Səɓəlari 37

Mdə Ku Namtə Akwati Alkawal

(Səɓ 25:10-22)

1Antə Bezalel ku namta akwati ka udzəm akashiya. Saɓəlkurari dzartsi suɗa ka reta, baukurari dzartsi pal ka reta, nalkurari dzartsi pal ka reta. 2Tsa fəi dzari na avivi japu ka na aɓəlaɓəla ka dinar shini, ka dəɓatə mnyari ka dinar. 3Tsa namtə lenduwar dinar nfwar, ka puta ata səlayerari na nfwar ni, lenduwa suɗsuɗa ata kəlara thlimbəlari, na abwani ka na abwanda. 4Tsuwa tsa ku namtə zwalayeri ka udzəm akashiya ka hartə ɗa ka dinar, 5ka hagau zwalayeri ni akwa lenduwayeri na ata thlimbəla akwati ni kamnyar kəlari. 6Antə tsa namtə sur hartə kərari, natə tsa an vəi kələmta watsəɓər biku ni, ka dinar shini. Saɓəlkurari dzartsi suɗa ka reta, baukurari dzartsi pal ka reta. 7Tsa namtə dludzər kerubayeri suɗa ka dinar tə mdə ɓdlətə ni, pal pal ata thlimbəlayerari na suɗə ni. 8Antə tsa namtə dludzər kerub pal ata thlimbəlari pal, ka damwa pal ata thlimbəlari na dukwari. Tsa namtə ɗa pakpakari ka sur hartə kəra akwati ni. 9Antə kəma kerubayeri ni akwa wuldzi, akwa wul sur hartə kəra akwati ni, ka ɓəɓəka ɗa kəlarkəlarari amta akwa hamta shanggur aka sur hartə kəra akwati ni, natə tsa an vəi kələmta watsəɓər biku ni.

Mdə Ku Namtə Tebər Ar Vəi Buradi

(Səɓ 25:23-30)

10Antə Bezalel ku namtə tebər ka udzəm akashiya. Saɓəlkura tebər ni dzartsi suɗa, baukurari dzartsi pal, nalkurari dzartsi pal ka reta. 11Antə tsa hartə dzari ka dinar shini, ka dəɓatə tengari shang ka dinar. 12Antə tsa namtə udzəm ar kalaktə tenga tebər ni, baukurari apa mandaɓar tsi pal, ka dəɓatə tengari ka dinar. 13Tsa namtə lenduwayeri nfwar ka dinar, ka putə ɗa akwa kuɗəmayeri ar tebər ni, akwa vəi tə səlayerari na nfwar ni ata. 14Lenduwayeri na kəsi zwalər kəl tebər ni, tsa pwi ɗa kudzəhə ka zwal udzəm tebər ni. 15Tsa nam zwalayeri ar kəl tebər ni ka udzəm akashiya, ka hartə dza ɗa ka dinar. 16Tsuwa ka dinar shini antə tsa namtə parantiyayeri, ka tasayeri ar mba tulari ɗuza, ka tasayeri na ol'ola, kəga samtalayeri kamnyar ɗamta saɗakar sur sa.

Zwalər Putə Pitəlayeri.

(Səɓ 25:31-40)

17Antə Bezalel ku namtə zwalər kəsi pitəlayeri ni ka dinar shini. Tsuwa tsa namtə zwal ni, ka kirari ni, ka kapayeri tə mdə nam akwa dludzər pukdlər almon ni, ata kəma duku ka thləma pukdlə ni, ka ɗəɗarni, shang tə da ndzi ata kəma duku. 18Tsa namtə zwalər kəsi pitəlayeri ni tə tsa ndzi ka tsiyayerari ngkwa, tsiyayerari makər ata thlimbəlari na abwani, tsiyayerari makər ata thlimbəlari na abwanda. 19Tsuwa kəlara tsiya zwalər kəsi pitəlayeri ni ka kapayeri makər tə mdə namtə pukdlər almon, japu ka thləma pukdlə ni ka ɗəɗarni. 20Ata dza zwalər kəsi pitəlayeri ka kərni, tsa namtə kapayeri nfwar na dludzə ka pukdlər almon, japu ka thləma pukdlə ni kəga ɗəɗarni. 21Tsa namtə pukdlə na haɗa səɓəla pal akwa kira kəlara tsiya zwal ni suɗa, antə da ku ndzi makər akira tsiyayerari na ngkwa ni. 22Antə pukdlə na haɗa ɗəɗa ni, ka tsiyayerari ni, ka zwalər kəsi pitəlayeri ni, tsa ɓdlətə ɗa ka dinar shini tə ndzi shang su duku. 23Tsa namtə pitəlayeri murfa kamnyar zwalər kəsi pitəlayeri ni, ka məksa, ka parantiyayeri na ol'ola, shang ka dinar shini. 24Tsa namtə zwalər kəsi pitəlayeri ni, ka kariyayerari shang ka dinar shini, natə kəgəɓkurari ku mwantə kilogram makkumari ka ntəfu.

Mdə Ku Namtə Bagaɗi Mba tulari ɗuza

25Antə Bezalel ku namtə bagaɗi ar mba tulari ɗuza ka udzəm akashiya. Saɓəlkurari dzartsi pal, baukurari dzartsi pal, watau saɓəlkurari ka baukurari shang kalkal. Nalkurari tsuwa dzartsi suɗa. Tsuwa akwa shanga kuɗəmayeri nfwar ar bagaɗi ni tsa ku namtə təmbəl na pakpakari ka bagaɗi ni. 26Tsa hartə dza bagaɗi ni, ka kərari, ka thlimbəlayerari, ka təmbəlayerari shang dinar shini, ka dəɓatə tengari shang ka dinar. 27Antə tsa namtə lenduwayeri suɗa ka dinar, ka dləɓtə ɗa aghəya tenga thlimbəlayerari na suɗə ni, tə da akwa wuldzi. Lenduwayeri ni an ata kəsi zwalayeri ar kəl bagaɗi ni. 28Tsuwa zwalayeri ngəni ni tsa nam ɗa ka udzəm akashiya, ka hartə dza ɗa ka dinar.

29Antə tsa namtə mal ar hamta mda aka Hyel na ɓɗakkarkara, ka tsuwa tulari ɗuza na kiskisu ka duna natə mdə namtə ni akwa laku mdər nam tulari ana hara.

Currently Selected:

Səɓəlari 37: KNB

Highlight

Copy

Compare