Səɓəlari 7

1Antə MTHLAKU pəla aka Musa, “Wula, I ata namtə nga apa Hyel aka kuthli, antə ɓzərma' nga Haruna ata ndzi apa naɓiyir nga. 2Ar nga shanga su tə I tsawa ala ga antə ga ata pəla aka Haruna na ɓzərma' nga, antə tsa an ata pəla aka kuthli abbər ka tsa zhar mjir Israila ka da ləɓəla kazhar tsəɗiyirni. 3Amma I ata hara ka kuthli ni ndzi ka kər ɓəɓalkur. Wala tə I ku jaktə hara seɗayeri kəga surndatayeri akwa tsəɗi Masar, 4kuthli ni aɗi ata psi thləm ala giri wa. Antə I ata ncantə duni ata kəra Masar atar sənta asar na mwavər ka shariya na mwavər ata kərari. Aghəla nda antə I ata fwaɓəla mjirna, watau mjir Israila kazhar tsəɗi Masar, nyarmbwa ata nyarmbwa. 5Antə mjir Masar ata sənda abbər I an MTHLAKU, ma sakatə I ku ɗi mjir Masar, ka fwaɓəla mjir Israila kazhar tsəɗiyir ɗa.” 6Antə Musa ka Haruna ku hara kalkal apatə MTHLAKU ku tsawa ala ɗa. 7Akwa sakatə da gari aka kuthli ni Musa ka məvari nciskumari, antə Haruna tsuwa ka məvari nciskumari ka makər.

Zwal Haruna Ku Shin Ka Pwapu

8Antə MTHLAKU pəla aka Musa ka Haruna, 9“Ma kuthli ku pəla ala giri, ‘Ncantə giri ali duna tə giri kəgari atar hara surndatayeri,’ ka gə pəla aka Haruna ka tsa kətə zwalərni ka tsa psəmta ata di akəma kuthli ni. Antə zwal ni ata shin ka pwapu.” 10Antə Musa ka Haruna ku təra mwari adzə kuthli, ka hara kalkal apatə MTHLAKU ku tsawa ala ɗa. Haruna ku psəmta zwalərni ni akəma kuthli kəga kwakunayeri arni, antə zwal ni ku shin ka pwapu. 11Antə kuthli ku kəgatə mjirni na ɗəɗu ɗəɗu kəga ɗeaghayeri na akwa Masar, antə da ku hara ɗeaghakur arɗa ka haratə tsu apani. 12Waskəi akwa nca ɗa ku ndzəndzəhəmta zwalərni, antə zwalayeri ni ku shin ka pwapwayeri. Amma pwapur Haruna ku ndasəmnya pwapwayeri arɗa. 13Amma wala apani ɗəffa kuthli ku kurtə hara ɓəɓal, antə tsa aɗi ata psi thləm ala ɗa apatə MTHLAKU ku pəla wa.

Bwani Na Ntangkəma: Yimi Ku Shin Ka Mamshi

14Antə MTHLAKU pəla aka Musa abbər, “Ɗəffa kuthli ku kurtə hara ɓəɓal, antə tsa aɗi ata zhar ka mji ni təra wa. 15Antə ka gə mwari adzə ni ɗəɗəpa kalkal akwa sakatə tsa ana səɓəla kamnyar mwari akwa Thlyagha Nayil. Ka gə kətə zwal na shin ka pwapu nda akəla ga, ka gə ra səktə ni ata mnya thlyagha ni. 16Ka gə pəla aka kuthli abbər MTHLAKU na Hyelər mjir Ibrani an thlentə nga adzə ni ka ndər abbər, ‘Ka gə zhar mjirna ka da ra vəngkər səli ali akwa mtaku. Amma nggədza har ba kulini ga aɗi psi thləma gə wa.’ 17Antə kulini MTHLAKU akwa pəla, ‘Atar su ngəni antə ga ata sənda abbər I an MTHLAKU. Kamnyar kulini I ata tsa yimər Nayil ni ka zwal ngəni akwa tsi ni, antə yimi ni ata palidzi ka ndzi mamshi. 18Antə kəlfayeri na akwa yimi ni ata mtəgəmtadzi, tə yimi na akwa thlyagha ni ata shiwur ka duna, har tə mjir Masar aɗi ata mzhi sa yimari kəra wa.’ ”

19Antə MTHLAKU pəla aka Musa, “Pəla aka Haruna ka tsa kətə zwalərni ka tsa haptə tsiyari ka ndərari ata kəra shanga yimayeri na akwa Masar, watau zərkayeri, ka thlyaghayeri, ka kufayeri, ka shanga vəi pwi yimi, kamnyar ka shanga ɗa shin ka mamshi. Antə shanga yimayeri na akwa Masar, har kəga yimi na akwa gəlamayeri kəga shanga sur pwi yimi tə mdə nam ka udzəm, wala kugwa, wala pela ata shin ka mamshi.”

20Antə Musa ka Haruna ku hara kalkal apatə MTHLAKU tsawa ala ɗa. Haruna ku haptə zwalərni ka tsa yimər Nayil ni ata nca kuthli kəga kwakunayeri arni, antə shanga yimər Nayil ni ku shin ka mamshi. 21Antə kəlfayeri na akwa Thlyagha Nayil ku mtəgəi, tə thlyagha ni ləkwa shiwur ka duna har tə mjir Masar amzhi sa yimari wa. Antə shanga vəyayeri na akwa Masar ku ndzi ka mamshi. 22Amma ɗeaghayeri ar mjir Masar ku hara ɗeaghakurər ɗa ka hara tsu apa nda. Antə ɗəffa kuthli ku vərvər hara ɓəɓal har tə tsa aɗi psi thləm aka Musa ka Haruna wa, kalkal apatə MTHLAKU ku pəla. 23Antə kuthli ni shinantə kəmari ka ngka aviyarngkiɗa, tsuwa tsa aɗi damitədzi ata kəra su na hara ni wa. 24Antə shanga mjir Masar ku mwari ata mnya Thlyagha Nayil ka ləkwa msə yimi kamnyar ka da wutə yimər sa, kamnyar da amzhi sa yimər Nayil ni wa. 25Antə mdə ku hara vir murfa cur aghəla tə MTHLAKU tsa Thlyagha Nayil tə tsa shin ka mamshi ni.

Currently Selected:

Səɓəlari 7: KNB

Highlight

Copy

Compare