Baɗitari 38

Yahuda Ka Tamar

1Akwa saka na ndaga antə Yahuda ku təra kazhar maɗama'ni, kara ndzəndzi ka mdə laga ka thləmari Hira ahar Adullam. 2Anda Yahuda kəɓa ka ngkwar mdər Kanana laga ka thləma baba'ni Shuwa. Antə Yahuda ku kəl ni, ka ləmbwa adzə ni, 3antə tsa yaɓəla alari ɓzər sal. Antə Yahuda vəta alari thləm Er. 4Antə tsa jaktə kətə hur, ka yaɓəla ɓzər sal, ka vəta alari thləm Onan. 5Antə tsa jaktə yaɓəla ɓzər sal damwa ka kəga thləmari Shela. Yahuda ahar Kezib sakatə mwalankiɗa yaɓəla alari Shela ni.

6Antə Yahuda ku kətə mwala na ka thləmari Tamar aka ɓzərni Er na yarakəmarni ni. 7Amma Er na yarakəmar Yahuda an mdə na ɗimi ata nca MTHLAKU, antə MTHLAKU ku tsi ni. 8Aghəla nda antə Yahuda pəla aka Onan, “Ləmbwa adzə mwalar ɓzərma' nga, ka gə hara su tə tsawa pəla kalkal ka ɓzərma' sal hara alari, ka gə wutə maɗankyar aka ɓzərma' nga.” 9Amma Onan ku sənda abbər maɗankyar ni aɗi ata ndzi ar kərari wa. Antə kəlara sakatə tsa ku ləmbwa adzə mwalar ɓzərma'ni, tsa ana pumta yimər dzari ata di, kamnyar ta tsa asə yaɓəla ɓzər aka ɓzərma'ni. 10Amma su tə tsa hara ni aɗi ɓɗaku ata nca MTHLAKU wa, antə MTHLAKU ku tsi ni tsuwa. 11Antə Yahuda pəla aka Tamar na mwalaɓzərni ni abbər, “Kuji gə ngka aviyar baba' nga, kə ga ləkəma ka ndzi kughung, har tar ma sakatə ɓzərna Shela ku kəla.” Tsa pəla apani ni kamnyar tə tsa akwa thlivər abbər nuhum Shela asə mta tsu apa maɗama'ni ni. Antə Tamar ku təra ka ləkəma ka ndzi aviyar baba'ni.

12Aghəla nda raka antə mwalar Yahuda na ngkwar Shuwa ni ku mti. Aghəla tə Yahuda ku ngkahə hangkalari akwa mtər mwalankiɗa ni, antə tsa ka pazhirni Hira na mdər Adullam ni ku ngka ahar Timna adzə mjir pamta shishir təmayeri arni ni. 13Sakatə mdə pəla aka Tamar abbər baba' salngkiri akwa mwari ahar Timna kamnyar pamta shishir təmayeri arni, 14antə tsa fəi zhaɓər tuwa ar kughungkurərni ni, ka pungkər gyalle, ka hartə kərari, ka ndzəndzi anyarfur ləvəi akwa Enayim, na ata lakur ləhar Timna. Kamnyar tsa wuta abbər Shela ku kurtə kəla, amma mda aɗi hamta ni aka Shela ka tsa ndzi mwalankiɗa wa.

15Sakatə Yahuda wutə ni, tsa kəta abbər mwala ni karwa, kamnyar kəmari harharari ka zhaɓi. 16Tsa aɗi sənda abbər tsa mwalaɓzərni wa, antə tsa mwari adzə ni ata mnya laku ni ka pəla alari, “Asər, kəi pəi ka ga.”

Antə mwala ni pəla, “Man tə ga ata na ali ri ma ga ku pəi ka iya?”

17Antə tsa pəla, “I ata kəɓəla malgum akwa ciɓərna kəi thlenta ala ga.”

Antə mwala ni pəla, “To, sur seɗa laga aɗi tə ga ata ni abbər ga ata thlenta ali malgum ni ya?”

18Antə tsa pəla, “To, man su tə kəi na gə na ata ndzi seɗa nə ri?”

Antə mwala ni pəla, “I ata bara seɗar hau tsi ar kuthlikur na ar nga ka səwurni, ka zwalər kuthlikur na akwa tsiya gə ni.” Antə tsa kəta ka hamta ɗa alari, ka pi ka tsa, antə Tamar ku kətə hur. 19Antə Tamar ku thlatə ka ngka avi, ka fəi gyalleyirni, ka jaktə mbwatə zhaɓər tuwa ar kughungkurərni.

20Antə sakatə Yahuda thlentə pazhirni Hira na mdər Adullam ni abbər ka tsa mwantə kwi ni aka mwala ni, ka tsa dlu alari seɗar alkawal na akəlari ni, Hira ku mwari amma tsa aɗi mzhi wutə mwala ni wa. 21Antə tsa yu mji na ata vəi ni abbər, “Ama antə I ata wutə mwala karwa na ana ndzəndzi ata mnya laku azi ahar Enayim nə ri?”

Antə da pəla alari, “Karwa aɗi na ku ɗar ndzəndzi azi wa.”

22Antə tsa ku ngka adzə Yahuda ka pəla, “I aɗi wutə ni wa. Tsuwa mji na anda ni pəla karwa aɗi na ku ɗar ndzəndzi anda wa.” 23Antə Yahuda pəla, “Zhar ni ka tsa kəsi kari ni ka da ndzi arni, kamnyar ta mji asə kumshi mwa. Arna ai ga ku wutə I ku thlenta alari malgum ni, amma ga an ka wutə ni wa.”

24Apa ka thliya makər aghəla nda, antə mdə laga pəla aka Yahuda abbər, “Mwalaɓzər nga Tamar ku hara karwakur ka kətə hur akwa karwakur ni.”

Antə Yahuda pəla, “Səɓəla giri ka tsa, ka mdə mbamta ni.” 25Sakatə mda akwa səɓəla ka tsa, antə tsa thlentə ndər aka baba' salərni abbər, “Mdə na mthlakər kari ngəni an vədza ali hur ni. Wulha, nuhum ga ata mzhi nggaɓəla sur seɗar hau tsi ar kuthlikur ngəni, ka səwari ni, ka zwalər kuthlikur ngəni.” 26Antə Yahuda ku nggaɓəla ɗa ka pəla, “Jiri, mwala ni ka jirkur ta iya, təng tə I aɗi hamta ni aka ɓzərna Shela wa.” Antə Yahuda aɗi jaktə pi ka tsa kəra wa.

27Sakatə sakar yarni ku hara, antə tsa nggaɓəla abbər azha ɓuli an akwa kutari ni. 28Antə sakatə tsa akwa kutərya, antə pal akwa nca ɗa haɓəla tsiyari pal. Antə mwala kathla ni kətə puwar nggira na mamza ka mbwata ata tsiyari ni, akwa pəla abbər, “Ngəni an baɗitə səɓəla.” 29Amma sakatə tsa ndəkərghəl tsiyari ni, təng təkəma ɓzərma'ni səɓəla. Antə mwala ni pəla, “Ya! An laku tə gə ɓəli ka səɓəla akwa ya.” Kamnyar ngəni antə mdə vəta alari thləm Perez. 30Aghəla nda, antə ɓzərma'ni ni səɓəla ka puwa nggira na mamza ni ata tsiyari. Antə mdə kəga thləmari Zera.

Currently Selected:

Baɗitari 38: KNB

Highlight

Copy

Compare