Baɗitari 40

Yusuf Ku Ngkərɓəla Karapur Suniyir Mjir Pərsəna

1Aghəla nda, antə mdə na olər mjir hamta sur sa aka kuthli ka olər mjir ɓwa buradi aka kuthlir Masar ku hara su na ɓzamtə ɗəffa kuthlir Masar ni. 2Antə ɗəffa kuthli ku ɓza adzə mjir kəthlər arni na suɗə ni, watau olər mjir hamta sur sa ka olər mjir ɓwa buradi. 3Antə tsa hambwa ɗa akwa mbwar pərsəna akwa kəyir olər mjir sək kəra kuthli, akwa mbwar pərsəna tə mdə vəi Yusuf akwa ni. 4Antə da ku ɗar fəi anda akwa pərsəna ni, tsuwa olər mjir sək ni zhar ɗa akwa tsiya Yusuf, abbər ka Yusuf ndzi mdər dlar ɗa, antə tsa ku dlar ɗa. 5Vir laga aviri təng olər mjir hamta sur sa aka kuthlir Masar ni ka olər mjir ɓwa buradi ni hara suni laga akwa kəyir pərsəna ni, waskəi ka suniyirni ka karapwari zum ta ar nvwani. 6Sakatə Yusuf si adzə ɗa ɗəɗəpa, tsa wuta abbər da akwa damitədzi. 7Antə tsa yu ɗa abbər, “Kamnyar mi tə kəma giri aɗi pwipwiyari ashina wa ri?” 8Antə da pəla alari, “Yeru ku suni, amma mdər mzhi ngkərɓəla ala yeru karapur ɗa aɗi wa.” Antə Yusuf pəla ala ɗa, “Aɗi Hyel an ka dunar ngkərɓəla karapur suniyayeri wa ya? Pəla giri ali suniyayeri ni, bu usa.”

9Antə olər mjir hamta sur sa aka kuthli ni ngkərɓəla suniyirni ni aka Yusuf, abbər, “Akwa suniyirna ni I wutə nfur anap akəmi. 10Tsuwa nfu ni ka tsiyayerari makər, natə təkəma tə thlaliyayeri arɗa baɗitə ɗəɗa, antə da baɗitə pu pukdla, tsuwa kula shamta saka təng gwandzalər yar anap ni ng'ha. 11Tsuwa arna, kwapər kuthli akwa tsi. Antə I kətə yar anap ni, ka ntsarwa yimari akwa kwapə ni, ka hamta aka kuthli akwa tsiyari.” 12Antə Yusuf ku pəla alari, “Nggədza karapur suniyir ngə ni. Tsiyayerari na makər ni an vir makər. 13Akwa kuta vir makər kuthli ata kəɓəla nga akwa pərsəna ni, ka tsa ngka ka ga akwa vəi kəthlər ar nga, ka gə ləkəma ka hamta sur sa akwa kwapu aka kuthli apatə ga ana hara hwatu. 14Amma ka gə sə ɗangtə ra, ma sakatə shanga su ku ndzəndzi kalkal ala ga, ka gə hara ali ɓɗakkur, ka gə kamnya thləmi aka kuthli, kamnyar ka mdə kəɓəla ra akwa mbwa ngəni. 15Kamnyar jirkurari, mdə an həltə ra akwa tsəɗiyir mjir Ibrani. Azi ni tsuwa I aɗi hara su ɗimi na ku mzhi ka mdə vu ra akwa pərsəna wa.”

16Sakatə olər mjir ɓwa buradi ni wuta abbər karapur suniyir mdər hamta sur sa aka kuthli ni ku ndzi ɓɗaku, antə tsa pəla aka Yusuf, “I ma I ku hara suni laga. Antə akwa suniyirna ni I wutə thlambəlayeri makər ka buradi akwa ata kəri. 17Amma thlambəl na amta ata kər ni ka susəmayeri zumzum tə mdə ɓwata aka kuthli. Amma ɗikayeri akwa səm susəmayeri na akwa thlambəl na ata kəri ni.” 18Antə Yusuf pəla alari, “Nggədza karapur suniyir ngə ni. Thlambəlayeri na makər ni an vir makər. 19Akwa kutar vir makər kuthli ata nthləmta kəra ga, ka tsa hahəi mshiyir nga ata nfwa. Antə ɗikayeri ata səm kumər dza ga.”

20Akwa vir na makərkur, na an vir kucali ar yar kuthli, antə kuthli ni hara susəmər kucali na ola aka shanga kwakunayeri arni. Tsa fwaɓəla olər mjir hamta sur sa ka olər mjir ɓwa buradi akwa pərsəna ni, ka səntə ɗa akəma kwakunayeri arni. 21Antə tsa ngka ka olər mjir hamta sur sa ni akwa vəi kəthlərərni, tə tsa ku ləkəma ka hamta sur sa aka kuthli apa na hwatu. 22Amma ar olər mjir ɓwa buradi ni mdə ku mbwamta ni ata nfwa, apatə Yusuf ku ngkərɓəla. 23Amma olər mjir hamta sur sa ni aɗi ɗangtə Yusuf wa, tsa fwari ata kərari.

Currently Selected:

Baɗitari 40: KNB

Highlight

Copy

Compare