fwaɓəla shanga malər kuta gyal ni, mal na hartə kari kutari ni, 9ka kulshayeri na suɗa, ka mal na hartə dza ɗa, ka bwa na ɓɗakta shang ar mir. 10Tsa ata kətə mal ni ka tsa mbamta ata kəra bagaɗi mbamba, tsu apatə tsa ana hara ka mal tə mdə fwaɓəla akwa mwaɓi tə mdə tsi kamnyar saɗakar jakə mwardzi.
11Amma kəsəmər gyal ni, ka kumari, ka kərari, ka nggilangayerari, ka kari kutari, ka vəngkər busari, 12tsa ata fwaɓəla ɗa shang kazhar kuta vəi fəli ni, ka mwantə ɗa aɓəla akwa vəi na kəcəkəcari, vəi pumta pənju. Anda antə tsa ata mbamta da ka udzəm. 13Ma shanga giri na mjir Israila ku hara biku na karkara, ka ɓəli tsawayeri arna, antə dza giri ata na giri abbər giri ku hara biku. 14Ma sakatə giri ku nggaɓəla abbər giri ku hara biku, antə ka giri səntə ɓzər gyal anyarmbwar tentər tsaptədzi kamnyar saɗakar kiɗə tifəmta biku. 15Antə mji ol'olər diyir giri ata pungkər tsiya ɗa ata kəra gyal ni ka thlamta wulyari anda. 16Prist na ola ata kətsə mamshir gyal ni akwa tasa ka tsa mwanta akwa tentər tsaptədzi. 17Tsa ata nciu kulengari akwa mamshi ni ka pshingkər mamshi ni ka murfa akəma lapəli ar Vəi na Ɓɗakkarkara ni. 18Prist ata ɗatə mamshi ni ata təmbəlayeri ar bagaɗiyir hamta saɗaka na akwa tent ni. Tsa ata pumta mambila mamshi ni adzə nggilanga bagaɗiyir mba saɗaka na akwa nyarmbwar tent ni. 19Tsa ata fwaɓəla shanga malər mwaɓi ni ka tsa mbamta ata bagaɗi ni. 20Prist ni ata hara ka gyal ni tsu apatə tsa ku hara ka gyalər saɗakar kiɗə tifəmta biku. Akwa laku ngəni antə tsa ata hamta saɗakar kiɗə tifəmta biku aka mji. Antə mda ata tifəmta ala ɗa bikər ɗa. 21Aghəla nda tsa ata kəɓəla gyal ni kazhar kuta vəi fəli ni, ka mwantə ni aɓəla, ka mbamta ni apatə tsa ku hara ka gyalər kiɗə tifəmta biku arni. Ngəni an saɗakar kiɗə tifəmta biku aka mji.
22Ma kəlara mdər pwara ar Israila ku hara biku karkara, ka ɓəli pal akwa nca tsawayeri arna, antə dzari ata nari abbər tsa ku har biku. 23Ma sakatə tsa ku nggaɓəla abbər tsa ku hara biku, tsa ata səntə nciwu na kula nangka kamnyar saɗaka. 24Tsa ata pungkər tsiyari ata kəra nciwu ni ka tsi ni akwa vəi natə mda ana tsi mwaɓiyir saɗaka mbamba. Ngəni an saɗakar kiɗə tifəmta biku. 25Prist ni ata nciu kulengari akwa mamshir mwaɓi ni, ka ɗatə mamshi ni ata təmbəlayeri ar bagaɗi ar hamta saɗaka mbamba. Tsa ata pumta mambila mamshi ni adzə nggilanga bagaɗiyir mba saɗaka ni. 26Antə tsa ata mbamta shanga malər kwi ni ata bagaɗi ni tsu apatə tsa ku hara ka mal ar saɗakar jakə mwardzi nda. Apani antə prist ata hamta saɗakar kiɗə tifəmta biku ar mdər pwara ni, antə mda ata tifəmta alari bikərni.
27Ma kəlara mdə na akwa nca giri na ndzang ku hara biku na karkara, ka ɓəli pal akwa nca tsawayeri, antə dzari ku nari abbər tsa ku hara biku. 28Antə ma sakatə mdə ku ncanta alari biku tə tsa hara, tsa ata səntə malgum na kula nangka kamnyar saɗaka ar bikərni. 29Ka tsa mwantə malgum ni ata bagaɗi mbamba, ka tsa pungkər tsiyari ata kəra malgum ni ka tsi ni anda. 30Prist ni ata nciu kulengari akwa mamshir mwaɓi ni, ka ɗatə mamshi ni ata təmbəlayeri ar bagaɗiyir hamta saɗaka mbamba. Tsa ata pumta mambila mamshi ni adzə nggilanga bagaɗiyir mba saɗaka ni. 31Antə tsa na hara biku ni ata fwaɓəla shanga malər malgum ni tsu apatə mda ana hara ka mwaɓiyir saɗakar jakə mwardzi. Aghəla nda antə prist ata mbamta mal ni ata bagaɗi. Tsa an saɗaka mbamba swakti ka shiwur na msəra natə I ata dluwari ka kucali. Antə mda ata tifəmta alari bikərni.
32Ma ga ata thla saɗakar kiɗə tifəmta bikər nga ka təma, antə tar ka təma ni ndzi mbəkəlari na lapiya kula nangka. 33Ka gə mwantə mbəkəl təma ni ata bagaɗi mbamba, ka gə pungkər tsiya ga ata kərari kara tsi ni anda. 34Prist ni ata nciu kulengari akwa mamshir mwaɓi ni, ka ɗatə mamshi ni ata təmbəlayeri ar bagaɗi mbamba ni. Tsa ata pumta mambila mamshi ni adzə nggilanga bagaɗiyir mba saɗaka ni. 35Antə gə na hara biku ni ata fwaɓəla shanga malər mbəkəl ni tsu apatə mda ana hara ka mwaɓiyir saɗakar jakə mwardzi. Aghəla nda antə prist ata mbamta mal ni ata bagaɗi ata kəma duku ka susəma tə mdə hamta ali. Apani antə prist ni ata hamta saɗakar kiɗə tifəmta biku ala ga. Antə mda ata tifəmta ala gə bikər nga.
Currently Selected:
Pristayeri 4: KNB
Highlight
Copy
Compare
Share
Want to have your highlights saved across all your devices? Sign up or sign in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.
