Səɓəlari 33

MTHLAKU Pəla Ka Mjir Israila Zhar Sinai

1Antə MTHLAKU pəla aka Musa, “Thlatə kazhar vəi ngəni, ga kəga mji tə gə fwaɓəla akwa Masar, ka giri mwari akwa vəi tə I hara alkawal aka Ibrahim, ka Ishaku, ka Yakub abbər, ‘I ata hamta tsəɗi aka kəkayeri ar giri.’ 2I ata thlentə mdərthlentərna ka tsa pwar nga, tsuwa I ata kədləmta mjir Kanana, ka mjir Amor, ka mjir Hitti, ka mjir Perizzi, ka mjir Hivi, ka mjir Yebusi. 3Mwari akwa tsəɗi na ɓɗaku, na ata ya su. Amma arna I aɗi ata mwari ata kəma duku kəga giri wa, kamnyar giri mji na ka kəra giri ɓəɓal, kamnyar ta I asə kurəmta giri akwa laku.”

4Sakatə mji ni ku nggatə labar ngəni msəra wa ni, antə da ləkwa ɗəm dəma, da aɗi jaktə hatə kari dəɓar ɗa kəra wa. 5Kamnyar MTHLAKU ku tsawa aka Musa ka tsa pəla aka mjir Israila abbər, “Giri mji na ka kəra giri ɓəɓal. Antə ma I ata mwa kəga giri, I ata kurəmta giri kulikulini. Antə kulini fəi gir kari dəɓar giri, kamnyar kəi səndə su tə I ata hara ala giri.” 6Antə mjir Israila fəi kari dəɓar ɗa təng tə da zhar Gar Horeb har ka ləkəma.

Tentər Kəɓar Mjir Israila Ka MTHLAKU

7Musa ana kətə tent natə mda ana kəga Tentər Kəɓa ka nci ni ciju aɓəla vəi fəliyir ɗa. Antə kəlara mdə na akwa bara səndə su na akwa ɗəffa MTHLAKU, tsa ata mwari akwa Tentər Kəɓa na aɓəla vəi fəliyir ɗa ni. 8Kəlara sakatə Musa ku mwari akwa tent ni, shanga mji ana thlatə ka thləthlata anyarmbwar tentər ɗa, ka da wul Musa, tar ma tsa ku ləkwa tent ni. 9Ma sakatə Musa ku ləkwa tent ni, dlamba na kəkəsu ana səghəi ka thləthlata anyarmbwar tent ni, antə MTHLAKU ata gari ka Musa akwa dlamba ni. 10Ma sakatə mji ku wutə dlamba ngəni kəkəsu ku thləlidzi anyarmbwar Tent ni, kəlara mda ata thlatə ka zuzuri anyarmbwar tentərni. 11Antə MTHLAKU ana gari aka Musa nca ka nca tsu apa tə mda ana gari ka pazhirni. Antə Musa ku ngka akwa vəi fəli ni. Amma Joshuwa na ɓzər Nun, ɓzərdakwi na ana dlar Musa ni, aɗi ləɓəla akwa tent ni wa.

Musa Ku Jaktə Hara Adduwa

12Musa ku pəla aka MTHLAKU, “Nggədza ga ku pəla ali abbər, kəi pwar mji nayeri ni, amma ga aɗi pəla ali mdə tə yeru ata təra ka tsa wa, wala tə ga ku pəla ali abbər ga səndə thləmi, ka wutə mdəkur ata nca ga. 13Kulini I akwa kiɗə nga, ma I an wutə mdəkur ata nca ga, ka gə ncanta ali lakwayeri ar nga kəi sənda, tsuwa kəi ləkəma ka wutə mdəkur ata nca ga. Ka gə ɗangta abbər mji nayeri ni mjir nga.” 14Antə MTHLAKU shinau alari abbər, “I ata ndzi adzə nga kəi na ala gə ghərəmtaghəra.” 15Antə Musa pəla alari, “Ma ga aɗi ata mwa ata kəma duku ka yeru wa, ga aɗiya famta yeru kazhar vəi ngəni wa. 16Kamnyar apa madi tə mda ata sənda abbər I kəga mjir nga ku wutə mdəkur ata nca gə ri? Ai tar ma mburu təra ata kəma duku kəga ga. Ma apani wa apa madi tə mda ata mzhi nggaɓəla abbər yeru kəga mjir nga an zum ta shanga mjir duniya ri?”

17Antə MTHLAKU pəla aka Musa, “I ata harari kalkal apatə ga ku kiɗa, kamnyar I asəndə nga cau, tsuwa I ku nggatə msərakur nga.”

Musa Ku Kiɗa Ka Tsa Wutə Səliyir Hyel

18Antə Musa pəla, “I akwa kiɗə nga, ka gə ncanta ali parakər səliyir nga.”

19Antə MTHLAKU pəla alari, “I ata hara ka shanga səliyir ɓɗakkur arna təramta akəma ga, tsuwa I ata psəmnya thləmi na MTHLAKU ni akəma ga. Antə I ata hara ɓɗakkur aka kəlara mdə natə I hir kəi hara alari ɓɗakkur, Tsuwa I ata kətadzə kəlara mdə natə I hir kəi kətadzə ni. 20Amma ga aɗi ata mzhi wutə kəmi wa, kamnyar mda aɗi na ata wutə kəmi ka tsa ndzi ka mpikə wa. 21Amma nggədza vəi laga adzə ra natə ga ata mzhi thləthlata ata pela. 22Tsuwa ma sakatə parakər səliyirna akwa təramta, I ata ɗuwamta nga akwa daɓwa gagəma na ntaudzi ni, kəi hartə nga, har tar ma I ku təramta, 23kambəla I kələmta tsi. Antə ga ata wutə bwahili amma ga amzhi wutə kəmi wa.”

Currently Selected:

Səɓəlari 33: KNB

Highlight

Copy

Compare