Səɓəlari 36

1“Antə Bezalel ka Oholiyab ka kəlara mdə na asəndə kəthlər ar tsi, natə MTHLAKU ku nar səndə ka masəkukur ar hara kəlara kəthlər, an ata latə tent ni, tsu akwa laku tə MTHLAKU ku tsawa.”

Mdə Ku Thləthlatə Ka Mji Akwa Hamta Su.

2Antə Musa kəgatə Bezalel ka Oholiyab ka shanga mji na ka sənda, natə MTHLAKU ku hamta ala ɗa səndər su, ka kəlara mdə natə ɗəffari ku mbwi kamnyar hara kəthlər ngəni. 3Antə Musa ku hamta ala ɗa shanga sur hamta ar hirər ɗəffu natə mjir Israila hamta kamnyar la tentər vəngkər səli ni. Amma mji ku ləkəma ka səntə sur hamta arɗa ar hirər ɗəffu tədəku ɗəɗəpa. 4Antə shanga mji na masəku akwa kəthlər ar tsi, na akwa hara shanga kəthlər tent ni, ku zhar kəthlər ni, ka mwari adzə Musa. 5Antə da pəla aka Musa, “Mji ni akwa ləkəma ka səntə su hangta su tə mda akwa barari kamnyar kəthlər tə MTHLAKU ku tsawa abbər ka mdə hara ni.”

6Antə Musa ku hamta tsawa tə ka mdə psəmnya bamama akwa kuta vəi fəli ni abbər, “Mda aɗi ata bara ka mdə sal wala mdə mwala jaktə səntə sur hamta kamnyar la Tent ni kəra wa.” Antə mji ku thləthlatə ka səntari. 7Kamnyar su tə mdə tsaptə ni ku mzhi, har ma ku təramta su tə mda akwa barari kamnyar kuri kəthlər Tent ni.

Namtər Tentər Vəngkər Səli Aka MTHLAKU

(Səɓ 26:1-37)

8Antə shanga mji na təramta ta shang ka masəkukur akwa nca mjir kəthlər ni, ku latə Tent ni, ka lapəliyayeri kuma, natə mdə tsa ka lilin na ɓɗaku, na kalar lipəla, ka kalar yar ndləngi həng'ha, ka puwa mamza, ka dəɓatə ka ɗahər dludzər kerubayeri. 9Saɓəlkur kəlara lapəli an dzartsi sərkumari ka ncisu, ka baukurari dzartsi nfwar. Shanga lapəliyayeri ni olkurər ɗa kalkal. 10Antə mdə paktə lapəliyayeri kəmari ntəfu ata kəma duku tə da ndzi lapəli pal, ka hara tsu apani aka na mbiləmta ntəfu ni. 11Antə da namtə səwur hahəi lapəli ni ka puwa lipəla, tə mdə nduɓtə ɗa ata mnya kəlara lapəli na ntangkəma tə mdə paktə ni, ka hara tsu apani aka na suɗkur ni. 12Mdə nduɓtə səwur hahəyayerari ntəfkumari ata mnya kəlara lapəli, Ma mdə paktə ɗa ka giratə ɗa səwur hahəyari na ata mnya lapəli na duku ata ndzi kalkal ka na ata mnya lapəli na dukwari ni. 13Tsuwa mdə ku namtə liyayeri laga ntəfkumari ka əmza kamnyar hahəi lapəli ni ata, ka vədzə lapəli na pal ni aka nvwa ni ata sur hatə ɗa ni, kamnyar ka Tent ni ndzi su duku.

14Tsuwa mdə ku tsaptə zhaɓayeri pal pal kum ka ntang natə mdə nam ka shishir kwi, ka nduɓtə ɗa tə da ndzi su duku, kamnyar hartə kəra tent ni. 15Saɓəlkur kəlara zhaɓi pal an dzartsi makkumari, ka baukur kəlara pal dzartsi nfwar. Antə olkur shanga zhaɓayeri ngəni kum ka ntang ni kalkal. 16Antə mdə ku paktə lapəliyayeri ntəfu, ka nduɓtə ɗa ata kəma duku tə da ndzi su duku. Tsu apani tsuwa antə mdə hara ka na zhaɓayeri na ngkwa ni. 17Antə mdə ku nduɓdzə səwur hatayerari ntəfkumari ata mnya kəlara lapəli. 18Mdə namtə liyar hatayerari ntəfkumari ka əmza ka paktə ɗa ka səwur hatayerari ni kamnyar ka Tent ni ndzi su duku. 19Aghəla nda antə mdə namtə sur hartə tent ni ka kəsəm gam tatari mamza, ka namtə sur hartari na aɓəlaɓəla ka kəsəmayeri na ɓɗaku.

20Aghəla nda antə mdə namtə katako ar udzəm akashiya aka Tent ni ka ncigəmta ɗa. 21Saɓəlkura kəlara udzəm an dzartsi kuma, ka bitkurari dzartsi pal ka reta. 22Tsuwa mdə namtə kəlara udzəm ni ka thlidlingər ɗa ret ka nvwani, kamnyar deltə ɗa. Apani antə mdə hara ka shanga udzəmayeri ar Tent ni. 23Nggədza laku tə mdə nam udzəmayeri ar Tent ni akwa, mdə namtə udzəm sərkumari kamnyar bwar anəm ar Tent ni, 24ka namtə sur kəsi səla ɗa akwa di nfwarkumari ka adzərfa, kəlara pal ka kurni, kamnyar ka mdə sə vətə udzəmayeri na sərkumari ni. Antə mdə ku hangkir sur kəsi səla udzəm ni suɗsuɗa akira kəlara udzəm kamnyar rwati udzəm ni. 25Mdə ku namtə udzəmayeri sərkumari akwa bwar yala ar Tent ni, 26ka sur kəsi səla udzəmayeri ni nfwarkumari tə mdə nam ka adzərfa, suɗsuɗa akira kəlara udzəm ni. 27Tsuwa mdə ku namtə udzəmayeri ngkwa kamnyar bwahila Tent na awul bwar ramta, 28ka namtə udzəmayeri suɗa akwa kuɗəmayeri na abwahili ar tent ni. 29Udzəmər kuɗəma nayeri ni mdə paktə kəra ɗa ata kəma duku akwa vəi lenduwa na ntangkəma ni, amma akwa kira ɗa da ndəkndəkari. Antə mdə ku hara aka udzəm kuɗəma na dukwari ni tsu apani. 30Mdə ku namtə udzəmayeri ncisu ka sur kəsi səla ɗa kumnya ngkwa ar adzərfa, suɗsuɗa akira kəlara udzəm.

31Mdə ku namtə zwalər kadləngkər kumnya ntəfu ka udzəm akashiya, zwalayeri na ntəfu kamnyar udzəmayeri na akwa thlimbəla Tent na pal, 32ka zwalayeri ntəfu tsuwa kamnyar udzəmayeri na akwa thlimbəla na palari. Tsuwa mdə namtə zwalayeri ntəfu kamnyar udzəmayeri tə mdə pwi abwahila Tent ni awul bwar ramta. 33Antə zwal kadləngkər na akwa daɓwa udzəmayeri ni, baɗita ata mnya Tent na abwa ni ka mwanta adzə mnyari na abwa nda. 34Tsuwa mdə ku hartə dza udzəmayeri ni ka dinar, ka namta ala ɗa lənduwayeri ar dinar natə zwalayeri ni ata təramta akwa. Tsuwa mdə hartə dza zwalayeri ni ka dinar. 35Antə mdə namtə lapəli na ola ka puwa lipəla, ka kalar yar ndləngi həng'ha, ka puwa mamza, ka puwar nggira ar lilin na ɓɗaku, ka dəɓata ka dludzər kerubayeri. Mji na masəku an hara kəthlər ngəni. 36Antə mdə hahəi lapəli ni ata zhimbwalayeri ngəni nfwar ar udzəm akashiya, natə mdə hartə dza ɗa ka dinar ni, zhimbwalayeri na ka liyayeri ar hatə su tə mdə nam ka dinar ni. Tsuwa mdə namta ala ɗa sur kəsi səla ɗa nfwar ka adzərfa. 37Tsuwa mdə ku namtə lapəliyir nyarmbwar ləkwa Tent ni ka puwa lipəla, ka na kalar yar ndləngi həng'ha, ka puwa mamza, puwar nggira ar lilin na ɓɗaku. Mdə dəɓatə lapəli ni ka ndəɓur tsi. 38Tsuwa mdə ku namta alari zhimbwalayeri ntəfu ka liyayeri ar hatə ɗa, ka hartə kəra ɗa kəga zwalayeri arɗa ni ka dinar. Amma vəi kəsi səla ɗa na ntəfu ni mdə nam ɗa ka əmza.

Currently Selected:

Səɓəlari 36: KNB

Highlight

Copy

Compare