Səɓəlari 2

Yaɓəladzər Musa

1Akwa saka na ndaga mdə laga aɗi akwa dur Lawi na ku kəl mwala akwa dur Lawi. 2Antə mwala ni ku kətə hur ka yaɓəla ɓzər sal. Sakatə tsa wuta abbər ɓzəngkyar ni dakwi, antə tsa ɗuwamta ni har thliya makər. 3Amma sakatə tsa wuta abbər tsa amzhi ɗuwamta ni avi kəra wa, antə tsa həntə thlambəl ka dzəɓta ka kwalta, ka kətə ɓzəngkyar ni ka peri ni akwa. Antə tsa kətə thlambəl na ka ɓzəngkyar ni ka ra vəyari akwa nca duwathlu ata mnya Thlyagha Nayil. 4Antə ngkwarma' ɓzər ni ku thləthlatə cijuwa akwa sək ka tsa wutə su na ata hara aka ɓzər ni.

5Aghəla nda təkəma təng ngkwar kuthli ləghəi ra pəra akwa mnya Thlyagha Nayil ni, ka ngkwarkəmayeri arni akwa mwa ata mnya thlyagha ni. Təng tsa wutə thlambəl ni akwa nca duwathlu, antə tsa thlentə pal akwa nca ngkwarkəmayeri ni ka tsa ra kətə ri. 6Sakatə kwatam ni kəlari, təng tsa wutə ɓzəngkyar an akwa tuwa akwa. Antə tsa kətadzə ni ka pəla, “Aiyi! Diya ngəni pal akwa nca maɗankyar mjir Ibrani.”

7Antə ngkwarma' ɓzər ni mwari adzə ngkwar kuthli ni kula shamta saka ka pəla alari, “Kəi mwar ra paktə ala gə mwala na ata mzhi kəlantə ala gə ɓzəngkyar ni akwa nca mwankir mjir Ibrani ya?”

8Antə ngkwar kuthli ni shinau alari ka pəla, “I, mwari!” Antə ngkwa ni ku mwari ka kəgatə mama' ɓzər maɓir ni. 9Antə ngkwar kuthli ni pəla alari, “Kətə ɓzər maɓir ngəni, kara kəlantə ni ali, antə I ata ntəmta nga.” Antə mwala ni kətə ɓzər maɓir ni ka kəlantə ni. 10Sakatə ɓzəngkyar ni ku kəla ka hara ola, antə mwala ni kətə ni ka mwanta aka ngkwar kuthli nda. Antə ɓzər ni ku ndzi ɓzərni. Antə tsa vətə thləmari Musa, kamnyar tsa pəla abbər, “I kəɓəla ni akwa yimi.”

Musa Ku Hwi Ləhar Midiyan

11Sakatə Musa ku kəla, antə vir laga tsa mwari adzə mjirni kamnyar ka tsa wutə laku tə da akwa ɗar bwani akwa hara kəthlər mafakur ni. Antə tsa wutə mdər Masar laga akwa dəka mdər Ibrani, na pal akwa nca maɗama'ni. 12Antə Musa shinardzi ka wuli su abwani ka abwanda. Sakatə tsa wuta abbər mda aɗi akwa wul ni wa, antə tsa tsi mdər Masar ni, ka ɗuwar mshiyirni akwa wuyaku. 13Səɓəla ɗəpari antə Musa jaktə ləɓəla ka wutə mjir Ibrani suɗa akwa mpa ka nvwa ni. Antə tsa pəla aka mdə na ka biku ni abbər, “Kamnyar mi tə ga akwa dəkə nvwa nga na mdər Ibrani ri?”

14Antə mdə ni shinau ka pəla, “Wan vətə nga ata olkur ka mdər hara shariya ata kəra yeru ri? Ga akwa bara tsi ra apatə gə tsi mdər Masar ni ya?”

Ndər ngəni ku thlivərantə Musa, tə tsa pəla akwa ɗəffari abbər, “Azha, mji ku səndə su tə I hara ni!” 15Sakatə kuthli nggatə ndər ngəni antə tsa bara ka tsa tsi Musa. Amma Musa ku hwi ka mwari akwa tsəɗi Midiyan.

Anda akwa tsəɗi Midiyan ni, vir laga sakatə Musa andzəndzi ata mnya jiɓa, 16təng tsa wutə maɗankwi laga murfa sə kə yimi akwa jiɓə ni, da an maɗa' prist ar Midiyan. Da si ka da ndəkərtsə yimi ka nghyantə vəi pwi yimər sar mwaɓi, kamnyar ka mwaɓiyir baba' ɗa sa. 17Amma təng mjir ɓəla laga ku si ka kədləmta maɗankwi ni. Amma Musa ku thlatə ka dlar maɗankwi ni, ka kətsə yimi aka mwaɓiyayeri ni tə da sa. 18Sakatə da ngka adzə baba' ɗa Reyuwel natə mda ana kəga thləmari abbər Yethro, antə tsa pəla ala ɗa, “Apa madi tə giri ngka ɗəm ashina ri?”

19Antə da pəla, “Mdər Masar laga an mbuli yeru akwa tsiya mjir ɓəla laga, har ma tsa ku ndəkərtsa ala yeru yimi, ka aka mwaɓiyayeri ar yeru.”

20Antə tsa pəla aka maɗa'ni ni, “Mdə ni ama ri? Kamnyar mi tə giri zhar ni anda ri? Mwar giri ra kəga ni ka tsa sə səm susəma.”

21Antə Musa ku kələngkər ka ndzəndzi ka mdə ni, antə aghəla nda Yethro ku nar ngkwarni Zippora aka Musa tə tsa kəla. 22Antə mwala ni ku yaɓəla alari ɓzər sal, tsa vətə thləmari Gershom, kamnyar tsa pəla, “I mətəpi akwa tsəɗiyir mji damwa.”

23Aghəla məvayeri laga hang antə kuthlir Masar nda ku si mti. Amma wala apani mjir Israila ku ləkəma ka tuwa ka nggyinggya kamnyar bwani ar mafakur tə da akwa. Da ku tuwa abbər ka Hyel dlar ɗa akwa jili bwani ngəni antə tuwar ɗa ku mwari akəma Hyel. 24Hyel ku nggatə nggyinggyir ɗa, antə tsa ɗangtə alkawal tə tsa hara aka Ibrahim ka aka Ishaku ka aka Yakub. 25Hyel ku wul laku tə mjir Israila akwa, ka damitədzi kamnyar ɗa.

Currently Selected:

Səɓəlari 2: KNB

Highlight

Copy

Compare