Səɓəlari 34

Allowayeri Na Bilən Ar Pela

(Z. Sha 10:1-5)

1Antə MTHLAKU pəla aka Musa, “Marəmta allowayeri suɗa ar pela apa na ntangkəma nda, antə I ata rəbutə ndərayeri na ata na ntangkəma tə gə jaɓumta ni. 2Ɗəmhədzi, ma ɗəɗəpə mbing ka gə lətə Gar Sinai, ka gə səktə ra amta ata kəra gar ni. 3Mdə damwa aɗiya nu ngə wa, tsuwa mda aɗiya wutə mdə damwa akwa kəlara vəi na ata gar ni wa. Tsuwa mda aɗiya zhar təma wala thla ka da ɓəla kudzəhə ka gar ni wa.” 4Antə Musa ku marəmta allowayeri ar pela suɗa kalkal apa na ntangkəma nda, ka thlatə ɗəɗəpə mbing, ka ndlətə Gar Sinai ni ka allowayeri ni akwa tsiyari, kalkal apatə MTHLAKU ku tsawa alari.

MTHLAKU Ku Ncantə Kərni Aka Musa

5Antə MTHLAKU ku səghəi akwa dlamba na kəkəsu, ka thləthlata anda adzə Musa, ka psəmnya thləmari na MTHLAKU ni. 6Antə MTHLAKU ku təramta kəma Musa akwa psəmnya abbər,

“I an MTHLAKU, I an MTHLAKU!

Hyel na ka kətadza, ka ɓɗakkur,

natə ɗəffari aɗi ana ɓzə taktar wa,

na ka hirkur na ana palidzə wa hang,

tsuwa na ka jirkur,

7na ana kəsi alkawalər hirkur na ana palidzi wa,

aka mjirni har ka mwanta akwa zaman dəpu dəpu,

na ana yafitə ɗimikur, ka bikər mulmulkur,

ka kəlara jili biku madi.

Amma wala apani aɗi mdər ndzi kula ɗi mdər biku wa,

tsa ana ɗi maɗankyar kamnyar bikər baba' ɗa,

har ka mwanta akwa zaman na makərkur ka na nfwarkur.”

8Təkəma antə Musa zuzuri ka kəmari ata di ka vəngkər səli aka MTHLAKU. 9Tə tsa pəla, “MTHLAKU ma abbər jiri I ku wutə mdəkur ata nca ga, I akwa kiɗə nga ka gə mwa ata kəma duku ka yeru. Wala tə mji ngəni ka kəra ɗa ɓəɓal, I akwa kiɗə nga ka gə yafitə ɗimikur yeru ka bikər yeru, ka gə dlu yeru apa mji na ar nga.”

Mdə Ku Jaktə Kətə Alkawal

(Səɓ 23:14-19; Z. Sha 7:1-5; 16:1-17)

10Antə MTHLAKU pəla aka Musa, “Nggədza I akwa bara mbwi alkawal ka shanga giri na mjir Israila. Ata nca shanga mjir nga antə I ata hara surndatayeri laga natə mda aɗi ɗar harari akwa tsəɗi laga akwa duniya ni wa. Antə shanga durayeri na kalaktə giri ata wutə dunar kuthlikur arna, I na MTHLAKU, kamnyar su tə I ata harari akwa nca giri an su na ata thlivərantə mda. 11Ar nga, ka gə ɓəlatə shanga tsawayeri tə I hamta ala ga ashina. Antə I ata kədləɓəla mjir Amor, ka mjir Kanana, ka mjir Hitti, ka mjir Perizzi, ka mjir Hivi, ka mjir Yebusi, kazhar kəma ga. 12Ka gə vədzə hangkala ga aka su ngəni, ga aɗiya hir mbwi alkawal ka mjir tsəɗi tə ga ata mwari akwa ni wa, ta asə ndzi abbər da nggəi ala gə dərku. 13Ata vəya ndaga, ka gə huzamta bagaɗi saɗakayeri arɗa, ka gə pukthləmta shanggamayeri, ka tadərəmta haptayeri ar Ashera. 14Ga aɗiya vəngkər səli aka haptu wa, tar ali I shira, kamnyar I an Hyel na ana bara hirkur na swakti akəla mda, thləmi an Mdər Bara Hirkur Swakti. 15Ga aɗiya mbwi alkawal ka mjir tsəɗi ni wa, kamnyar ma akwa sakatə da akwa hara karwakur aka haptayeri arɗa akwa vəi haptu, wala akwa sakar hamta saɗakayeri aka haptayeri ni, nuhum mdə laga akwa nca ɗa asə kəga nga, ka gə səm susəmər saɗakar ɗa ni. 16Kamnyar ma ga ku mbwi alkawal ka da, ta nuhum ga asə kəl maɗankwiyir ɗa aka maɗashilər nga, tə ma sakatə maɗankwiyir ɗa ni akwa hara karwakur aka haptayeri ni, da asə vu ka maɗashilər ngə ni hara karwakur aka haptayeri arɗa ni.”

17“Ga aɗiya fatəɓəla liya ka da ndzi haptu wa.”

18“Ka gə ɓəla sakar Kucali ar Buradi Na Kula Yist. Ga ata hara vir murfa akwa kwasə buradi na kula yist apatə I ku tsawa ala ga, kalkal akwa sakatə vəi ala ga akwa thliyar Abib kəlara məva, kamnyar akwa thliyar Abib antə gə səɓəla akwa Masar.”

19“Kəlara ɓzər sal na yarakəma an arna. Shanga yarakəma na salari, wala ar thla wala ar təma ata ndzi ali. 20Ga ata mzhi pəli mpika yarakəmar ɓzər kwara akəla MTHLAKU atar palɓəla ni ka ɓzər gam. Ma ga aɗi ata paltari ka ɓzər gam wa, ka gə ɓəli wulyari. Ga ata mzhi pəli mpika kəlara ɓzər sal na yarakəmar nga.”

“Mda aɗiya si akəmi kula su akwa tsiyari wa.”

21“Ka gə hara kəthlər akwa kuta vir ngkwa, amma akwa vir na murfəkur ka gə ghərəmtaghəra, wala an akwa sakar tsuhwa, wala sakar səvi ka sur faku, ka gə ghərəmtaghəra.”

22“Ka gə ɓəlatə sakar Kucalər Sati, watau kucalər vəngkər səli na ar baɗitər thla alkama na ng'hə ntangkəma. Tsuwa ka gə ɓəlatə Kucalər kuri Tsaptə Sur Faku na akwa kurər məva.”

23“Ka makər akwa kuta məva pal antə ka mji shilər giri si akəmi, I na MTHLAKU na ka Duna ta Shang, Hyelər Israila. 24I ata kədləɓəla shanga durayeri na akwa tsəɗi ni kəmata ga asi akwa tsəɗi ni, kəi jakəngkər olkur tsəɗi ni ala ga. Wala akwa sakayeri tə ga ata ndləɓəla ka makər akwa məva pal ka si akəmi, I na MTHLAKU na Hyelər nga, mda aɗi na ata tsəkwar tsəɗiyir ngə wa.”

25“Ga aɗiya hamta ali saɗakar mamshi ata kəma duku ka su na ka yist wa. Tsuwa ga aɗiya vəi kumər saɗakar vir Kucalər Fəlɓəla Kəi, ka tsa pi har ka vir kura alari wa.”

26“Kəlara məva, ka gə səntə yarakəmar sur fakayeri ar nga na ɓɗakta shang, akwa mbwar MTHLAKU na Hyelər nga.”

“Ga aɗiya ɓwa ɓzər kwi akwa uwar mama'ni wa.”

27Antə MTHLAKU pəla aka Musa, “Rəbutə shanga ndərayeri ngəni. Kamnyar ata kəra ndərayeri ngəni antə I mbwi kalkal ka ga, ka tsuwa mjir Israila.” 28Antə Musa ku ndzi ata vəi duku ka MTHLAKU pci ka viri ar vir nfwarkumari, kula səm susəm wala sa yimi. Akwa saka ngəni antə tsa rəbutə ndərayeri ar alkawal ni, watau Tsawayeri na Kuma ni, ata allowayeri ni.

Kəma Musa Ku Mbəlmbəla

29Sakatə Musa ku səghəi ata Gar Sinai ka allowayeri ar alkawal akwa tsiyari ni, tsa aɗi sənda abbər kəmari akwa mbəlmbəla kamnyar gariyirni ka MTHLAKU ni wa. 30Sakatə Haruna ka shanga mjir Israila ku wul kəma Musa, ka wuta abbər kəmari akwa mbəlmbəla, antə da ku thlivər mwari kudzəhə ka tsa. 31Amma Musa ku kəga ɗa, antə Haruna kəga mji ol'olər Israila ku mwari adzə ni. Antə Musa ku gari ala ɗa. 32Aghəla nda, antə shanga mjir Israila ku si adzə ni. Antə Musa ku zwarəngkər shanga tsawayeri tə MTHLAKU hamta alari ata Gar Sinai ni. 33Sakatə Musa ku kuri shanga gari kəga da antə tsa hartə kəmari ka zhaɓi. 34Amma kəlara sakatə tsa mwari akəma MTHLAKU akwa tentər vəngkər səli kamnyar gari aka MTHLAKU, tsa ana famta zhaɓi ni. Ma sakatə tsa ku səɓəla kamnyar pəla aka mjir Israila shanga tsawayeri tə MTHLAKU ku hamta alari, 35mjir Israila ana wutə kəma Musa akwa mbəlmbəla. Aghəla nda antə Musa ata jaktə hartə kəmari ka zhaɓi, tar ma sakatə tsa ata jaktə mwari ra gari aka MTHLAKU.

Currently Selected:

Səɓəlari 34: KNB

Highlight

Copy

Compare