Baɗitari 39

Yusuf Ku Hara Kəthlər Aka Potifar

1Akwa saka ndaga antə mdə ləghəi ka Yusuf ahar Masar. Antə Potifar na mdər kəthlər na ola aka kuthlir Masar, na olər mjir sək kəra kəyir kuthli, ku mwari ka masɓəla Yusuf akəla mjir Ishmayel na səghəi ka tsa anda ni, ka səntə ni. 2Antə MTHLAKU ku ndzi ata vəi duku ka Yusuf, har tə tsa baɗitə səma akwa shanga su tə tsa akwa harari akwa kutakəyir mdərkəyirni Potifar na mdər Masar ni. 3Tsuwa mdərkəyirni ku nggaɓəla abbər MTHLAKU ata vəi duku ka Yusuf, kamnyar kəlara su tə Yusuf ku tsəkwari ka tsiyari, MTHLAKU ata vu ka suari hara.

4Apani antə Yusuf ku wutə mdəkur ata nca Potifar, ka hara kəthlər alari. Antə Potifar ku vəngkər ni ata kəra kutakəyirni, ka ata kəra shanga su tə tsa kəgari. 5Baɗitə ka sakatə Potifar vəngkər ni ata kəra kutakəyirni, ka ata shanga su tə tsa kəgari, MTHLAKU ku vədzə barka aka kutakəyir mdər Masar ni kamnyar Yusuf. MTHLAKU ku vədzə barka aka shanga su tə Potifar kəgari, shanga su na avi kəga na aɓəla akwa mtaku. 6Antə Potifar ku zhar shanga su tə tsa kəgari akwa tsiya Yusuf. Potifar aɗi ka damitədzi ata kəra surni wala raka wa, tar susəmər kutari daci.

Mwalar Potifar Ku Bara Ka Yusuf Pi Ka Tsa

Yusuf an ɓzərdakwi laga na dakwi tə mda abara ka wula. 7Aghəla saka laga təng vir laga mwalar mdərkəyirni putə ncari ata Yusuf, ka pəla alari, “Pi ka iya!” 8Amma Yusuf ku nggəlari, ka pəla aka mwalar mdərkəyirni ni, “Wula, tə I aɗi azi, mdərkəyirna aɗi ka damitədzi ata kəra su na akwa kutakəyirni wala raka wa. Tsuwa tsa ku pu shanga su na akwa kutakəi ni akwa tsi. 9Tsa aɗi təramta ra ka kuthlikur akwa kutakəi ni wa, tsuwa su aɗi tə tsa ngkata ali wa, tar gə kə kəra ga ni, kamnyar ga an mwalankiɗa. To, apa madi tə I ata mzhi hara su ngəni ɗimi ni, kəi hara biku aka Hyel ri?” 10Antə wala tə tədək viri mwala ni akwa gari aka Yusuf, Yusuf aɗi kələngkər alari, abbər ka da pi wa, wala ndzi ata vəi duku ka tsa wa.

11Vir laga, Yusuf ku ləvəi akwa kutakəi ni kamnyar hara kəthlər apatə tsa tsəli ka harari hwatu, tsuwa ata sakanda mda aɗi akwa nca mjir kəthlər akwa kutakəi ni wala duku anda wa. 12Antə mwala ni tamtə ni ata ləptərni, akwa pəla, “Tar ma gə pi ka iya!” Amma Yusuf ku hwi ləɓəla kazhar ləptərni akwa tsiya mwala ni. 13Sakatə tsa wuta abbər Yusuf ku hwi kazhar ləptərni akwa tsiyari, ka tərɓəla, 14antə tsa tsa ləlu akwa pəla aka mjir kutakəi ni abbər, “Wul giri! Mdərkəyirna səntə mdər Ibrani ngəni kamnyar ka tsa səm mdəkurər mburu. Tsa si adzə ra abbər tar ka tsa pi ka iya, antə I tsa ləlu ka duna. 15Sakatə tsa nggatə ra haptə kurakəi akwa tsa ləlu, antə tsa hwi kazhar ləptərni adzə ra, ka hwi, ka tərɓəla akwa kutakəi ni.”

16Antə mwala ni pwi ləptu ni adzə ni, har tə mdərkəyir Yusuf ngka avi. 17Antə mwala ni jikata alari ndər ni abbər, “Mdər Ibrani na buɗa tə gə sənta ala mwa ni an səmbwa akwa bara səm mdəkurərna. 18Amma təkəma tə I haptə kurakəi ka tsa ləlu, antə tsa hwi kazhar ləptərni adzə ra, ka tərɓəla kazhar kutakəi ni.”

19Sakatə mdərkəyirni nggatə ndərayeri tə mwalankiɗa pəla alari abbər, “An su tə buɗar nga hara ali ja,” antə ɗəffari ku ɓzi. 20Antə mdərkəyir Yusuf ku kətə Yusuf ka hambwa ni akwa pərsəna, vəi tə kuthli ana pwi pərsənayeri arni akwa, antə tsa ku ndzəndzi anda akwa pərsəna ni. 21Amma MTHLAKU ku ndzi ata vəi duku ka Yusuf, ka ncanta alari hirkur arni na ana palidzi wa, ka hara tə tsa wutə mdəkur ata nca mdər ɓəla pərsənayeri ni. 22Antə mdər ɓəla pərsənayeri ni vu shanga pərsənayeri na akwa kəi pərsəna ni akwa tsiya Yusuf. Antə shanga su tə mda ata harari anda Yusuf an ata ndzi ata kəra suari.

23Mdər ɓəla pərsəna ni aɗi ana ndzi ka damitədzi ata kəra shanga su na ku ndzi akwa tsiya Yusuf wa, kamnyar MTHLAKU ata vəi duku ka tsa. Tsuwa shanga su tə tsa pəla tsa ata harari, MTHLAKU ana hara ka tsa mzhi haratari.

Currently Selected:

Baɗitari 39: KNB

Highlight

Copy

Compare