Səɓəlari 35

Tsawayeri Ar Vir Ghərəmtaghəra

1Musa ku tsaptə shanga mjir Israila ata kəma duku, ka pəla ala ɗa, “Nayeri ni an suayeri tə MTHLAKU ku tsawa ala giri ka giri hara. 2Ka mdə hara kəthlər akwa virayeri na ngkwa ni, amma vir na murfəkur an Vir Ghərəmtaghəra na ola, vir tə mdə ku namtə ni ɓɗakkarkara aka MTHLAKU. Antə kəlara mdə na ku hara kəthlər vir nda, mda ata tsi ni. 3Giri aɗiya mba u'u akwa kəyayeri ar giri Vir Ghərəmtaghəra wa.”

Suayeri Tə Ka Mji Hamta Kamnyar Tentər MTHLAKU

(Səɓ 25:1-9; 39:32-43)

4Antə Musa pəla aka shanga mjir Israila abbər, “Ngəni an su tə MTHLAKU ku tsawa. 5Ka giri kəɓəla su laga akwa nca su na akəla giri, ka giri hamta aka MTHLAKU. Ka kəlara mdə səntə sur hamta natə tsa an hir ka thlamta akwa ɗəffari, wala dinar, wala adzərfa, wala əmza, 6wala puwa na lipəla, wala na kalar yar ndləngi həng'ha, wala na mamza, wala lilin na ɓɗak laga, wala shishir kwi, 7wala kəsəm gam natə mdə putə ni mamza, wala udzəm akashiya, 8wala mal zaitun kamnyar pitəlayeri, wala yaji kamnyar mal ar hamta mda aka Hyel, wala tulari ɗuza na ka shiwurari msəra, 9wala pelayeri ar oniks, wala pelayeri damwa na ka daraja, natə mda ata mzhi patari ata efod ka ata zhaɓər dlipwayeri ar kərathlu.”

10“Ka shanga mji na akwa nca giri na masəku akwa kəthlər ar tsi si ka da hara shanga su tə MTHLAKU ku tsawa abbər ka mdə hara. 11Watau ka da hara kəthlər ar tentər vəngkər səli ni, ka sur hartə kərari, ka liyayeri ar hatə su, ka udzəmayeri ar nyarmbwari, ka udzəmayeri ar kadləngkər, ka zhimbwalayerari, ka sur kəsi səlayerari akwa di, 12ka Akwati Alkawal ka zwalayerari, ka sur hartə mnyari, natə tsa an vəi kələmta watsəɓər biku, ka lapəliyari ar nyarmbwayerari, 13Ka tebər ka zwalayerari, ka shanga kariyayerari, ka Buradi ar vəi Akəmi, 14ka zwalər kəsi pitəlayeri kamnyar hamta parakəu, ka kariyayerari, ka pitəlayerari, ka malər pu pitəlayeri ni, 15ka bagaɗi ar mba tulari ɗuza ka zwalayerari, ka mal ar hamta mda aka Hyel, ka tulari ɗuza na msəra, ka lapəliyir nyarmbwar ləkwa tent ni, 16ka bagaɗi ar hamta saɗaka mbamba, ka rariyar əmza na akwa kutari, ka zwalayerari, ka kariyayerari shang, ka tasa na ola ka sur vətari, 17ka lapəliyayeri ar kalaktə bəbal ni, ka zhimbwalayerari, ka sur kəsi səla ɗa, ka lapəliyir nyarfur ləvəi akwa bəbalər tent ni, 18ka makukwayeri ar nci tent ni, ka makukwar kəla bəbalər tent, ka səwayeri, arɗa, 19ka ləptayeri tə mdə tsatə ɓɗaku laga kamnyar kəthlər akwa Vəi na Ɓɗakkarkara, ka ləptayeri na ɓɗakkarkara aka prist Haruna, ka ləptayeri aka maɗashilərni kamnyar hara kəthlər pristkur.”

Mji Ku Səntə Sur Hamta Arɗa

20Antə shanga mjir Israila ku təra kazhar Musa. 21Antə shanga mji natə ɗəffa ɗa ku hir ala ɗa, ka mji tə mambələr Hyel ku tsəkwar ɗəffa ɗa, ku ngka ka səntə sur hamta arɗa aka MTHLAKU, kamnyar ka mdə kəthlər kəgari akwa tentər vəngkər səli ni, ka shanga kəthlərayeri na akwa, kəga ləptayeri na ɓɗakkarkara. 22Antə mji shili ka mwanki natə ɗəffa ɗa ku hir ala ɗa, ku ləkəma ka səntə sur hamta arɗa na ar sur dəɓa tə mdə nam ka dinar aka MTHLAKU. Da hamta pinayeri, kəga surthləmayeri, kəga lenduwayeri ar kuleng tsi, kəga gənar wulya, ka kari dəɓayeri zumzum natə mdə hara ka dinar. 23Shanga mji na ka zhaɓi na kalar lipəla, wala kalar yar ndləngi həng'ha, wala puwa mamza, wala lilin na ɓɗaku, wala shishir kwi, wala kəsəm gamayeri natə mdə namtə ɓɗaku, wala kəsəm kwi na ɓɗaku ku səntə ɗa. 24Shanga mji na ku mzhi hamta sur hamta ar adzərfa wala əmza, ku səntə ka hamta aka MTHLAKU. Shanga mji na ka udzəm akashiya na ata mzhi kuri wujir akwa kəthlər ni ku sənta. 25Shanga mwanki na masəkur shə puwa ka tsi, ku səntə puwa tə da sha, na ka kalar lipəla, ka na kalar yar ndləngi həng'ha, da puwa mamza, ka lilin na ɓɗaku. 26Tsuwa shanga mwanki natə ndər ni ku tsəkwar ɗəffa ɗa, mwanki na masəkur shə puwa ka shishir kwi, ku namtə puwa ka shishir kwi. 27Antə mji ol'ola ata kəra ɗa ku səntə pelayeri ar oniks ka pelayeri damwa na ka daraja kamnyar ka mdə putə efod ka zhaɓər dlipwayeri ar kərathlu ni. 28Tsuwa da ku səntə kari yaji, ka mal zaitun kamnyar pitəla, ka mal ar hamta mda aka Hyel, ka tulari ɗuza na msəra. 29Shanga mjir Israila shili ka mwanki natə ndər ni ku tsəkwar ɗəffa ɗa ku səntə su na ata dlara akwa hara kəthlər natə MTHLAKU ku tsawa aka Musa ka tsa hara ni. Da ku səntə sur hamta arɗa na ar hirər ɗəffu aka MTHLAKU.

Mji Na Ata Nam Tentər MTHLAKU

(Səɓ 31:1-11)

30Antə Musa pəla aka mjir Israila, “Nggədza, MTHLAKU ku carɓəla Bezalel na ɓzər Uri kəkar Hur na akwa nyarmbwar Yahuda. 31Hyel ku nghyantə ni ka mambələrni, ka masəkukur, ka na alari kər, ka sənda akwa shanga jili kəthlərayeri tə mda ana hara ka tsi, 32kamnyar ka tsa mzhi namtə ɗahayeri na ɓɗakɓɗaku, ka mzhi namtə su ka dinar, ka adzərfa, ka tsuwa ka əmza, 33tsuwa ka tsa mzhi marəmta pelayeri ka patə ɗa, ka marəmta udzəm, ka hara shanga jili kəthlərayeri ar masəkukur. 34MTHLAKU ku hamta aka Bezalel ka Oholiyab na ɓzər Ahisamak na akwa nyarmbwar Dan ɗəɗukur ar thlipə su aka mji damwa. 35MTHLAKU ku nghyantə ɗa ka səndər nam kəlara su ka tsi, apa kəthlər ɗaha, ka marəmta su, ka ndəɓur tsi ar dəɓa ka puwa lipəla, ka na kalar yar ndləngi həng'ha, ka puwa mamza, ka lilin na ɓɗaku. Antə da ku ndzi masəku akwa hara kəlara kəthlər tə mda ana hara ka tsi.”

Currently Selected:

Səɓəlari 35: KNB

Highlight

Copy

Compare